|
نافذة إليّ السلام عليكم ورحمة الله وبركاته أختكم الفقيرة إلى الله،، جتكم نازحة من منتدى غرام من بعد ما انقفل علينا أكثر من مرة واحنا مصرين الا نسجل فيه ثانية وثالثة << أبد ما في كرامة كان ودي أجيكم في حال أحسن من كذا لكن كتب ربي إني ما أجيكم إلا منتوفة لا والأسوأ من كذا ان الي ناتفني أختي الصغيرة أبو سبع سنين،، والله ياهي نتفتني نتفة بنت كلب ما خلت فيني ريشة صاحية -_- هذا سلمكم الله كنا في السوق،، وقالت تبغى ايسكريم رحت أجيب لها،، أنا جبت لها أبو كاس وهي قالت انها قالت لي انها تبي أبو بسكويت بس أنا ما سمعتها!! قلت لها خلاص أنا قد قطعت فاتورة وأخذته أكليه ومرة ثانية أجيب لك أبو بسكويت أخذته على مضض،، ويوم شافت عيال أختي معاهم أبو بسكويت ولعت وفكت حلقها ولا عاد سكرته🤦🏻♀️🤦🏻♀️ قالت:" دايما تهاوشيني اذا ناديتيني واتسيمخت والحين تسوين كذا،، قلك تعلميني وتربيني وانتِ عادك ما تربيتي" أنا طبعا مبهوتة ومصعوقة ولا قادرة أرد😂💔 أخوي ماسك ضحكته غصب ويقولها عيب وش هالكلام أختك لازم تحترميها قالت وهي معصبة والله ما أحترمها لين تصير عجوز🤦🏻♀️😂💔 مدري قصدها حجمي صغير وما يأهل انها تحترمني والا ايش سالفتها بالضبط بس أنا خلاص غاسلة يدي من الجيل الجديد وألسنتهم😭💔 |
سؤال يا جماعة عشان أنا جديدة على المنتدى،، هو طبيعي في هالمنتدى إن أسماء الأعضاء الي أعطوك تقييم ما تظهر؟ شفت تقييمات وبعسست بعيوني أدور أسماء بس ماش انفقعت عيني ع الفاضي ما عرفت غير لقاليقو وهيام بس عشان كتبوا أسماءهم في التقييم! + الاقتباس من وين نجيبه؟ والله شكله يبي لي وقت على ما أتعلم عليه وأنا إنسانة كسولة������ المهم اقتباس:
لا ذاكرتك صحيحة والله هذيك الأيام تنتفت تنتيف،، أحيييه ذكرتيني بذكريات مؤلمة ������ |
يأثر فيني خبر الوفاة جددًا وخاصة إذا كان أحد أعرفه أو عرفته من قبل .. وصلنا قبل يومين خبر وفاة (محمد) ولد صديق أبوي،، وأمه صديقة أمي ،، توفى بحادث وأوجعنا الخبر جددا الكل متأثر أمي، أبوي، أنا، وإخواني .. البيت هادي وكأن العزا عندنا .. كل واحد منعزل في زاوية ومحد له خلق شي.. أقول في نفسي إذا كان هذا حالنا،، فكيف حال أمه وأبوه!! الله يصبرهم ويربط على قلوبهم .. قال أخوي صرت أكره أفتح الفيس بوك،، كل ما جيت بانسى يذكروني فيه،، استغربت شلون رغم إن توه ٢٢ وقدر بهالشكل يملك قلوب الناس ويكسبهم!! الكل منزل تعزية فيه من أصحابه لزملاءه في الجامعة لأصحاب أبوه للدكاترة الي درسوه،، حتى الي عرفوه من بعيد بس!! تذكرت حديث الرسول"أقربكم مني مجلسًا يوم القيامة أحاسنكم أخلاقًا" ،، وفعلا كان محمد مثال وقدوة في الأدب والهدوء والاحترام وغاية في اللطف مع الكبير والصغير الموت صعب على الأهل أكثر من المتوفي،، بالنهاية هو راح للرحمن الرحيم وفي أيام مباركة ونال حسن الخاتمة لكن وش حال أبوه وهو أكبر عياله!! أبوي كل وقته يدعي له بالصبر وإن الله يجبر مصابه... أمنيتي دائمًا وأبدًا إني أكون أول الراحلين من أهلي،، إذا وفاة الغريب الي عرفته بس في طفولتي أثرت فيني هالقد شلون أهلي؟! وأنا وفاة جدي وجدتي الله يرحمهم ما تجاوزتها بسرعة أبد وللحين إذا ذكرتهم يمرني نفس الحزن... أخيرا .. أعتذر جددا من التقييمات الي ما رديت عليها،، هذا أنا ياخذني الحزن لزاوية وأنعزل عن الكل،، حتى الواتس وبقية البرامج أفتحها وأقفل بدون لا أرد ولا حتى أفتح الرسايل .. |
