الحلقة : (1)
المشهد : (12)
المكان : صالة الانتظار بجوار مكتب الضبط والتحقيق/ ممر الجامعة المؤدي الى الساحة الخارجية.
الوقت : (مساء –4:30م - داخلي).

(بعد ان خرجت مها تجلس لتنتظر ان يتم التحقيق مع صديقتها رنيم ولكن خلود خرجت على المتواجدين وطلبت منهم ان يسجلوا افادتهم ويجيبوا على الاسئلة التي طلب رئيس التحقيق ان يقوموا بالاجابة عليها ثم قاموا بذلك وبدأوا بالانصراف وفي الممر بالجامعة)
- مها / (تمشي بخطا متسارعة وقد اتضح عليها التذمر مما حصل بشكل عام).
- رنيم/ (تحاول ان تبطئ من خطوات مها لتلتقط انفاسها) مها الله يخليك هدي السرعة خليني اقدر اخذ نفسي.
- مها / (تبطئ من مشيها قليلا وهي تنظر الى كل من يراها بنظرات غاضبة).
(تمر بجانبهما احدى صديقاتهما بالجامعة وتلقي التحية على مها).
مها / (لا تعيرها انتباهها وتغير وجهة نظرها الى اخرى فتقول في داخل نفسها " اقول اقلبي وجهك ماني ناقصتك").
رنيم / (تنظر الى مها وبعد ان انصرفت الفتاة) المخلوقة ترى مالها ذنب تسلم بس ردي السلام.
مها / (تتوقف عن المشي) رنيم ترى الي فيني مكفيني عن جد ابغا اصيح احس بنفجر.
(في اخر الممر وخلف مها ورنيم يمشي فيصل ونايف وهما يتوجهان الى مواقف السيارات)

الحلقة : (1)
المشهد : (13)
المكان : مواقف سيارات الجامعة.
الوقت : (مساء –5:00م - خارجي)

