ايها البطل

نعم أقصدك أنت
انت البطل يا صديقي ..
لأنك تخوض معركة الحياة كل يوم ولازلت تقاوم بكل شجاعة

ايها البطل .. هل حصل يوم وطحت؟

لالا .. لا أقصد التشبيه المزاجي للطيحه

بل أقصد الطيحه الحقيقيه ياحلو



اعجبني كلام واحد يقول لما تطيح
ثم ترفع رأسك .. وتتأكد ان فعلا محد شافك
هنا حتما ستكون الفرحة أكبر من الألم

تذكرت موقف لواحد من اخواني زمان
رحنا انا وهو نشتري فطور للبيت
المهم وهو راجع من الفوال …. يد فيها الفول واليد الثانيه فيها تميس
والأرضيه الي هو ماشي عليها كانت بلاط
وكان عليها شوية مويه

وفجأه وبدون مقدمات وحده من رجوله حذفت يمين .. والثانيه حذفت يسار
حاول جاهدا أن يستعيد توازنه .. ويحافظ على سلامة التميس من السقوط
ولكن الفيزياء لعبت فيه ذاك اليوم .. لاهو الي استعاد توازنه
ولاهو الي طاح واستراح

كان المشهد عباره عن مقاومة انزلاق من جميع الزوايا .. وقوة دفع وجذب ..
كنت أنا في السياره اطالع فيه وهو يصارع السقوط ..
ويقدم عرض استثنائي في فن الرقص على البلاط المبلل
وكأنه جالس يرقص راب بمهارة عالية ..مع حفاظه الكبير على الفول والتميس من السقوط

المهم …وبعد مقاومه وجهد كبير الحمد لله استعاد توازنه .. وجاني وهو متفشل

واول شي سأل عنه ( فيه أحد شافني )؟

اركب اركب يابطل .. الحمد لله على سلامتك وسلامة الفطور بس

مواقف الأعضاء مع الطيحات


أخ يا الطيحات يا رايق ههههه لا تذكرني خصوصا إني مرات أستعجل ، الله لا يوريك

اجل لك حكايات وحكايات مع الطيحات .. دام انك من شلة المستعجلين


رايق لا تذكرت لمن طحت قدام الناس كنت اجري ورا ولد اخوي كان صغير وخفت عليه ورحت اطارده الحيوان وقف فجاه وانا سويت فرامل وطحت اخخخخ ي الفشله كان بالبلد بالساحه الكبيره عاد كل واحد جالس ع الدرج والموقف قدامهم وقتها تمينت الارض تنشق وتبلعني

ههههههههههههههههههه
المشكله ان المكان الي ذكرتيه هذا ملياااااااان عالم
ومستحيل تلاقينه فاضي ههههههههه
والله موقف لا تحسدين عليه .. ههههههه
سلامات سلامات والله >> جالس يضحك من قلب



ههههههههههههههه والله ما قدرت أمسك ضحكتي .. وربي فشله الموقف الله لا يحطنا فيه يارب .. وصفك تحفه


دوم يارب … ايوالله .. الله لايحطك في مثل هـ المواقف


من الناس لو واحد سوى قدامي حركة خوييك وتزحلق ما امسك نفسي يذبحني الضحك بالذات الزحلقه .. وانا اذا تزحلقت يذبحني الضحك على نفسي تحسها طيحه هبله وانت تهابد تحاول توزن نفسك ..مثل البعارين لاقامت تتزحلق فالربيع شوفها باليوتيوب

شوف انت مع نفسك تضحك على نفسك هذا شي حلو
لكن مع الغير .. حرام عليك بيتفشل زياده مع ضحكك
ايه شفت الابل الي تتزحلق في اليوتيوب ههههههههه
بس ياخي الجميل انها ما تتفشل ولا تستحي ولا يضحكون على بعض
ما عندهم واحد زيك يضحك عليهم ههههههه


هههههه احد شافني قد صار لي موقف طيحة قدام السيارات وطحت ع ركبة وبيدي ملف حذفته ف الارض علشان لما اقوم الناس ف باله الملف طاح موب انا ممدري العالم الي ف السيارات ينتظرون ف بالهم انا طحت والا مثل مااوهمتهم انه الملف طاح ههههه

ياعيني يا عيني ع التكتيك الي ما مشى إلا عليك انتِ بس هههههههه
الناس تفهم وتعرف كل شي
تلاقينهم يقولون شوفوا كيف صررفت الموضوع .. وحطت الطيحه براس الملف .. يعني انه محد انتبهلك هههههههههههههه


نفس الشى صار لى ههههههه تخيلت نفسى مكان اخوك

سلامات سلامات .. تعيش وتاكل غيرها ههههههههه

عذراً أصدقائي حزب الشاي




صحيح انا صرت عضو معكم .. ولكن لابأس بكوب قهوة بين فينة وأخرى


على فكره بوريكم آخر أعمال المبدعين عندنا بالمحل












وسلامتكم

عندنا هنا على موضوع الطيحات …

قصة من عضوه شريره ..


