روحٌ هادِئة و نفسٌ لاترغبُ إلا بِالسلام .

[روحَ]

الإختلاف في درجة الوعي
سبب من أسباب الخلافات

اللي درجة وعيهم منخفضة
يكون تفكيرهم مادي وشهواني أكثر
وتغريهم القشور بسرعة وتطير عقولهم
ونظرتهم سطحية مو عميقة
لانهم يشوفون بالبصر مو بالبصيرة

واللي درجة وعيهم مرتفعة
تكون نضرتهم أرقى وأعمق لأنهم يشوفون بالبصيرة
وما تغريهم القشور وما يعطونها اهتمام كبير
ويعرفون القيمة الحقيقة للأشياء

وبعد اللي درجة وعيهم منخفضة
موسوسين ودايم عندهم خوف من العين والحسد
حتى لو كانوا متحصنين
ما يؤمنون أن الله حافظ
يقولون الأذكار بدون يقين
عندهم ضعف في الإيمان واليقين

العين حق بس مو ل درجة الوسوسة
في أشياء مالها دخل بالعين
بس لكل فعل ردة فعل
وما تفعله بغيرك يعود إليك

وبعد اللي وعيهم منخفض ينتظرون العالم يتغير
عشان هم يتغيرون
واللي وعيهم مرتفع يعرفون أن هم اللي لازم يتغيرون أول
عشان العالم يتغير

و بعد نظرتهم للمرأة تختلف
ل هالسبب في خلاف على موضوع تغطية الوجه
وهذا لأن الخلاف
مع ناس درجة وعيهم منخفضة ونظرتهم سطحية
وناس درجة وعيهم مرتفعة ونظرتهم راقية للمرأة

وحتى مفهوم الجمال يختلف عند الاثنين
اللي وعيهم مرتفع نظرتهم أعمق وأوسع

[روحَ]

https://up6.cc/2022/09/16631365154161.png

[روحَ]

ما تعجبني أي قصة أو أي رواية
إلا لما يكون فيها خير وشر
وناس طيبين وناس أشرار

وجود الأشرار ضروري في أي قصة
كيف بنعرف إذا البطل قوي ولالا
مو لازم يحارب ويصير أكشن و يغلب الأشرار
أصلاً القصة بدون أشرار وبدون أكشن بتكون مملة

وين الحلو لما يكون البطل كسول ويبي كل شي يجيه بسهولة !
اللي يجي بسهولة ما يسمى ثمين 🙂

حتى في قصص الحب
لازم يكون في أشرار وحساد
أصلاً وجودهم اختبار لقوة العلاقة
إذا قدروا يخربون العلاقة يعني أصلاً كانت علاقة فاشلة من البداية
بس إذا ما قدروا يخربونها يعني العلاقة قوية



أحس أني فاهمة صح
وقاعدة أمثل دوري صح في قصة حياتي
بس محد فاهمني :MonTaseR_203:


المهم
كل حد يركز على دوره ويمثله صح
لا تخربون القصص لو سمحتوا
ولا تنتظرون من الشرير يصير طيب
لأن كذا تقتلون المتعة :MonTaseR_141:

وبس :24:

[روحَ]

ودي أعرف
ليش بعض الناس يختارون يصدقون اللي يكذب عليهم
ويتصنع الطيبة والتواضع !
يعني مثل الزوجة اللي ف البداية
تقول عادي مستعدة تتحمل كل شي وكل الظروف الصعبة
حتى لو زوجها فقير ومستعدة تعيش على خبزة وجبنة وزيتونة
ومن هالكلام
وآخر شي يصير العكس > الكذبة واضحة من كبرها
طبعاً ما تقدر تتحمل
و عادي كل شوي تحسسه أنه مقصر وما يهتم
وممكن تذله وتهينه بعد وتمن عليه لأنها مستحملة

ليش بعض الرجال يختارون يصدقون هالنوع !

واللي من البداية تقول ما تقدر تتحمل
يقولون عنها مغرورة
طيب صح مغرورة ف نظركم
بس ع الأقل صادقة وواضحة من البداية
ما تسوي نفسها طيبة
وبعدين تروح تحش ف زوجها عند صديقاتها !


أصلاً العاقل والفاهم يعرف أن هالكلام غير واقعي
وأنه لازم يجتهد ويوفر لهم ولعيالهم حياة كريمة
خاصة في هالزمن لأنه مو نفس زمن البساطة

وصعب الأنسان يتعايش مع كل هالاختلاف

[روحَ]

أحس مخربين العلاقات
موجودين ف كل مكان وكل زمان
وما يستسلمون ما شاء الله

كنت مشتركة ف قروب ف الواتس أب
مرة وحدة مدحتني قدام البنات
الثانية غارت وانقهرت وصارت تحاول تشوه صورتي
بأي طريقة وتقول عني كلام مو فيني
بس عشان ليش فلانة مدحتني أنا وهي لا
لأن تبي تكون هي محور الاهتمام وكذا

آخر شي طلعت من القروب
ما أقدر أستحمل السخافة
ودايماً كذا أنسحب وأريح راسي
أحس عقولهم صغيرة

وحتى بأيام المدرسة نفس الشي
ما كنت أبادر وأكون صداقات وكله في حالي
بس لما وحدة تتعرف علي
وتكون توها من فترة قصيرة صايرة صديقتي
فجأة يجون بنات يطلعون إشاعات عنها
وأن فلانة تكذب وتصاحبني عشان مصلحة ومن هالكلام

وأنا أستغرب منهم لأن كلهم ما أعرفهم زين
مع هذا مطلعين إشاعات
انزين اصبروا خلوني أعرفكم أول !

آخر شي أسحب عليهم كلهم
أهم شي راحة بالي وبس

ويا زيني وأنا صديقة نفسي :نبض:

[روحَ]

كنت أفكر بموضوع التشابه والاختلاف
وبالصدفة طلعت لي قصة
وتتكلم عن نفس الشي وكأن القصة تجاوب على سؤالي

طبعاً كنت أفكر شنو الأفضل
نختار الأصدقاء اللي مثلنا ولا اللي عكسنا

في نهاية القصة قالوا اللي عكسنا أفضل
يعني اللي تكون نسبة الاختلاف بيننا وبينهم
أكبر من نسبة التشابه

المهم
تذكرت وحدة من البنات كانت معاي بأيام المدرسة
ما صارت صديقتي إلا لأنها مختلفة عني
كانت تحب تبادر وتحب تسولف
وأنا ما أبادر ولا أحب أسولف كثير بس أحب أسمع
لو ما كانت عكسي ما كانت بتصير صديقتي

وعلى فكرة يمكن في البداية ما تتقبلون اللي عكس صفاتكم
بس في النهاية بتشوفون أنهم أنسب ..

[روحَ]

كان هناك عقرب يُريد أن يعبر النهر، ولأنه لا يستطيع السباحة،
طلب من ضفدع يسكن بالقرب من النهر أن يُساعده قائلاً له:
"لماذا لا تجعلني أعبر النهر على ظهرك، فأنا لا أستطيع السباحة؟".
قال له الضفدع: "كيف لي أن أساعدك، فأنت عقرب وقد تلدغني فأموت بسمّك القاتل،
أنا لن أفعل ذلك؟". فقال له العقرب: "آه أيها الضفدع الغبي،
من المستحيل أن أفعل ذلك، لأنني إذا لدغتك فسنغرق معاً".

وجد الضفدع أن كلام العقرب منطقي للغاية، ولا يمكن له أن يفعل ذلك،
لأنه لا يُريد أن يغرق فيموت، إضافة إلى أنه بهذه الخدمة الرائعة
التي سيُقدمها للعقرب، سيكون صاحب فضل عليه، بل وقد يُساعده على تغيير طبعه الشرير.

وافق الضفدع، وحمل العقرب على ظهره، وفي منتصف النهر، لدغه العقرب،
فقال له مذهولاً: "لماذا فعلت هذا؟"، فأجابه العقرب: "لأنني عقرب"، وغرق الاثنان معاً.

العقرب هو العقرب، ولا يستطيع أن يكون غير ذلك، حتى وإن حاول جاهداً
أن يُغير من طبعه وسلوكه، فممارسة اللدغ هي هوايته المفضلة، بل وظيفته التي لا يُجيد غيرها


_______

^ هذا اللي يصير لما تسامحون
اللي يأذيكم كل مرة وتصدقون أنه بيتغير

[روحَ]

الأشرار نوعين

الأول يكون شرير حقيقي
وهذا مهما حاولنا نغيره ونغير طريقة تفكيره
مافي فايدة ويرجع يأذي

النوع الثاني يكون شرير ماضيه حزين
صارت له ظروف مو حلوة غيرت أفكاره ومعتقداته
وصار شرير ومتمرد ويأذي
هذا النوع لما نحاول نصحح أفكاره ومعتقداته
عادي يتغير ويرجع لأصله ومعدنه الطيب
ويتغير وما يصير يأذي

وبس والله
هذا من دراستي العميقة والمتعمقة
ل عالم الأشرار والوحوش :MonTaseR_221:

[روحَ]

الحين تتوقعون أنا شريرة حقيقية ؟
ولا شريرة ماضيها حزين ؟

ولا طيبة وأنتوا تحسبوني شريرة
لأنكم تسيئون الظن فيني ومو فاهميني صح ؟


^ اللي يجاوب صح بحط اسمه في مدونتي
عشان يصير مشهور وحركات :icon10:

[روحَ]

في فلم عجبتني قصته
مع أني ما تابعته بس شفت لقطات
وفهمت القصة
المهم
فيه وحدة تروح مزرعة وتعيش التجربة
وتسوي كل شي بنفسها

ودي أسوي مثلها وأروح مزرعة حلوة
وأعيش التجربة
بس مدري من وين أجيب هالمزرعة !
وبعد ما أحس في حد يتحمس لمثل هالأشياء نفسي
بس أخوي الصغير نفسي
لكن هو مشغول وعنده دوام ومب فاضي

والله من الملل ودي أسوي أي شي جديد ما جربته من قبل
أهم شي يكون بعيد عن الشاشات والنت
بس ما أعرف شنو أسوي > قاعدة أفكر :dddas:

[روحَ]

أحب القصص كثير
وأحب أسمع كل أنواع القصص
وأكثر شي إذا كانت غريبة وفيها غموض
وحتى قصص الكبار أحب أسمعها لما يحكونها لنا
وكيف كانوا في الماضي وهكذا

