هدوء .. ورقة و قلم ..
فرصة لن تتكرر إلا أن يشاء الله

صباح الامنيات المحققة ..
صباح كل شي جميل ،،

انا حالياً جالسة احاول اتغلب على طبعي الخجول ،،
صح الخجل جميل ، لكنه بعض الاوقات يردك عن لحظات جميلة ممكن تعيشها بعفويه اكثر ،،


المهم ما علينا ،، انا احبني بكل اطباعي ،، على انه في بعضها يبيلها تعديل و جالسه اشتغل عليها ،،

،،


فرصتي الآن كبيره في التفكير في كل شي ، بتركيز عالي ،
هدوء تام ، اجواء محفزة و سعيدة

جالسه افكر في الشغل : كيف ارجع بعد اجازة طويلة جداً ،، رجوعي لازم يكون مميز
بقدر تميّز هذي الاجازه ، بقدر تميزي .. بقدر تميّز صحباتي ،،
مشتاقه لهم اكثر من الشغل ،،

افكر في غادة : كيف ممكن نعدل سلوكنا مع بعض ،
كيف البي لها طلباتها بدون ما تأثر على قناعاتي ، بدون ما تأثر على نفسيتها ،،
اكثر طلب تطلبه مني في هذي الفتره ، تبي قناة في اليوتيوب ،،
دايم اقولها انا راح اسوي لك بس ابي تقدمين محتوى مميز ،، فكري و قولي لي ،،
اذا شفته مميز ،، راح اسوي لك قناة ،، للحين ما عندها شي مميز ، اتحمس و اسوي لها رغم اني ٩٠٪ معارضه ،،
لكن هالزمن يجبرنا نسايرهم على اساس ما تسويها من وراي ،،
و لا ابي اسوي القناه و يكون المحتوى سخيف ،،

و ثاني شي : ابي محتوى ما يعتمد على الصوت او شكلها ،، <- تعجيز صح خخخ
المهم طلعت لها فكره و ابي فكرتين ثانيه ،، عشان تختار بينهم ،،


تدرون اني عندي اليوم اختبار و المفروض بدل ماني جالسه ع اللابتوب ،، اكون اذاكر
بس مدري كل ما افكر اذاكر احس الماده سهله و ان شاءالله اجيب الدرجه الكامله <- هذا و انتي ما ذاكرتي خخخ
المدربه تقول اعلى درجة صارت هي ٣٨ من ٤٠ ،، و انا قررت اجيب الاربعين كامله
شويتين و امسك المادة اراجعها <- من الثقه تقول اراجع مو اذاكر ،،

اممم فجأه مخي ،، مافيه و لا كلمه و لا سالفه اقولها ،، و اجلس اتنح في الكيبورد خخخ

خجوله او حياويه ،، يمكن انا بمفهومي البسيط ،، اشوفهم واحد او قريبين من بعض ،،
لكن انت صححت لي معلومه لازم انتبه لها ،، هل هو خجل او حياء ،،

اتمنى ما يكون نقص في الثقه ، لاننا مهما ادعينا الثقه بالنفس ، ممكن تكون عندنا ثغره احنا مو منتبهين لها ،،
و يمكن احتاج لعلاج فعلاً ،،


ممتنه لك ، و ممتنه للجميع هنا ،،
اللي حببني في هالمكان ،، اني استفيد منه و منكم كثيير

١٩ / ٧ / ٢٠١٧


الحياة جميلة ..
بقدر جمال أرواحنا ..

نتجمل .. و نزداد جمالاً ..
و تزداد الحياة جمال ..

صباحكم رضا ،،
اسبوع جداً جميل ،،
كل محفزات السعادة اجتمعت فيه ،،
سواليف مالها حد <- هذا اهم شي خخخ


ايوه ما قلت لكم على الاختبار كم جبت فيه
جبت ٣٧ من ٤٠
كنت ابي الاربعين بس زين جات على كذا ،، و اتوقع انا اعلى وحده في المجموعه
الماده انا جدا احبها و احب مواضيعها ،، عشان كذا كنت اقول حرام ما اجيب الدرجه كامله ،،
اللي لخبطني ان الاسئله تتكرر بس بطرق مختلفه ،، يتعمدون يتوهونك
و ما اقولكم التوتر اللي جاني كيف ،، قلبي صار ينبض بقوه و يديني ترجف خخخخ


بس اقول الحمدلله على كل شي ،،

عندما تكون وحيداً
ليس بالضروره ان تكون تعيساً ، او حزيناً ،،

انما هي فرصة ،،
للتغيير ، و اتخاذ القرارات المعلقة ،،
فكّر دائماً بإيجابية ،،
اقلب الطاولة على ظرفك ،،