*
*
بعدما طالت بي المده على باب المودّه
امتكتّف واتحرى فتحته ثمٍ دخولي
افتحه حظي ووقف فيه يرقبني لمدّه
كنّه يسوم الغرام اللي بصدري من نحولي
كان يقرى في سكوتي غصّةٍ مرّه وحدّه
حدةٍ خلتني أطلع .في نظر مثله. فضولي
قال:حيّه.. قلت:حيّه.. وابتسمت ومد يدّه
جته يدّي مثل طيرٍ مطلقينه من قفولي
يوم قلطني وأنا في مجلسه والوقت أعدّه
تكتكت عقرب ثواني ساعه .. وصبرٍ بطولي
كان للمسباح في راحة يدي روحه و ردّه
وارتعاشة خوف غامض من غموض الوضع حولي
لين جتني بنت .. كن بمشيها قومه وهدّه
وانتهضت وكل خوفي من سحاي..يطيح طولي
وأثرها خجلا حياويّه .. تحسب السّين شدّه
قلت يالبيه يا( عاد اسمها .. لأ .. إسمحولي) !
صالحتني مع هناي ورجعتني للمخدّه
وأثقلت متن الخفوق بحبها وإلتاع قولي
من غلاها صار قلبي يعلن إن هالشي ضدّه
لا غدى هالشي شيٍ غيرها .. لو كان زولي
حبها توه صغير والبلا لاعاش مدّه..
وين أشيله وهو واصل لين راسي من رجولي؟
شكلها لا طالت المدّه وأنا في هالمودّه
بأتكتّف عند باب قليبها وأنطر دخولي !
*
*