|
https://d.top4top.io/p_24181n4az0.jpeg ممكن اللي بكتبه شي غريب لكن الوضع اصبح مقزز وكأن الدين والاسلام محدد بالسعوديه والسعوديين فقط اولا قبل ما أُفهم غلط ويحصل هجوم علي انا لا ابرر المعاصي ولا الذنوب بعد انتشار السوشال ميديا واصبحنا نعرف ادق تفاصيل مايحصل بالدول الاخرى وكل شي عالمكشوف ظهر شي اسميه (( متلازمة الاسلام السعودي )) يعني انت او انتي سعوديه خلاص مايحق لك شي اخر اتذكر زمااان في 2018 مع بداية القرارات الجديده بالسعوديه حصلت مناوشات بالمنتدى القديم انو مايحق لكم تتغيرون لانكم واجهة الدين الاسلامي مايحق للسعوديات السواقه لانهم سعوديات ولازم يمثلون الدين الاسلامي مايحق فتح دور السينما لانها السعوديه ولازم تمتثل الدين الاسلامي ولما تناقشت مع شخص عربي انو دولته اشتهرت بالمراقص قال احنا غير وانتم غير عفوا غير في ايش .!! كلنا مسلمين ..!! وانا لا ابرر ابدا لكن الامر مضحك جدا انو اتركونا نفعل المعاصي وانتم لاااااا انتم يالسعوديين لازم ماتتجاوزون اي شي وفقط تمثلون الدين وحياتكم لاتتغير ولاتتطور بالبوست اللي فوق فنانه (( خليجيه )) انتقدت مشهد لفنان سعودي وقالت (( لانه سعودي مايصير يعملً هذا المشهد )) المضحك في المقابله قالت لا احنا خليجيين عادي نسويه والفتاه اللي مع السعودي بالمشهد (( من جنسيه عربيه )) عادي تظهر بهذا المظهر والمضحك ايضا ان هذي الخليجيه ظهرت بمشهد تتحمم وهي عارية اليدين والاكتاف والرقبه يعني ياسعوديين التزموا بالدين الصح واذا غلط اي شخص منكم فالويل له من ألسنتنا ونقدنا لكن حدكم لاتتكلمون فينا او بحياتنا او اي شي يحصل في مجتمعاتنا انا لا ابرر ابدا لفعل الاخطاء لكن لاتجعلون غيركم يتمثل بالدين نيابه عنكم الدين هو الدين في كل بلد وزمان ومكان |
|
في مثل هذا الوقت وفي شدة حرارة الشمس والحر كنا في الطفوله نبكي عند ابوي علشان نكشت ونلعب بالتراب فيأخذنا احنا الصغار وعددنا اربعه ويروح عند اقرب ارض فاضيه وننزل ونلعب ونحفر وندفن ولا كأن الشمس موجوده وهو ياعمري يقفل السياره ويشغل المكيف وينام الى ان نخلص لعب وبعد انتهاء الكشته نتحول لأكوام من الطين والتراب في الشعر والوجه والبدين والملابس كانت من امتع الرحلات عندي واللي ماراح يعرفها جيل الايباد |
|
اقتباس:
هههههههههههه الله يسعدك والله يانجمه انا نجمتي افلت مع المنتدى القديم كانت مدونتي نار على علم وفيها من العجب مالله به عليم طب بديل .. طب معادن .. طب الطبائع والامزجه .. قانون الجذب .. قوانين كونيه سوالف .. مشاكل. انتقادات .. يوميات وطبخ فاشل .. صور من تصويري وخواطر نصائح دينيه .. فوائد مالها داعي .. الحين يمر شهر ماكتبت ولا كلمه احس اني كبرت وعقلت او ماعاد اهتم مشغوله بأمور اهم بحياتي الله ييسرها لي من حيث لا احتسب |
اقتباس:
