عليكم السلام ورحمة الله
اتفضل اشرب شاي ..

بص يا زميل

في وقت كدا في حياتنا لما بنوصله
لازم الاشياء نسميها بمسمياتها الحقيقية
طبقا لأي مرحلة من النضج وصلنا ليها
لأن سنة الحياة اننا بنكبر
ولازم افكارنا واساليبنا تكبر معانا
والمفروض ده واقع مرغوب

الهرج مسماه واحد
و النقاش مسماه واحد

كنت بدخل منتدي كان فيه قسم اسمه الفضفضة
واللي بتقوله يا خواف يندرج تحت بند الفضفضة
اللي هو مافيش الزام لحد بأي حاجة
مافيش كود يحكم العملية
مافيش قانون يحكم الاختلاف

ماينفعش يكون في حاجة اسمها نقاش كدا وكدا
اللي هو هنعمل نفسنا عبط ومشي امورك ..

مش بنقول اننا نغير الكون
بس الأولوية لتغيير نفسنا ونفعها

فاهم ان جزء من وجودنا هنا للترفيه والفضفضة
وانك مش عاوز حد يحط قيود علي لسانك
وده حق كل واحد ..
ومهما كان كلامي .. فكل واحد حر ..

بس علي مدار سنين دخولنا المنتديات
دايما مش هتلاقي جديد
دايما هتلاقيك تشتكي من نفس العيوب
دايما هتوصل لنقطة هتحس فيها انك غريب عالناس
لأن تفكيرك اختلف
ومحتاج اللي اختلف زيك يكون معاك علي نفس التراك
مش يختفي .. او ياخد زاوية وجنب لوحده في مدونة او غيره ..
لانه مش لاقي افكار علي مقاسه ظاهرة ..
لأن مش كل الناس عندها قدرة علي التأقلم
او مرونة التعاطي مع الوضع الثابت ..

ومش بفكرة انه اتكبر عالناس
بفكرة انه حابب مايستهلكش نفسه
بكلام معتاد وسيناريوهات مكررة
واساليب مش عاوزة تتطور
ومواضيع مافيهاش تجديد

لأننا كلنا بنلف في دايرة واحدة
فمش عاوز يصاب بضمور في افكاره ..
في ناس بتفكر كدا .. صدق او لا تصدق
فبتنسحب وخلاص .. لان مافيش مجال للتطوير
ودي بقعة سودة دايما موجودة في المنتديات
و احيانا اللي بينسحب ده
مابيكونش فاهم هو ايه اتغير
او هو عاوز ينسحب ليه اساسا من المكان ..
او ليه واخد جنب ومش قادر يندمج
تاني مع المكان ..

واللي بيخلي البعض يشعر ان قناعاته لازم يفرضها
او انه الصح الوحيد
ان ماحدش فينا بيحاول يطور من طرق الاقناع بتاعته
عشان علي الاقل وجهات النظر البديهية تسود
فامنحسش ان احنا محتاجين نكرر فيها
عشان نرسيها الاول قبل ما نبدأ بطرح فكرة جديدة
يا رجل ده اختلافنا في البديهيات
وكترة اللت والعجن فيها الحاد فكري هههه

لو هنتكلم عن ادبيات الحوار

في ناس بتخلط بين الردود حاسمة وناشفة
وردود قليلة الزوء ..

ردود نابعة من الطبع ..
وردود نابعة من التطبع ..

ردود بتتزوق قبل ما تتقال عشان العلاقات العامة
وردود بتتقال مباشر عشان انت شخص عملي

وده بيخلي الناس الي حد ما
بتسبق بسوء النوايا قبل النظر لمحتوي الكلام ..

مابتقدرش التعليق الجيد .. علي قدر تعلقها
باللي هيرد ليها في المستقبل بتعليق يرفع معنويات ..

الناس بتتكثف من الكلمة الحلوة اكتر من الحق ..
وبتدوس علي الكلمة الناشفة ولو فيها جزء من الحق ..

هي الدنيا كدا ..
عشان كدا الاسلوب مهم ..وان الناس تستوعبه اهم ..
وان الناس تفهم ان قسم النقاش المفروض
يرتقي باختلافنا .. مش نحس ان اختلافنا بضغينة

الكلام بيتحس .. بس افهم مصدر الاحساس الاول
قبل ما تحكم عشان ماتبقاش ساذج مش اكتر ..