04-01-20, 12:56 AM
|
#1125 |
| آنثــى من عــالـــم الخيـــال | | | | | | | | | | | | | | | | الهوايه » السفر بين عالم المعرفه وروائع الطبيعه | | | | | | | | | | 
d تـــراتـيــــل مخمـليــــه ≃ التــرتيلـــه الـــ 31 ــــ ≃ كـذبــه آبـريــل c
بخصوص الآول من آبريل يوم الكذب العالمي ،،، انا بالعاده مابحب المقالب ولا بمزح مع حدا خارج نطاق اهلي ورفقاتي القراب ,,, بس (قبل كم سنين) وبهيدا اليوم كان عم يجيني رغبه كبيره وكنت بنشيء مقالب إبداعية مابيخطر ع بال حدا ،،، والمقالب كلياتن كانو بيمشو ع الناس ل 3 اسباب :-
الاول ... لاني انسانه كتير جدية ومنضبطه في عملي وكمان وقت كنت بالجامعه ، ف شي طبيعي بقا انو محدا بيتوقع انو المقالب بتصدر من هيك أشخاص .
التاني ... اتقان وابداع في صياغه المقالب وربطن بأحداث ووقائع يلي دايرين حوالين الأشخاص .
الثالث ... طريقه إلقاء المقالب ع الناس ومدى برائة وشي وثبات تصرفاتي ،،، لهيك مستحيل حدا كان يشك انو كلامي كان مقلب !!
الغريبه انو محدا قدر يمشي اي كذبه نيسان عليى او اي مقلب فيي ،،، والأغرب الاغلبيه كانو بيعرفو أنو الاول من ابريل ومع هيدا كان مقالبي بتمشي عليهن !!
وقت كنت بالجامعه عمولت مقالب ع (الطلاب ، المعيدين ، الاساتذه) بس بصراحه مااسترجيت اعمولن ع الدكاتره ,,, وكان اغلب مقالبي ،،، بقول للطلاب انو بيك او خيك ناطرك بالاستعلامات والمساكين دغري كانو بيطيرو من فرحتن ،،، او كنت ابعتن ع الكافيتيريا عاساس في اكلات جديده ،،، ومرات كنت ابعتن ع المكتبه بحجه انن يوزعو كتب جديده ,,, ومرات كنت ببعت 3 آصدقاء بذات الوقت كلحدا بميله آنو هني بدن يجتمعو ( حدا ع الحديقه , التاني ع الصف , والتالت ع المخبرات الرسم الهندسي) !!
المعيدين كنت ببعتن ع مختبرات بعض وللعلم مواقع مختبرات كليه الهندسه كانو كتير بعاد ع بعض ...
الاساتذه كنت برسلن للعماده انو العميد طلبن فورا ... (يعني معقوله بقا محدا منن قال : طب العميد اذا بدوياني لشو مابيتلفنلي لالي ؟!! ولشو باعتتك انتي !!!)
ومرتين عمولت مقلب في مصور الكليه المعتر وبعتتو ع الاقسام انو في حدث وتجمع وبدن مصور .
وبخصوص مقالبي في زملاء العمل وصديقاتي في الشغل ،،، مابضن بقي حدا وماعمولت فيه مقلب ،،،
وكانو المقالب متنوعين لانو العمل في المشاريع الهندسيه بيدور ع عده اصعده ،،، (الموقع ، المختبرات ، الاداره ، والدائره) ... ولكترتن هون بقا مفي مجال اذكرهن ،،، وعمولت مقالب في رؤساء الأقسام والمدراء انو اجتن إيفاد من أوروبا وإني عرفت بالخبريه بواسطه سكرتيره المحافظ يلي بتكون صديقتي .
وتسائبت مره بقا اني عمولت مقالب في اهلي واقاربنا وصديقاتي وزملاء الشغل بيوم واحد (تقريبا طلعو اكتر من 37 ضحيه)،،، ولما رجعت البيت تذكرت اني نسيت المدير (وهوى مهندس كبير وعندو خبره طويله في المشاريع والاداره ، وكتير بيقدر شغلي واشرافي )،،، فقلت لحالي والله مابخليك تزمط من مقالبي ،،، تلفنتلو وخبرتو عطيني بشاره انو سعر اتصالات الموبايل وصلت للثمن وصديقتي من شركه الاتصالات خبرتني ،،، والمسكين سدقني ومن فرحتو وعدني ببشاره ،،، وبعد 3 ساعات رجع تلفنلي وخبرني : انو فلس ع الاخر ورصيدو زيرو من ورا خبريتي الفاشله ،،، وهو تلفن لكل اقاربو ورفقاتو يلي كانو مستغربين من حنيه مديرنا المفاجيء {لانو طبعو جاف ومش من عوايدو يسأل عن الناس} وهوى عبالو الاتصال صار ثمن لحد ماخلصو رصيدو ورح شحن من جديد !! وانا خبرتو طب حضرتك نسيان اليوم شو ؟!! قام ضحك وقلي انتي عمولتي فيى مقلب محدا استرجى يعملو ، ماتخبري حدا وانا مرح اعاقبك !!
(وبالفعل انا مخبرت حدا بهالقصه غير زوار مدونتي الحلويين ,,, وآنتو كمان ماتخبرو حدا  ).
وصراحتا انا صرلي فتره بطلت وتركت هالمقالب يجوز من شي 6 سنين ،،، مبعرف بسبب النضج ولا لاني من الأساس مابحب المقالب ،،، ويجوز لاني حسيت بتأنيب ضمير تجاه هالناس مع انو كانو مقالبي عطول بريئه ومابيأذو ... ويجوز يكونو كل هولى الأسباب سوا !!
خاصتا انا بعرف حالي طيبه وحنونه وما بيلبقلي هالنوعيه من المزحات ، ولا اني كون شريره ولئيمه آبدا !!
✍....... a تـــاتــيـــانــــــا b  |
|
|
|
 |
8700Likes