ابشركم الحلوين طلعوا من المستشفى والان في المزرعه الحمدلله المهم اكتشفت الطفل نفس التصرفات في جميع الكائنات الحيه من دخلوا المزرعه مسوي ازعاج وقلق لأمه يركض ويضرب بالجدران وكل شي يشوفه يأكله حتى ذيل امه اكله وسحبته من فمه وشعرها ورقبتها والحدايد وكل شي بطريقه يأكله مزززعج ومرح بنفس الوقت ومسوي اكشنات وفي نفس الاسطبل توجد ام ومعها بنتها مهره صغيره عاد هذي الام عااااقله وبنتها نفسيه مايعجبها شي وتدور حول رجول امها احس عقل امها بسبب البنت اللي زعلانه 24 ساعه هههههههه ولاتركض ولاتلعب ولاتهتم بس عند امها وتحت رجولها ههههههه |
شفت مقطع صغير من مسلسل باب الحاره بصراحه مادري ليش كان يعجبنا .!!! مسلسل ذكوري بحت والمرأه مالها حق تزعل وتعطي رأي وتتكلم وابو شهاب عامل نفسه جنتل وشكلين مابحكي وهو داعس على زوجته شريفه اتوقع لو انعرض حاليا بترتفع هاشتاقات سب وشتم في ذكوريتهم العمياء المهم ماعلينا الحمدلله وقتها ما كنت افهم كان فلتت اعصابي على مسلسل |
بسوي استفتاء عن اي مرحله وصلتوا بالغثيان من نصائح ومواعظ الواتس 1/ مليون بالمائه 2/ مائه بالمائه كل رسائل امي مقاطع تهديد ووعيد ودمار وامراض واوبئه ومساوئ الجوال واضرار السهر وتضييع العبادات واتباع المشاهير وعلامات نهاية الزمن اللي كلها مقتبسه من وضعنا الحالي والاكل الصحي وتفشي المبيدات والاسمده اللي موجوده بالاكل اللي قالوا عنه صحي وفساد البنات وضياع الاولاد وتضخيم اي ترند انو العالم انتهى والناس مافيها خير واضرار المسكنات ومساوئ المستشفيات وانتشار الامراض اللي لم يكتشف لها علاج وخيانة الازواج وضياع الزوجات مابين الكوفيهات والمطاعم والاسواق ومساوئ الخدم والمدارس وسخه والمناهج سيئه ومافي وظائف وعلامات الساعه ظهرت مو باقي الا شي واحد يقولون القيامه قامت وانتوا مو دارين حرام والله ارحموا امهاتنا وارحمونا من هذي النصائح المدمره الدنيا بخير والعالم بخير والناس فيهم خير والمساجد عامره والرحمه موجوده والخير موجود .. الله لايسامح من يتداول هذي المقاطع وينشرها ويسبب رعب لكبار السن وغثيان لنا |
كيف اثبت اشتراكات في لوحة التحكم ؟ اللي يعرف يخبرني الله يسعدكم |
من فتره قررت انظف الصور في جوالي بس اذا شفت عددهم يصيبني اكتئاب ولأن مخي تجاري واحب التجاره خطرت ببالي فكرة مشروع جديده اسوي بزنس وخدمات تنظيف وفلترة الصور من الجوالات المطلوب فقط الاكلاود واعمل تصفيه للصور لمدة يومين والفلوس على عدد الصور كل ألف صوره بـ خمسين ريال والارباح اشتغل فيها بالاسهم لان عندي خبره بالمضاربات وارباح الاسهم اشتري فيها سبايك ذهب وابيعها اذا ارتفع سعرها وارباح الذهب استمتع فيها واتسوق وما اطلع من السوق الا اذا رصيدي صفر بكذا يكون عندي ثلاث مشاريع مربحه معليش لا اسمح ولا احلل من يسرق مشاريعي وافكاري [ فقرة هواجيس ومشاريع ماقبل النوم ] |
اقتباس:
بصراحه حاليا ما اتابع ولا مسلسل ولا اعرف شنو المسلسلات اصلا لكن باب الحاره يعتمد على خنوع الانثى وجبروت الرجل لشد المشاهد والله غايبه مشغوله بأمور الله ييسرها من حيث لا احتسب اقتباس:
نصائح الواتس كلها تخويف وسوء ظن ويأس واحباط والضحيه الامهات يصدقون الله يعينهم اقتباس:
اللهم امين يارب فعلا كأنهم اوادم ويفهمون مش مثل باقي الحيوانات |
