صـباح الفُل . 🌸🌼





- مؤخرًا اكتشفت اني شخصية ما تطلق احكام مسبقة بشعه عن الاشخاص واني حتى لو اطلقتها ما اعاملهم على اساسها , لانه زي ما انا ما ارضى على نفسي السوء مو من حقي اعامل احد بسوء عشان مو على مزاجي او ناسب شخصيتي.


مع ذلـك قاعدة اواجه الفترة ذي اشخاص من النوع اللي يسيء الفهم بسرعه , ويكملون الاحداث من منظورهم ويحاكموني على اساسهـا -رغم انه انا ما سويتها- وانا مو شخصية توضح سوء الفهم اللي صار غير لو فيه شخص بحق مهتمه انه اشرح له موقفي وما ابي اخسره. وعادة اتركهم مع التوقعات اللي بنوها بنفسهم يكملونها بنفسهم ولوحدهم وما راح اتدخل واوضحها ابدًا. لانه اللي مهتم يسمع رأي الحقيقي ويفهم وضعي وموقفي راح يواجهني لمره على الاقل.



وانا بطبعي شخص مرح , وحواراتي وقعداتي غالبًا تكون بغرض الوناسه والترفيه وما يهمني ادخل في حوارات عميقه مع احد. مع ذلك فيه ناس تحب تجرني لحوارات ما ابي اخوضها معاهم لانه ما راح نتناسب ابدًا. فليش نعكر مزاج بعض ؟. والنتيجة واضحة من البداية.



+ بعضهم يتبع اسلوب انه ما تبي تخوضين معانا نقاشات اخرى ؟. اوك راح نتجاهلك . 😭😂

وللاسف انا شخص ما يتنازل ابدًا .
وهنا تنتهي القصة. الا لو كان مزاجي عالي جدًا والموضوع صار تافهه بنظري لدرجة انه ما يستاهل اتخذ اي موقف تجاهه.

ومرات احس ليه ما اصير مرنه اكثر ؟.
يمكن الخوض شوي في بعض الحوارات ذي يكون مفيد ليا ويضيف لي على الصعيد الشخصي. بس مقدر الا لو الشخص ساعدني اتقبل منه ويوصلني منه شعور انه عقله كبير شوي 🤏🏻 .




ليه تكلمت فجاة عن الموضوع ذا ؟.
لانه ازعجني شوي صراحة , واحس ودي اشاركه بشكل عام.


ولعلي اجد اراء ممتعه . 😂👍





طيب بعيدًا عن الموضوع ذا , بمناسبة فوز منتخبنا
والاجواء الحلوة صراحة مره مبسوطة بس لعل تأجيل اختباري للسبت عكر مزاجي وخلاني لاني مقيد ولاني مفكوك بس خيرة ان شاء الله , وربي ييسره واعطل على خير واريح من الترم ذا خلاص . 😭😭😭💚💚







وبـس والله , احس كذا احسن . 😂👍


اتمنى لكم يوم حلـو ومليان خير. 🤍🤍





^^

مسـاء الفُل . ☀🌿





- وعدنـا لترم جديد , ما مداني اعطل الا وانا ع طول اداوم ثاني , صراحة الموضوع يزعل شوي . 😂😭🤏🏻

بس يلا الحمد لله على كل حال.



تدرون وش المؤسف اكثر ؟. 🌚🤌🏻

انه من بكره الدكاترة بيعطون محاضرات , واحس وين عاداتنا وتقاليدنا -بعدم اعطاء محاضرات اول اسبوع- بس صدق gg .

الترم ذا عندي 3 مواد فيها بروجكت , ومادة رابعه قد يكون فيها بروجكت وقد لا يكون حسب الدكتور . 🥹

ربي ييسرهم لي , ويكون ترم خير علينا جميع . 💚💚


اكثر ترم شايله همه هو الترم الثالث -يوافق رمضان- احس ي راسي بيكون ترم قصير اساسا واخر السنه يعني الانسان صدق تعب وانكرف طول السنه.
بس يلا بخليه لوقته اتحلطم فيه . 😂😂😂😂 [ عشان يكون فيه محتوى ]



وبـس والله , كان بخاطري اكتب تدوينه فيها حلطمة بسيطة وخفيفه ,
لانه الكتابة تحسن مزاجي خاصة لما اشاركها مع الناس. 😂👍



ويارب يوم حلو ومليء بالخير لكـم. 🤍






^^

مسـاء مليء بالمسـّرات والخيرات . 🌿🌻






- من قبل بداية كورونا بوقت قصير بدات اطيح في الشموع العطريه , ومع كورونا زاد بحكم انه كان فيه فتره حجر منزلي.

والانسان يحب يغير جو البيت عشان يحس انه طلع من المكان او راح مكان جديد.

والروائح الحلوة مع الاجواء المناسبه كفيله انها تروق الانسان وتخليه يحس بالتجديد.


خلال ذيك الفترات وللان صرت مقدر استغني عنها.
وبالتالي حتى اخواتي اللي ما كانوا يستعملونها بكثره صارو زي يستخدمونها حتى في مكاتبهم في العمل.


