أختي نونو نحن إذا جينا نحلل الموضوع من الغلطان راح نختلف كثير لأن الموضوع ماهو سهل أبدا . حسب العرف القبلي عندنا ما مر علي رجل ضرب زوجته لأنه منقصه في حقه كرجل حتى لو قالت فيه ماليس فيه من سب وشتم لأن إهانة المرأة قد تجر المجتمع إلى شرارة من الحروب القبلية اللي الله يكفينا ويكفيكم شرها . أعرافنا تختلف عنكم طالما أخوانك تضاربوا مع صهرهم . الحل بيدك . هذه فتنة لها جمرة تشتعل والله أعلم وين ممكن توصلكم إذا كنتوا مجتمع قبلي أحيانا ينجرف خلف الأعراف القبلية ويتصرف بتهور قبل ما يرجع للشرع والقانون .

ما نبري الزوج أبدا ، فعلته مشينه وعيب صراحة لكن بعد انتوا ما قصرتوا . انتي قلتي ماهو رجال واكيد اخوانك لما هجموا على صهرهم رجعوا له نفس الكلام انت مب رجال وتضرب حرمه . هنا اشتعل الفتيل وهذا مبين من اتصال بينه وبين عمه اللي هو أبوك.
الحين أنا صراحة ماعاد همني في المقام الأول إلا أبوكم .

ماهي سهله لما يقول الأب لعياله خليه يربيكم . أنا لو أبوي قالي كذا على طول بفهم قصده . يعني قصده يبلغني أني مب حريص على شرف أختي وسمعتها أكثر منه وكنتوا متقدمين على الزوج بدرجة لأنه ضرب زوجته وهذا عيب في كل عرف ومرده يجي يعتذر . لكن لما العيال حاولوا يضربوه هنا صار هو متفوق عليكم بخطأ جسيم مقابل خطأ استفزاز وخطأ جسيم لأن العيال لو تمكنوا منه راح يدخل العنايه بكل تأكيد .

أختي في هذه الحالة والظرف الصعب من رأيي تعتذري لأبوكي وتواسيه وتكوني انتي حلقة الوصل اللي فازت بأجر اصلاح ذات البين وعلى الأقل اذا ناقشك كوني صريحه معه ايش قلتي بالضبط لزوجك لأنه إذا عرف إنك قلتي كلام لا يليق وخبيتي عنه ودرا من زوجك كذا تكوني انتي اهنتي ابوكي بطريقة غير مباشرة وخليتي زوجك يستقوي على عمه .كوني قريبة من اهلك واخدميهم والصبر الصبر هذا الموضوع قوي معد يتحمل تهور لأنه على وشك تفجير مصائب وبلاوي الله يجيركم منها .

موضوع محير صراحه ما تدري تهدي من وتخلي من ولا تدري تتوقع من وين ممكن تجي شعلة المشكله اللي محد حسب لها حساب . الله يستر بس

في مثل هذه الأمور الحساسة ما ينبغي للأولاد التصرف دون استشارة الأب لأنك تكون بموضوع وتلاقي الجيران تداولوا موضوع آخر .

أذكر قصة رجال رجع من الدوام معصب . شاف بنجالي يبيع أكل قدام بيته قال روح لا تبيع للأطفال واذا شفتك بضربك . بعد مده قام الرجال يضرب البنجالي قدام بيته والجيران تجمعوا وهو يسبه .

وين كنا ؟ بنجالي يبيع اكل للاطفال . صح ؟
وين صرنا بعد التهور ؟

الناس قالت شكله البنجالي يغازل الشغاله أو حد من بنات الرجال .

وضحت الفكره يا وخيتي؟

الامور العائليه تتناول بسريه تامه بوجود عقلاء وناس راكده واطراف مستعدة للتنازل عن شوي من حقوقها للصلح العام . الحين انتي بهذا الموقع أكثر حكمة من اخوانك صراحة وهذا ينحسب لك ولازلت أظن إنك زوجة طيبة وفعلا الاحترام واضح وقلبك على عيالك وزوجك واخوانك واهلك طبعا .

لا تخليهم يعيدوا الكره عشان محد يدري . احتووا الموضوع ولملموه بينكم وان شاء الله زوجك يرجع لصوابه ويعتذر بعد هو ما هو بريء الخطأ راكبه بعد .

الله يسعدك ويعوضك راحة بال ويبارك فيك . انتي بنت أصل