|
https://i.top4top.io/p_244824sek0.jpeg لا إله الا الله .. ليش بعد63 سنه .!!!! ياحبهم للاكشن والغموض .. طيب والفضول عندنا كيف نسيطر عليه .!! |
اقتباس:
قررت افرمت جوالي لانو رفض تحديث النظام الجديد بسبب امتلاء المساحه ومضطره انقل محاضرات الاسهم للابتوب وهي تتجاوز 56 محاضره وكل محاضره مدتها ساعه https://d.top4top.io/p_2449fsn2p0.jpeg اللهم هون علي سفري واطوي بعده هههههههه |
ليش نغمات الحزن واليأس والألم اذا ذُكر الله ليش اي نصيحه تُقدم لازم تذكر بأسلوب حزين وكسير ليش مقاطع الادعيه تُلقى بأسلوب باكي ومؤلم اصلا ليش ارتبط شعور بُعد استجابة الدعوات وآلام الوصول لله بأذهاننا راقبوا مشاعركم اتجاه الله سبحانه وستعرفون معنى .. (( فما ظنكم برب العالمين )) |
دكتور كبير بشهاده مادري من وين وخبير بمشاكل النطق والمخاطبه يقول التأتأه ليس لها مسببات .!!! دكتوره كبيره ولها باع طويل بمشاكل الحمل والولاده تقول الكالسيوم ماله علاقه بتعسر الولاده ..!!! دكتور ثالث مادري شنو تخصصه يقول اختلال المعادن وتحاليل الشعر اكذوبة العصر ..!! مادري متى الدكاتره ينزلوا من برجهم العاجي ويوسعوا مداركهم ويقرؤوا بباقي العلوم للامانه العلميه وحجتهم هذي المعلومات ليست موجوده بكتب الطب ولاتطرقوا لها بدراستهم طيب مو كل شي بكتب الدراسه معلومات مقدسه مرضى كثيييير ضاعت حياتهم لانهم قالوا (( تعايشوا )) مع المرض ومافي علاج حرام والله وشي يغبن ويقهر انك يادكتور تمنع مريض من تجربة علاجات اخرى لان حضرة جنابك مادرسته بكتب الطب نصيحه لكل مريض اسعى واسعى في طلب علاجك لكل داء دواء لم يعلمه الاطباء بعد والله يضع اعظم معجزاته في ابسط مخلوقاته _التأتأه في الطب الشعوري التصنيفي صدمه وعدم امان مفاجئ مع تأنيب للذات وخلل بين الصوديوم والبوتاسيوم _تعسر الولاده (( من مسبباتها )) ارتفاع شديد بالكاسيوم (( انقباض عضلي )) ونقص حاد بالمغنيسيوم (( انبساط عضلي )) _تحاليل الشعر توضح الخلل بمعادن الجسم وجذور مسببات الامراض من المعادن ••• طيب يادكاتره هل سمعتوا عن العلاج بالفرويكوينسي .!! لا طبعا ماسمعتوا ولو عرفتوا بتكذبون الطريقه وتستخفون بالفكره وتمنعون المرضى منها |
https://j.top4top.io/p_2455gijxz0.png https://k.top4top.io/p_2455kid8s1.png https://l.top4top.io/p_2455439xe2.png حاله لطفل توحدي تم علاجه بتنظيف الخليه + علاج الجين المسبب للتوحد + فرويكنسي https://c.top4top.io/p_2455cwwy90.png https://e.top4top.io/p_24551wjqx1.png مريض مصاب بالسرطان والسكر والضغط وكسر بالحوض وكورونا وحراره دائمه وإلتهاب بروستات واحتباس بالبول ومضاعفات بالركبه تم علاجه بالفرويكنسي الحمدلله رب العالين والله يتمم عليه شفائه بارب اذكروا الله ماشاء الله تبارك الرحمن |
تتفقون انو اكثر سؤال يطرح في بيوت السعوددين : [ وين امي ] |
|