المشكلة النوع ذا من التسوق غالبًا تحتاج فيه حاسة الشم وانك تختار بالريحة , لكن معاكم انسان يشم بعينه الظاهر . 😭😭😂😂😂😂😂😂

انا اطلب من المواقع لانه العروض فيها افضل + حتى التشكيلات تكون مختلفه -اللي في الموقع احلى- .

وعشان كذا مقدر اشم الروائح , وما اكون جربتها قبل .
اختارها حرفيًا بالوصف حقها اللي للعلم مو مضمون انه يوصلك الريحة صح , بس يا سبحان الله كل مره تزبط معايا. 😭😭😭



للان ما شريت شمعة ريحتها ما عجبتني او ندمت عليها.
ولعلي اكتشفت موهبة جديدة . 😭😭😭👍


اي استشارات بخصوص الموضوع ذا , راح اعمل لكم فيها خصم . 😉🤣



بالمناسبه ترى مرات كثير اختي تشتري معي , لكن لعلها كثير لم تزبط معها , يعني مش كل اللي تشتريه عادة يعجبها , وهذا اللي خلاني انتبه انه انا اشم بعيني✨✨✨ .



وسلامو عليكو توصون شيء ؟. 😭😭😭😭🤣





ليا فترة ما كتبت , وحسيت اني منضغط ومحتاجة اكتب واهبد اي شيء يجي في راسي حرفيًا . 🥹🌚



ودحين يب احس احسن بكثييير . 😂👍






جمـعة مباركة , ويارب يوم حلو ومليان خير لكم. 💜🌸









^^

مسـاء مليء بالبهجة والخير . 🍁🌒












- من زمان ما كتبت في المدونة اي شيء وخاصة من يوم بدأ الترم الثالث . 😂


كنت على اساس بشارك ببعض التدوينات عن هذا الترم خاصةً لكن واضح ان الترم ما كان يمزح وانكرفت كرف . 😭😂

صـراحة , كان اسوء ترم في السنة ذي من ناحية الضغط والكرف الدراسي.

لانه عندي اربع مواد تخصص وكلها من العيار الثقيل وكل مادة فيها بروجكت خاص فيها غير العملي.
يعني لكم ان تتخيلو في الفتره الزمنيه القصيره ذي قد ايش انجزنا ونحن مطحونين بين هذا وهذا. 😫🥲


بس الحمد لله , عدت على خير وما بقي ليا غير ثلاث اختبارات فاينل واكون بكذا خلصت اصعب سنه تخصص في مسيرتي الدراسية ولله الحمد . 😫❤


+ في الفتره الماضية وقت تسليم مشروع لمادة برمجة متقدمة صارت مشاكل وضغوطات واساسا المشروع بكبره ما كان بذيك السهوله يعني فيه مشاكل في ربط الداتا بيس بالابلكيشن , بس عمومًا انجزناه.
بس بعد ما انا شبه طحت على اهلي . 😂😂
نفسيتي وقتها كانت في القاع وما اكل حتى .
لو مش بالقوه اهلي يجون يعطوني لقمتين , وحتى النوم كان سيء فترتها.

وصارت مشاكل بين بنات القروب نفسهم , وانا كنت في النص بينهم وما ابغى احد يضر احد ولا ابغى يقعدون يمسكون في بعض كل شوي .
وحاولت قد ما اقدر اني ما اكون طرف في الخلافات بينهم او اني انحاز لجهة.
عمومًا هذا كلفني كثير ع الصعيد الشخصي ,
لاني اطريت ارمي واتحمل لاخر قطره رغم اني زي زيهم طالبه وعندي ضغوطاتي الخاصة وهذا اللي تعبني وقتها اكثر من شغل المشروع نفسه , خاصة وانه الموضوع وصل للدكتورة بنفسها وهي بنفسها بلشت فيهم . 😂😭


وبرضو في ذي الفتره نفسها اكتشفت شخصيات ناس وعرفت قد ايش ممكن شخص يحاول يكون كويس ويسوي انه تمام معاك وهو عكس كذا تمامًا وعادي انه يبرر اذيته للغير بكل سهوله عشان ما كان على "مزاجه" . رغم انه ما يرضاها على نفسه . 😂🤏🏻


امانةً ذي السنة وذا الترم على وجه التحديد احسهم كبروني خمس سنين قدام . 🥲






طيب بعيدًا عن الدراسة , بعد ما خلصت تسليم مشاريعي وقبل تبدا اختباراتي النهائية , كان ضروري اطلع من البيت واغير جو عشان اقدر اجدد طاقتي .

وقررنا انا واختي ننزل جدة ونروح السينما .
وهذا اللي حصل , واخترت فيلم كونان لانه باقي الافلام ماش ما كانت تستاهل صراحة . 😂

والفيلم يجننن مررررره , عجبني بعيدًا عن انه عندي بعض الملاحظات شوي , بس بشكل عام عجبني واستمتعت فيه . 👏🏻 [ انا من متابعي الانمي ] عشان كذا يمكن استمتعت فيه لانه تابع للقصه مو مثل باقي الافلام اللي تكون شوية منفصله عن القصه الاساسيه واركات المنظمة السوداء.