المهم
زمان كنت أقول ودي أسمع قصص المجانين
وأعرف كيف صاروا مجانين
بعدين اشتريت كتاب اخترته من العنوان
وطلع فيه قصص
كل وحدة تحكي قصتها وهي ف المستشفى
ويحليلهم كانوا طيبات بس الدنيا ظلمتهم وكذا
يعني في ناس أذوهم وصاروا مجانين


وبعد كان ودي أسمع قصص المساجين والقتلة
واللي ارتكبوا جرائم قتل وشنو السبب وهكذا
دايماً نعرف قصة الطيب اللي مات
بس مو كل حد يعرف قصة الشرير أو المجرم

عشان كذا أحب أسمع قصصهم

لما رحت المكتبة آخر مرة
شفت كتاب فيه قصص وعلى طول اشتريته

هذا هو
https://up6.cc/2022/09/166378162109561.jpeg
" ما يناسب أصحاب القلوب الضعيفة " > أنا قلبي قوي عادي هههه

والله مدري شنو جوي وأنا أقرأ
بس أحسه حلو
قرأت أول قصة كان فيها غموض
واحد من المساجين
كل مرة يطالع ف السقف كأن فيه شي فوق
والكل مستغرب ومو فاهمين ليش يطالع السقف
حتى كانوا يخافون منه
آخر شي قالهم تشوفون الجثة اللي معلقة فوق ؟
طلع يشوف جثة بس هم ما يشوفونها
المهم هو وأصدقائه كانوا يأذون وحدة مجنونة
ودايماً يضايقونها
وماتت بسببهم
وبعدين اثنين من الاصدقاء ماتوا بحادث
وكانوا يشوفون الجثة
وآخر شي حتى هو مات
شكله كان يتعذب من تأنيب الضمير

بروح أكمله عجبني
مع أن فيه عنف

بس أحس كأني قاعدة معاهم ف السجن
ويحكون لي قصصهم وأنا أسمع وأتعجب !

[روحَ]

انتقل رجل مع زوجته إلى منزل جديد وفي صبيحة اليوم الأول
وبينما يتناولان وجبة الإفطار،
قالت الزوجة مشيرة من خلف زجاج النافذة المطلة على الحديقة المشتركة
بينهما وبين جيرانهما
انظر يا عزيزي إن غسيل جارتنا ليس نظيفا..
لابد أنها تشتري مسحوقا رخيصا..
ودأبت الزوجة على إلقاء نفس التعليق في كل مرة ترى جارتها تنشر الغسيل..
وبعد شهر اندهشت الزوجة عندما رأت الغسيل نظيفا على حبال جارتها،
وقالت لزوجها انظر.. لقد تعلمت أخيرا كيف تغسل.
فأجاب الزوج: عزيزتي لقد نهضت مبكرا هذا الصباح
ونظفت زجاج النافذة التي تنظرين منها !!.

الحكمة: قد تكون أخطاؤك هي التي تريك أعمال الناس خطأ
فأصلح عيوبك قبل أن تنتقد عيوب الآخرين.

[روحَ]

مشكلة بعض الناس
أنهم يشوفون كلامنا وبعدين عقلهم يخترع الباقي من عنده
نحن مسؤولين عن الكلام اللي نقوله
مو مسؤولين عن الأفلام اللي تخترعونها والأوهام اللي تصدقونها
وتظلمون فيها الناس وتسيئون الظن فيهم !

[روحَ]

لفت انتباهي هالكلام /

" امرأة ليس لها حدٌ في الحنان،
تداوي جرح إصبعك وكلتا يداها مجروحتان "


^ يوجد مبالغة يوجد فلم هندي
^ يوجد فخ صدقوني :icon10:


أنا لو أجرح إصبعي
على طول أحس بدوخة وغثيان :13:

قال حنان قال :26:


أصلاً التكفيخ أحلى من حنان :l: < يبرد القلب هههه

[روحَ]

الرّيش الأبيض:
يأتي الرّيش الأبيض من أنقى الملائكة، وبالتالي فهو رسائل سلام ومحبّة وحماية ونور. إن العثور على ريشة بيضاء هي رسالة ونعمة قويّة من الإله، وهي علامة على أن كل شيء سيكون مناسبًا لك قريبًا.* إنه أيضًا رمز للتطهير، مهما كانت الطّاقة السلبيّة الَّتي قد تكون تراكمت على مدى فترة من الزمن، يتم الآن التخلص منها، مدفوعة بالنور الإلهي والحبّ.
إذا صادفت ريشة بيضاء في وقت صعب وشاق، فتأكد من أن ملائكتك يراقبونك، ويساعدونك في الحفاظ على قوتك، وأنهم يعملون بجد لرفع روحك، وحمايتك من الشرّ والسلبيّة.

________

^ أمس تذكرت هالمعلومة
وقلت في خاطري أنا ولا مرة شفت ريشة
وكان ودي أشوف


اليوم شفت هالريشة
‏https://up6.cc/2022/09/16639449441661.jpeg

كانت ف الصالة
مع أن الشغالة منظفة الصالة الصبح
وما عندنا طيور ف البيت مدري من وين جت
واشمعنى ما ظهرت إلا لما فكرت فيها !

شكلهم الملائكة يبوني أفرح :icon10:

[روحَ]

صح نسيت أقول
لا تصدقون سالفة التكفيخ ترا أمزح
أحس في ناس يصدقون وما يفهمون أني أمزح =)

تراني ضد العنف
وعندي فوبيا بعد من العنف والضرب
والصراخ والصياح والمشاكل وكذا


بس الصدق أني ما أحب المبالغة
مو لازم أحد يضغط على نفسه عشان يصير طيب وحنون
يعني أنا أشوف مافيها شي لو كانوا صادقين وقالوا ما نقدر
عادي بتفهم هالشي وما بضغط عليهم

وبس
يعني الأمور بسيطة =)

[روحَ]

أنا مع هالكلام /

" لا تطلب الشيء مرتين إلى من الله "
+
" اطلبوا الحوائج بعزة الأنفس
‏فإن الأمور تجري بمقادير الله "

وضد الإلحاح في طلب الشي من الناس

لأن يمكن اللي أطلب منهم ما يقدرون يسوون شي
وأكون رحت للناس الخطأ
كذا بحطهم بوقف محرج ويمكن أضغط عليهم
وبحط نفسي بعد بموقف مو حلو وبرجع مخذولة

وبعد ما أحب أحكم على الناس
على حسب مين وقف معاي ف الشدة ومين لا ..

لأن أصلاً لو الله سخرهم لي بيوقفون معاي
حتى لو ما طلبت منهم شي
وبالطريقة الصحيحة والمناسبة اللي ترضى الله
يعني بدون ما يسوون شي غلط

حتى الموضوع ماله علاقة إذا هم طيبين ولا لا
يمكن يكونون طيبين كثير مع غيري والله مسخرهم لغيري
بس مو مسخرهم لي ..

وأنا يمكن في ناس ثانيين مسخرهم لي وهكذا ..


المهم

الأحكام اللي مثل كذا
أشوف فيها سوء ظن و ظلم للناس

[روحَ]

اللي يخالفون القوانين الكونية مستحيل يربحون
أقصد اللي يحاولون يحصلون على الأشياء بأساليب ملتوية
بالغش والكذب والخداع والتلاعب والتخريب على الغير
بالطرق الغير قانونية والغير شرعية
مستحيل يربحون
حتى لو حصلوا اللي يبونه ب هالطرق بيكون سبب تعاستهم

المفروض الإنسان ما يفكر كيف يوصل وبس
لازم يفكر بالطريقة هل هي صح ولا غلط
اللي ماشي سيدا هو اللي يفوز في النهاية
والباقي كلهم يخسرون

و اللي نيته طيبة ما يجتمع مع اللي نيته خبيثة

اللي ماشي على النية لازم ما يخاف
لأن بتكون عنده حماية إلهية
الخبيث هو اللي لازم يخاف

[روحَ]

ممكن مرات الإنسان يسيء الظن بدون ما يعرف

بس كيف يعرف أنه أساء الظن ؟

من ردة فعله وشعوره لما يسمع أو يشوف الكلام أو التصرف
إذا غضب و حس بضيق يعني أساء الظن وما فهم صح
اللي يفهم صح يكون هادئ ونفسيته زينة

طبعاً نحتاج نتعمق
ونشوف الموضوع من كل الجوانب ونحط كل الاحتمالات
عشان نفهم وما نسيء الظن
وهالشي مو سهل بس نحاول وبنتعود

وبس

[روحَ]

كنت أسولف مع الشغالة
تقولي فينيش سكوول ؟
ما تدري أني فينيش سكول من زمان جداً
من أيام لما أمي وأبوي وجدتي كانوا عايشين

طبعاً تحسبني أصغر منها
مع أني أكبر منها ب 5 سنوات
> مابي أقولها وأصدمها

مرات أحس الشي حلوو لأن يدلعونك
ومرات ينرفز
لأن اللي يحسبوني أصغر منهم
يعاملوني كأني ما أفهم وخاصة لأني أغلب الوقت ساكتة
بس ترى أكون فاهمتهم لكن أطنش بمزاجي
مابي أسوي نفسي فاهمة عشان ما ينتحرون مني

ما يدرون أني ساكتة ومستحملة كثيير
لو أتكلم بيكرهوني بيحقدون علي على طول
لأن محد يحب يسمع الصراحة

أصلاً التسليك شي حلوو وجميل
وغالباً مايكون لي خلق أتكلم ولا أوضح شي

بس أكثر شي أتكلم و أوضح بعض الأشياء
من باب أنصر أخاك ظالماً أو مظلوماً ..

