السلام عليكم

الله يسامحك أريام فتحتي للرجال باب يتنمرون علينا والحين وش يسكتهم؟! :/

بس تدرين؟ المرأة ساعدت الرجل على عدم فهمها

الموضوع بدأ من يوم ما ظهر أحد التماسيح وقال للزهرة الرقيقة انتِ عاطفية

وهي بكل هبل اعتبرتها سبة وقامت تبي تثبت لهالتمساح انها غير عاطفية فخرجت من فطرتها وصارت لا هي زهرة ولا هي تمساح

والمفترض انها كانت توقف وتقوله ايييه هذا أنا وهذي فطرتي انا عاطفة ومزاج وهرمونات خلقني الله كذا عشان تزهر الأرض ،، وانت تبي تتأقلم معي هالشكل يا أهلا وسهلا ما ودك خذ عفشك وروح لك كوكب ثاني ما فيه عاطفيات والله يجزاك خير تخفف عن كوكبنا الكثافة السكانية والاحتباس الحراري
^
^
^
الكلام أعلاه مزحة وأعتذر وإن كان فيه شيء من الصحة والواقع إلا أنني مو من أنصار تأجيج الحرب بين آدم وحواء

نيجي للجد
فهم الرجل للمرأة وفهم المرأة للرجل يجي بالسهالات ولا فيها أي تعقيد

الي معقد أمورنا هاليومين هو التدقيق والتركيز على صغائر الأمور

التدقيق يفسد جمال الأشياء ،، لأنه أي شيء جميل لابد يعتريه النقص

لازم نغض الطرف عشان نشوف جمال الأشياء (ولكن سيد قومه المتغابي)

الشي الثاني في جرثومة دخلت المجتمع يعني ممكن نشوفها صحيحة ومنطقية لكن مو دائما الشيء المنطقي هو الي يحل الأمور ..

هالشي هو تطبيق نظام الحق والواجب في كل صغيرة وكبيرة في الحياة الأسرية

زوجتك طبخت،، واجبها صحيح بس ما يضر لو شكرتها وطيبت خاطرها بكلمتين ماراح تنقص لا يد ولا رجل والله!!

زوجك أعطاك مبلغ تشترين فيه أغراضك،، نعم واجبه بس برضو انتِ ما راح ينقص من قدرك شيء لو شكرتيه

الحياة بشكلها الحاضر تحطم الروابط العاطفية والاجتماعية باستمرار وبدون ما نحس ،، هالأشياء البسيطة تجدد هالروابط

ويبقى الفهم شيء نسبي،، ومن باب الانصاف طلب المرأة من الرجل فهمها بكل تقلباتها شيء أشبه بالمستحيل

مو لأنها لغز ولا شي،، لكن يا عزيزتي انتِ كائن حي ،، تطرأ عليك تغيرات وتقلبات ومو درس فيزياء ولا معادلة رياضية

تكفي المعاملة بالحسنى بلاش نعقدها
وسلامتكم