عندي مشكله والله حلها اصعب من قضية فلسطين خواتي ثنتين تزوجوا هذي السنه ووحده منهم كانت معي بالغرفه وكنت بخرٍج سريرها واعيد ترتيب الغرفه واعمل ركن تلفزيون وركن مكتب ومن هذا القبيل وين القضيه الصعبه ؟ ..(( السرير )) الله لايبارك فيه اختي الثانيه حلفت مااحطه بغرفتها اختي اللي كانت معي حلفت ما اطلعه لانها اذا حملت تحتاجه امي حلفت مايطلع برا البيت ولا للمزرعه ولا حتى اتصدق فيه كل احلامي طارت ادراج الرياح بالله عليكم ايش الحل مع سرير جحا .؟؟؟؟؟ |
اقتباس:
سريري كبير واصلا مايلصقون ببعض لوجود حواجز وايضا انا ابي ركن للتلفزيون مكان سريرها بالضبط لان موقعه استراتيجي الله يسهلها والاقي حل من حيث لا احتسب اقتباس:
امين يارب المضحك بالموضوع انو اختي الثانيه تزوجت وغرفتها مافيها احد ورافضه احط هذا السرير فيها وامي مثل كل الامهات اي اثاث جديد يمنع منعا باتا التخلص منه وعذرها ممكن في يوم ما احد يسكن عندنا ونحتاجه .. مين هذا الشخص المجهول الله اعلم اقتباس:
بصراحه حلك ذكي جدا وماخطر ببالي فعلا سريري وانا حره بتصدق فيه ههههههه لكن المشكله اذا حملت اختي بتنومني عالارض وتنام على سريرها مو اقولكم اصعب من قضية فلسطين ..!!! |
|
سؤال فلسفي : أين يقع الجزء الطفولي داخلك ؟ |
سؤال يحتاج الى وقفه جاده [ معليش انا انسانه احب اتفكر واسأل ] هل من حق مغسلي الاموات الله يرحمهم ويغفر لهم وصف حال الميت هل من حقهم يحددون هذا وجهه باهت وقاتم من (( المعاصي )) وهذا وجهه مشرق ومبتسم من (( حسن الخاتمه )) هل من حقهم نشر مايحصل وجعلها فاكهه للمجالس والاهم وسبب لطرحي هذا السؤال هل من حقهم وصف حال الميت وكأنهم يقولون بشكل لامباشر هذا من اهل الفساد والمغضوب عليهم وهذا من اهل الصلاح والتقى .!! سؤالي صدمه صحيح .!! في احد المرات كنت احضر فيديو لطبيب شرعي للجرائم الجنائيه وتطرق لهذي المسأله وشرح بالتفصيل الممل لماذا بعض الجثث يغمق لونها ولماذا بعض الجثث تبتسم ولماذا بعضها تزرق وكلها لها اسباب طبيه ودلائل على امور مهمه ابرزها : الامراض ومدة الوفاه يعني طرحي لهذا السؤال يجعلنا (( نفتح عقولنا )) ونتقي الله في اتهام الاموات بخواتيمهم لان لا احد يعلم صلاح الانسان وفساده وسوء خاتمته الا الله سبحانه فلا تصل غيبتنا وسوء ألسنتنا للاموات رحمهم الله جميعاً .. |
من المعلومات اللي قليلة الانتشار اصابة الجزء الايمن من الجسم بالامراض مرتبط بالاواعي بالاب والجزء الايسر مرتبط بالاواعي بالام اما اصابة الجزء السفلي بالجسم بالامراض مرتبط بالام والجز العلوي مرتبط بالاواعي بالاب كيف ؟؟ صدمات الطفوله اذا كانت من الاب تطهر بهذي الاجزاء وصدمات الطفوله اذا كانت من الام تظهر بهذي الاجزاء بغض النظر عن نوعية المرض ••• من جهه اخرى امراض البطن عموما مرتبطه بالعلاقات بالاوعي واذا كان بطن سفلي تحت السره مرتبط بالانتقال والانفصال امراض الصدر والقلب مرتبط بالعاطفه والروابط القويه امراض الحلق مرتبطه بالتعبير عن النفس وحب الذات امراض الحوض مرتبطه بالمكانه الاجتماعيه والاقصاء امراض الارجل والاقدام مرتبطه بالخوف من المستقبل امراض الكتف مرتبطه بالمسؤوليه امراض العمود الفقري مرتبطه بالدعم المادي