سنين الحبّ


على جَفْن العيون .. وجور اهدابي
يبوح الليل .. بأسراب المجرّه !
يعيد الشوق .. عمُرٍ قد جرَى بي
بعكس الرّيح .. وانسام المسرّة
يجول الفَقْد .. وافقد به صُوابي
صويب الحبّ .. وايّام المضرّة
على انغامها .. نَوّخ ركابي
اسير اللي حصل .. بالعُمْر مرّه
واسير الوقت .. ووقفاته ببابي
تقول العين .. لذيذ الشوق حرّه !
يجرّ القلب .. ويفْضح ماخَفى بي
واخبّي عن .. ليالي الوَجْد جرّه !
حبيبي .. وإنْ تذكّرني وفآ بي
وتلقَى الهجْر .. في وصْفه مقرّه !
تذكرته .. على جرحٍ رسَى بي
يسيل الحبّ .. مكنونه ودُرّه
اطالع نجمه اللي .. قد سرَى بي
مابين افلاك .. احساسي وُبَرّه
لعلّ الغيم ينفث .. ما طرَى بي !
يزول الغيم .. وأزيد الحبّ كَرّه !
حبيبي وإنْ جِفَى ..صفْحة كتابي
اشوف الشّعر .. يتباهَى بِبِرّه
وُفَآ الابيات .. وإحساس التّغابي
يكون احيانْ .. لاجل شوقي يُمرّه !
صحيح إنّه .. يزايد من عذابي !!
صحيح إنّه .. على قلبي تشرّه !!
ولكنّ الاكيد إنّه .. بِقَى بي ..
سنين الحُب في حُلوَه ومُرّه ..!

إعداد / نبضي يخاويك