شن درتلي خليتني نشتاقك
وشن درتله عقلي ايفكر فيك

هايم ومش طايق نهار فراقك
وفي كل لحظه ايقولك نبيك

شن درتلي حاس بشعور اشواقك
على شبحتك باعث اشواقي ليك

راه خاطري يرجا فحن ارواقك
تعال شوفني وارحم الله يهديك

مرات نملي بالدموع وسادي
ومرات يبقى العزم عزم اجبال
ومرات مهما انقال فيا عادي
ومرات من كلمه يضيق البال
ومرات نبقى في الزعل متمادي
ومرات نرضى نبتسم في الحال
هو قلب متقلب وبيد الهادي
في لحظه ايغير بين حال وحال

ماني على بابك ولاني على باب الرجــــا
انا على باب اللي عينه لا تنام ولا تخيب.

نسهر مع طيفك خيال يجيني
اللي يرتسم لحظات ويناجيني
عندي سرحه
وعندي مع ذكراك حزن وفرحه
وعندي احساس غريب يصعب شرحه
بعد يختفي طيفك يزيد حنيني

اصبر علي لايام لو شالنك
شور شي عمرك ماحسبت احسابه

واصبر علي ليام لو بكنك
او تمن دموعك في الحياة سكابه

مرات عز الناس يرحل عنك
ومرات غاليك يطول غيابه

ومرات تفقد من اقريب منك
ومرات عمرك ماتعيش اعقابه

واصبر علي ليام لو كسرنك
كسرت العود اللي انكسر في غابه

وخليك صابر لو مصايب جنك
مامن اللي عافس عليه عذابه

واذكر الله
ماكيف ربي وين تقرا كتابه

لاتقلقي ياعين لاتحتاري
يجي يوم يعدلها الكريم الباري
ياعين خيره وافي
يجي يوم يسقينا العسل الصافي
مولاي متكشف على اللي خافي
راقب وناظر جهرتي واسراري
وبقدرته يبث الحياة في الطافي
من وسط برد اليأس تشعل ناري