او النفسي امراض الاذن مرتبطه بالهروب من سماع اي حقيقه تنكرها امراض العين احيانا مرتبطه بالاب واحيانا عدم الرغبه بتقبل ماتراه في حياتك امراض الاسنان العلويه مرتبطه بالاب والسفليه مرتبطه بالام امراض الجلد بشكل عام مرتبطه بالانفصال والرفض السمنه المفرطه او العاديه مرتبطه بحب الذات او الخوف المزمن مشاكل الفك السفلي مرتبط بالتحرشات الجنسيه او الصدمات بهذي المنطقه والقائمه تطووول .. والارتباط هنا يقصد له اللاواعي بالعقل الباطن وليس شي ظاهري |
يارب اطوي بعد الايام وعجل بالفرح |
اتوقع بغير اسم مدونتي الى : ليه ؟؟ ليش ..؟ لماذا ..؟ Why..؟؟ من تفكيري في تناقضات الفرد والمجتمع ومن تناقضات المعتقدات ومن تناقضات التربيه ومن تناقضات الحياه كل يوم اكتشف شي دمرنا نفسيا ومعنويا ونفسيا وجسديا ودينيا بس للامانه مو كل شي يُعلم يُقال ..! |
اقتباس:
لا والله حقيقه فعليا .. ولي باع طوييييل في البحث عن هذا الموضوع وطبقتها على نفسي واكتشفت بلاااااوي من صدمات الطفوله ماتخطر على بالي وغصت في اعماقي الى ان وصلت لعمر (( الشهرين )) لأول صدمه بحياتي لكن للامانه محد عنده الاستعداد يطلع من قوقعة الطب وبدليل مافي ولا لايك الا اللي وضعتيه انتي |
اقتباس:
https://f.top4top.io/p_2476pb49n0.jpeg طبعا لان الكلام اللي بالبوست من دكتور فـ راح تصدقونه وهو مطابق تماما لشرحي سابقا على فكره فيه مجموعه من صديقاتي اكتشفوا صدماتهم وهم اجنه ببطون امهاتهم انا كانت اول صدمه لي بعمر الشهرين قبلها ما اكتشفت شي |
"للهِ سلَّمْتُ أمرًا لَسْتُ أَعْلَمهُ ما لي على حِمْلِه لكِنْ سَأرْضَاهُ ربّاهُ لولاكَ لا سندٌ ولا أحَدٌ فأنْتَ حَسبي وَحَسْبِي أنّكَ اللهُ" |
اقتباس:
ياهلا يعني العلاقات الاجتماعيه بشكل عام وكل جزء بالبطن يختص بشعور محدد مثلا القولون العصبي هو رفض للتغييرات الجديده والتمسك بصلابه بالماضي مغص سببه الخوف من المواجهه (( مثل الالقاء امام جمهور وحشود كبيره )) الاسهال التخلص من افكار مفاجئه وعدم تقبلها القلق الشديد يؤثر على المعده والهضم انتقاخ البطن هو مشاعر وغضب مكبوت من الاهل او الاصدقاء واذا الغضب عظيم ومدمر يضرب بالكبد فورا وهكذا يعني بشكل عام لكن كتحديد مباشر بالضبط يحتاج دراسة الطب الشعوري التصنيفي انو تكتشف الشعور بالضبببط اللي تسبب بالمرض قبل حدوثه |
|
https://h.top4top.io/p_24782h1t80.jpeg الفسفور : زيت زيتون .. زيتون اخضر .. حنطه الصوديوم : ملح بحري .. طماطم .. ماء جوز الهند البوتاسيوم : موز .. تمر .. بطاطس .. ماء جوز الهند .. افضل طريقه لرفع الحرق والنحافه السريعه عن تجربه استفتح يومك بماءجوز الهند (( نشاط فكري وبدني وهضم بروتينات كويس وحرق سريع )) ابتدء اي وجبه بسلطه مليئه بالخل وزيت الزيتون لرفع الحرق وزيادة عصارة المعده وختم الوجبات بحفنة زيتون اخضر لرفع الفسفور وسد الشهيه وتقوية العظام هضم سلس ومريح وفقد وزن بشكل سريع بالاضافه الى معلومه جدا مهمه : الخلايا جميعها تعتمد على الصوديوم والبوتاسيوم بالهدم والبناء واذا ارتفع الكالسيوم يسبب جدار عازل يغطي الخليه لذلك لاتخرج فضلاتها من الهدم يعني لازم تراقبون ارتفاع الكالسيوم بالاضافه الى معلومه اهم دال هو هرمون وليس فيتامين يرتفع اذا توازن الكالسيوم والمغنيسيوم والفسفور —> مكونات العظام وينخفض اذا اختل توازنهم وطغى معدن على اخر |