هههههههههههه ،، هو لي قصة بس أنا كنت فيها الغريم مو المجني عليه��،، تعمدت مرة أطيح المراقبة في قاعة الامتحانات�� بس حافظت على توازنها و ما طاحت للأسف����،، وبالنسبة لإبداعات محلكم حقيقي إبداع ما شاء الله


ياساتر عليك .. شكل المراقبه ماخلت أحد يغش
بس عاد ما توصل انك تطيحيها هههههههههه
والله منتي سهله .. تخوفين

شكرا لك من ذوقك والله

ولا زال الأعضاء يتحفونا بمواقفهم مع طيحاتهم




يوه استاذ رايق ... ياكثر طيحاتي ... لكن افشل وحده وانا طالعه من المكتبه شايله اغراضي والمكتبه مرتفعه ثلاث درجات ..مدري كيف سكر نقابي ماصرت اشوف ودعست ع عباتي وطحت مع اغراضي وع طول اتلفت احد شافني اللي بالشارع ناس كثار بس اهم شي ماحد عرفني ... فشله


هههههههههههههههه
شكل الطيحه جت قويه … بس احيانا مع الفشله معد تحسي بالألم
ايوالله صح .. مع الغطا والعباة .. محد يعرفك وهذا لصالحك

لكن بيسولفون عن هـ المره الي طاحت عند المكتبه

حمد الله ع السلامه والله

نعود للعضوه الشريره …
الّي بغت تطيّح المراقبه في الإختبار بس الحمد لله ما طاحت
الصراحه كنا نحسبها شريره .. لكن ظلمناها
صديقتنا ما طلعت شريره … طلعت شرسه بس … وفرق بين شرسه وشريره
المراقبه هي الي كانت شريره بس ما انتبهنا
لذلك يقلك لاتحكم حتى ترى الصورة كاملة
تعالوا نسمع وش قالت

لا ترى هي الشريرة والله ههههههههه كانت تنقل إجاباتي لطالبة ثانية،، ومقدر أشتكي لأنها بتشطب ورقتي وحبيت أبرد كبدي فيها فحاولت أشقلبها🤣🤣،، للحين زعلانة انها ما تشقلبت ترى🙂💔


هذا الفعل يسمى ( مع سبق الإصرار والترصد)
الله .. باقي قلبك ما برد ؟؟!!
صديقتنا هذي لا تمت للشر بصله هي فقط شرسه جدا كما أسلفنا
طيب دام القلب باقي ما برد
اش رايك نرسلك عضوه من العضوات الي يعرفون يسوقون
أعتقد ( بنت ابها) عندها سياره وتسوق زين
نخليها تاخذك للجامعه
وانتِ انتظري المراقبه هذي عند باب الجامعه .. وأول ما تخرج .. مدي رجل بس .. واذا شفتيها تهاوت وشمت ريحة البلاط وطاحت الطيحه الي على كيف كيفك
رجلك وع السياره .. وبنت ابها راح تقوم بالواجب .. وتهجبك
وكذا يكون برد قلبك ….

وراح نزوركم في السجن ونجيبلكم كل احتياجاتكم بإذن الله


يا كثرها لكن سهل نكسب ضحكة الجمهور

.. آخرها من فترة قريبة .. خارجة من البيت متأخرة عن الاختبار وطحت طيحة الله لا وراك لدرجة العباية انقدَّت ورجعت اغيرها بس الحمد لله لا من شاف ولا من دري، فقلت اجي هنا أفضح نفسي بنفسي.

ههههههههه الجمهور بس يبغى يشوف شخص يتهاوى ويختل توازنه
وبكل تأكيد راح ينسدح من الضحك
ياساتر .. من قوة الطيحه العبايه انقطعت >> جالس يضحك بالدس حفاظاً على المشاعر وكذا
حاليا كلنا عرفنا .. ونقول لك حمد الله ع السلامه والله
وثاني مره على مهلك .. لاحقه على كل شي



ههههههههههههههه ، الله يسعدك رايق فطستني ضحك ، بصراحه ما قدرت أقاوم إني ما أسجل دخول وارد هنا ، والأهم إن ما أحد شاف ووصل الفطور والتميس بخير هههههه

الله يسعدك يارب
ياخي الأعضاء الي زي كذا .. يسجل دخول عشان يقيم ويرد
هذولا المفروض نعطيهم منصب في المنتدى ونسميه منصب ( جبر الخواطر)
الله يديم هـ الضحكه والابتسامه يارب