|
جهزتوا دعوات يوم عرفه ؟ يالله بالقائمه اللي كتبتها هههههه اهم دعوه لشعري وله النصيب الاكبر طبعا .. قلت لكم مهووسة في حب شعري بالمناسبه فتحت قائمة دعوات السنه الماضيه اقشعر بدني من اللي تحققت سبحان الله بقولكم طريقة دعاء طبقتها وربي انها تحققت كلمح البصر دقايق بحمل المقطع وانزله لكم |
https://e.top4top.io/m_23732za1a0.mov هذا المقطع نزلته العام من التيك توك وطبقت دعوة الشبخ اللي ذكرها وربي من لما دخلت اول شهر من السنه الهجريه بعد ذوالحجه الا تمطر علي اجابة الدعوات سبحان الله وللان مستمره كل جمعه ادعي بدعوة هذا الشبخ |
اللي مافتح معهم هذا الدعاء اللي ذكره الشيخ : اللهم بحق لا إله الا الله اللهم اني لا اجد اعظم منك فأقسم عليك به اللهم بحق لا إله الا الله فرج عني ما انا فيه اللهم بحق لا إله الا الله فرج عني ما انا فيه اللهم بحق لا إله الا الله فرج عني ما انا فيه يارب غلقت الابواب الا بابك وقطعت الاسباب الا اسبابك فيارب الابواب ويارب الاسباب ويامهئ الاسباب ويامن تنصر عبادك بلا اسباب وتنصر المظلوم بلا اسباب وتحيي الموتى بلا اسباب وتشفي المريض بلا اسباب يارب فرج عني ما انا فيه |
اكتشفت من مدونة رومانس انو نصف بنات غرام هنا ماشاء الله كيف اخفيتوا انفسكم كل هذي الفتره انا من ثاني اسبوع فلت لساني واظهرت هويتي وعرفت عن نفسي بالله اللي هنا ارسلوا تقييم بتعرف على شخصياتكم الجديده روان اذا موجوده خبريني .. والله فقدتك بالتلقرام من عشر اشهر مو شايفتك |
يقال من مصادر موثوقه ان هناك حربا اندلعت في قسم النقاش بصراحه من زمااان عن المناقشات احتاج طاقتي هذي الفتره |
أحب الأصوات التي لا تحمل أي معنى' كصوت المنطق في حضرة العاطفة .!" |
(( وبالاسحار هم يستغفرون )) استغفر الله العظيم اللذي لا إله الا هو الحي القيوم واتوب عليه استغفر الله بعدد قطر الامطار استغفر الله بعدد ورق الاشجار استغفر الله بعدد مكاييل البحار استغفر الله بعدد مثاقيل الجبال استغفر الله بعدد ايام الدنيا والاخره استغفر الله بعدد رمشات العيون من آدم الى يوم يبعثون |
كتبت كم رد بالنقاش بصراحه اعتبرها تسليكيه او بمعنى (( مالي نفس اتفلسف واشرح )) المهم زياره عالسريع لهذاك القسم |
|
للذين يغزلون خيوط الود لأجلنا .. إنكم بأعيننا |
|
مررت بوعكه صحيه .. طهور با انا صباح الخير لكل المارين من هنا .. ••• حرر الرابط من قبل المراقب العام |
"نحن لا نكبر، طفولتنا تختبئ، وحين نلقى شخصًا واحدًا نأمنه، نعودُ صغارًا." من اصدق ما قرأت |
من بعد الوعكه الصحيه حسيت بنشاط لذلك عملت حملة تنظيف لغرفتي كل شي تقع عيني عليه الى الزباله (( الله يكرمكم )) وباقي الاشياء للغسيل منظر الادراج فاضيه يبعث على الراحه النفسيه بعد ما انتهيت وبخرت الغرفه وعطرتها فتحت درج الماكياج برجع اللي عالتسريحه فيه فجأه نص المكياج مختفي وصرخة صرخه عاليه بلحق على الشغاله قبل ترميهم بالشارع قلبي طاح مادري توقف مادري ايش صار واسألها تقول مافي مكياج وفتحت صندوق قالت هنا انتا مافي يشوف .. مادري كيف جمعتهم فيه مو متذكره المهم الحمدلله على سلامة مكياجي .. |
