أحس اني لازم اروح اشتري اي شي

ما ادري ليش هوس الشراء صار داء مستعصي عندي

لدرجة اني اطلع من البيت ابي اروح اشتري

وش اشتري .. ؟؟ ما ادري

آآخ لو الزمن يرجع وهالهوس موجود

وين رايح يا توم ،، رايح اشتري جارية

ومنين جاي يا توم ،، من السوق اشتريت هذه الجارية

هيك يكون هوس الشراء له طعم

ماهو باهت،،، ذاك اليوم طلعت من محل اواني منزلية بملاعق

قالوا لي وش عندك شاري ملاعق وعندنا ملاعق الدنيا

استغربوا جاي هذا كبر راسي وانقل بيديني درزن ملاعق بس


قلت لهم هذولي غير شكل

هذولي كبيرات وابي يوم افطر برمضان نخلص على الشوربة بوقت قياسي

ماهو يقيم الصلاة وانا ما خلصت الشوربة

طبعا جبتهم قبل رمضان

المشكلة إني ما اتذكرهم إلا على السفرة مع الفطور واقول لهم وين ملاعقي

وليه ما جبتوهن

وعلى هالحال ما جابوهن لي الا تقريبا بالخمس الايام الاخيرة من رمضان

كنت بالصين قبل كورونا بشهرين واستفحل معي داء الشراء وخويي ابو نواف يمسكني ويسحبني برى المحل

يقول ما توقعتك كذا

المهم اني اشتريت بعض الحاجات لليوم بكراتينهم ما فتحتهم

كل ما شفت خويي ابو نواف اقول له ياخي ليه ما خليتني اشتري طاولة البلياردو

شافني بالصين واقف قدامها وسحبني ما خلاني اشتريها

له تأثير علي اشوى من خوينا الثالث اللي نتهمه انه وجه نحس على الصين وانه هو الخفاش الاسود اللي تسبب بفايروس كورونا المستجد