- ريهام / (تقف لتنتظر لوموزين ليقلها الى المنزل وكانت في حالة من اليأس والحزن والانفعال وترتدي نظارات سوداء ودموع بسيطة تنزل من تحت نظارتها فتسيل على وجنتها وصوت هاتفها يرن وتنظر فيكون الاتصال على شاشة الجوال "عمري" فلا تجيب)
(في احدى مواقف السيارات الجهة الاخرى)
- فيصل / (يشاهد مها ورنيم متوقفتان تنتظران فيحاول ان يتحدث معهما ويتجه نحوهما).
- نايف / (يتحدث باجوال مع ليان وكان يمشي خلف فيصل)
- فيصل / (يتوقف بجانب مها).
مها / (لا تلتفت عليه لانها لم تعتقد بانه فيصل).
رنيم / (تنتبه وتحرج قليلا).
فيصل / ( وكان يرتدي نظارته السوداء ويتقدم بشكل جاد) السلام عليكم.
مها / (تنظر اذ به فيصل فتستاء) نعم وعليكم السلام خير انتوا ما عندكم في هالجامعة غيري تلاحقونها وتتبلون عليها؟
فيصل / (يحرج قليلا ثم تتغير نظراته الى عدم الرضا من اسلوب مها) هالحين ابغا افهم انتي ليش من يوم شفتيني وانتي مسيئة الظن فيني؟
مها / (تلتف بشكل كامل لفيصل بشكل سريع) نعم نعم (وكأنها تقرب اذنها لضعف سمعها) شقلت سمعني كلامك مرة ثانيه؟ انتي من يوم شفتيني؟ اصلا ومن متى المعرفة الله يهديك .. يا اخي بالقوة تبغاني اعرفك؟
- نايف / (يتوقف عن الحديث مع ليان منذهلا من الموقف امامه الذي يمر به صديقه فيصل) لحظه حبي اكلمك بعد شوي.
- رنيم/ (تحرج من تصرف مها) اا .. معليش اخوي فيصل اعذرها هي تعبانه وارجوك لو تتكرم وتخلينا لوحدنا.
- فيصل / (احس بان هذه هي الفرصة الوحيدة لكي يقاتل من اجلها لانه منذ مدة طويلة يحاول ان يجد مدخلا للتحدث معها فلم يفضل أن يتنازل عن هذه الفرصة مهما كانت غير مواتية او مناسبة فيستجمع شجاعته ولكن بتوتر) انا كنت ابغا اطمن عليكم واشوف فيه احد بيوصلكم محتاجين شي حنا اليوم الي مريتوا فيه مرينا فيه.
- مها / يا سلام انتم رجال ما همكم البنت اهم شي عندها سمعتها (ثم تتنهت كمقدمة للبكاء).
-رنيم/ (تقترب من مها وتربت على كتفها بهدوء).
- فيصل / حلو والله والرجال ما عنده سمعه ولا مخلوق كذا يمشي ويخطي على الناس والناس تخطي عليه مو فارق معه شي.
- مها / (تتوقف عن التنهت ثم تنظر اليه وفي عينيها دمعة حائرة) بالله ؟ والموقف اللي اليوم لو كان لاختك بيرضيك ؟
- فيصل /لا أكيد ما يرضيني لا عليها ولا عليك هالحين انتي ليش محسستني اني انا الي متهمك؟
نايف / (يتدخل بابتسامة) اكيد فيصل وانا كلنا اعتبرونا زي اخوانكم وتهمنا مصلحتكم.
مها / كملت.
رنيم / (تنظر الى نايف وتبتسم بحياء).
نايف / (يبادل رنيم الاعجاب والتبسم) ولا لا يا رنيم؟
فيصل / (يهمس في اذن نايف بحنق مبطن) انت وش جابك يالملقوف؟
مها / يالله يا رنيم خلينا نمشي.
رنيم / وين بنروح ما رد عليك اخوك سعود ؟
مها / سعود هاه ما ادري يقولي ارجعي بلوموزين لانه في مشوار بعيد.
نايف / تمام خلاص اركبوا نوصلكم السيارة قريبة.
فيصل / (ينظر الى نايف بارتباك).
نايف / ("يغمز" الى فيصل أي "دعني اتصرف").
مها / لاء شكرا بنركب مع لوموزين الحين يالله يا رنيم.
رنيم / تلحق بها وتمشيان سويا.
- فيصل / (ينظر باستياء شديد لنايف) انا ما ادري ليش تعرفت عليك.
نايف / (يضحك) اقول امش يارجال خيرها بغيرها والله بغت تضبط.
فيصل / الحمدلله ان ما معي سلاح ولا كان برتكب جريمة الان.
نايف /(يضحك)
(وفي المواقف التي تقف بها ريهام)
- فارس / (وقد اتى مسرعا ليلحق بريهام بعد ان فرغ من الاستجواب بمكتب الضبط والتحقيق فيمسك بعضدها وهي لم تنتبه له ويبدوا عليه انه كان يركض تقريبا) ريهام (وهو يحاول ان يلتقط انفاسه).
- ريهام / (تخاف وترتبك) ثم تضع يدها على قلبها) بسم الله.
- فارس / (يبتسم) ليش ما تردين عليه؟ والله جايك اركض.
- ريهام / ارجوك يا فارس ماعاد بيننا كلام ارجوك خلني في حالي.
فارس / مين الحين الي يحق له يزعل انا ولا انتي؟
- ريهام / مو مهم.
- فارس / بعدين كيف هذي ماعاد بيننا كلام وخلني في حالي وش هالكلام الجديد؟
-ريها م / خلاص فارس انتهى كل شي.
-فارس / (بشكل جاد) ريهام الله يرحم والديك تعالي يالله اركبي بس بلا هبل خليني اوصلك (ثم يفتح بالريموت كنترول ابواب سيارته ويشغلها وكانت "أودي موديل 2017a8").
- ريهام / (تظطر للركوب معه).