تصدقون إني أمس دخلت المنتدى وكتبت شي وانشغلت في نص السالفة وماعاد لقيت وقت أكملها ونسيت،، ويوم دخلت اليوم تذكرت ،، تصدقون والا نا تصدقون؟ :( بابكي أنا بابكي خلاص،، الوقت يمضي بسرعة مخيفة أحس اني مش لاحقة على أي شي وجدولي الي كنت حاطته في أول الشهر اختبص وتخربط 😭 المهم سالفة أمس ما بخليها في خاطري باكملها اليوم بأثر رجعي😁 يستفزني جدًا تهميش الأطفال والتاس الي تحسهم شي ثقيل على النفس!! وخاصة في موضوع صلاة الأطفال في المسجد. أنا من بداية رمضان وأنا صابرة على بعض الحريم في المسجد ال ييطردون الأطفال أو يفرضوا عليهم انهم يروحوا آخر صف حتى لو كانوا جايين بدري وأقول شهر خير يا بنت لا تجرحي صيامك ولا تتجادلي معاهم،، لين اليوم صار موقف خلاني أتفجر عليهم،، طبعًا بما إنهم فارضين على الأطفال انهم يصلون آخر صف صرت أروح مع أختي في الأخير لسببين : الأول إني أبيها تتعلم الصلاة بالطريقة الصحيحة وأنا أدري انها اذا صلت لحالها جنب بقية الأطفال بتخبص معاهم،، والثاني انه هي نفسها ما تحب تصلي وحدها جنب الأطفال لازم أنا أو أمي جنبها،، وفي أثناء ما احنا نصلي جت واحدة متأخرة ولأنها ما تبي تصلي جنب الأطفال راحت جاية وتجر أختي من مكانها جنبي وتوقف تصلي معاها!! خير خير!! ولعت وأنا أصلي قسم بالله اقهرتني،، مو عشانها أختي بس،، لا عشان التصرف نفسه مستفز،، اذا انتِ جاية آخر الخلق تراه مو ذنب الصغيرة!! خلصنا التراويح والوتر وانفجرت فيهم،، يعني ما انفجرت حرفيا حاولت أضبط أعصابي شوي،، قلت لهم احنا ما جينا نتجادل ولا نبي نجرح صيامنا بس يعني وش مشكلتكم مع صلاة الأطفال!! قالوا السنة ان الأطفال في الأخير ومن هالكلام،، طيب اذا كان الترتيب هذا سنة فتعليم الأطفال الصلاة فرض والفرض مقدم على السنة،، ثم إن الطفل ما يتعلم لحاله ولا يتعلم من طفل زيه لازم جنبه أحد كبير يعلمه،، قالوا ازعاج وفوضوية قلت لهم انتوا سببتوعا لان طفل وجنبه طفل طبيعي بيصير ازعاج بس لو كل طفلة جنب أمها تعلمها الصلاة وتضبطها اذا سوت ازعاج ما كان حصل هالفوضوية،، كرهوا الأطفال في المساجد وفي الصلاة،، وآخرتنا نتحلطم من جيل احنا كنا سبب في تكوينه،، ويطلع معانا إما طفل كاره للصلاة وكاره للمسجد،، أو طفل ما يعرف أحكام الصلاة لانك تركته يصلي لوحده في آخر صف،، أو طفل مستهتر بالصلاة لأنك كنت تحسسه إن صلاته مو مهمة!! وما ادري ليه الناس صارت تعتبر الأطفال عبئ مو بس عيال الناس حتى عيالهم نفسهم،، يا أختي إنتِ بدال ما تطردي الطفلة من المسجد علميها الصلاة الصحيحة حببيها في الصلاة وبدال صلاوة التراويح الي ما ركزتي فيها اليوم او يمكن فاتت عليك حتى بيصير أجر هالطفلة كل ما صلت من يوم علمتيها لغاية ما تموت في ميزان حسناتك وبدال هالصلاة الي فاتت عليك كسبتي أضعاف أضعافها.. مدري لين متى واحنا فاهمين ديننا بشكل أعوج ومدري لين متى بننشئ أجيال بشكل خاطئ ونرجع نتحسر ونقول ايش ذا الجيل!! |