ولأن مرات الكلام يحل بعض المشاكل ويفيد

ومرات أحب أطير جبهة اللي يتفلسفون علي
وفاهمين غلط و ما يشوفون نفسهم :l:

[روحَ]

ما أحب البكايين
لأني مو بكاية
اللي أعرفه أن الإنسان يبكي مع نفسه
عشان يتخلص من المشاعر السلبية
بعدين يغسل وجهه ويظهر للناس
هالشي طبع فيني منذ الصغر وصعب أغيره

حتى بتلاحظون نادراً أحط الفيس اللي يبكي
لأن ما أكون أبكي وحتى لو حطيته أحطه بس كذا عبط

أكثر شي أحب هذا الفيس :icon10:
لأني أكثر شي أبتسم

ما يقهرني إلا اللي يقول
من يبتسم كثيراً فهو حزين
مو على كيفكم :MonTaseR_56:

يمكن أنه قوي نفسياً مب هش
و تراه نفسية اللي يقول كذا مب حزين :icon10:


المهم
ترى ما أعرف أواسي اللي يبكون
ولا أعرف أطبطب عليهم بس أتوتر وأحس بكآبة

أنا لما أتضايق أو أعصب أو شي
أحب أشوف ناس فرحانين كذا أفرح وأنسى الزعل
وأحب اللي يضحكوني
بس اللي يقولون كلام حزين ينرفزوني

أقول يالله متى يخلصون ويفكوني من الكآبة

لحد يزعل بس هذي الحقيقة =)

ترى أدري أن في ناس مثلي ومتأكدة :85:

[روحَ]

ودي أسوي هذيك الشغلة
اللي لما يجيبون لي الأوراق لين مكتبي الفخم
اللي في بيتي الجميل

وأنا بس أوقع على الأوراق
وكل شي ما يمشي إلا بتوقيعي

تعبت وأنا أتدرب عشان أضبط لي توقيع حلو
خلاص لازم أطبق وأوقع على أوراق وشيكات :MonTaseR_112:

ما يصير تعبي يضيع :DsC00581:

[روحَ]

اليوم طلعت ف الشمس
وحسيت الضوء كان خفيف مو نفس العادة
مع أن مافي غيوم
وفي هواء بارد
شكله الجوو بدأ يتعدل > الحمدلله

المهم
شفتوا كلام الأستاذ رايق ف مدونتة ؟

ترى كنت ما أحب الشمس ولا أحب أطلع ف الشمس
وصدق هالشي كان يأثر على النفسية كثيير
بس لما صلحت علاقتي فيها تعدل الوضع

إذا جربتوا بتحسون بالفرق

وبعد في معلومة عرفتها
يمكن في حد ما يعرفها

عشان تستفيدون من الشمس
اكشفوا الرقبة من ورى
الجزء السفلي من الرقبة
عرضوا هالجزء للشمس عشان تستفيدون من فيتامين دال

سمعت وحدة تتكلم عن هالشي
هي كانت تطلع في الشمس بس ما تستفيد
وما يرتفع فيتامين دال
بعدين عرفت السبب
لأنها ما كانت تكشف الرقبة


كتبت المعلومة ف مدونة ثانية
وقلت بكتبها هنا
عشان اللي ما شافوها يستفيدون

وبس

[روحَ]

في الصيف ما أحب أطلع ف الشمس عشان حر
بس في الشتاء عادي أطلع وأعوض
يمكن عشان كذا النفسية تتعدل ف الشتاء
> عكس الناس
أصلاً الشتاء عندنا غير عن بعض الدول
يعني مافي غيم وثلج طول الوقت

بس ترا طول السنة
حتى لو قاعدة داخل
ما أحب أقعد ف الظلام إلا إذا بنام
يعني لازم أفتح الستاير أو أشغل الأنوار
لأن أحس لو أقعد ف الظلام
تفكيري يتأثر ويصير سوداوي

حتى لاحظت لما أسهر يتفعل الجانب الشرير
وأصير صدق أفكر بأفكار خطيرة
وبعد أصير حساسة وأتضايق بسرعة
عشان كذا أكره السهر
وأحب النهار

وبعد لاحظت لما عيوني تتعود على الظلام
طاقتي تصير ضعيفة وتأثر على كل شي
يعني كل شي أسويه
يكون باهت ومظلم ومافيه نور ولا حياة ولا ألوان

عكس لما عيوني تتعود على النور
كل شي أسويه وأختاره
يكون مشرق ومضيء وفيه نور وفيه حياة
وفيه ألوان وهكذا ..

ل هالسبب حتى لون الخط
ما أحب يكون أسود > عشان كذا مختارة الوردي :Dl3:
> والرمزية فيها وردي

ونفس الشي لون الأثاث ف البيت
أحبه يكون أبيض ولون الصبغ فاتح

والله إذا دخلت مكان لون الأثاث فيه أسود
والصبغ غامق
أحس كأني داخلة بيت الرعب وأحس بكآبة
خاصة إذا أسود مع أحمر
> ناقص يحطون دراكولا ويصير صدق بيت الرعب

مثل المنتديات اللي استايلها أسود وأحمر
أحس بكتمة لما أتصفحها
و ولا مرة شاركت بمنتدى استايله أسود ولا أفكر


الألوان الغامقة حلوة وتعجبني مرات
> خاصة ف الملابس الشتوية

بس مو كل شي ف الحياة أسود كذا صدق كآبة

[روحَ]

مرات أحس في فلتر داخل عقلي
ينظف الأشياء ويلمعها

ل هالسبب أختلف مع ناس كثير
مثلاً عادي نشوف نفس المشهد
بس مو بنفس النظرة
هم يركزون بأشياء ما أنتبه لها
وأنا أستغرب و أقول كيف شفتوا هالأشياء
أنا ما شفتها !

ونفس الشيء هم يستغربون من نظرتي
وما يشوفون اللي أشوفه !

المهم
ترا كل حد يشوف الأشياء من زاويته
ف لو سمحتوا لا تحاسبون الناس على نظرتكم
لأن نحن مالنا دخل ب الشي اللي تشوفونه !

[روحَ]

أول مرة أنزل موضوع في قسم مشكلتي
أكثر شي أحب أفكر بحلول لمشاكلي بنفسي
بس حبيت أعرف رايكم
لأن صدق الموضوع ينرفزني كثير
ومدري شو الحل

وما ودي الناس يتضايقون
بس هذي المشكلة والله :24:

[روحَ]

اليوم فتحت الفوتوشوب وقررت أصمم

وطلعت بتصميمين :cupidarrow:



هذا الأول

https://up6.cc/2022/09/166456373618161.png

استخدمت أربع صور





وهذا الثاني

https://up6.cc/2022/09/166456373621222.png

هنا استخدمت خمس صور


ما كان في بالي شي محدد
بس اخترت الصور ودمجتها وهذي النتيجة =)

[روحَ]

في شي لاحظته من كثر التدقيق
والتركيز على نفسي
سبحان الله جسم الإنسان ذكي
ولما نمرض أو نتضايق يعطينا إشارات ويكون فيها الحل
وحتى لا إرادياً نتكلم عن الحل بدون ما نحس

مثلاً :
شخص متضايق
طول الوقت يقول أبي أسافر
> يكون علاجه انه يسافر

شخص ثاني
طول الوقت يقول أبي أشوف الناس
> يكون علاجه أنه يختلط بالناس ويشوف ناس

وشخص ثالث
طول الوقت يقول أبي هدوء
> يكون علاجه أنه يقعد بمكان هادي > هذا نفسي أنا


شخص رابع
لما يتضايق
يركز على الاهتمام والأسلوب والكلام
> يكون علاجه اهتمام و أسلوب حلو وكلام طيب


طبعاً أهم شي ما ندور ع الاهتمام بطريقة غلط
لأن كذا بنمرض أكثر وما بنستفيد شي


الزبدة
ركزوا على الكلام اللي ترددونه كثير
لما تتضايقون
وبتعرفون الحل والعلاج

وبس .. :MonTaseR_222:

[روحَ]

في شي أستغرب منه
لما أروح أجيب شغالة
ويقولون لي عندها خبرة وتعرف كل شي
ومشتغلة سنين

والله ما أشوف الخبرة اللي يقولون عنها
تقول مشتغلة 5 سنين وآخر شي أشياء بسيطة تسويها غلط
يعني مثلاً ما تنظف صح و ولا كأنها نظفت

مع أن هذا تخصصها وشغلتها
ولما أي حد يعمل لازم يتقن علمه أو يتركه لغيره صح ولا ؟

خواتي يقولون علميها كيف تنظف لأن أنت تخلين الأشياء تلمع
وعلميها كيف تطبخ أنتِ تطبخين أحسن

أنا بنجلط
صرت أحس كأن عندي طفلة لازم أدقق وراها
مع أنها كبيرة ولازم تكون مسؤولة وتعرف شغلها وما تنتظرني أدقق
وليش جايبينها إذا أنا اللي بعلمها
كذا لازم يعطوني أنا الفلوس لأني بعلمها كل شي من الصفر !

يعني مدري بس أحس الموضوع فيه غش !

ترى أنا مو تخصصي تنظيف وتطبخ وهالأشياء
بس علمت نفسي بنفسي
ومع هذا أشوف أني لازم أتعلم أكثر وتكون عندي شهادة
عشان أتقن هالأشياء
لأن مو أي حد يعرف ينظف ولا أي حد يعرف يطبخ
في طرق تكون صح وصحية
وفي طرق غلط وتجيب المرض !

أحس لازم يعطون الشغالة دورة
يعلمونها الأساسيات وكل شي وتاخذ شهادة بعدين تعمل
عشان تتقن عملها وتسويه صح
وبعدين نحن نعلمها على نظام بيتنا

لأن هذا الصح والله :)

[روحَ]

فرق بين التواضع واحتقار الذات

التواضع شي جميل
وحلو لما الإنسان يتواضع وما يشوف نفسه أحسن من غيره

بس احتقار الذات شي مو زين
أصلاً اللي يحتقرون ذاتهم هم اللي يتكبرون على الناس

احترام الذات شي حلو
ويكون نابع من معرفة الذات ومعرفة القدرات

اللي يحترمون ذاتهم ويقدرون ذاتهم
دايماً أشوفهم يحترمون الناس ويقدرونهم مثل ما يحترمون ذاتهم


بس طبعاً أنا ضد التواضع للناس المتكبرين
لأن أحس هالشي فيه مذلة





^ أبداً مو جاية من قسم النقاش :icon10:

[روحَ]

^ يعني قصدي أن في ناس عندهم صفة التواضع
بس ما أشوف عندهم احتقار للذات

بالعكس أشوفهم محترمين ذاتهم ويحترمون غيرهم


حبيت أوضح أكثر
وبس ~> عشان محد يفهم غلط

[روحَ]

ما تعجبني المقارنات بصراحة
أحسها تدل على صغر العقل وعدم التعمق

لأن اللي يظهرونه الناس مو كل شي
حتى لو كانوا قريبين منا
ف على أي أساس نسوي مقارنات !
مو كلنا عشنا نفس الحياة
ولا كلنا مرينا بنفس التجارب

ف النهاية لا يحمل الله نفساً إلا وسعها
كل حد عنده هموم على قده حتى الأطفال عندهم هموم

مرات أختي اللي معاي بنفس الغرفة
ما تعرف إذا كان في شي يضايقني
لأن عندي قوة تحمل و ما أقول شي

حتى مرة قالت لي أنتِ ليش ما تبكين
أقولها وليش تبني أبكي !
تقول ولا مرة شفت شكلج وأنتِ تبكين
أبي أعرف كيف شكلج

وتقولي
أنتِ الإيجابية ما تحزنين أبداً

أنا أقول الحمدلله أكون إيجابية
أحسن من أني أكون نكدية

[روحَ]

قاعدة أتأمل تصاميمي اللي سويتها وأحاول أفهمها

أحب أصمم بدون ما أفكر وأدقق كثير
وبعدين أشوف التصميم وأحاول أحلله و أفهمه

التصميم الثاني أحسه واضح

ذكرني ف هالكلام /
" وتحسب أنك جرم صغير وفيك انطوى العالم الأكبر "


وبعد ذكرني ف الكلام /
" رُبَّ روحٍ مِثلُ روحي عافَتِ الدُنيا المُضِرَّه
فَاِرتَقَت في الجَوِّ تَبغي مَنزِلاً فَوقَ المَجَرَّه
عَلَّها تَحيا قَليلاً في الفَضاءِ الحُرِّ حُرَّه "



أما التصميم الأول ما فهمته

مدري شنو جاب الحوت والسفينة
مع المجرة والكواكب !

