|
إضافة رد |
| LinkBack | أدوات الموضوع | انواع عرض الموضوع |
12-16-21, 08:26 PM | #1 | ||||||||||
|
. Just Maram | 👾
[ 16-12-2021 ] - مسـّـاء الفُل . ونفـتح مدونة هنـا , عشان الاقي مكان انزل فيه حلطماتي وذكرياتي زي ما انا عايزه . 😂🤍 + [ حُــور فتحت مدونة , وصراحة تحمست افتح معاها ] . 🥺💛 | ||||||||||
التعديل الأخير تم بواسطة Maram_fofo ; 12-16-21 الساعة 08:39 PM |
07-13-22, 07:58 PM | #2 | ||||||||||
|
مسـاء السـعادة . - فتحت مدونة ولعلي نسيتها . 😂😂😂 بما انه اجازة العام ذي تعتبر اقصر اجازة من كم سنه تدلعنا فيها باربع شهور وشوي . فخلوني اوثقها هنا . احس من زمـان ما دخلت منتدى ونشرت في مدونة , اوه ي الشعور . 😂😭 بس للامانة المنتديات بشكل عام حليوه , احلى من اغلب مواقع التواصل اللي موجودة دحين من وجهة نظري . وانا شخص مساحتي الخاصة تهمني وما احب اكثر البشر حولي . ليس لعيب فيهم طبعًا , بس نقول طبع في الشخص انه يكون واضح من البداية في دائرة علاقاته . بالاضافة المنتديات تتيح للشخص يطلع اللي بخاطره براحته مع مراعاة الذوق العام . اغلب المواقع فيها اهلي واصحابي من الدراسة واماكن الدورات وغيرها والجامعة والتخصص . لذلـك بالنسبة لي غير مريح اكتب فيها بشكل مكثف . [ متلازمة الانطوائي الكئيب الغامض ] 😂😂 احبني وانا ارمي الهروج رمي حرفيًا , بدون ترتيب مسبق للكلام او حتى فكرة المنشور نفسه . 😂🤏🏻 اهل العشوائيات ✨✨ وبـس والله , احس كذا كفاية بالنسبة لي . 😂👍 ^^ | ||||||||||
|
07-15-22, 03:11 PM | #3 | ||||||||||
|
مسـاء الفُل . 🍂 - اول يوم مباشرة بعد عيد الاضحى حجزت فيلم تامر حسني في السينما . ليه ؟. لانه مع الدعايه الكبيرة للفلم والاغاني والاعلانات وانه تامر رجع بفلم قصة حب بحته . حمسوني مره وقلت يلا نروح نشوف , التجربة مو سيئة . لكن تقييمي للفلم انه ما يستحق الواحد يحجز له في سينما ويكفي يشوفه من النت لما ينزل . كان فيه شعور فراغ بعد ما خلصنا الفلم . وغالبًا لانه القصة وتسلسل الاحداث تبعها ما خلاني اقدر ارتبط عاطفيًا مع الابطال . فكان الوضع شوي محبط بالنسبة لي , لاني كمرام اتوقع ادخل اتفرج شيء يمتعني موسيقيًا او بصريًا او قصصيًا الخ . الموسيقى هي التوب بالنسبة ليا في الفيلم , بعده المشاهد الكوميدية واخيًرا بعض الرسائل الحلوة في الفيلم اللي قدرت توصلني واستمعت بطرحها . الباقي كان عادي , خاصة قصة الحب اللي دارت وصارت بسرعة مرعبة . 😭😂 وبما انه فيلم عاطفي المفروض ركزوا على هذه الجوانب اكثر من اي شيء . 🌚👉 التجربة كويسة مو بذاك السوء , لكن يب ما اتوقع ح انزل لتامر فيلم بعد اليوم في السينما الا لو كانت البطولة اللي معاه مي عز . 😂👍 بعيدًا عن فيلم تامر , قبل مدة رجعت لهانتر اكمل الارك تبعه بعد انقطاع . 😭😂 وبما انه توغاشي عايش لسى ولله الحمد , فكملت ارك النمل من بدايته لنهايته . الارك جمييييييييل وبنايته من البداية للنهاية رهيبة وتحسون الانمي انتقل لمرحلة غير غير . الشخصيات اللي ظهرت والاحداث والعاطفة اللي صورها لنا الارك شيء ثاني . ما ودي احرق , بس راح احرق . 🤏🏻🌚 ميريم بطل الارك [ هو الفلن المفروض ] شخصيته تهبل تهبل تهبل . هو مو شخصية ذات قوة غاشمه وبس , لا لا هو شخصية مفكرة ذات مبادئ وقادرة على اتخاذ قرارات رهيبة . وجانبه العاطفي كان شيء ثاني ثاني ثاني , كل ما افتكر نهاية الارك بالنسبة له احس اخخ النهاية مرضية وبنفس الوقت كانمي شونين المفروض تكون اقوى من ناحية القتال , بس ستل نهايته رهيبه . 🥹🥹🥹❤❤❤❤ احسد اللي ما شاف الارك للامانه , وانا بالقوة ماسكة نفسي ما اروح للمانجا لانه توغاشي ماله امان . 