اقتباس:
زعلانه ماعندها شي تلبسه والدولاب خلفها ملئ بالملابس ههههههههه العفو ربي يسعدك اقتباس:
عاد الامهات عندهم فوبيا من تكديس الملابس ههههههههه اقتباس:
والعزومه اللي بعدها نعيد نفس السيناريو ماعندنا شي نلبسه ههههههههه |
عندنا ثلاجه نكبه من مميزاتها اذا فتحتها ومرت عشر ثواني ماتقفلت تصفر واللي مايشتري يتفرج .. طبعا في الليل ولا افكر افتحها علشان ماتقعد النايمين وباقي الاوقات اذا فتحناها كأننا في برنامج سباق مع الزمن ناخذ اي شي خلال عشر ثواني لان صوتها مزززعج وفيها اضاءه مكتوب فيها ارقام ودرجة الحراره ومع الصفير تشتغل توتتتر اضاءه تكبس وصفير يشتغل والجيران يدرون انو فاتحينها واللي نايم يصحى صدق المثل (( يامن شرى له من حلاله عله )) |
صوتك اللي عارف لقلبي طريق جعل ماغيرك يسولف واسمعه |
تدوينه للتفكر : الله مقدر الاقدار سبحانه ولكل شي قدر بدقه عظيمه عندما نمر بمشكله كبيره امامنا طريقين وقدرين مختلفين الكثير منا وانا منكم ولا ازكي نفسي ننغمس بالمشكله ونتطرق لجميع الحلول المتاحه وهذي الحلول كلها مقدره من الله والطريقه الاخرى الانسلاخ من وضعية حلولنا وتفويض الامر لله بالتوكل المطلق وهذه ايضا مقدره من الله سبحانه اي مختلفه عن اقدار الحلول السابقه اي ان لكل مشكله إلاف الحلول المتاحه واللتي يعجز العقل عن ادراكها لذلك جوهر هذي التدوينه : كيف تعرف انك خرجت من قدر الله لقدر الله ؟ كيف تعرف انك اتصلت بالتوكل وطبقته بشكل صحيح وخرجت من حلول عقلك ؟ لأسهل عليكم الحل موجود في هذه الايه : (( فكلي واشربي وقري عينا فإما ترين من البشر أحدا فقولي إني نذرت للرحمن صوما)) |
مريم عليها السلام وُضعت في ابتلاء عظيم حمل من غير زوج شي خارج حدود التصديق العقلي اي من عظم المعجزه كان بقدر عِظم الخوف اللي تعبش فيه لنخرج قليلا عن معجزة مريم عليها السلام واتطرق لكيفية التوكل اللي امرها الله به عندما نتفكر قليلا بحمل امرأه خارج اطار الزواج فهذه مصيبه عظيمه وعظمتها في شدة شعور الخوف وترقب الاحداث المفجعه اللتي ستحدث للمرأه يعني شعوريا حاله عظيمه من الخوف الرهيب والعجز عن التبرير واستحالة تصديق الناس فترجم الله سبحانه شعور مريم بقوله (( ياليتني مت قبل هذا وكنت نسيا منسيا )) وهذا يدل انو عندما نقع بورطه عظبمه يتمنى الشخص الموت بشكل حقيقي وفي حالة مريم عليها السلام لم تتمنى الموت فقط بل ان تكون نسيا منسيا وهو من مات قديما ومن زمن بعيد حتى نسوه الناس وانقطع ذكره ولا احد يعرفه ولو راح نترجم حالتها (( شعوريا )) هو رعب شديد وخوف عظيم ورجفه وشلل العقل عن التفكير لهول البلاء يعني عاصفه شعوريه مدمره لجسدها وعقلها وهي في اضعف حالاتها (( الولاده )) فأجتمع ضعف