بس الحوت دايماً أشوفه يعبر عن الحكمة مدري ليش
وقرأت بأن في ناس يشوفونه رمز للوعي والحكمة
ويذكرني ف قصة يونس عليه السلام

والسفينة تذكرني بقصة نوح عليه السلام

والكواكب تذكرني بقصة يوسف عليه السلام

بس المجرة مدري عن شنو تعبر !


> أفكر أسوي تصميم جديد وأشوف كيف بيكون

[روحَ]

في قصة سمعتها من زمان وعجبتني
كان في وحدة تعمل بمكان
وما كانت مرتاحة فيه ودايماً تصير مشاكل
وآخر شي تركت العمل هذا
وبعدها بفترة اشتغلت بمكان ثاني

وهي تتكلم تقول
الحمدلله أني تركت العمل الأول
لأني لو ما تركته ما كنت بعرف أن العمل الثاني يناسبني أكثر
وطبعاً المكان الثاني كانت مرتاحة فيه وعاجبها وكل شي

الزبدة
لا تستحملون العمل اللي يسبب لكم تعب نفسي وجسدي وعقلي

لأن العمل المناسب حتى تعبه يكون راحه
و ما بتحسون نفسكم مضغوطين
وبتحسون أن حتى الناس اللي فيه متعاونين
ويساعدونكم وما يضايقونكم

وبس

[روحَ]

كل المواضيع اللي تقول
كيف تتعاملين مع الناس عشان يحبونك
أسحب عليها على طول

وما أحب أقرأها وما تعجبني ولا أطبقها

بس أسوي الشي اللي يعجبني
إذا عجبهم زين
وإذا ما عجبهم أشوف غيرهم

ماله داعي للعذاب النفسي

أصلاً مو لازم يحبوني :MonTaseR_112:

[روحَ]

في كتاب قصص
عنوانه " قصص لا يسمحون لي بنشرها "

عجبتني القصة رقم 6
عنوانها " فخ "

عجبتني البنت اللي ف القصة
أذكر قلت ياليتني بمكانها > أصلاً أحس كأنها أنا :icon10:

شوفوا الشخص اللي ف القصة كيف كان يلعب
ويكذب وآخر شي طاح ف الفخ

وصار فيه نفس الشي اللي سواه ف غيره
طبعاً هو كان يخدع الأرامل والمطلقات
ويلعب على نقاط الضعف ويحسسهم أنه بيعوضم ومن هالكلام
آخر شي ياخذ فلوسهم ويسحب عليهم ويضحك عليهم
ويشوف أنهم غبيات لأنهم صدقوه > قمة النذالة

الفخ هو أنه حب وحدة من أول نظرة وطار عقله
وهالمرة مو أرملة ولا مطلقة وحبها صدق وقرر يتغير عشانها
بس هي اللي خذت حق كل الي لعب عليهم وخدعهم
طلعت هالبنت تعرفه وتعرف حقيقته وكل شي عنه
لانه خدع أختها وأختها انتحرت وقبلها تركت رسالة وكتبت كل شي عنه

أهم شي ف النهاية قاعد يصيح
ويقول أنا بريء مع أنه كان كذاب وخبيث

[روحَ]

من زمان ودي أسوي تصميم
ويكون كأنه غلاف رواية

وأمس سويت هالتصميم

https://up6.cc/2022/10/166544105903291.png

استخدمت صورتين فقط

واخترت هالعنوان
لأن أحس البنت اللي فالمراية كأنها مُضيئة
نفس القمر اللي فوق مضيء وكذا
رغم السواد اللي بكل مكان

> باقي أخترع الرواية بس عاد بعدي ما تخيلتها =)

[روحَ]

بعض الأشخاص أحس أنهم ما يعرفون يحكمون على الناس
أحكامهم تكون على حسب مصالحهم
شافوا شي يعجبهم يعني أنت ملاك
وإذا شافوا شي ما يعجبهم يعني أنت فيك كل العيب


ما أثق في أحكام مثل هالناس
وأحسهم دايماً متخبطين في رايهم وفي قراراتهم

اللي يعرف يحكم
يحكم صح من أول مرة أو ع الأقل من ثاني مرة
بس مو كل شوي يغير كلامه
واللي يعرف يحكم ما يشوف حد ملاك ويعرف أن حتى هو مو ملاك
ويدري كل إنسان فيه عيوب ومحد كامل

وأكثر شي صدق أحسه غبي
لما يفسرون كل مرض على أنه عقاب
على كيفكم !
ويكون الشخص المريض راضي
ويقول الحمدلله
ويكون في ناس واقفين معاه ويطمنونه

يعني لو عقاب بيكون راضي و بيقول الحمدلله ؟! :MonTaseR_166:

شوية عقل !

ولا عاد تحكمون على الناس بأحكام من راسكم
خلوكم ساكتين أبرك ! :xss:


^ ترا من هالغباء يجينا صداع

[روحَ]

من زمان جداً ما عصبت مثل أمس
كأنه أحد ضغطت على الزر اللي يخليني أعصب
فجأة صرت أتذكر كل شي يعصبني
وحتى الناس اللي ضايقوني من مية سنة
مع أني ما عشت مية سنة
بس عقلي يصير يتخيل أشياء ما صارت

والله حسيت قلبي بيوقف من كثر العصبية
وحتى كنت أبي أمسك الأشياء وأكسرها

^ شي مو طبيعي بس ما أعرف السبب !

لأنها حالة نادرة
يمكن لها علاقة بالتقلبات الجوية وكذا مدري !

أصلاً الوقت اللي لازم أعصب فيه ما أعصب
وتكون ردة فعلي باردة وأسكت
بس فجأة بيوم واحد و بدون سابق إنذار
أعصب وأطلع كل شي مرة وحدة :19:

[روحَ]

سوف تصل مؤخراً إلى قناعة أن
السلحفاة كانت أكثر حكمة من الأرنب
" لا شيء يستحق الركض "

[روحَ]

تعتقد ، والاعتقاد ظن وبعض الظن إثم
وللإثم عقاب !
فاحرص على أن لا ينتهي إعتقادك بعقاب !

من مدونة عطر الندى
تذكرت رواية
واحد قتل وحدة لأنه كان يعتقد أنها قاتلة
أرسل لها شخص يقتلها
وبعد ما ماتت أكتشف درجة غبائه

هو شاف أشياء عباله أدلة على أنها قاتلة
بس كانت مجرد أوهام
كان يحسب نفسه البطل اللي بينقذ الناس من القاتلة

وطلع ما عنده سالفة
عشان كذا لازم الإنسان يشغل مخه ويفكر زين
وما يتسرع ويقرر من أوهام وظنون

[روحَ]

زمان لما كنت أتكلم
كانوا يشكون فيني وما يصدقون كلامي
حتى وأنا صادقة
ويقولون عني ما ليس فيني
وكل كلامهم ظنون وأوهام
واليوم قاعدين يعيشون نفس الشعور بالضبط
وصار في ناس ما يصدقون كلامهم

أنا ما سويت شي
بس الدنيا دارت وورتهم أفعالهم

أتوقع الحين عرفوا كيف كان شعوري
وليش قررت أبعد عنهم وأروح مكان ثاني
واختار الناس اللي يصدقوني ويفهموني صح :26:

[روحَ]

مع أني أكره المواضيع اللي تتكلم عن الذكوريين والنسويات
وما تعجبني
بس في شي لاحظته وبقول رايي بكل صراحة

لاحظت أنه أصلاً ما يتكلم عن النسويات إلا الذكوري
وما يحاربهم إلا الذكوري
لأن النسويات مصدر تهديد للذكوريين
الذكوري يخاف من النسوية
هذا لأن ما يعرف يتعامل مع النساء ويأذيهم عشان كذا يخاف
يخاف تطلع له نسوية تسود عيشته

و عشان كذا دايماً يكون في وضعية الدفاع
ونظامه خير وسيلة للدفاع هي الهجوم عشان كذا يتهجم
ويحارب النسويات

عكس اللي مو ذكوري ما تهمه النسوية وما درى عنها
ولا يحاربها ولا شي ومشغول بأشياء أهم
ولأن واثق الخطى يمشي ملكاً
واللي مو ذكوري تجيه إنسانة طبيعية مو نسوية
لأن ما تفعله يعود إليك
تحترم النساء راح تجيك اللي تحترمك وهكذا

وأصلاً الخلل مو من النسوية
الخلل من الذكوري
لو مافي ذكوري ما بنشوف نسوية
يعني لازم هم يواجهون نفسهم ويعترفون بأخطائهم
ويغيرون نفسهم أول
الذكوريين فاهمين الدين غلط ويحسبون نفسهم فاهمين صح

وبس
انتهى النقاش :الحلا ذبحني:

[روحَ]

لفت انتباهي هالكلام وأنا أتصفح تويتر /


" ‏اذا قامت صديقتك بسرقة زوجك منك ،
‏فاتركيه ولا تحاولي الرجوع اليه ؛
‏لأن الرجل الحقيقي لا يُسرق
‏ولو كان يحبك لَما التفت لغيرك.."


شو رايكم ؟؟


أنا أقول صح
وبنفس الوقت يمكن تكون ساحرته
عادي في حريم يتعاملون بالسحر !

أو هي اللي تتلصق فيه وتمثل
وتستغله وتستغل تعاطفه معها مثلاً
وتقول‏ أنه يحبها وتطلع إشاعات
وهو أصلاً ما يبيها !

يعني في أكثر من رد
على حسب كيف سرقته
لازم نعرف التفاصيل عشان نرد !