🙃 وبالمناسبة فيلم توم كروز توب قن , والمدح اللي عليه خلوني استغرب هل فعًلا هو بذي الروعة ؟. الاعلانات وضحت ان الفيلم مره مو جوي وما حسيته يحمس , بس شكلي بعطيه فرصه واشوفه من البيت . 🌚🤏🏻 [ ما ودي يصير نفس فيلم تامر ] توم كروز ملك الحركة والاكشن كالعادة , لكن مدري حسيت الفيلم مو عاجبني . وافـلام الرعب , مستواها صار متدني جدًا , قصصيًا اغلبها نفس الافكار . ماش وين ايام الافلام الرهيبة والمكتوبة صح . 🤏🏻 ييـوه احس اني شفت كل شيء الفترة الماضية لدرجة دحين قاعدة اتأمل الفراغ . 😂 ^^ | ||||||||||
|
07-18-22, 12:19 AM | #4 | |||||||||||||||||||
|
-
لما الشخص يكتفي بإنسان واحد عزيز وصديق مقرب جدًا. وكل شيء منه مميز . 🤍🍃 حُـورتي . ❤ ^^ | |||||||||||||||||||
|
08-06-22, 02:36 AM | #5 | ||||||||||
|
. صـبـاح الخـير والمسّـرات . 💛🍃 - ما ودي انكد ع نفسي والله , بس اليوم لمحت التقويم واكتشفت انه حرفيًا باقي ثلاث اسابيع وارجع لكرف الجامعة لاجل غير مسمى . 🥹💔 مدري ليه خلوها ثلاث اترام دراسيه , خاصة واني طالب قديـم الفايدة اللي بتعود عليا تقترب من الصفر . بس ما ندري , لعله خير . 🤲 بعيدًا عن الدراسة , الفرق بيني وبين عيال اختي عمريًا مو كبير ابد , فمثلًا بيني وبين حمودي -الطفل الاول- 7 سنوات بس . 😂😂 لذلك اعتبر شوي من جيلهم واقدر اتفهم اغلب المخاوف والمشاكل اللي ممكن يمرون فيها بالعمر ذا . مع ذلك اكتشفت انهم قادرين يبنون مفاهيم خاصه فيهم عشان يتعاملون مع امورهم . [ وانا بعمرهم ذاك كنت شبه لاصقة وتحت حماية اختي الكبيرة مريم ] 🌚🤏🏻 بس انا برضو فاهمة انه تجربتهم في الحياة اكيد راح تختلف عني وعن اي شخص ثاني . و مرات كثيره احس بمسؤولية تجاههم . -رغم انه موقعي كخاله ما يعنيني فيها- بس ماش حب الاطفال الاولين في الاسرة دايم يكون مختلف وكبير للكل . عشان كذا ما نقدر نتجاهل تعلقنا فيهم امانةً . وبالمناسبة قريبًا ح اصير عمة كمان . 😂❤ [ استقبل التهاني ع شكل تقاييم ] 🌚🌚 عشان كذا احب موقعي واني اخر العنقود . اشاهد تجارب ونضج شخصيات قبلي في اجيال مختلفة واستفيد مجاني . 😭😂 وبرضو بعيدًا عن عيال اختي , الفترة الماضية جاتني رغبة شديدة في دخول نادي رقص . بس طبعًا انا في مكة . ومدينتنا طبيعي جدًا نحترم قدسيتها لذلك مستحيل نلاقي فيها شيء زي كدا . 😂 مالي غير جدة لو مره ودي , بس اعرفني شخص ملول وبعدين لو بدخل مكان لازم روحه تشدني شد مو بالاسم بس . 😂👍 عمومًا في نفس اللحظة اكتشفت انه الموضوع صعب . لذلك كنسلت الفكرة وقلت هل يحتاج الواحد شخص يدربه ؟. الله يخلي التعليم الذاتي و الافلام الهندية . 😂 يوه وحشتني تدويناتي اللي اهبد فيها ستين هرجة . 😭🤏🏻 خلاص ذي منجد اخر هرجة . 🥺🫶🏻 بما اني في اجازة والطفش يتسلل لي كثير , فرجعت للروايات بقوة , وطحت في المصرية تحديدًا . وحرفيًا الكاتبة مركزة على اشياء مختلفة عننا واتوقع هذا بسبب اختلاف الثقافات والبلاد . لكن برضو حليوه الرواية رغم انه عندي كثير استفهامات في سلوك الستات تحديدًا . بس هسكت اصله خيال في خيال . 😭😂 ودي احط اسم الرواية , بس مرام اللي جواتي تحس انه لا لا لا بتاتًا . 😭😭 وبكذا خلصت قصة حياتي من جديد . لما تجيني رغبة في الكتابة والنشر برجع اكتب معلقة ثانيه . 😂💃🏻👏🏻 وبداية يوم موفقـة وسعيدة للجميع . 🤍🍃 ^^ | ||||||||||
|
08-08-22, 07:04 PM | #6 | |||||||||||||||||||
|
مسـاء الفُل . 💛🍂 - اقتباس يمثلني :
^^ | |||||||||||||||||||
|
إضافة رد |
مواقع النشر (المفضلة) |
| |
| أصدقاء منتدى مسك الغلا | | |||||