مساكم غشطه

اليوم رحت الدوام الساعه سبعه الصبح
حطيت تلاجة الشاي والقهوه وصحن الحلى فوق الطاوله ونمت

الساعه حدعش قمت بتشمس شوي
الا وفيه عامل جالس بظل جدار
موت حراره
جيته قلتله عندك شغل لانه لوحده
قال الساعه ثلاث العصر
قلت اجل تعال معي المكتب ع المكيف
والله ويجي كنه مستحي
بس قسم بالله انه ونيس
والله واقهويه واخليه يحلي ويعين من الله خير

عاد انا شبعان روقان

واسولف معه فقع بطني من الضحك

واصجه بسؤال ليتني ما سألته قلبت مواجعه

قلتله انت متزوج
وهو يصنف

الرجال شاف مني طيب وارتاحلي وبدى يفضفضلي

صرعني ضحك بقصة حبه

هو يسولفلي عن قصة حبه وانا القريحه الشعريه المكسورة كل ماله
تقرب تقرب
لين وصلت
قلت اجل اسمع
تعرف شعر .. قصيده
يالله وصلتها له
فرح .. قال تعرف تكتب
قلت شوي شوي

قلت اجل اسمع
لا تكلمني لين ماكلمك العب بجوالك لين ماخلص
قال تبغا موسيقى
مفلمين ههههه
فهمته ويالله فهم أني بكتب قصيده
على أساس انه انت اللي كتبتها

المهم واغتنم القريحه واكتب :

ياسالبا عقلي كفايه تنمرا
ارحمي قلبا جن فيك ولا اكتفى

عشقك فيني من الصبا قدهو نما
ياويل حالي كان ماصار اللقى

في مزرعة فلفل عشقتك يالمها
حراق حبك مثل هذي الفلفلى

أصبحت كني منقرص بعدك انا
غير اتلوى وانتظر وقت اللقى

باقي ثلاثه شهور واجيلك انا
فيني تعب سنتين من بعد وعنى

ضاقت عليا جميع أركان السما
شاعرك ياقلبي تبهذل وانكوى

والحين باقي شهور واجيلك انا
وأنسى جروحي كلها وقت اللقى

هاض الفؤاد وصاح شعري مزمجرا
ياسالبا عقلي مكانك في الحشى

وسلامتكم

المشكله مي هنا
المشكله شلون ازبطها بلغتهم
لان زوجته ماتعرف عربي

المهم حاولت اشرحله معنى .. قدهو وغيرها
هذي نكبتني

المهم قلتله عطني رقمك انا بحاول اخلي صاحبي الحلاق
يتكلم عربي كويس يزبطها لك

المهم الحمد لله رسمت البسمه بوجهه
وصلت البيت مالي نص ساعه تاركه الا وهو يدق

مافي ينسى يامدير

ذكرني موضوع إشراق اللي بالاسك

بواحد من الشباب
يوم راح لامه وابوه وقال بخطب
ويقول لامه ابيها حلوه وابيها كذا وكذا
يقول يوم خلصت مواصفات العروس
والتفت على ابوي
وهو مبتسم
قاله ابوه

ياوليدي عمرك شفت قرد يشتري ورد

المهم خوينا طلع من البيت وعلى سوريا

تدمرت نفسيته

النفسيه محتاجه ثنين كذابين

واحد يمدحك والثاني يقول ونعم

الفترات الزمنية باللغة ألعربيه

عقد : عشر سنين
جيل : أربعين سنه
قرن : مية سنه
مع بعض لآخر العمر : أسبوعين ونص

مسا الخير

ماينلام .. رحمته