_____

تراني شفت قصة مثل كذا
هي تبدأ تبادر وتتغزل وتحاول تدبس الرجال فيها
وبعدين تسوي نفسها مسكينة
وأن هي مظلومة وهو اللي يجري وراها ويخدعها ومن هالكلام
كله عشان تبي اهتمام وتبي تحس نفسها محور الكون


> ما يصير كله نوقف مع الحريم
لازم نكون منصفين شوي

[روحَ]

في الأخير على اسلوبك وشخصيتك هذي حتلاقي نفسك وحيدة ..

بسم الله وش فيها شخصيتي ترى أجنن الله يحفظني :DsC00581:

مافي حد وحيد أصلاً
حتى اللي يقول أنه وحيد في حوله ناس ويتعامل معاهم
الإنسان لو كان وحيد بيموت بسرعة لأنه ما يقدر

وأنا مكتفية بالناس القليل اللي يعرفوني وأعرفهم
والباقي ما يهموني
ومو لازم أعجب كل الناس لأن أنا مو كل الناس تعجبني

و لو لا اختلاف الأذواق لبارت السلع

ترى مستغربة لأن التقييم من شخص ما أعرفه أصلاً
ولا أذكر غلطت عليه بكلمة حتى
ف على أي أساس حكمت أنا مو فاهمة =) !

المهم لا تدقق كثير فالكلام اللي نكتبه ، طنشه .

[روحَ]

https://www11.0zz0.com/2022/10/31/14/630648960.png

[روحَ]

‏" لكي يستعيد الانسان عافيته لابد له من إجازة
يعتزل فيها البشر لمدة ستة أشهر على الأقل مرتين بالسنة "

^ لا أدري من القائل لكن صح كلامه :icon10:

[روحَ]

https://www12.0zz0.com/2022/11/04/12/766972598.png

[روحَ]

تعاطف بعض الأشخاص مع المجرمين
هل هو شي طبيعي ؟
أحس أنه مو طبيعي
لأن ما يتعاطف مع المجرم أو الظالم
ولا يبرر له إلا اللي مثله

نفس اللي يتعاطف مع المتحرش ويبرر له
ويحط اللوم على الضحية
حتى لو تكون الضحية طفلة ما تفهم شي

غريبين والله
ويقرفوني
ترا الغلط غلط وما له مبرر !

[روحَ]

ما هي رسالتك في الحياة ؟

يمكن لو حد سأل مثل هالسؤال
في ناس تجاوب وناس تقول ما أعرف
وفي ناس يمكن ماتوا وما عرفوا رسالتهم في الحياة

رسالتك في الحياة غالباً تكون مرتبطة بشي يسبب لك ألم
وأنت ودك تسوي شي عشان ما تتألم ولا تشوف غيرك يتألم من هالشي

مثلاً شخص شاف حد يحبه مريض ويتعذب بسبب المرض
وهالشي سببه له ألم وصار ما يحب يشوف حد مريض
بتكون رسالته الصحة
ومثل هالشخص يصير يهتم بالصحة كثير وممكن يصير دكتور
ومستشار أو أي شي له علاقة بالصحة وهكذا

اللي يعرفون رسالتهم
يظهرون لهم ناس نفس اهتماماتهم يساعدونهم أو يضيفون لهم أشياء
ويحصلون أصدقاء مناسبين يشجعونهم
ويجونهم أعداء يركزون على نقاط ضعفهم عشان يقونها
و تصير لهم ظروف وتجارب تعلمهم اللي يحتاجونه .. وهكذا

المهم
شنو أكثر شي يسبب لكم ألم وودكم تغيرونه ؟
وعرفتوا رسالتكم ولا بعدكم ضايعين ؟

[روحَ]

^ في رسائل تحتاج منصب ومال
وفي رسائل ما تحتاج منصب ومال كثيير
ل هالسبب الناس يختلفون
ومو كلهم يكون عندهم منصب أو مال كثير

واللي ما راح يفيدونكم في تحقيق رسالتكم
راح يصير بينكم وبينهم تنافر

[روحَ]

اليوم حلمت ف بنت كانت معاي ف المنتدى السابق
وكانت طيبة ومسالمة وعلى نياتها
بس ما حبيت الحلم
لأنها كانت حزينة جداً ومهمومة وما أعرف ليش
وصحيت من الحلم وأنا متأثرة


مدري وينها الحين
لما تقفل المنتدى
ما صار عندي طريقة للتواصل معها
وما أعرف أخبارها
بس إن شاء الله تكون بخير

ومن يدري يمكن تسجل هنا
وأقابلها مرة ثانية =)

كنت أفكر فيها قبل أشوف الحلم
ودايماً كذا إذا فكرت ف ناس
إما أشوفهم بالحلم أو أشوفهم صدفة بأي مكان

ويمكن قليل أتواصل وأتكلم مع الناس
بس أتذكرهم وما أنساهم
مع أنهم يحسبوني نسيتهم

[روحَ]

مشكلة البنات
يحسبون أن اللي تكلم شباب فقط
هي اللي ممكن تغريهم
مع أنها ممكن تغريهم لفترة قصيرة بعدين يملون منها

ترى حتى اللي مسوية فيها
الخلوقة المؤدبة المتواضعة وتتصنع المثالية
ممكن تغريهم
وممكن يكون تأثيرها أقوى

يعني بيطلع لك واحد يقول
حبيتها عشان أخلاقها جذبتني

المهم
كوني على طبيعتك وبس

أو صيري جنية أحسن

المشكلة حتى لو صرتي جنية
بيطلع لك جني يقول حبيتها
لأنها جنية مثلي وتشبهني وااو ههههه

يعني مافي فايدة
بو طبيع ما يجوز عن طبعه

كل واحد يحط عقله براسه
ويحترم نفسه ويغض بصره وخلاص
ما راح يشوف أي بنت تغريه

الخلل في العقول
إذا عقلك نظيف ما بتفكر ب هالأشياء قبل وقتها
وحتى لو عجبتك وحدة بتسكت
وبتشغل نفسك في بناء مستقبلك وتجميع فلوس المهر
بعدين بتروح تخطبها

وبس والله

[روحَ]

التسجيل » 23-11-2021
فترة الإقامه » 365 يوم

كملت سنة وأنا عندكم :icon10:

[روحَ]

https://up6.cc/2022/12/167111812291831.jpeg (https://up6.cc/)

^ فكرنا نمشي هنا ونغير جوو ونشم هواء نقي
وانصدمنا بريحة الشيشة
أكره شي عندي :13:
خربوا علينا مع أن الجو كان حلو

أحس لازم يمنعون الشيشة من هالأماكن
عشان نقدر نتنفس صح
عيوني دمعت من قوة الريحة :30:

[روحَ]

https://up6.cc/2022/12/167125584048691.jpeg (https://up6.cc/)

^ لما تعجبني شخصية أنمي
الأستديو صار كله صورها :icon10:

أحسها حلوة بكل الحالات :Dl3:

ودي أعرف منو رسم هالشخصية !
أحس أنه ذوق
وذوقه نفس ذوقي بالأشكال والملامح

وبعد أحس أنه طيب
لأن الطيب يرسم وجوه طيبة =)

[روحَ]

ماعرف كيف ريحة الشيشه مير ريحة السقاره يا انها تعجبني ههههه عموما غيري المكان وانجوي لبحر منظره يفتح النفس
هذا اللي سويته
غيرت المكان
ما أعرف شنو الفرق بصراحة

مع أن حتى البخور فيه دخان
بس عادي أستحمل البخور ويعجبني
بس مو كل نوع يعجبني طبعاً
> الناس أذواق

[روحَ]

كل يوم بمثل هالوقت أسمع صوت صراخ
كأنه أحد ينادي اسم شخص
نفس لما حد يصيح على حد ميت
ومو بس أنا أسمعه حتى أختي نفسي ومن زمان
والصوت من ورا بيتنا
لكن مدري من أي بيت بالضبط
ومستغربة كيف في حد يصارخ وما هذا محد يسوي شي
وليش بعده الصوت مستمر
وكل مرة نسمع نفس الصوت !

توترت وخفت بصراحة ولازم أعرف شنو السالفة
عشان ما أتوتر وأخاف
تركيزي تشتت ومو عارفة أتجاهل الصوت

[روحَ]

أحيانًا مثل هذا الوقت من الشتاء القطط تصدر أصوات غريبة جدا وأحيانًا كأنه بكاء أو نداء وقت الليل وقبل الفجر خاصة وبشكل متكرر، ركزي ربما مجرد أصوات قطط ! وإذا بيتكم قريب الجبل ربما أحد الثعالب البرية..
لا متأكدة أنه مو صوت قطط ومو ثعالب بعد
بيتنا بعيد عن الجبل
أحس أنه صوت حرمة تصارخ
وتقول اسم شخص
وفي صوت ديك بعد وقت الفجر
ف البداية قلت يمكن أنه صوت الديك
يعني ديك ثاني بس صوته غير عن الأول
بس لا مو هو
لأن فرق بين الصوتين والفرق واضح

المهم لما نمت بعد الفجر
شفت رؤيا عن هالموضوع
وعرفت من أي بيت
وف الحلم كانت حرمة اللي تصارخ
وكانت قاعدة برى ف بيتهم وتصارخ
وتقول إسم شخص وتكرره

بس بعدي ما عرفت شنو قصتها
يمكن تكون مريضة نفسياً وفاقدة شخص
هذا التفسير الوحيد اللي جا في بالي

والله أعلم

وترى صرت أسمع الصوت حتى فالنهار
بس مستغربة ليش محد يسوي شي !