باقولكم سر يا بنات بما إني توني خلصت أسوي الحلا😁 أول شي كوني ذكية واختاري الأشياء الي بيمدحونك عشانها يعني حلا أو أي شي ينأكل وخلي المواعين لأختك😁😂 ثاني شي إذا أخذتي طريقة حلا لا تسوينها نفسها في كل مرة،، غيري فيها ولو شي بسيط مثلا بدلي نكهة الشكولولاتة ،،او ضيفي لوتس أو أي شي من هذا القبيل بعيدا عن الإضافات المريخية واعتمادا على إن الرجال عندهم حاسة تذوق قوية ما شاء الله>> استنتجت النظرية من اخواني بس مدري اذا كل الرجال كذا والا لا بس اخواني ما شاء الله فعلا حاسة تذوقهم قوية أنا عن نفسي إذا سويت شي وبتأكد من كمية الملح فيه أخلي أخوي يذوقه ما أذوقه أنا🙂💔 المهم راح يركزون أكيد على النكهة الجديدة في الحلا ويحسبونه حلا جديد واسمتعتي عزيزتي بالمدح😁♥️👌 |
اقتباس:
+ أشكر لك يا لقلوقتي كثيرا ذكر اسمك لأن الظاهر أنا ما بوصل لعدد المشاركات المطلوبة الا بعد عمر طويل😂💔 |
أحس بإحساس(الأبكم) وأنا آخذ اليوم أول جولة في المنتدى ولا أستطيع التقييم أو الإرسال☹💔 بس والله انشرح صدري لما دخلت ولقيت الوضع مرتب لون الخط والترتيب والرمزية😂😂💔 لا مو أنا ،، أنا كسولة زي ما عرفتوني دائما وأبدا،، التغيير سوته فاعلة خير فديتها 😂♥️ |
اقتباس:
اييه والله ياريت☹💔،، ما في عندهم نظام الصدقة؟😁💔 + حياك الله وهم نورتي وأسفرتي ياقلبي ولو متأخرة😍♥️ اقتباس:
هيومة قلبي شرايك تغيرين الدلع بما انا غيرنا المنتدى وتسذا🙂💔 وعيونك الزينة والله😁♥️ |
اقتباس:
اقتباس:
بس خلاص غيرنا اسم الدلع😁 وحياك الله أخوي رايق في مدونتي المتواضعة^^ ______________ كم مرة وردت في القرآن وعود إبليس ووعيده بأن يغوي بني آدم؟؟ "قال فبما أغويتني لأقعدنَّ لهم صراطك المستقيم"،،"قال أرأيتك هذا الذي كرمتَ علي لئن أخرتنِ إلى يوم القيامة لأحتنكن ذريته إلا قليلا"،، "قال فبعزتك لأغوينهم أجمعين" ،، وغيرها وغيرها كثيير!! وكم ورد من تحذير الله لنا من اتباعه؟؟ "ولا تتبعوا خطوات الشيطان إنه لكم عدو مبين"،، "الشيطان يعدكم الفقر ويأمركم بالفحشاء والله يعدكم مغفرةً منه وفضلًا والله واسعٌ عليم"،، "ومن يتخذ الشيطان وليًا من دون الله فقد خسر خُسرانًا مبينًا" ،، وغيرها وغيرها كثيير!! والطبيعي أنه إذا عرفت عدوك،، وحقده عليك،، وكيده وحرصه على أن يوقعك،، تحذره وتكرهه وتكون مهتم جدًا بأنك تفشل مخططاته!! _فماذا لو أن كُل هذا لم يُذكر؟! فما أوسع رحمة الله!! فإذا كنا بعد التذكير والتحذير والتكرار مازلنا نقع ونخطئ ونزل!! فالحمد لله كما ينبغي لجلال وجهه لا نحصي ثناءً عليه ..♥️✨ |
أنا ومن كسلي ما قرأت قوانين المنتدى وشروطه،، والظاهر اني لازم اقرأها وأتفقه فيه لأني مضيعة مرة :/ الحين تقييم وما نقيم وقلنا ماشي ،، رسايل وما نرسل وقلنا معلش،، بس خيار الاعجاب مرات ما يظهر لي بعد!! ليش طيب لييش أبكي أنا والا أبكي؟؟ يسروا ولا تعسروا يا جماعة وش الداعي لهالقانوين كلها!! -_- |
اقتباس:
اقتباس:
_______ أرسلت لي صديقتي مقطع يوتيوب وتقولي صح هذا زميلنا؟ فتحت المقطع قلتلها الا والله هو!! المقطع كان عبارة عن مقابلة تلفزيونية قصيرة معه،، يسألونه عن وضع اللاجئين في هولندا،، وكيف تهرب وإيش الي خلاه يجازف بحياته ويتخذ هالقرار.. لما كان يدرس معنا عرفنا انه تهرب لهولندا عن طريق بيلاروسيا،، ويومها استغربت وقلت لصديقتي كيف الواحد ممكن يخاطر بحياته وهو يدري انه ممكن يموت قبل لا يوصل حتى!! الله يقول" ولا تلقوا بأيديكم إلى التهلكة"! قالت الله أعلم ما تدرين يمكن شي أقوى من الموت!! زميلنا طلع إعلامي،، اعتقل لمدة أربع سنين،، صدر في حقه حكم إعدام،، طلع من المعتقل في صفقة من صفقات تبادل الأسرى،، خرج بانزلاقات في العمود الفقري وأمراض في الكلى من آثار التعذيب!! سافر