احبك يا بعد نبض الخفوق ورعشة الاهداب ..
احبك والأمل يرسم على ثغر الفجر نوره ..

تجين بهمس يغريني حنينه ريحة الغيّاب ..
واجيك بقلب مايرضى بغيرك بنت بلوره ..

تمنّع هالحكي يلبس على صمت الرحيل ثياب ..
وجاك يبوح من صمته ويرسم في المدى صوره ..

طغى جرح الجفا وادمى خفوقن في هواكم ذاب ..
تولّع من صغر سنه وصارت وجهتك سوره ..

تمطّى وامتطى صهوة خيالن ممتليك اعجاب ..
وطاحت بالصدر بتلة ربيعن فاحت زهوره ..

وغنّى لك مداهيل الخفوق بريحة الاطياب ..
وجاك الصبح من وجه السنين يزيح ديجوره ..

لحسنك قامت اوراقي تغنيك الهوى غلاب ..
ومثلك لاعشق قلبن تغنّى القاف منثوره ..

قسم واللي جعل حبك بصدري اول الاحباب ..
لغيرك ماقرا حرفي نديم الهمس وشعوره ..

احبك والهوى عذري وصمت العاشقين عتاب ..
احبك والمطر ثغرك وروحي اليه مضموره ..

تعالي نعشق النجمه ونقفل من ورانا الباب ..
ونصعد للفرح سلّم ونبني للامل دوره ..

تري حلم اللقا موعد وبالموعد تطير اسراب ..
دخيلك مدي من صدرك طريق العمر وجسوره ..

ابغفى في وطن صدرك وابسدل للقا اهداب ..
تنام بحضنك الدافي ويعلن هالفجر نوره!!

تركي المعيني