[روحَ]

خلاص عرفت السالفة كلها وفهمت كل شي
لازم أقولكم السالفة عشان تعرفون مثلي
أنه مرات الأشياء ليست كما تبدو حتى لو صدقنا


بكتبها قريباً إن شاء الله

بس أبي أعرف أنتو شنو كان تفسيركم الأول
لما كتبت أول رد
إرتواء قالت صوت قطط أو ثعالب

وأنتو شو كان تفسيركم ؟

[روحَ]

الحين بقولكم شو سالفة الصوت

طلع تفسيري الأول هو الصح
لما قلت أنه صوت ديك
بس هذا ديك ثاني غير عن الأول
وصوته صدق كأنها صوت حرمة تصيح
بس لما نقرب أكثر يبين أنه صوت ديك

والقصة الثانية من اختراع عقلي
لأنه صدق كلام أختي
هي اللي سمعت الصوت قبلي وقالت أنه صوت حد يصارخ
وبعدين عقلي صدق السالفة واخترع القصة
وبعدها حتى العقل الباطن تأثر وجاب لي حلم مناسب للقصة

والله لين الحين أحس الصوت من بعيد
كأنه صوت حرمة تصارخ وأتوتر
الله يسامحه هالديك عقدني :19:

صدقت و تأثرت والله :MonTaseR_180:

لو ما فكرت أتأكد من الصوت بنفسي
ما كنت بعرف الحقيقة
> هذي الفايدة من التفكير




ما يستفاد من القصة :-

- اكتشفت أنه عندي قوة ملاحظة
بس لازم ما أمشي ورا أختي ولا أصدق تحليلاتها الخنفشارية

- التفسير البسيط يكون صح
أكثر من التفسير الطويل اللي يكون فيه قصة وفلم

- الأشياء ف الليل مو نفس النهار

- الأصوات لما نسمعها من بعيد غير ولما نقرب غير

- في أشياء نحسبها حقيقة بس تكون مجرد وهم

- لازم نكتب قصص أنا وأختي لأن خيالنا واسع ما شاء الله :110:


وبس

[روحَ]

اليوم مزاجي أرسم وألعب بالألوان


قررت أرسم هذا الطير

https://up6.cc/2022/12/167198232256851.jpeg (https://up6.cc/)













وهذي النتيجة
https://up6.cc/2022/12/167198218985331.jpeg (https://up6.cc/)

أدري أبدعت بسم الله علي
قولوا ما شاء الله لا تحسدوني :MonTaseR_166:

ترى مو لازم يكون نفس الصورة بالضبط
أهم شي الألوان نفسها
وأنتو تخيلوه طير وخلاص :icon10:



^ أهم شي الفكرة :الحلا ذبحني:

بس أحس الألوان ما عجبتني كثير
نوعها مو حلو
أفكر أشتري غيرها وأجرب نوع ثاني

[روحَ]

نرجع للتصميم أحسن :cupidarrow:




هذا آخر تصميم سويته
https://up6.cc/2022/12/167207365401191.png (https://up6.cc/)





وهذي الصور المستخدمة
https://up6.cc/2022/12/167207365404132.png (https://up6.cc/)


وبس :Dl3:

[روحَ]

https://up6.cc/2022/12/167207997112171.jpeg (https://up6.cc/)

من زمان ما شفت مثل هالأجواء :MonTaseR_169:

برد الصراحة > أخيراً حسيت بالبرد :icon10:

كل يوم أشغل المكيف
واليوم أول مرة أشغل الدفاية :Dl3:

[روحَ]

صباحك سعادة روح اتمنى تعطيني صوتك بمسابقة القصة رقمي 7 وممتنة لكِ
للأسف ما قرأت ولا قصة
وكان لازم أقرأ كل القصص قبل ما أصوت
وإذا عجبتني قصتك أكيد كنت بصوت لها بدون تحيز

بس ما كان لي مزاج أقرأ
وهذا مو تقليل من قصصكم
يمكن تكون كلها جميلة

المرة اللي طافت قرأت كل القصص وبعدين صوتت
> النظام نظام
بس هالمرة ما لحقت للأسف =)

[روحَ]

تضحكني ثقة الناس
اللي يتكلمون عن الذوق والأدب والأسلوب
و أنا أصلاً ما أتجنبهم
إلا لأني شايفة أسلوبهم كريه ومو عاجبني

^ الثقة الزايدة مشكلة

[روحَ]

https://youtu.be/KG7DKSPQTSs

^ أنا وبنت أخوي نحب هالمقطع :icon10:

سبحان الله النمر الجوعان موجود نفسه بكل مكان
وبكل منتدى في نفسه
طبعاً أهم شي يتصنع ويمثل ويسوي نفسه أخلاق وكذا
عشان يصدقونه بسرعة ويطيحون ف الفخ

ما يدري أنه مكشوف وفاهمين حركاته:xss:

[روحَ]

‏https://up6.cc/2023/01/167291720283721.jpeg (https://up6.cc/)

كان عندي حوض سمك نفس هذا
وفي سمكة عجبتني
قلت خلاص هذي حقي واخترت لها اسم

بعد فترة كل شوي تموت سمكة
كلهم ماتوا بسرعة
إلا سمكتي كانت صامدة
وهي آخر وحدة ماتت

كل مرة أتذكرها وأذكر قوتها وصمودها


واليوم قررت أرسم سمكتي اللي ماتت



هذي هي
https://up6.cc/2023/01/167291781645061.jpeg (https://up6.cc/)

^ الفكرة أنه مو لازم نركز في التفاصيل
الحين لو رسمتها مع التفاصيل ولا بدونها
واضح أنها سمكة صح ولا ؟

ف ليش نعقد حياتنا ونركز فالتفاصيل
إذا كانت الصورة الكاملة واضحة !


^ أصلاً ما عندي وقت أرسمها مع التفاصيل :24:
عشان كذا قاعدة أتفلسف :icon10:

[روحَ]

اليوم خليت لولو الصغيرة تلون
من فترة وهي تشوف ألواني وتبي تلون




شوفوا هذا تلوين وحدة عمرها سنتين :MonTaseR_169:

https://up6.cc/2023/01/167300111222561.jpeg (https://up6.cc/)

هنا أنا اخترت الألوان
وردي / أبيض / أزرق



https://up6.cc/2023/01/167300111224472.jpeg (https://up6.cc/)
وهنا هي اللي اختارت الألوان
حبيت اختيارها أكثر
وهاللوحة عجبتني أكثر من الأولى

أنا ما ساعدتها إلا شوية بس
وهي سوت الباقي بروحها :cupidarrow:

طلعت فنانة :0741:

[روحَ]

أول مرة أرسم لوحة بالألوان المائية
قبل رسمت أزهار فقط
والحين رسمت هذي

https://up6.cc/2023/01/167302260500961.jpeg (https://up6.cc/)

من زمان هالصورة ف بالي
وأبي أرسمها > أهم شي الشلال و النهر :نبض:
بس أحس الشلال ما ضبط !
ما عرفت أرسمه زين
تعبني كل شوي أمسح وأعدل :MonTaseR_203:

[روحَ]

https://up6.cc/2023/01/167319314456421.jpeg (https://up6.cc/)

هالكتاب اشتريته من زمان
وأمس بس فتحته وقررت أتعلم
لأني ما أحب الشرح لما يكون من كتاب

بس بصراحة حلو وفيه كل شي ومعلومات حلوة
يعني الي يبون يتعلمون الرسم بالألوان المائية بيعجبهم

وبعد في واحد ثاني لتعلم رسم الأزهار
أنا اشتريت الإثنين
وأكثر شي أحب رسم الأزهار :0741:

طبعاً هنا رسمت شي بسيط
بعدي ما تعلمت كل شي

وبس :MonTaseR_1:

[روحَ]

https://up6.cc/2023/01/167335789857111.jpeg (https://up6.cc/)

^ يعجبني هالنوع من اللوحات

ما شاء الله حتى خرابيشهم فن إبداع :m42:

الحلو فيها أنها مو مفهومة
بس مع هذا جميلة

ودي أسوي لوحة نفس كذا بس أحسها صعبة :24:

[روحَ]

لاحظت دايماً يطلعون لي النرجسيين بكل مكان
بس هذا من سوء حظهم والله
لأني دايماً أغلبهم ف النهاية وكل أفعالهم السيئة ترتد عليهم
بطريقة مؤلمة ومُدمرة وتصير حياتهم تعيسة
مع أني أتعامل بالظاهر وما أحب أسيء الظن
ولا أحب أفكر بنوايا الناس كثير وأحسب الناس يفكرون مثلي

لكن سبحان الله أغلبهم بكل بساطة
حتى لو كانت الحرب صعبة ف البداية
و حتى لو كانوا أقوى وأكبر مني وحتى لو كانوا مثقفين ومتعلمين وعندهم شهادات
كلهم كنت أغلبهم وغلبت نرجسيين كثير قبل

وإن شاء الله الباقي في الطريق وبضيفهم للقائمة قريباً

وبعد لاحظت كلهم نقطة ضعفهم نفس الشي
يحسبون نفسهم أذكياء و واثقين من نفسهم بزيادة
ويحسبوني ضعيفة ويستهينون فيني ويحسبوني ما أقدر أسوي شي

بس والله أفوز عليهم حتى لو أكون ضعيفة
أصلاً بعمره الخبيث واللي نيته شينة ما فاز ولازم يخسر

عشان كذا بس صفوا نيتكم و بتفوزون
حتى بتشوفون أن الله يساعدكم ويسخر لكم ناس يدافعون عنكم
أو يبعدهم عنكم ويكشفهم أو يجون ناس يحذرونكم منهم وهكذا ..

[روحَ]

إذا عرفتي السر في عمل مثل هاللوحات التجريدية شاركينا أنا كل ما أروح محلات الأثاث والديكور لازم أوقف دقيقة صمت أمام هذه الفنون العشوائية الجميلة!
حتى أنا نفس الشي

طلع في تقنيات وحركات وكذا
اكتبي ف اليوتيوب تقنيات الفن التجريدي وشوفي =)

[روحَ]

في مقطع سمعته
يتكلم عن تأثير الكلام اللي نقوله عن نفسنا

هذا واحد أجنبي كان يقول
أنا في بداية السنة بيقبضون علي ويحطوني ف السجن
وصار مثل اللي قاله بالضبط
مسكوه في بداية السنة وحطوه ف السجن

^ مثل ما قال كلام سلبي وصار
يمكن لو قال كلام إيجابي كان بيصير

يعني انتبهوا للكلام اللي تقولونه عن نفسكم

[روحَ]

أنا مليت وأنا أقول لنفسي بسافر اليابان كل سنة وما أسافر لها أظن تأثير الكلام السلبي أقوى بكثير من الايجابي، لهذا فعلًا لازم ناخذ حذرنا!
صح يمكن الكلام السلبي أقوى
وبعد هذا الشخص مو مسلم ويمكن أعماله السيئة كثيرة
بس المسلم ممكن يقول كلام سلبي
وبنفس الوقت عنده أعمال صالحة تدفع عنه البلاء
ف ما يتحقق الشي السلبي

وبعد أنتِ تقولين تبين تسافرين اليابان
بس ما تدرين يمكن خيرة أنك ما تسافرين
عشان كذا ما تحقق
وبعد اللي يكون عندهم تعلق كبير ف الشي اللي يبونه
ما يتحقق لهم الشي اللي يبونه بسرعة
لازم يحلون مشكلة التعلق أول
وفي كثير أسباب ثانية ممكن ما تخلي الشي اللي نبيه يتحقق

في كتاب يتكلم عن هالمواضيع وعجبني
عنوان الكتاب " اسأل تعط " تعلم أن تظهر رغباتك

[روحَ]

بصراحة أنا مب مقتنعة بكلام اللي يقولون
محد يعرفنا أكثر من نفسنا

" إن لله عباداً يعرفون الناس بالتوسم "

"اتقوا فراسة المؤمن؛ فإنه ينظر بنور الله"


^ دايماً في ناس يعرفونا أكثر من نفسنا
حتى لو أنكرنا هالشي


وبعد لما تمرضون تروحون عند الطبيب
لأنكم مرضى بس مو فاهمين المرض
ومو فاهمين نفسكم وما تعرفون الحل
بس هو يكون فاهم لأن هذا تخصصه وعنده خبرة

ولما تبون تتعلمون شي تروحون عند معلم
وتدرسون وتذاكرون سنين عشان تنجحون
لأنكم ما تعرفون كل شي

بس طبعاً مو كل دكتور شاطر
ولا كل معلم شاطر
على حسب التجارب والخبرة وهكذا ..