مصر على أساس يتلقى العلاج،، ولأن حكومتنا(قاتلها الله) غير مسؤولة ماقدر يغطي نفقات العلاج!! سمع وقتها عن اللجوء لهولندا والتهرب عن طريق بيلاروسيا وبنفسية إنسان طالع من المعتقل محكوم عليه بالإعدام ظلم وافتراء ينتظر الموت في كل لحظة ولا يدري متى راح ياخذونه للساحة،، فشيء طبيعي انه يستسيغ الفكرة!! وفعلا تهرب مع مجموعة من الناس،، عانوا من البرد والجوع والخوف،، قطعوا ****** خلال ثلاثة أسابيع علشان يوصلون للحدود الهولندية،، وحاليًا هو قدم طلب لجوء وينتظر النظر في وضع.. وآآآه من جوااا القلب وبكل حسرة،، لما البلد الي مفروض تكون الأمان لأهلها تنقلب جحيم!! لما تكون حرية الرأي والتعبير والنطق بالحق جريمة توجب عليك الإعدام،، لما ابن البلد يضطر يختار ما بين الموت والموت!! دعواتكم في الأيام المباركة من هذا الشهر لليمن بأن يردها ربي لأحسن حال،، وجميع بلدان العرب والمسلمين المنكوبة وأن يرد كيد الكائدين في نحورهم ،، ولعلها ليلة القدر فلا تنسونا .. |
انشقي يا أرض وابلعيني😭💔 خبصت تخبيصة قوية☹ اقتباس:
باموت من الاحراج😭😭😭 أعتذر منك أخوي والله ولكن قوانين المنتدى الي الله يسامح من اقترحها 💔 |
استعدادنا للعيد هالمرة من نوع آخر،، وحلاوة العيد من نوع فاخر جدا ،، حلاوة العيد عبارة عن أحلا توأم شفتهم في حياتي😍😍♥️ ،، زوجة اخوي ولدت وجابتهم لنا وأخيييرا بعد انتظار تسعة أشهر😍♥️ كلنا مبسووطين واحساااس رهييب أول ما شفناهم،، صغااار بالحييل كأنهم بِسَس😍♥️ يشبهون بعض والاثنين يشبهون أخوي ،، وانا ما عندي شغلة غير إني أطالعهم مفتونة بكل تفاصيلهم حتى بكيهم سجلته وكل شوي أسمعه😂♥️ أرسلته بعد لاخواني وفطسوا ضحك،، أصواتهم صغيرة وبكيهم يضحك😂😂♥️ الله يحفظهم ويقر عين والديهم فيهم ويجعلهم من خيار عباد الله♥️ |
مهما قالوا لك ان خشمك مسدود بسبب اللحمية،، واللوز منتهية صلاحيتها بعد ولازم تطلعهم،، لا تصدق، لا تصدق، لا تصدق والسبب انه بعد العملية راح يصير الزكام أقرب لك من أنفاسك،، إذا تعرضت لهواء بارد زكمت،، واذا تسبحت بمويا باردة ولو شوي زكمت،، واذا تغير عليك الجو بعد زكمت وتدرون وش الي ما أحبه أكثر من الزكام نفسه؟؟ السخونة وانا أبد ما تجيني سخونة زي باقي الأوادم،، سخونتي دايما داخلية.. وما أعرف اني مسخنة الا اذا حسيت ببرودة وقمت أتنافض وعظامي يتكسرن وعيوني توجعني ورقبتي بعد،، ولكن وقتها أكون خلاص قد بلغت من السخونة عتيا💔 خلاصة القول حافظوا على خشومكم وحلوقكم من عبث الدكاترة،، ولا تصدقون ان العملية كويسة ابدا مو كويسة ولا تصدقوا بعد انها سهلة تراهم كذاابيين،، وكل عام وانتوا بخير وصحة وسلامة بعيدا عن الزكام |
أحب إني أحتفظ بذكرياتي الحلوة،، وأحب أدور ذكريات حلوة في عز الضيقة،، هذا كان أول عيد بدون أنيسنا أخوي وصديقي ،، وهو من الأسباب الي خلت عيدنا هذا كئيب نوعا ما بالإضافة للضيوف ثقال الدم،، ما علينا خلونا نجي للشي الحلو https://f.top4top.io/p_23189ltl70.jpg هذي الذكرى الحلوة في عيدي هالمرة،، (أنس) أخوي الي عمره ما خذلني أو خيب ظني دايمًا موجود إذا احتجته،، نتفق جدًا وشخصياتنا متقاربة نوعا ما مع بعض الاختلافات عز علي فراقه،، لما كان على وشك السفر كان يقولي ودي أحطك في الشنطة وآخذك معاي ،، طيب مافي منك أحجام صغيرة على ميداليات�� كلمته اليوم يقول منتظر بفارغ الصبر الحش على الضيوف هههههههههه لو كان موجود كنا كل يوم نعقد أنا واياه حلقة حش عليهم ،، بس أبشركم سمعتهم يقولون ان يمكن يسافرون بكرة وأخيرا�� الله يجيب بكرة على خير ان شاء الله���� |
