قصه منقوله جميله عن الحب




‏يا شريفة متى ودك نروح
‏ يم ديرة هلك يا العسوجية
‏بيت من قصيدة مشهورة سمعناها صغاراً ورددناها كباراً ولا تزال تثير فينا أعطر الذكريات وخاصة هذا البيت:
‏وهذه القصيدة قيلت قبل ١٠٠ عام. وخلفها قصة حزينة.
‏فـ شاعرها (ابراهيم الكنعاني) من أهل عنيزة، كان يحب بنت عمه شريفة ولكنها لم تبادله الحب..!!
‏بل تحب رجلاً آخر وكل ماحاول يتقرب منها تصده لأنها تحب هذا الآخر، ولكن الآخر لم يحبها وتزوج غيرها..!!
‏فحزنت وعاد لها المحب الحقيقي ابراهيم وقال: نتزوج ؟! فقالت: (حتى يطيب جرحي من فلان) ومع كل هذا الصدود إلا أن المحب الصادق صبر ثم تزوجها وعاشوا سعادة الحب والوفاء، وقد ذاع صيت محبتهم، إلا أنه لم يمض سوى سبعة أشهر على زواجهم حتى أصابها المرض المعروف (الجدري) الذي لم يكن له علاج في ذلك الزمان. ‏فكان يداويها ولم يعزل نفسه عنها غير مبال بالمرض لو أصابه، وقال لها: نروح لأهلك فقالت بعد ٤٠ يوم حتى أطيب لأن فترة ٤٠ يوم هي المنجية من المرض، وأشتد عليها المرض قبل انقضاء الأربعين يوم..!!
‏وفي الأيام الأخيرة لشريفة بكاها الكنعاني بهذه الرائعة :
‏يا حمام على ****** ينوح
‏ ساجع بالطرب لا واهنيه
‏قلت حيه ولاكنه بيوحي
‏ مر عجل ولا سلم عليه
‏واعسى السيل دايم ما يروح
‏ ما يفارق جفار الصالحيه
‏حيث ينصاه خطوات الطموح
‏ كل بيضا هنوف عوسجيه
‏تنقض الراس لاجت بتروح
‏ وتنكسه لية من فوق ليه
‏نفضت راسها ودها تروح
‏ قلبها مشتغل يبي خويه
‏يا شريفه متى ودك نروح
‏ يم ديرة هلك يالعسوجية
‏قالت اصبر يطيبن الجروح
‏ شهر وعشر ودنولي مطيه
‏كن في ضامري قدر يفوح
‏ أو غروب توامى في ركيه
‏روح روحي بغت روحي تروح
‏ يوم قيل الغضي فيه جدريه
‏جيت ابشرب والى مسك يفوح
‏ غاسل فيه وضاح الثنيه
‏والحجب نابيٍ فوق السطوح
‏ والجدايل على متنه طويه
‏جعل زمل يبي خلي يروح
‏ ينكسر في شعيب الصالحيه
‏قلت يا ذا الحمام اللي تنوح
‏ جارك الله عن الرامي نجيه
‏ذكرت صاحبي مبري الجروح
‏ قذلته فوق متنه هلهلية

قصة اليوم لاحد الكرماء من قبيلة الدواسر


شاعر معروف كان مسجون بسبب مبلغ مالي
‏وأمر الملك سعود رحمه الله بسداد دينه واخراجه من السجن
‏ولكن سدد ديون خوياه وطلّعهم وترك نفسه بالسجن!

‏كنت اسمع بهذي القصة من زمان وحطوها لأكثر من شخص لكن صاحبها الحقيقي هو صاحب الابيات الشهيرة /

‏مادام جودات الفتى من ذراعه
‏فانا طويل الباع ماني بمجهول

‏ماني باميرً مير طيّب جماعه
‏سيفً لربعي فالمواجيب مسلول

‏لاقدموني لابتي ظرف ساعه
‏قدمتهم مقدار خمسة عشر حول

‏/

‏الشاعر سعد بن هتيل المساعرة الدوسري ..

‏تم إيقافه بيوم من الايام بمبلغ ٨٠ الف ريال
‏واضمن لكم انها من كرمه لأنه رجل كريم جداً
‏ ومذكور بكل علمً طيب رحمه الله ،

‏سأل عنه الملك سعود بحكم معرفته فيه وبحكم انه كان موظف بالديوان الملكي ، واخبروا الملك بالي حاصل لسعد ، فقال الملك هذي خمسين الف وطلعوه ، وراح فيها احد الاخوياء وعطاها سعد وقال سعد هذي ماتكفي ديني لكن رح وطلّع فيها خوياي الدواسر الي مسجونين بدين ، واذا بقى منها شي طلّع بها خوالي القحاطين
‏( كانوا خواله من قحطان ) وفعلاً هذا الي حصل وطلّع خوياه كلهم وترك دينه،

‏وبعد مده راح الملك سعود يتمشى شمال عن مدينة الرياض ، وسأل الخوي الي ارسله لـ ابن هتيل وقال وين سعد وش صار عليه ؟
‏وعلمه الخوي بالسالفه كلها أن سعد سدد بالخمسين الف ديون خوياه وترك نفسه ومازال موقوف ..

‏وأمر بعدها الملك سعود بسداد دينه كامل
‏ واخراجه من السجن ..

‏( الطيب فطرة بالانسان )

‏كذلك له قصه شهيرة جداً مع خالته ضرب فيها أروع الامثلة بالبر ، ويُقال انها اخته من الرضاع ، بعد ماجته وقالت ياسعد ماجيتك الا من قِل وحاجة ، وكعادة ابن هتيل قال ابشري بسعدك وبعد ماعشاها واكرمها اليوم الأول
‏جاء صباح اليوم الثاني ،
‏واخذ زوجته وطلع من بيته وقال لخالته
‏( البل والبيت والحلال كلها لك ونذر ماترجع )

‏سعد بن هتيل شاعر جزل ورجل كريم وسريع بديهة وايضاً كان شاعر محاورة ولعب مع صقر النصافي في وقته ، لكن أغلب تواجده كان بالنظم وله قصائد جزلة جداً ، وهذي الابيات تختصرلك صفات سعد بن هتيل ..

‏ياللي تقول ان فقرنا من يدينا
‏لاتحسبنا مانعّرف التدابير

‏ياما غدا منا وياما عطينا
‏وياكثر ماحاشت يدينا من الخير

‏نجود من جودات ربك علينا
‏ونصبر ليا كثرت علينا المخاسير

‏وان جات من ربك على مابغينا
‏والّا صبرنا في رجا الله بتيسير

‏ولو الصخر ياطا على ماوطينا
‏خطرٍ يذوب من التجمد على الكير

‏"
‏ويقول بالكرم ايضاً ..

‏يامليّم المال جعله قلة الوالي
‏لاصار ماهوب فالعازات يشفاله

‏اما صديقٍ شفيقٍ حده اللالي
‏والا ابن عمٍ ثقل حمله ولا شاله

‏..

‏توفى سعد بن هتيل المساعره الدوسري بالرياض
‏عام ١٤٠٨ عن عمر يناهز ٧٥ سنة رحمه الله تعالى رحمة واسعة