[روحَ]

https://up6.cc/2023/01/167396295252051.gif (https://up6.cc/)

https://up6.cc/2023/01/167396295319262.gif (https://up6.cc/)

أحب شجرة الساكورا / جميلة :m42:

[روحَ]

لما أصور أي صورة
أحب تكون فيها إضاءة
عشان الألوان تبين واضحة

نفس هالصورة
https://up6.cc/2023/01/167396590266081.jpeg (https://up6.cc/)


عكس خواتي يحبون يضيفون تأثير
مدري ليش !

نفس هالصورة
https://up6.cc/2023/01/167396599937791.jpeg (https://up6.cc/)
^هذا التأثير الدافئ

أنا ما يعجبني هالتأثير
أحسه يبهت الصورة
ويخلي الألوان مو طبيعية ومو واضحة

بس سبحان الله الناس أذواق :19:

[روحَ]

الشخص المناسب سيظهر لك في وقته
وأمنيتك ستتحقق في وقتها المناسب
ومشكلتك ستُحل في وقتها
وأزمتك ستزول في وقت زوالها
والقلق والهم لا علاقة له بتعجيل أي شي من ذلك
فعش حياتك مطمئناً بعيداً عن ألم الانتظار والترقب

[روحَ]

https://up6.cc/2023/01/167412961861041.jpeg (https://up6.cc/)
^ قاعدة أفكر
الحين مين اللي بيصفع الثاني
أنا ولا توأمي المفقود !

أتوقع أنا لأني أحب التكفيخ :l:

وبعد مذاكرة الحياة زين وأعرف أعطي دروس :85:

[روحَ]

‏https://up6.cc/2023/01/167415241222821.gif (https://up6.cc/)

‏https://up6.cc/2023/01/167415243618631.gif (https://up6.cc/)

‏https://up6.cc/2023/01/167415246541171.gif (https://up6.cc/)

‏https://up6.cc/2023/01/167415250879941.gif (https://up6.cc/)

‏https://up6.cc/2023/01/167415253948991.gif (https://up6.cc/)

[روحَ]

_





https://up6.cc/2023/01/167415293855341.gif (https://up6.cc/)

أحلى شي عندي الشلال :نبض:

[روحَ]

https://up6.cc/2023/01/167424547518911.jpeg (https://up6.cc/)

^والله صدق

مرت أخوي تعرف تفتح مواضيع وتسولف
ف هي عادي أسولف معها بسهولة
مع أنها مو دايماً تفهم علي صح لأنها اجتماعية وأنا انطوائية
دايماً تحسني نفسية ومعقدة :19:

أصلاً ما يفهم النفسيات إلا النفسيات
حتى لو ساكتين =)

أحلى شي إذا قلت كلام بأسلوب غير مباشر
على طول يفهمون
وطبعاً أنا أكون متعمدة وأدري بيفهمون قصدي :icon10:

[روحَ]

في مقطع شفته من زمان
لين الحين مأثر فيني
كان في واحد يصور يومياته
ف مرة صور مع ولده وهو ف السيارة
يبي يوصله المدرسة
والولد كان يبكي ويقول قلبي يعورني
بس الأبو حسبه يتدلع عشان ما يبي يروح المدرسة
وقاله أنت لازم تروح ومن هالكلام
وراح المدرسة
بس بنفس اليوم توفى الولد وهو فالمدرسة

لما تذكرت المقطع اليوم تأثرت نفس أول مرة
و لأن صار شي ذكرني فيه

بس الشي الإيجابي بعد ما شفت هالمقطع
صرت أركز ف كلام الأطفال
حتى لو مو مفهوم وأحاول أفهم
وبعد لما يبكون أحاول أعرف السبب
وشنو المشكلة وشنو الحل

في ناس يقولون أن الأطفال يبكون بدون سبب
ويتدلعون بس مب مقتنعة
أكيد في سبب حتى لو بسيط

ومن تعاملي مع بنت أختي وبنت أخوي
كانوا لما يبكون ونحسب بدون سبب
يكون في سبب
ومرات السبب يكون مو طبيعي

الزبدة
ركزوا ف كلام أطفالكم ولا تتجاهلونهم
لأن يمكن يكون الشي مهم أو خطير

[روحَ]

على طاري البكاء
مو كل الناس أتأثر لو بكوا
بعضهم حتى لو يبكون ما أتأثر ولا أشفق عليهم
مدري ليش !
بس يمكن لأنهم شريرين ومو طيبين
مو كل حد يبكي يعني مسكين ومظلوم :26:

الأطفال أكثر شي يأثرون فيني
ولأنهم ما يعرفون يتكلمون ويعبرون بسهولة

[روحَ]

جربت أسوي إخفاء للرمزيات والتواقيع
من تعديل الخيارات
وكأنه عجبني الوضع
أحس نفسي كأني فالقسم الإسلامي =)

بصراحة في رمزيات ما تعجبني
أحسها مو مريحة
ولما تطلع ف وجهي تضايقني وما أحب أشوفها

[روحَ]

https://up6.cc/2023/01/167439682208121.jpeg (https://up6.cc/)

أنا شفت كلمة " قوة "
وبعدين " حياة "
وبعدين " دفء "

وانتو ..؟

[روحَ]

من أسباب الهدوء
أنك تكون نفسك مثل ما أنت
بإيجابياتك وسلبياتك وكل شي
وما تلبس قناع وتمثل شخصية عكس حقيقتك
وتتصنع الطيبة والمثالية عشان ترضي الناس
وتبيهم يحبونك غصب عنهم ويشوفونك مثالي وكامل

[روحَ]

عندي دفتر محتفظة فيه من أيام المدرسة
كنت أخلي البنات يكتبون فيه أي شي للذكرى
> يعني في نهاية السنة قبل ما نفترق

مرة فتحت الدفتر وصرت أقرأ الكلام
وتذكرت وحدة من البنات
وكنت أفكر فيها وأقول ودي أشوفها وأعرف أخبارها وكذا
لأن من بعد المدرسة سبع سنين ما شفتها
يعني كانت معرفتي فيها بحدود المدرسة فقط

المهم
بعدين صرت أشوفها فالحلم
أكثر من مرة شفتها
وكنت مفكرة إنه خلاص ممكن أقابلها يوماً ما
حتى لو صدفة > واثقة

بعد الحلم بفترة
بيوم كنت قاعدة ع الكرسي بمكان
وكنت بنفس اللحظة أتذكرها وأقول بخاطري
أتخيل أشوفها اليوم
ولما رفعت راسي شفتها واقفة قدامي
طبعاً تفاجأت وما توقعت بشوفها بنفس اللحظة
ولما كلمتها قالت حتى هي كانت تتذكرني وشافتني بالحلم

طلعت مو بس أنا وحدي أتذكرها
هي بعد ما نستني
استانست بصراحة وعجبني المفاجأة

ل هالسبب أنا ما أشوف أي شي مستحيل
عادي إذا أبي أشوف ناس ممكن أشوفهم
وإذا أبي أحصل شي عادي أحصله حتى لو صعب
لأن إذا الله أراد الشي يصير أكيد بيصير

وترى مو أول مرة وفي غيرها بعد
مع أن ساكنين بعيد عنهم وما يعرفون وين بيتنا حتى =)


مو بس الناس
حتى مرة صار لي موقف مع قطوة كانت عندنا
كانت علاقتي فيها من بعيد بس أتقبلها وحتى هي تتقبلني ودايماً تقرب مني
بس مو الكل يحب القطط عندنا

ف قالوا بياخذونها ويحطونها بمكان بعيد
عشان خلاص تشوف مكان ثاني وناس غير يهتمون فيها

خذوها بعيد بالسيارة

وكنت أتذكرها مرة وبعدين شفتها بالحلم
وبعد يومين رجعت
لما شافوها كلهم استغربوا كيف رجعت !
وأنا بعد استغربت ما كنت أعرف أن القطط ذكية ل هالدرجة
مدري كيف عرفت مكان بيتنا و رجعت مع أنهم حطوها بمكان بعيد

ولما رجعت
قالوا شووفي رجعت عشانج
وفعلاً تجاهلتهم كلهم وجاية عندي تدورني

> حبيت المشهد كان كأنه فلم =)

[روحَ]

في قصة حلوة سمعتها
تتكلم عن التوقيت الإلهي
وأن الوقت اللي الله يختار لنا
أحسن من الوقت اللي نحن نختاره

في اثنين كانوا بيسافرون وحجزوا التذاكر
بس صار بينهم خلاف وانفصلوا فترة
وطبعاً قالوا خلاص ما بنسافر > كيف يسافرون وهم متخاصمين

وبعدها بفترة تصالحوا
وقالوا الحين نبي نرجع الحجز ونسافر
وراحوا يكلمون المكتب
في المكتب قالوا لهم عادي نرجع الحجز
بس بتروحون كل مكان إلا الجزيرة

قالوا خلاص موافقين ومانبي نروح الجزيرة
بعدين لما سافروا
سمعوا أن هذيك الجزيرة اللي كانوا بيروحون لها
صار فيها تسونامي !

في هاللحظة استوعبوا
أن كل شي صار من البداية كان خير
وأن الله يبي يحفظهم من التسونامي

عشان كذا حتى لو تخاصمتوا مع حد وافترقتوا
قولوا الحمدلله يمكن خيرة
ويمكن بعدين تتصالحون من يدري !