تلك العلاقات التي تفتقر للمصداقية والأمان ك(الغرغرينا) ،، إن لم تقطعها فستُهلِكُ روحك .. ... حقيقة،، دايمًا وأبدًا أهم صفة بالنسبة لي في أي إنسان أتعامل معاه الصدق والوضوح،، أكره الدوبلوماسية الي يقولون عليها،، أعتبرها من الأوبئة المتفشية في المجتمع في العصر الحديث .. |
أحسني اليوم عصفورة وأنا صاحية كذا بدري :icon10: ايش عصفورة؟ إلا بومة مافي عصافير تصحى من الساعة ٢ الفجر!! :138: ما نمت غير ساعتين بالضبط ولا أدري ايش الي مصحيني كذا ،، لا وبعد عيوني مفتحة بأقوى قوتها حتى مافي نعاس!! :69: رحت بعد الفجر عند أمي يقال أدور حنان ويمكن أنام إذا تسدحت في حضنها،، طلعت بعد زيي طاير من عينها النوم ومعصبة ليش انها ما نامت وطردتني ههههههههههههههههه قالت انقلعي بس أنا ناقصتك!:xss: أنا وأمي حساسين جددا ضد المسهرات ،، إذا شربنا بالليل شاي ،قهوة او اي شيء من هذا القبيل مستحيل ننام،، بس العجيب انه أمس ما شربنا شي من هذا!! قعدنا نتذكر ايش شربنا بالليل وطلع انه شربنا عصير جوافة،، بس هل معقول انه الجوافة تسهر؟! :MonTaseR_94: الموضوع يبغى له بحث-_- |
خذني إلى مرافئ السكينة إن تهت في ظلمات البحر يا الله♥️✨ |
أختي الصغيرة معتمدة المثل الي يقول"الزن ع الودان أمر من السحر" في حياتها .. زنااانة بشكل مش طبيعي ،، وأنا أكثر شي ينرفزني في الحياة ان الواحد يزن على راسي،، أصبر على شقاوة الأطفال وعلى عنادهم وطولة اللسان وكل شي بس الزن لا لا لا ،، والله اني بعض مرات أمسك نفسي غصب لا أضربها!! علمًا بأني ما أسخى والله أمد ايدي على طفل نهائيا ولا حتى تراودني الفكرة ولكن وبقدرة قادر أختي النتفة أبو سبع سنين خلتها تراودني -_- مدري من وين جايبة هالصفة!! أذكر اني كنت شقية لما كنت صغيرة بس ما اذكر اني كنت زنانة :/ والله مصيبة لو كنت😂 لا بس ما أظن أمي تقول ما تعبتها مثل أختي ذي😌😁 بس ما أخفيكم سرًا إني اعتمدت طريقتها مع اخواني هههههههههه والله نفعت معاهم ،، أنشب للواحد واتلزق فيه لين أغثه وهو لما ينغث يجيب لي الي أبيه عشان يفتك مني هههههههههه،، الجانب المشرق من الموضوع😂✨ |
https://youtu.be/e2T7fCTR8Ck إدماني الجديد😍😍 عبد الله الجار الله يا ربي صوته فخم فخمممم:icon32: أنا إذا أدمنت شي لازم أنقل العدوى للجميع وبدأت بأمي وفعلا حبته ،، مفروض يعطيني نسبة من عدد المشاهدات قاعدة أسوق له من قلببب😁،، ولكن الحق يقال خامة صوته تستاهل يعني فخامة الصوت مع فخامة الكلمات شيء إبداعي والله👌 |
من وقت ما طلعنا من عند الكوافيرة لهالحين وانا مصدعة 💔 والسبب ان القصة الي هي حلم حياتي المستحيل طبعا لأن نبع الحنان رافضة تحت شعار(اذا تزوجتي قصيه) الكوافيرة قصت لأمي نفسها وطلعت تجنن😭😭💔 وأنا جاني صداع من القهر:crying: سويت كوب بُن أكبر من راسي على أمل ان هالصداع يفك عني بس مافي فايدة:69: |
ويبقى شوقي لك غصة في حلق السعادة،، مرارة في عذب الأيام ... |
رن المنبه وخلصت الإجازة😭😭💔 هو يعني أنا ما نسيت ولا راح أنسى بس حطيت المنبه خوفًا من نفسي الأمارة بالسوء لا تزين لي الغياب في أول يوم،، وأنا البدايات عندي مهمة جدا على طاري الدراسة في عندي مشكلة عويصة أفكر فيها من شهور ولا طلعت بحل،، باقولها لكم بعدين بعد انتهاء الدوام 🚶♀️💔 |