واخيرًا وليس اخرًا , انا واهلي صرنا نموت في شيء اسمه هوت شوكلت وذ ون شت اسبريسو من دانكن . 🥹❤‍🔥
او اختصارًا [ هوت موكا ] .

المشروب ذا مره لذيذ وخفيف خاصة للي ما يحبون القهوه كثير او تتعبهم . 👍
انا عشان من محبي القهوه السعودية , ما افضل باقي القهاوي ولا تمزجني , بس لعل دانكن اساطير او شيء ؟. 😚😂












^^

مسـاء مليء بالخير والسعادة . 🌱🌺







- اهلًا يا اصدقاء ، جمعة مباركة . 🍃☀

احدثكم من اجازتي الجميلة . 😂👏🏻
يـاه مقدر اوصف لكم ، بس الحمد لله على نعمة الاجازة . 😁👍


بداية الاجازة نومي كان لسى مقلوب بحكم الاختبارات والضغط اللي كنت فيه , لكن اخر اسبوعين ونص عدلت نومي الحمدلله .
وصرت انام بشكل طبيعي على الساعه 11 تقربيًا واقوم الصبح .
وما يحتاج اقولكم قد ايش النوم بشكل طبيعي وفي الليل تحديدًا مفيد مره ويحسن المزاج والله . 😂👍


اليوم تحديدًا قمت بنشاط وحيوية , واحس نفسي خفيفة مره الحمد لله ، وخلصت معظم اموري البسيطة ومنها "الفطور" .
وتقربيًا شبه ما تكلمت غير مع كم صديقة بشكل سريع وماما وباقي وقتي قاعدة لوحدي استمتع بمزاجي الحلو ذا . 😂👏🏻



وبس والله , حبيت اكتب تدوينه سريعة اشارك فيها مشاعر اللحظة . 😊🌸



يارب يوم حلو وممتع لكم. ☘🤍






^^

صـباح الخير ، صباح ديسمبري جميل لكم جميعًا يارب ☀🍁



- معاكم طالبة جامعية خريجة ذي السنة بإذن الله 👩🏻‍🎓✨

تبون اختصر لكم رحلتي الجامعية ؟.

تعـب ، الكثييير من التعب الدراسي اللي اثر عليا في صحتي النفسية بالتالي على اكلي و وزني. 😭😂
صرت انسانة قلقة مره ، رغـم اني عارفه ومؤمنه ان ربي ما يضيع جهد وتعب الانسان ، لكـن ماش ، ما صرت اقدر اسيطر واحس انه مرات القلق ياكلني بشكل فوق المعدل الطبيعي.


ياخي اول كنت بايعه الدنيا كلها ، وناستي وسعادتي كانت دايم في المقدمة بغض النظر عن اي شيء ثاني. 😂😂👍 [ وكنت برضو شخص ناجح ومنتج الحمد لله].


مرام الحالية ما اقول اني ما احبها ، بالعكس انا ممتنة لها كافحت مررره مره مره ، وما زالت تكافح.
لكن برضو مرام الحالية لازم تشوف حل للقلق الزايد ، وتخميني انه ممكن بسبب سوء التغذيه تأثرت الفيتامينات والحديد بجسمي ، لذلك ناوية قريب بحول الله اتأكد.


الاشخاص اللي خلصوا الجامعة ، طمنوني كيف كانت تجربتكم ؟. 😄


بالنسبة للجامعة , مدري لو سبق ذكرت اني دخلت التخصص بناءً على "حقرة بقرة" او لا , لكن يب تقربيًا هذا اللي صار , لانه مافي اي شيء كان شغفي او طموحي في الدراسة , وتيسير ربي وتوفيقه وصلني اني انقبل بذا التخصص تحديدًا , والحمد لله . ❤❤🤲🏻




اتوقع كمان بشكل عام عمر العشرينات الشخص فيه يمر بكثير تقلبات ومشاكل واختبارات يبني فيها شخصيته ويختبر افكاره ومبادئه وتتغير نظرته لكثير امور.
الشخص برضو ينضج وتصير عنده مسؤوليات اكثر ، يحس انه خلص نص مشواره الدراسي والخطه اللي مرسومه في حياته ، وبعدها تقرببًا فراغ او شغل.

وانا بطبعي , احب الحياة والمغامرات , احب الاشياء المتوهجة والمليانه شغف والـخ…





برجع اشوف هذه التدوينة بحول الله , لما اكون نهاية الترم الثالث وشبه متخرجة , وصدقوني بجيكم مبسوطة مره مره مره بإذن الله , دعواتكم لي ولجميع طلاب العلم. ✨👏🏻👩🏻‍🎓





يـارب يوم خفيف ولطيف ومليان بركة لكم جميعًا. 💖💐








^^