وهنا طلاسم الاديب
عتيم
تعالي ...... لملميني شاعرٍ ما يعشق المألــوف
خذيني وبيدينك ..... من طلاسم حسّي الراقي

تمنّيت انتشلني من مساي وفكري المخطــوف
ومن بعض الظروف اللي خذت نصفي عن الباقي

انا في داخلي طفلٍ يـسولـف لـلحـيــاه بـخــوف
يخاف من الرحيل اللي يعقّـد بـسـمـة أخـلاقــي

وانا اللي يكتب الدنيـا مـشـاعـر مـا كتبت حروف
وانا اللـي كـم تـمـنـيـت الـحـروف تـحـرّر وثـاقـي

مثل ليلٍ يـداري دمـعـتـه يـالـخـاطـر الـمـكسـوف
تمنيت إنّي آضـم الـضّـيـا ...... وآسـكّـر أحـداقـي

تعالي .... يـلـعـن الله كـل مـخـتـالٍ يـهـز كــتــوف
ومريني ........ صـبـاحٍ هـزّه الـتّـحـنـان لاوراقـي

انا لو يسألونـي وش تشـوف اقـول ويـش آشـوف
سوى صبـحٍ يـعـاتب هـالعتيـم بـداخـل اعمـاقـي

تعالي .. ودّرينـي فـي ومـيـض السطـر والمعزوف
وغنّيني على كيفك ..* وضمّـي لاهـب اشـواقـي

انا ما جيت لك غامض انا جيتك عـلى الـمكشـوف
وحثّيت القدم لـجلـك وكم عـنّـيـيـت لـك سـاقــي

انـا ودّي عـلـى صـدرك ومـن خلـف الـرداء الـصوف
اعيش اللي بقا من عمـري المـتـمّـرد الـشـاقــي

تـعـالـي نـقـهـر الـواقـع .. ونـبـنـي للـخيـال كفوف
تـلـوّح لـلّـقـا .... مـاهــي تـلــوّح تـعـلـن فـراقــي

طـلـبـتـك لـمـلـمـيـنـي قبل لتلاشى واصير طيوف
واغادر هالحياه بحزني الـلـي سـبّـب إرهــاقــي

شبيهك ياليتيم اللي خذاه احساسه الـمـلـهـوف
يشوف إنّ اليدين الحانيـه كـ الـغـيـيـم والـساقـي
..

متعفرته
لعتيم الشعر
نترككم مع نص اكبر من النسيان


..


بعض القصايد لقبلت ما لها حس
لكنها تاتي بطابع جنوني

..

متعفرته ما تشبه قراية الخمس
بكفوفها يالعالم اللي قروني

..

قد تسمع الرومان وتسكت الفرس
وتعلم اهل القافيه يعتقوني

..

من واقعة فكري ولو ما لها نفس
لو إجنحت للسلم ما قلت كوني

..

ليلي بعيد أبعد من مصافح الهمس
واحبابي اللي داخلي عاتبوني

..

شف ملحمة صبري ولو قلت لك قس
تضيق باول جرح شقق متوني

..

ومن لا خذى من تجربة عمره الدرس
يستاهل اللي جاه لو حلفوني

..

انا بشر معجون من واهج الشمس
ما تشبه اشكال الطباشير لوني

..

شف طيحتي من ليلة البارحه وامس
منها عرغت اللي وفا وغدروني

..

فقيرنا يعطي ولو ما معه فلس
ونفوسنا تكرم مقالت عطوني

..

والاغنيا منكم مخابيهم الخرس
ما هي بترحم لو جياع البطوني

..

ف قدام لا تبرز ملامحك يالطرس
ربيت فيك الصدق لو كذبوني

..

في معطفي توارت الشمس بالدس
وتحررت قبل إتهادى جفوني

..

كم دمعة من خلف قضبان هالحبس
إغرورقت لو مذرفتها عيوني

..

شف صبحي المشرق مع ليله الدمس
على عظيم القاف ياما حدوني

..

كن القصيده بن والشاعر الحمس
وليا اقطعت قدمتها واشربوني

..

شاعر يغادر موطن احساسه اللمس
يكتب وفي قلبه : يقول إكتبوني

..

على اليقين اللي هزم واقع الحدس
ظهرت وكثير الملا خيبوني

..

حلفت ماصاحب رديٍ ولا نجس
وأقسمت ما داهن ولو حاربوني

..

يا قلبي المسكين يا حظي النحس
أهديتهم حبي وهم جرحوني


..

عيون الغيم
لبنت الغيم والجمال والشعر
الرائعة وهج



كُلّمـا فاضَتْ سَمـائي جيـت أدوّر قِيمـــة
للأماني في عـيـون الغيـــم ...لـو يقراني


واقـــفة ما بيــن صَمْتي وانهمـــار الغيمة
ممتلي كفّي دُعـــــاء ولا أثمرت قيفاني


رحت والخاطر تِمَــرْجح في شفاه الدّيمة
لا الثمــت صبره وَلا قـــــالت تـراه أغواني


شاحـــبٍ بعضي قفـار وبعض منّي خيمة
دندنـت للــرّيح وأغـــرى حسّهــــا ريقاني


باهــتٍ مثــل الــرّماد الّلي بقى به شيمة
هفهــف الحـــزن وتنـــاثر كلّـــي وعــزّاني


قـــال يــا ذات الخفــوق المرهف التّعظيمة
للشّحـــوب وللـــرّمــاد ولانخطـــاف ألواني


كـــلّ جمـــرة لو تــوافـق روحهــا التنسيمة
مــــات ليـــل النّــازحيــن بلونهــا المرجاني


كـــــلّ صبـــرٍ فيـــك لازم ينكتــــب تـــرنيمة
للصّبـــاح ولانثنـــاءة صمتـــك الــــرّويـــانــي


هيــــه يـــاطهـــر النوايـــا والهمــوم مقيمــة
ارحلي ما اخضر غصن ،ولا انصفتـك أوطانـي

حبك عقوبة
للجميل وارف
ياغايب ٍ عن عيوني طالت الغيبه
....................وينك ترى القلب في غيبتك مشقيني

عز الله احترت مدري ويش اسوي به
..........................احاول اصبَّره من حين لا حيني

زادت همومه وزادت به لواهيبه
.......................والنوم باسباب غيباتك مجافيني

يهون قلبي عليك اليوم تعذيبه
......................ويهون دمع ٍ من اجلك هلته عيني

يامنبع الحب والاحساس والطيبه
........................ياشمعة العمر والافراح وسنيني

من يوم ربي عطاك الحسن والهيبه
......................سلمتك امر الخفوق وكل مافيني

حبك تمّلك خفوقي وانت تدري به
.........................مدري على وين تاليها موديني

حبك عقوبه وانا ربي بلاني به
...................اصبح كما الدم يجري في شراييني

من وين ماجيت اعذرب فيه واعيبه
.........................تكبر بعيني عذاريبه وترضيني

انت الذي بس ألبّي له مطاليبه
..................وانت الذي شوفتك فالناس تكفيني

وانت الوحيد اللي افرح به واهليّ به
...................وانت الذي بس ترجح له موازيني

ياشينه البُعد وان كثرت مكاسيبه
.....................يصير عثرة حجر بين المحبيني

ارجوك يكفي غياب ولاتماري به
........................تعال واجمع شتاتي لاتخليني

يمكن يجي يوم ماتصفى مشاريبه
........................تعود بعد الغياب وماتلاقيني