وأخيرا لقيت وقت أتكلم عن مشكلتي العويصة هي السالفة طويلة حبتين ولكن مختصرها اني درست سنة أولى في الجامعة أدب عربي وكان المفروض السنة الي طافت أكون سنة ثانية ولكن لظرف ما جمدت قيدي في الجامعة لمدة سنة ،، وعشان أستغل هالسنة قررت آخذ دورات لغة أون لاين ،، لهنا أوكيه؟ لا مش أوكيه أصلا من هنا تبدأ المشكلة السنة قربت تنتهي وتبدأ اجراءات الاستئناف ،، وأنا بصراحة حبيت جو الانجلش والاون لاين،، حبيت الاحترام المتبادل وإنك تاخذ درجتك حسب مجهودك مش حسب نفسية الدكتور،، وان يكون لجهدك أثر .. ونفسي الأمارة بالسوء تقولي خلاص يابنت كمليها اون لاين ودورات لغة وبتاع وشاي بنعناع ،، وبعد ممكن تاخذين لغة ثانية بعد ما تخلصي الانجلش،، تدرسي وتتسلي يعني كذا حاجة حلوة وخفيفة ويرجع ضميري يقولي بلا غباء!! الدورات حلوة لزيادة مهاراتك بس من متى كانت تكفي عن شهادة البكالاريوس؟ وأمي تسألني ليه ما اسأل زميلاتي الي كانوا قبل عن المواد الي أخذوها واستعد للسنة الجديدة،، ما تدري عن الموال الي في راسي😁 لو تدري به بتفجر فيني،، فقررت اني أصرفها وما أقولها لين أقرر،، يعني الواحد اذا تفجر على الأقل يكون أخذ قراره بتأني وعن قناعة😂 مشكلتي مترددة جدا في القرارات المصيرية،، ما أحب ذا الصفة فيني تغث :( |
اقتباس:
اقتباس:
في في راسي هوشة كنت باكتبها بس احتراما للتقييمات الحلوة باكتبها في تدوينة ثانية😁 |
ليه مافي كفوف الكترونية؟ يعني من جد الواحد مرات يحتاج انه يصفخ أحد كف محترم بس ما يقدر -_- مثلا،، انا عندي واحدة في الكلاس وودي أكفخها ،، في الحقيقة هي أصلا لازم تتكفخ .. عالة كبدي يا ربي😭😭 ،، تجبر الواحد انه يحش عليها،، ما يدري الواحد يعلق على لبسها والا على الميكاب الي يحسسك انها طالعة سهرة والا الأضواء الي وراها والا دلعها البايخ الي ماله داعي والا ثقالة دمها😭😭😭 أنا استأذنت من الأستاذ أقفل الكاميرا عشان الانترنت ضعيف وبعد حر وأنا منقبة والأستاذ طيب ومتفهم ووافق،، تقوم تقول يا أستاذ ليش بعض الطلاب ما يفتحون الكاميرا😤 صديقتي المصرية وقتها ارسلت لي ع الواتس تقولي " هي البت دي فلحوسة كده ليه؟" قتلتني ضحك😂😂 الأستاذ حط عناوين كإقتراح للبرزنتيشن والي يبي ممكن يختار منهم،، تقوم تسأل ع الفاضي علما بأن العناوين واضحة أصلا،، وكان من ضمنها التحدث عن العلاج التقليدي والفرق بينه وبين العلاج الحديث تقول يا أستاذ كيف يعني؟ قالها يعني طرق العلاج الشعبية مثل العلاج بالعسل أو الشاي الأخضر وهالأشياء قالت وااو تيتشر عسل؟ تقصد اني عسل؟ يا ربي يا ثقالة الدددم😭😭 صديقتي قالت لو تدري النحلة الا تنتحر😂😂💔 |
"Open minded" مصطلح جميل صح؟ بس المعنى مو جميل أبدًا وش معنى انك تكون Open minded؟ يعني انك تشوف الشي الي مفروض ان فطرتك تنكره شي عادي وما تستغربه،، ويكون الموضوع عندك مجرد اختلاف وجهات النظر!! يعني ان عيونك تشوف الوضع بشكل طبيعي ونفسك ما تعيفه!! يعني يصير عندك تقبل للفكرة لدرجة انه ما عندك مانع اذا في يوم من الايام غيرت وجهة نظرك وتبنيتها او إذا أحد من أهلك سلك مسلكهم !! كل إنسان مفروض يحترم،، الا المجاهيرين هم بنفسهم تنازلوا عن ذا الحق،، تدري ليه؟ لأن االه أنعم على الإنسان بنعمة لو تفكر فيها ماراح يتوقف لسانه عن الحمد عليها (الستر) نعمة أنعمها الله على الإنسان،، كلنا لنا جانب مظلم،، وكلنا عندنا ذنوب وزلات،، لكن الله بنعمة الستر سترها ستر سيئ أفكارنا ووساوس أنفسنا وقبائح أعمالنا عشان يساعدنا نتقبل بعض ونتعايش،، بل وأكثر من كذا نحترم بعض ونحب بعض ولكن الي رفس نعمة الستر برجلينه لا يستحق الاحترام ،، ما يستحق انك تدنس فطرتك وتتقبله.. (كل أمتي معافى إلا المجاهرين) اللهم عافنا وأتم علينا سترك .. |