في شخصيه اشتهرت بشي مخزي والحمدلله اللذي عافانا مما ابتلاه به بصراحه ما احب اتكلم بالمبتلين واحفظ لساني عنهم لاني لا اعلم ما احصد من فلتات لساني لكن مفجوعه من شي وبسأل هو حقيقي او يستهبل علينا هذي الشخصيه مشهوره بجملة (( كيكاتي وانتي كيكه )) المهم اكيد عرفتوه الحمل صدق او كذب ؟ طيب لو صدق كيف ؟؟ هذي الادمي كيف سوى كذا ؟ قرأت وشفت صور لذكور حوامل لاكن عند الغرب ما استغرب خروجهم عن الفطره بس عقلي تفكك ويحتاج اعادة تركيب من سالفة هذاك الذكر شلووون حامل .!!! يارب انو مزحه ومو صدق .. لاني مو مستوعبه هل حقيقي او لا |
اقتباس:
ما اعتقد زرع رحم عندنا بالدول العربيه للرجال لكن اللي محتاره فيه هو صادق او يستهبل علشان المشاهدات |
اقتباس:
وعليكم السلام ورحمة الله اهلا فيك .. مادري انت رجل او فتاه ماعرفت احدد من مشاركاتك نورت المدونه وصاحبتها . من كرم ذوقك واخلاقك . وتصفيقك وصل الله يسعدك |
https://a.top4top.io/m_2388cyyu20.mov نعم فعلا كلامه صحيح ليش ماتنتبهون يامعشر الرجال ..!! اصلا لو مهتمين كان عرفتوا السبب :MonTaseR_148: |
في عضو هنا قال معرفك لوحة سياره ههههههههه بصراحه اختياري لهذا المعرف علشان سهل احفظه مادري ليش ماكتبت اسمي واختصرت الموضوع من فين تغيير الاسم ؟ لازم اراسل الاداره او كيف ؟ |
https://k.top4top.io/p_238914f9s0.jpeg ما اعرفها ولا اعرف ايش مرض ولدها بس شعور الفرحه مبكي حتى لو الامر لايخصني الله يتمم عليه عافيته يارب |
اقتباس:
موضوع مقفل بالنقاش بس الا ارد عليه في وقت لاحق بس كلمه مبدئيه قبل اسمي بالله واشرشحك (( انت بالذات لاتتزوج اي بنت بالدنيا )) لي عوده ان شاء الله علشان اتفاهم مع هذا الموضوع ••• بنات التقاييم تستقبل ردودكم عليه بنزلها بعد ردي ان شاء الله |
مادري ليش اذا نسخت كلام احس كأني ماسكته بيدي واتوتر ولا اعرف استخدم يدي الا لما اسوي لصق له حمدلله والشكر بعض التصرفات مادري كيف اتخلص منها |
اقتباس:
نرجع لموضوع هذا الاخ والكلام اللي بكتبه يخص كل رجل اذا كنت مطلق وعلى وشك زواج فلازم تضع حدود لحياتك القادمه اولادك يحترموا الزوجه الجديده والزوجه تحترم الاولاد لكن الواضح من قصتك انو الشر بيبدء من بناتك فلازم تشدد عليهم مو كل زوجة اب سيئه وممكن سوئها ردة فعل لسوء اولادك وواضح من سردك انو الزوجه الجديده ماراح تلاقي الاحترام ثانيا : حدث العاقل بما يعقل هل تصدق رضاعتها من كلب .!! ممكن تربطت ووارد جدا والناس يزيدوا بهارات على سالفة ربط امها فحكم عقلك ولاتصدق اي شي يقال عنها لكن استوقفني جملتك (( العرض مغري )) واستشفيت من كلامك ماهو الاغراء فيها ومابي ادخل بنيتك ولاراح اعلق الخلاصه : الزواج رحمه وموده و(( احترام )) وتقدير لأهلها قبل تقديرك لها فنصيحتي لك ابتعد عن (( العرض المغري )) لانك اشمئزيت منها واستحقرتها قبل تخطبها لا الاب متقبلها ولا البنات بيتركونها بحالها الزواجه كلها غلط بغلط والله يرزقها من هو افضل منك بإذن الله .. ••• على الهامش : نصيحه للامهات احترموا وقدروا بناتكم لاتهينونهم امام الناس ولا تتصرفون معهم تصرفات لاتليق بآدميتهن اذا ماقدرتيها محد بيقدرها بسبب وراح يتزوجها المترديه والنطيحه ويتفضلوا عليها ويهينونها لاهانتك لها ربوا بناتكم على الاعتزاز والشموخ واجعلوهم حلم لكل رجل اجعلوا زوجها يحسب لها ولوالدينها ألف حساب قبل يفكر يغلط عليها |
اتمالك نفسي عن التعليق مو لشيء سئ لكن لا احد يصدق ليس عندي دليل قاطع لإقناعهم صدقوا ما قيل لهم وكأنه قرآن منزل فهم في عناء دائم .. يارب ارشدهم وارحم ضعيفهم |
