سألت حكيم المشاعر هل ينفع اني ادخل أجواء الشعر
بعد ما الحمد لله صرت تمام قال الأجواء معتدلة
باردة لكن ننصح أصحاب القلوب الرهيفة عدم
التعمق في بحور المعاني وذلك حرصاً على
سلامتهم وشكرا انتهت نشرة الجوية لهذا اليوم

يتني الرسايل من جداكم
رحبت من الخاطر و ممنون
الله لا يقطع نباكم
ياللي عن الدنيا تسدون
ما عاش لي يوصل غلاكم
لو هو ذهب نرخصه و يهون
قلبي حلال لكم فداكم
أما البقايا لو يموتون
أفز لو حدٍ طراكم
و أشرق إذا بإسمك ينادون
و أحسد لي ساكن حذاكم
و إللي على بابك يمرون
من هو خلق في مستواكم
من يشبهك في الوصف و اللون
إنت لتاج الزين حاكم
قدام و الباقي يردون

مساء الورد لـ اهل الدار هلالي أو نصروي
بالتوفيق لعشاق المستديرة والقلوب تنتظر
على أحر الجمر

شفت لي خيلٍ تصافح خد خيل
ما حلا .. يدها على خد الفرس
الأصيل اللي تسلم عـ الاصيل
مهرةٍ جامح ولا معها حرس
تختلف م الخيل بالخشم السليل
والعيون اللي بها خجل ونعس
واعتدال العود والخصر النحيل
والنحر بدرٍ تجلاّ من غلس


من عتيم الليل يكسيها شليل
طاح منشوله وهده و إنتكس
ليتني خيالها ولا خليل
التقط ع سرجها طاقة نفس
من نظرت عيونها ضاع الدليل
لا بقى عندي دليل ولا ونس
جودها لي .. مثل ما جود البخيل
وانا حظي ما تعود ع الفلس


و هي من أهل الكرامه والجميل
والحياه عيون واكثرها عسس
خايفه من قول نقالٍ و قيل
واشيٍ و يلحّق السمعه دنس
من هواها لا بحي ولا قتيل
ثوّرت شوقي بصدري وانحبس

يمرني طاريك لكن مايمر
مابين عقل وقلب يسالني عليك

يلي في بعدك نار وفي قربك جمر
اجيك ودي بس ماودي اجيك

لو قلت لك مثل الصحاري والمطر
ارجع انا اضماك لو يوم ارتويك


وانت اذا هليت مره بالشهر
وينك مع باقي الشهر الله يهديك

والله احبك بس قاسمت العمر
الي بقى من بعد ماشحت يديك

مع شخص علمني تفاصيل الصبر
وعلمني ان الحب مش حكر عليك

طاب مسائكم بكل خير