قسم بالله مالي شغل😭😭 ايش ذا اييييش ذا؟؟ كنت أكتب تقييم وكنت حريصة انه يوصل ولسة ما كتبت كلمتين على بعض طار بالغلط طبعا في ذا المنتدى طامة كبرى ان يطير التقييم منك لأن لازم تقيم الأمة الإسلامية كلها وما جاورها عشان ترجع تقيم نفس العضو😭😭😭 وبما اني انسانة مشهورة بالكسل باحط التقييم الي كنت باكتبه هنا ويارب همس تشوفه😢💔 المهم يا همس تدرين ليش ما سألتك اذا انتِ همس حقت غرام او لا؟ عشان صارلي موقف محرج مع عضوة شبهت على اسمها ،، وبدون كلام ولا سلام ولا سؤال رايحة استهبل على البنت واستخف دمي😂😭 وتطلع البنت ما تعرفني ولا هي ننفسها الي في غرام فحبيت اني احفظ ما تبقى من ماء وجهي🤣😂💔 |
وكنتَ أدعوك يا الله في صغري رزقًا من الأنس أو قطعًا من الحلوى لما كَبرتُ عرفُ الرزق يا ربي بأنه الأمن والإيمان والسلوى :31: |
مدري كيف عدت ليلة أمس،، ولكنها عدت على كل حال والحمد لله .. كان عندي محاضرة وشوي أسمع صراخ وبكي وأمي جات تقول تعالي الحقي ولد أخوك مختنق ،، الولد شرق لأنه كان يبكي وأمه مصرة تعطيه العلاج كنت باموت وانا أشوفه مو قادر يتنفس ولونه بدأ يتغير وأمي تبكي وزوجة أخوي بعد تصارخ،، كنت أحاول أسعفه باللي أعرفه ويدقون على أخوي ما يرد وبعد ما أكلت فجيعة تكفيني لمية سنة قدام بكى الولد أخيرا وتنفس الحمد لله طبعا أخوي تهزأ تهزيئة محترمة ليش ما يرد،، والصدق ان موقفه كان صعب،، قال وقتها كان عنده حالة إسعافية في الطوارئ مرة حامل في الشهر التاسع وللأسف توفت الله يرحمها لكن الطفلة عاشت،، قالت له مرته وولدك يموت عادي؟! قال أنا أأدي الأمانة الي علي وربي بيحفظ عيالي إنشاء الله لو جينا للمنطق كلام أخوي منطقي،، لكن الأم اذا تعلق الأمر بطفلها ما تعرف المنطق وما عندها مانع لو تفدى ولدها بالناس كلهم .. |
ضاقت فلما استحكمت حلقاتها فرجت وكنت أظنها لا تفرج بيت الشعر ذا ينطبق على مزاجياتي وبقوة أقفل فجأة أحيانا بسبب وأحيانا بدون وأحيانا في سبب ولكن أحس انه ما يستاهل اني أقفل عشانه والقفلة ذي له مراحل الأولى أكون أحس بالقفلة بس أحاول أطنشها وأتجاهلها وأكمل يومي بشكل طبيعي الثانية وتكون القفلة صار تأثيرها أقوى شوي وأكون واضح اني قاعدة أسلك وأمشي يومي هه بالغصب الثالثة وأكون وصلت أعلى درجات القفلة وأتخذ وضعية لا أرى لا أسمع لا أتكلم، أتابع المشهد بعيوني بس وأجلس في مقاعد المتفرجين ولكن بعد القفلة القوية ذي سبحان الله تفرج تماما وحتى اذا في موضوع كنت مو قادرة أفكر فيه تتهافت بعدها الأفكار وكلو يمشي تمام أمس كانت الانفراجة من قفلتي الحمد لله،، ودخلت موضوع أريام الي شفته أول ما نزلته ولكن لأني كنت قافلة فما كان في شي أكتبه،، ويوم دخلت لقيت الكل مكفي وموفي وما بقى شي أقوله🥲💔 باعلق تعليق بسيط بس،، والمرة الجاية ان شاء الله باحجز لي مكان في المقاعد الأولى قبل ما يخلصون علي الحكي🙂💔 |
