يا قلب يا ألي كل ما ضاق غنى
ضايق ويشكي بعض الأيام تقصير
يلعب به الهاجوس منا و منا
ويفز من وسط الحشا وده ايطير
وده يلاقي كيفه ألي تمنى
بعد البطا وده يمسيه بالخير
وان جاته الفرصة حشى ما تثنى
يلفي مع الهقوات من دون تأخير

الشعر من بوح المحبين مسطور
يشبه عبير الورد داخل زهوره
و إلا بخور العود في الجو منثور
عطر(ن) من القمة تناثر بخوره
فنٍ حديث وصاحب الفن دكتور
نشتاق فنّه و الذنوب امغفورة

دام المشاعر مشت في جوها المعصول
خلها تسير فرح في حدها المسموح
تمشي على هونها بأقدام رجل الخجول
النفس فيهاأمل والرجل فيها جروح
تشكي لك أحزانها مع شاشة المحمول
تطمح لناموسها ما دام فيها طموح

الله مع طولة غيابك يحييك
ويحيي الي شال يدك وجابك
شيك الرصيد ألي تخطه بأياديك
حول ملايين الغلا في حسابك

أطير لجلك فرح وأهب لأجلك عبير
وأختار جزل المعاني وأتغنى بها
أهز غصن الندى وأشم ورد الغدير
وأنظر عيون الغزالة وا تحلى بها
واتخيل الغايبة بعيون طفل صغير
وأشوف لمحة مواريها مع غيابها

أشره على شعري ألي ما نظم لك قصيد
و الجملة ألي تجي ما أنت بمضمونها
و طول المسافة إذا قالت ديارك بعيد
ما تدري إنك وسط روحي و مكنونها
غالي من اليوم وقبله لك بقلبي رصيد
غلاك من سالف الأيام و اسنينها