وإذا ما صار الشي بالوقت اللي تبونه يمكن خيرة

[روحَ]

بتكلم شوية عن " الموهبة "
هذا كلام سمعته ف مقطع واستفدت منه

الناس غالباً ما يعرفون مواهبهم
أو يمكن ما يلاحظونها لأنهم تعودوا عليها
ف ما يحسون أنها شي مميز
وحتى الأشخاص اللي حوالينهم يمكن ما يلاحظون مواهبهم
لأنهم متعودين على الشي ويشوفونه عادي

بس الناس الجدد اللي تعرفونهم من أول مرة
هم اللي يلاحظون مواهبكم
ولأنهم مو متعودين عليها يشوفونها شي مميز
ف لما يقولون لكن عندكم موهبة في شي
صدقوهم واهتموا فالموهبة وطوروها واستفيدوا منها صح
لأن هذي الموهبة بتكون كأنها كنز

إذا تبحثون عن كنز
لا تروحون بعيد
تراه موجود عندكم
أنتو الكنز بمواهبكم وقدراتكم
والأشياء اللي تميزكم عن غيركم

ركزوا على كلام الناس الجدد لما يمدحونكم على شي
أو لما يلفت انتباههم شي فيكم ويحسونه مميز
أو اسألوهم شنو المميز فيني وراح يقولون لكم

ولا تهتمون لكلام الناس اللي يشوفونكم عاديين
ترا محد عادي كل حد مميز

( وَفِي أَنْفُسِكُمْ أَفَلا تُبْصِرُونَ )

كل شي الله خلقه مميز وجميل ومُبهر
بس مو كل العيون تشوف الجمال
أكثر الناس يركزون ع الجانب المظلم وما يشوفون الجانب المشرق

والإنسان لو يركز على نفسه
بيشوف فيه آيات وفيه أسرار وفيه كنوز

ولما يركز على نفسه ما راح يطالع غيره ويغار منه
لأن حتى هو يقدر يكون الأفضل
و لأن القمة تتسع للجميع

كل حد يقدر يكون محور الكون من المكان اللي هو فيه
عشان كذا يقولون " نحن في الكون والكون فينا " .

[روحَ]

مرات لما أحس بالملل أحب أكتشف الأشياء

تشوفون الزهرة اللي في رمزيتي ؟
عجبتني من أول نظرة
لفتني شكلها ولونها الأبيض
وما كنت أعرف عنها ولاشي


واليوم قررت أبحث وأكتشفها =)

‏https://mrkzgulfup.com/uploads/167508290664951.jpeg (https://mrkzgulfup.com/)

^ هذي هي نفسها
يسوون فيها باقات للعرايس =)


وهذي المعلومات /

‎زهرة البيوني أو الفاوانيا من الزهور التي ترمز إلى الكرامة والغنى والازدهار والرومانسية، كما أن البعض يعتبرها زهرة الحظ الجميل والسعادة، وتُصنف تلك الزهرة على أنها من الزهور النادرة، فهي تنمو في المناطق الجبلية التي يتجاوز ارتفاعها الألف متر.

‎تُزهر زهرة البيوني في فصل الربيع؛ وبالتحديد خلال شهري آذار ونيسان، وتتميز بحجمها الكبير عند تفتحها، كما أن لها رائحة مميزة، وتتوفر بعدة ألوان؛ الوردي، والأبيض، والأحمر، والمرجاني.

‎تنمو زهرة البيوني في كل من؛ غرب أمريكا الشمالية، وآسيا، وجنوب أوروبا، كما تزهر في سوريا، وتعد البيوني الزهرة الوطنية في الصين، ويوجد لتلك الزهرة ستة أنواع، ولكل منها رائحة مميزة، فبعضها له رائحة تشبه الورد، والبعض الآخر له رائحة شبيهة برائحة الليمون، كما أن بعض الأنواع ليس لها رائحة مطلقًا.


وطلع لها فوائد بعد
ومن فوائدها أنها تستعمل كمهدئ


وبس

كنت أشوفها مجرد زهرة وعجبني الشكل فقط

الحين صرت أشوفها جميلة ونادرة ومفيدة
وعجبتني أكثر > شكلها بتصير زهرتي المفضلة =)

[روحَ]

مساء الورد :ah11:

اللي يفكرون وين اختفت روح
ترى مشغولة قاعدة أذاكر و أتعلم الرسم

والحمدلله أنا بخير مافيني شي =)




صور من مذاكرتي اليوم

https://up6.cc/2023/02/167551465820291.jpeg (https://up6.cc/)

رسمت أول وحدة نفس الكتاب
بعدين رسمت أي شي من عندي > يعني أخربش وأجرب وكذا




وهذي النتيجة
https://up6.cc/2023/02/167551465821962.jpeg (https://up6.cc/)

أحس في تطور شوي بس يبغالي أتدرب أكثر =)

> أهم شي أشجع نفسي بنفسي :ورد:

[روحَ]

على طاري الرسم

ترى رسم ذوات الأرواح محرم
ابحثوا و شوفوا الحكم بنفسكم

عشان كذا أنا اخترت رسم الأزهار
وممكن بعدين أجرب أرسم أشياء ثانية
يعني مثل الجمادات وكذا
لأن قرأت بأنه عادي نرسم النبات والجماد ، والله أعلم .

[روحَ]

إذا أخذت موقف من شي أتحسس
وما أغير موقفي بسرعة
مرة أخذت موقف من الإدارة ف المنتدى السابق
والحين خلاص كل الإدارات اللي ف الكرة الأرضية ما أتقبلهم
ولا أحب أحتك > على طول أسوي تحديد الكل
أدري مو الكل نفس الشي بس صعب أغير موقفي لما أتحسس
وبنفس الوقت أكيد ما بغلط عليهم
اللي يحترموني أحترمهم بس أتجنبهم

المهم
مرة صارلي موقف لما كنت مراقبة
في عضو نزل موضوع ف قسم الصور
والموضوع كان فيه صور أحضان يعني عيب وحرام
رحت نقلت الموضوع للمحذوفات على طول
لأني مراقبة ولازم أحذف المخالف
ومن القوانين نحذف أي شي مخالف لتعاليم الدين الإسلامي

تصرفي كان صح وتصرفت بدون ما أسأل الإدارة
لأن ما يحتاج أسأل أصلاً وعندي خصائص الحذف والتعديل
مع هذا العضو اشتكى علي في قسم الشكاوي
وقاعد يتبكبك ويعني أنه مظلوم ومعصب مني
وكان أول مرة حد يشتكي علي والحمدلله ما كنت غلطانة

بس اللي استغربته
أن المدير وقف مع العضو ويقول أنها صور عادية
ويعني صور رومانسية وعادي
وليش حذفتي الموضوع !
كنت بنجلط من بروده و طريقة تفكيره
ما كان شايف أن الصور مخالفة مدري كيف !
يمكن لأنه تعود وصار الوضع عادي عنده
بس الغلط غلط حتى لو الكل يسويه ولازم نتكلم وما نسكت
وخاصة أني كنت مراقبة

وكنت كثير ألاحظ أشياء وأنبه عليها وأتكلم بس مافي فايدة
الإدارة كانت تمشي على كيفها أكثر شي وكثير كلام تهمشه مع أنه صح
قلت خلاص ليش أستمر مراقبة مابي وطلبت إعفاء
والله لما صرت مشرفة ومراقبة كنت كل شوي أتعب وأمرض
ولما طلبت إعفاء ارتحت كأنه هم وانزاح

بعدين استوعبت أني لما كنت مستمرة
كنت كأني راضية وأعينهم على الخطأ والظلم
عشان كذا كنت أتعب وأمرض

ومن يومها وأنا أكره أكون من الطاقم الإداري ف أي منتدى
وأكره المناصب كلها ولا أبي أمسك أي منصب

[روحَ]

من تعاملي مع الأطفال
ومن تجربة لاحظت
نقدر نتحكم ف شخصياتهم ومزاجهم
لما نتحكم ف نوع الغذاء

يعني لو عطيناهم غذاء ينشطهم
أكيد راح يصيرون جن ويتعبونا وصعب نتحكم فيهم ونسيطر
بس لما نعطيهم غذاء يخليهم هاديين ورايقين ما راح يجننونا
كذا ما بتحتاجون تهاوشونهم وتكفخونهم عشان تسيطرون عليهم

ما ينفع نعطيهم غذاء ينشطهم
إلا إذا بيروحون المدرسة أو بيروحون يلعبون
لكن لو قاعدين في البيت وما راح يسون شي ما ينفع
لأن وين راح يفرغون طاقتهم ؟!

كذا راح يجننونكم وبعدين بتعصبون ويمكن تضربونهم
والعنف الأسري مو زين وجريمة ويسبب عقد نفسية للطفل

وأنا ما أرضى على الأطفال :26:> شكلي بصير المدافعة عنهم

[روحَ]

مرة شفت ناس يقولون شو الفايدة من الرسم !
طبعاً لأنهم ما يحبون الرسم يقولون هالكلام
ويحسون ماله فايدة


المهم
شوفوا هذي فوائد الرسم


- يساعد الرسم على تخفيف الشعور بالإجهاد وتحسين الحالة المزاجية للإنسان.

- تساعد ممارسة الرسم والكتابة على تقوية الذاكرة.

- يساعد الرسم على التعبير عن المشاعر، مما يساعد فى التغلب على الخجل وزيادة الثقة بالنفس.

- تحسين مهارات الاتصال، حيث يعتبر الفن الطريقة الوحيدة للتعبير عن المشاعر دون التواصل اللفظي، لذلك يمكن للمرء أن يعبّر عن مشاعره دون قيود أو خجل .

- يساعد رسم اللوحة على زيادة حركة عضلات اليدين والأصابع.

- تساعد ممارسة فن الرسم على تعلم فن الصبر لإنجاز اللوحة بكل دقة وتنسيق ألوان.

- يعزز الرسم من المشاعر الإيجابية عند الإنسان، حتى إنه يشعر بالرضا والعظمة والتفاؤل والثقة بالنفس عندما يشيد أحد الأشخاص بلوحاته.

- العلاج بالفن يساعد على تقوية الذكاء العاطفي من خلال استخدام الإنسان الرسم للتعبير عن ذاته، الذى يتطلب التفكير مليًا في شعوره الحالي والسبب وراء ما يشعر به سواء كان "حزين أو فرحان أو غضبان".

[روحَ]

أفكر أوقف الكتابة ف مدونتي
أحس اكتفيت
ومن يزيد عدد المشاهدات نفسيتي تتعب
> ما تحب الشهرة =(

هذي بتكون آخر مشاركة إن شاء الله :m42:

[روحَ]

_



نكمل ال 300 مشاركة