اكتشفت إن كل (أحمد) بكااش أحمد ولد عمي عمره ٤ سنين،، أسأله مين تحب أكثر؟ يناظر بعويناته الحلوين وببراءة مدري هي حقيقية والا يصطنعها يقول ماما وبابا وانتِ:x124: ،، وأي أحد يسأله نفس السؤال يعطيه نفس الإجابة😅،، وعلى قولت الفنان مدري منهو "كذاب لكن حالي،، كذبه جديد مش بالي"🙂♥️ |
اقتباس:
عشان كذا قلت كل أحمد😂 آمين يارب،، ويسعد مساك أخوي:MonTaseR_11: اقتباس:
هههههههههههههههه يعني ابتزاز على رشوة على طيبة قلب وكرم منك وحطيهم مع بعض في الخلاط 😁 وبعدين شفيك متكاسلة هي كلها ١٠ مشاركات صغنونة تسدحينها لأختك الضعيفة:eiwp: الله يسعدها لقاليقو سدحت لي مشاركات مليااان والا كان الحين اشحد منكم يابو قلوب قاسية😿💔 |
|
استغفر الله ياربي الحر مش طبييعييي أنا قاعدة أتشوي يا جماعة😭😭 أتذكر انه احنا لسة في بداية يوليو وتخنقني البكية لسة مشوارنا مع الصيف طويييل😢💔 رحت لأخوي أقوله أخوي حبيبي قلبي انت ☺♥️ قال خير اللهم اجعله خييير🙂 قلت له ايث رأيك☺♥️ قال ايث رأيي في ايث؟🙂 قلت له تسوي لنا عصير أناناس بااااارد من يدينك الحلوين،، ويوم أحس البرودة نزلت على كبدي أقول يالله انك تسقي أخوي حبيبي من نهر الكوثر☺♥️<<< عاد العصير من يدين أخوي ذا ما ينتفووت من جد غيير😍👌 قال آمين بس معلش مافيني حيل🙂 أستسلم؟ لا طبعا ما انا خلاص صرت حافظة قانون الزن ع الودان😈 وزنييت لين وافق جعلني فداه😁♥️ |
ليس شرطاً أن يكون الرزق مالاً،، قد يكون الرزق خلقاً أو جمالاً..!! قد يكون الرزق عقلاً راجحاً،، زاده الحلم جمالاً وكمالاً..!! قد يكون الرزق علماً نافعاً،، قد يكون الرزق أعمارا طوالاً..!! ليس شرطاً أن يكونَ الرزقُ مالا،، قد يكونُ الرزقُ قلباً صافياً يمنح الناس وداداً ونوالا..!! قد يكونُ الرزقُ بالاً هادئا،، إنما المرزوق من يهدأ بالا..!! قد يكونُ الرزقُ طبعاً خيّراً،، يبذل الخير يميناً وشمالا..!! ليس شرطاً أن يكونَ الرزقُ مالا،، كن قنوعاً واحمد الله تعالى...♥️ كلمات أ.د.محمد بن أحمد الدوغان https://www.instagram.com/reel/Cetwx...d=MDJmNzVkMjY= الإلقاء بالصوت الفخم:سكر: |
توأمنا فخمين يا جماعة فخمين مرة:Chulo: كل الأطفال ياخذونهم يتلقحون،، إلا عيال أخوي اللقاح يجي لعندهم في البيت:MonTaseR_218: هذي من فوائد ان أبوك يكون دكتور:icon10: يا عيني هم الحين أكيد يعورهم:eiwp:💔 |
وماذا عن أُختِكِ الكُبرى؟ إذا تبسَّمتْ، غنَّت أزهارُ المدينة كما إذا حلَّ الربيع،، وأما عذوبة صوتِها، فإرهاصات الفتحِ إذا ما اشتد حِصارُ الحُزن على أسوارِ قلبي،، وأما عن قلبِها، فما أشبهه بقلب أمي..♥️ زمااان عن الكتابة آخر شي كتبته ما أذكر متى بس من شهوور ،، حتى هواياتي تخضع لقوانين المزاج🙂💔،، واليوم رجعت هفتني نفسي وكانت الكلمات من نصيب أختي♥️ |
اقتباس:
خلينا نكمل هنا بلاش تقاييم لأني دخت والله في المرة الي فاتت وانا أقيم الخلق🙂💔🚶♀️ |
اقتباس:
عادي ياشيخة سماحات 😁 أسهل وأريح بصراحة أنا كسولة🙂،، وزيد لو نهدر بلهجتنا ومحد يفهم😂😂 وبعدين سؤاال؟ كيف كذا بسرعة رجعتي تقيميني؟؟ أنا أجلس أسبوع أدور زباين أقيمهم🤣🤣 |
| الساعة الآن 07:59 AM. |
Powered by vBulletin® Copyright ©2000 - 2024, Jelsoft Enterprises Ltd.
SEO by vBSEO 3.6.1 al2la.com
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع الحقوق محفوظه لـ منتديات مسك الغلا