اشعر ان على اكتافي مسؤوليه وخلفي ناس ينتظرون سيطر عليهم الخوف جازفت وألقيت بنفسي في تلك المعمعه ولا اعلم ماهو مصيري يارب مني الجهد وعليك التكلان فلاتكلني الى نفسي طرفة عين ولا اقل من ذلك يارب هي لحظه ستغير حياة الكثيرين للابد فقل لها كن لتكون في عالمي |
اقتباس:
ماقدرت امر مرور الكرام على موضوعه اقتباس:
كنت بجلده جلد بس لطفت اسلوبي من يقرء كلامه بنظره شموليه يفهم مغزاه الله يسامحه وكما اسلفت الاب متقزز والبنات شنوا الحرب فالزواج كله خاطئ بسببهم وليس بسببها اما رجال الانقاذ من مشاكل العنوسه سامح الله امهاتهم اللي زرعوا فيهم هذي الصفه وهم متلبسين بجميع الاخطاء البشريه وعيونهم قويه ولايتقبلون النقد لان امهاتهم قالوا (( الف بنت تتمناك )) المهم هموس اتوقع اللي بيخطبني انا وانتي ويقرء كلامنا بيهرب هههههه اقتباس:
لا معليش ردي لسى وصل لازم انصر المرأه المسكينه اللي في قريه وتقولوا عليها الاقاويل |
اتوقع كلكم سمعتوا عن قصة العروس التونسيه عجز كلامي عن الكلام .. لكن حصلت من ترجم اللي بداخلي https://k.top4top.io/p_2398uy6w20.jpeg فعلا امهات طواغيت .. تظن انو ولدها (( السفيه )) تمتلكه بصك ملكيه غير قابل للانتزاع كونك ام هذا لايعني تتحكمين بأولادك بريموت كنترول وتذيقين زوجة ابنك اشد انواع التسلط والجبروت لكن الدنيا دواره وكل مدين يدان ولو بعد حين |
اقتباس:
بسم الله عليك من الجنون لشلة المعارضه من الذكور نحن نقف مع الحق حتى لو ضد النساء مافي سبب بالدنيا يخول لأي شخص ينتزع حياة شخص اخر الظلم ظلمات يوم القيامه ولكن لان جرائم الذكور اكثر فهي المسبطره على الساحه لان الذكر بالوطن العربي اعطى لنفسه قدسيه ومبررات ليعتدي على النساء والعرف والتقاليد وتعزيز بعض النساء جعله يتمرد اكثر واكثر انا دائما بصف الحق ولكم بالمشاركه السابقه اكبر دليل لذلك لاتأخذكم العزه بالاثم وتعمى بصائركم عم الحق |
عندنا خيل كانت حامل وولدت قبل شهرين ولدت ذكر لكن للاسف اصابه خلع في رجله اثناء الولاده وكانت حالته حرجه فدخل تنويم للمستشفى ياعمري عليه المدهش انو امه مرضت لفراقه وتعبت نفسيتها ورفضت الاكل الا بالقوه فلما علم البيطري بسالفة الام قال جيبوها مرافق مع ولدها سبحان الله كأنهم اوادم عاد اليوم العصر خضع الولد الفرس لعمليه لاستئصال السُره مع جزء من الامعاء سبحان الله انما هم امم امثالكم .. للان مادري شنو صار بعد العمليه ولا اعرف نفسية امه يمكن شعرت او لا سبحان الله |
|
الطاقه الكلمه اللي ارعبت الكثيرين وهددت سلامهم الداخلي واللي وصفوا المؤمنين فيها بالشرك بالله (( والعياذ بالله من هذا الاتهام )) كنت سابقا لاأؤمن فيها ولا انفي صحتها .. لا اكذب اصحابها ولا اتفق معهم لا استشعر وجودها ولا اعرف ماهيتها .. يعني كنت اعطي لكل مؤمن فيها عذره هو يستشعر وجود الطاقه بكيفه .. يعني كل شخص حر بعقله لكن اندهش ممن يفصلون طاقتي بالتفصيل الممل في هذي السنه من بعد قراءات كثيره وضروف خاصه حصلت لي شعرت بشي غريب كأني اول مره اتصل بجسدي ولا افهم ماهو هذا الشي كل جزء فيني اشعر بشعور مختلف فيه .. شي مشوش وشي ثقيل وكأنها لحظات ادراك اول مره اتصل بها .. ومره بعد مره فهمت طاقتي اتصلت بطاقتي وشعرت فيها وافهم متى تثقل ولماذا وماهو السبب وافهم اذا هذي طاقة جسدي او طاقة شخص نكد علي اعرف اصفها بالضبط واعرف اين تتركز وكيف قوة تركيزها وافهم اذا ثقلت بشده انو تركيز مكثف من عدة اشخاص علي شي ما يوصف ابدا هو شي استشعره .. تناقشت مع بنات عن هذا الموضوع بنت قالت لي انا استشعر طاقة الناس حتى لو في قاره بعيده ووحده قالت استشعر طاقة المرض في اي شخص حتى لو لم يتحدث واعرف اي جزء مريض فيه الطاقه هي شعور مكبوت ثقيل جدا او خفيف او عدة صفات له على حسب نوع الشعور المصاحب له مجرد فضفضه غير قابله للنقاش مع معارضينها … |
