يهبلوا الاطفال وفرحهم بالعيد.....اجمل شيء في العيد هو الاطفال.....



.......

قالت خلاص انساني
قسمي لغيرك والكريم غناني
نزل دمعها

قالت عدي
ونا قلت سيورك ف يوم اتردي
وخليه بابنا مفتوح راك اتصدي
موحال نترك للعزول مكاني
وحتى انكانه وقتنا متردي
بأرواحنا انعيشوا على الاماني
ونا واخذه صوبك اليوم تحدي
يا ننتصر يا ينكسر ميزاني

قالت عيبه
انخونه ونبقى لك غلا وحبيبه
وخلاص كل حد فينا ايشوف نصيبه
وكيف ماتعاني ياحبيب انعاني
وماتذكرا الماضي وراك اتجيبه
لا عالورق حتى فضرب معاني
كيف ماعرفتك حر عندك هيبة
را الحر ماينزل الوطن الداني

قلت خلاص انسيني
عالذنب والخطا طالب الله يهديني
وينما لمست ايمينها بيميني
بلا رادتي ضميتها لاحضاني
نزل دمع متخزن اسنين فعيني
وفارقت هللي من زمان اكواني
يانويرتي ماعاد سمح ايجيني
ولا عاد راحه فها العمر الفاني

حتى كان ماجابك نصيبي
تبقى دوم يالغالي حبيبي

ماجابك رجايا
مش حندير لي حبك نهايه
لين انموت ويديروا عزايا

ماجابك حنيني
وشوقي ليك لا دمعات عيني
وحال القسم مابينك وبيني
وحتى كان ماتجبد سريبي
ولا انا نجيك لاتقدر تجيني
تبقى داي ودواي وطبيبي

ماجابك ملامي
وتحرم شبحتي ويحرم سلامي
يكفي كان ريتك في منامي
حتى حلم عني ماتغيب
ويكفي انقول حلوة يا احلامي
في اللي غايب ليا اتجيبي
حتى كان ماجابك نصيبي

العيد وجهك والفايزين عيوني
عسانا نعوده بضحكتك غانمين

ربي رحيم بنا أكثر من انفسنا هو يعرف الي يصلح لنا وكل شيء يصير معنا هو حكمه منه سبحانه.....حكم ربي نرضوا به والحمد لله


..........

بين الورق والبيرو
يسيل دمعنا ياصاحبي ونحيروا
تجي صورته ..بين الورق والبيرو

بين القلم والورقه
يجيني خياله يزيد شوقي يرقى
وارياف يكبر في القلب داير حرقه
وماعندنا من الشوق وين انطيروا
تجي صورته...بين الورق والبيرو

بين القلم والدفتر
تنزل الدمعه وين غالي يخطر
وجيوش ريافه في كنيني تحضر
امغير الدمع ماعندنا ما انديروا
بين الورق والبيرو
يسيل دمعنا ياصاحبي ونحيروا

مشكله المشاركه السابقه بندير فيها تعديل ماقدرت بنكتب يعلم كتبت يعرف... الله المستعان....لانه لايجوز قول يعرف لله بل الله يعلم سبحانه علام الغيوب



...........

هذه الدنيا مليانه قصص لما قريت هذه الكلمات حسيت الشاعر قاسي لكن لما قريتها مره ثانيه قلت ممكن هي الي طعناته وخلاته بهذه القسوة ..ولما قريتها أكثر تألمت لشاعر.....مش عارفه لكن حسيته يتألم......فضوليه وخاطري اعرف قصته

غلاك انتهى عندي خلاص انسيني
من البال شلتك من القليب وعيني

عيشي بعيدة عني
آخر كلام اليوم وصلك مني
لاتفكري فيا ولا تستني
ولا تذرفي دمعك ولا تلوميني

غلاك انتهى من بالي
ماتفكري في يوم تبقي حلالي
ومحال نتلفت ونرجع تالي
ولا نعودلك في يوم وانتي تريني

غلاك انتهى عندي خلاص انسيته
قرار من قلبي صحيح خذيته
كتاب المحبه والغرام طويته
واسمك محيته من ربيع اسنيني

غلاك انتهى وتواره
وحبك في قلبي طافيات انواره
ولو كان قلبك قال كل اعذاره
ماعاد نرضى نغمرك بحنيني

غلاك انتهى ودعته
وحبل المحبه بينا قطعته
وبصوت عالي للجميع سمعته
لاعاد نمشيلك ولا انتي تجيني

غلاك ذبلوا اوراقه
وماعاد عيني شوفتك مشتاقه
ولو كان تنزل دمعتك رقراقه
وتسيل كالوديان ماترضيني

غلاك انتهى وتبخر
نسيتك بسرعه اليوم ربي سخر
حالف يمين الله ماعاد انوخر
ولا نسير في طريقك ولا تلاقيني

غلاك انتهى ورحل
وماعاد عنده في القليب محل
ولو كان تشكي للعباد الكل
ماعاد نرجعلك ولا تشوفيني

دام الحياة ظروفها ترخي الروس
الموته اللي " ترفع الراس " متها