السلام عليكم اخواني وخواتي

عندي مشكلة وهي ان احنا ثلاثة شباب اعمارنا بين 20-25 وعندنا اخت اكبر مننا ومتزوجة وعندها ولدين المشكلة مو فيها المشكلة في زوجها يعني نسيبنا زوج اختنا هذا اهله نعرفهم من زمان وساكنين في الحي اللي جنبنا يفصل بيننا حارتين فقط وشارع وهو كل يومين ثلاث مطيح عندنا يتغدى ويتعشى ويتقهوى وشاهي وانا الاوسط بين العيال ارجع من الجامعة تعبان مالي خلق افضى لاحد الا بعد المغرب بعد ما اروق واصحصح واخوي الكبير يرجع تعبان من شغله 4 العصر واخوي الصغير نفس الشيء يرجع من الجامعة تعبان وامي وابوي دايم يهاوشونا ان ليش تشوفون زوج اختكم جاي وما تقعدون معاه ، اقولهم وش الجديد هو كل يومين يجي ويقعد لين اخر الليل هو وزوجته وزوجته هي اختنا يعني هذا بيتها لو تجينا كل يوم عادي لكن زوجها من النوع النشبه والغثيث اللي بس يسولف كثير ومرات يلج راسنا بالشيلات والقصايد ويقول هذا ولد عمي فلان مؤلفها وهو كذاب بس يحب يهايط حتى عياله يزعجون قدامه ولا يقول لهم عيب وما يصير ويؤدبهم وامي وابوي يحبونه حيل ودايم يجلس معهم وخصوصاً امي لا شافته تهلي وترحب فيه لدرجة ان نحس ان هو ولدها واحنا كأننا ازواج بناتها حتى ابوي صار لما يعزم احد يتصل على زوج اختنا عشان يقعد معاه بالمجلس بالرغم من وجودنا احنا معاه لكن دايم يمدح فيه واحنا كأننا تماثيل في زاوية المجلس ، المهم طولت بالكلام اللي عنده شخص كان نشبه في حياته وقدر يتخلص منه يعلمني الطريقة عشان نفتك من النشبه نبيه يجي بالشهر مرة وحدة بس بدال كل يومين

هو يا ابن الحلال مو استكر هو صمغ ، غراء لاصق غير قابل للفكاك ولو عندنا اخوان صغار كان خليتهم يناقزون فوق راسه ويلعبون بلاي ستيشن عشان ينكدون عليه نومه

من ناحية اقول لاختي هالكلام بصراحة ما اقدر عيب اما موضوع فلوس مابي اقولك ان هو اذا جانا يطلب اكل وعلى حسابه بعد والظليمة شينة وانا اخوك ترى هو بصراحة مرات لما يجي ما يجي ويده فاضية مرات يجيب شغلات للبيت زي خضار وفواكه بالرغم ان عندنا لكن هو الله يكثر خيره يجيب كميات كبيرة لدرجة مرات تعفن وما خلصنا نص اللي بالثلاجة ، هو طيب وحليو لكنه غثيث ولا سولف ما يسكت