ماذا بعد دعوات يوم عرفه فيديو يوزن بماء الذهب لسلطان العثيم https://youtu.be/ZgXsVS8LXKA العام بعد يوم عرفه حرفيا كل اللي قاله بالفيديو حصل معي بالملي كنت يائسه واقول ليش يحصل معي كذا عكس دعوتي وكأن الدنيا انقلبت رأس على عقب ولما سمعت كلامه فهمت معنى اختبار الدعوه |
﴿ ثُمَّ يَأْتِي مِن بَعْدِ ذَٰلِكَ عَامٌ فِيهِ يُغَاثُ النَّاسُ وَفِيهِ يَعْصِرُونَ ﴾ اللهم اجعلها سنة غيث لارواحنا واحلامنا وامالنا وارزاقنا وكل خير قسمته وقدرته لنا .. |
اقتباس:
فعلا عجيييبه الطاقه في مره شفت هالتي المحيطه فيني وكل مره لها لون على حسب نفسيتي الطاقه بوجه عام هو فهم جسدك والاماكن المتوتره او المشدوده فيه ولها عدة اوجه مو بالضروره تكون توتر وشد .. اقتباس:
عادي براحتك كل شخص حر يؤمن فيها او لا بصراحه ما اتذكر اسمك سابقا .. لكن تشرفت فيك الان |
والان مع فقرة هواجيس السقف الى ان يأذن الفجر قاعده افكر الامريكان عندهم اسماء قديمه مثلنا او لا ؟؟ يعني يسمون اطفالهم على جدتهم وجدهم اللي اسمائهم قديمه هو مو انو ما يسمي على اسماء الاجداد .. الحيره في عقلي هل اسماء اجدادهم قديمه ؟ تسبب ازمه نفسيه للاطفال بالمدارس ؟؟ هل عندهم اسماء تتماهى مع احوال الطقس اثناء الولاده ؟ السؤال اللي ما اعرف جوابه للاسف يالله بكمل نظر للسقف الى ان يحين وقت الصلاه |
نورت الحته يا إسمي الجديد :Dl3::MonTaseR_205: |
لسى اكتشفت ليش حلقي يؤلمني كل خميس من الصراخ على الصغار والركض وراهم لاتسوي كذا .. لاتفتح الباب .. لاتضرب .. اجلس .. لاتكسر المرايه .. لاتركض على الدرج لاتلعب بالكوره في الصاله .. كسسسسرت الكوووب انتبه .. لاتلعب بالجوال وهو بالشاحن هذا شي والمرور بالصاله للمطبخ شي ثااااني اصلا اللي توصل للمطبخ من غير اصابات تعتبر تجاوزت ماراثون عظيم ••• المهم قطعت هذي التدوينه وغطيت عيوني وتخبيت لان ولد اخوي يستهبل بيحذف الكوره على راسي اتمنى اضغط زر الارسال بسلام ومن غير اصابات |
اقتباس:
لاوالله كان يستهبل ويبي يخوفني بس صارخت عليه وانقطع صوتي احتاج مشروبات دافئه علشان يرجع الله يعين بسس |
من صفاتي المتطرفه ماعندي صببببر في بعض الامور لاحظت احط تحدي مع نفسي انو اخلص السنابه قبل هي تنتهي يعني مدتها عشر ثواني انا اسوي سكيب قبل توصل العشره وانغبن انو ماشفت السنابات كلها بسبب هذا الطبع وفي فئه حقا يستاهلون السكيب والحذف بعد هم اللي يطولونها وهي قصيره تسعين سنابه على فتح الثلاجه واخراج الايسكريم وفتحه او تصوير طريقة فتح كيس الشيبس .. ياااامسلمه اتقي الله في اعصابي اما الفئه اللي تصور بالتيكتوك وتكتب ترقبوا البارت الثاني وصلت لمرحله انو في حياتي الواقعيه اختصر كللل شي حياتي كلها اختصار وتبسيط وتجاااوز مثل تجاوز السنابات |
|
| الساعة الآن 03:15 AM. |
Powered by vBulletin® Copyright ©2000 - 2024, Jelsoft Enterprises Ltd.
SEO by vBSEO 3.6.1 al2la.com
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع الحقوق محفوظه لـ منتديات مسك الغلا