الجسد مع قلة الحيله مع آلام المخاض ومشاعر ألم وخوف ورعب في مكان قصي بعيد موحش هنا قال الله تعالى : (( فكلي واشربي وقري عينا )) النقيض تماما مع شعورها الحالي ووضعها النفسي السئ وهو خلاصة (( التوكل )) ان تكون في قمة اعاصير الابتلاء تعيش شعور السكون واللاشيء لما قال سبحانه (( فكلي واشربي )) فهذا يدل في علم الشعور الراحه النفسيه لا يأكل ولا يشرب من يمر في ازمه او مشكله لكن امر الله فيه اعجاز بتصفير الحاله الشعوريه وليس ذلك بعد بل تحويل الحاله الشعوريه الى (( وقري عينا )) وشعور قرارة العين هو اعظم شعور عرفته البشريه لايوصف من جماله فهو كالماء البارد يزيل كل ألم من الجسد وهو بلاغ الشي وتمامه فلما يجتمع مشكله عظيمه وشعور قرة العين هنا تحدث المعجزات وايضا قال سبحانه (( فإما ترين من البشر احدا فقولي اني نذرت للرحمن صوما )) وهو يفسر مجازيا عن السكوت في الخوض بالمشكله سكوت تام داخليا وخارجيا يعني الحديث الداخلي بينك وبين نفسك تصمت عن تفسيراته وبينك وبين الناس تسكت عن التحدث فيه لذلك التوكل التام الحقيقي هو ؛ تلغي تفسيرات عقلك وثرثرته تصمت عن الحديث في المشكله تعيش شعور البلاغ والتمام لحل المشكله وكأنها حُلت وانتهت تستقر نفسيا وتبدء تأكل وتشرب لانها خرجت من حلول يدك لله سبحانه وانتهت وحلها وقع قطعا لايساورك شك 1% بالحلول خارج ادراكك العقلي وان امرها انتهى فعليا ثم بعدها انتبه لنفسك مشاعريا يجب ان تصل لمرحلة الاطمئنان الحقيقي الصادق لله سبحانه مهما كانت النتائج وتصفير الشعور هو تلغي اي شي داخلك وتنشغل بأمور اخرى اي بمعنى (( لاتفعل شي )) داخليا بالمشاعر وخارجيا بالافعال |
https://i.top4top.io/p_2491mnlco0.jpeg تصفيق جماعي يابنات لهذا الشخص [ شجاع كريم زعيم ماتخاف ذيب …الخ ] |
اقتباس:
ممكن بالغ لكن هي جزءمن احد اسباب الخلع لاننكر وجود هذي الفئه الطاغيه من الرجال واللي المرأه عندهم مكينة (( كرف )) احدى قريباتي طليقها من هذا النوع من الرجال استعبدها وعذبها وكرفها واهلكها بمتطلباته وضيافاته لايرحم ضعفها سواء تعبانه او مرهقه او صائمه او نفاس او في الشهر التاسع او اي حاله تمر فيها ولايحترم لاوقت ولا مكان حتى بالعمره تكرف وتطبخ لضيوفه حتى مع صلاة الفجر يكسر الباب عليها علشان تقفز للمطبخ وتطبخ للرجال اللي بمجلسه هؤلاء فئه لايجب غض الطرف عنهم وعن همجيتهم والخلع لو ينفع عشر مرات في حقهم ماراح يقصرون النساء وكذلك انتشرت قبل فتره امرأه سبعينيه خلعت زوجها بعدما عرفت بهذي القوانين يا أخي انا دائما مع الحق ولو الحق للرجل لوقفت معه لاني انسانه اكره الظلم ولايجب التغاضي عن هذي الفئه لأنها قليله (( وقد تنحصر بكبار السن )) لكن في هذا الزمن اصبح الشباب اكثر تفتح وتسامح ومشاركه للمرأه كما اسلفت |
| الساعة الآن 01:28 PM. |
Powered by vBulletin® Copyright ©2000 - 2024, Jelsoft Enterprises Ltd.
SEO by vBSEO 3.6.1 al2la.com
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع الحقوق محفوظه لـ منتديات مسك الغلا