مرحوم ياحب ترعرع بالأعماق


متغذي دم العروق الصخافي


في كل عضو له مقر وميثاق


بين الضلوع العوج بين وخافي


يروق مع روقه مزاجي اليا راق


ويحس بي اليا لحقني أخلافي


ويحس بأشواقي اليا صرت مشتاق


قدام يصبح فالامور اختلافي


واليا هنا علقتها فوق معلاق


وسليت سكين الخيانه ياكافي


ودعتك النسناس ياورد الأشواق


كرامتي تحكم علي بأنصرافي


قطفت منك ما تهيا وما لاق


ورميت باقي ذكرياتك خلافي


لا دمعة طاحت ولا خاطر ضاق


ماقول غير اللي على البال كافي


يكفي ثلاث سنين مرت على ساق


عين فراش لك وعين لحافي


واليوم في تسعه وتسعين طقاق


قلبي كذا طبعه اليا عاف عافي



لشاعر /سلطان الهاجري ♡

بين استثارة جرح ومعاند نفوس
وبين الحسافه يوم صدات الاقراب

وبين العذاب وبين دمعات محبوس
زنزانة الدنيا تحبسه ولا تاب

آخذ بعقلي بين الارجاء وآحوس
واقلب اوراق الخفا وافتح ابواب

امشي على خطه وتكتيك مدروس
ولاهو بهمي اكسب اصوات واعجاب

ويا فكري اللي تملك احساس
معكوس يا لعنبوك اليا متى وانت غلاب

ويا قلبي اللي من عنا الهم متروس
ما ابيك تضعف لا قدك عند الاجناب

لا شك ابيك تكون لعداي كابوس
في عصر شعر كله فسرق وانهاب

ما دامك العالي تعليك ناموس
خلك كذا كايد ويحسب لك حساب

علم هل النمات نقارة السوس
اللي يزيدون الحكي زود واكذاب

اني ارى قد اينعت للفنا روس
حان القطاف وحان تقطيع الارقاب

صاحب وخاين صار لعداي جاسوس
وصاحب فشى سري كذا دون اسباب

يا رب انا في رفقتي ليه منحوس
برحمتك ترحم صويب ومنصاب

لا جن ليل الهم هب لي الكوس
كنها تذكرني مواعيد الاحباب

آجر صوتي واسحبه سحب منكوس
من خاطر فيه الهواجيس تنتاب

وانا بحبه ناحل القد ( مهووس)
حبه يعذبني يا لبى التعذاب

اغليه ما (امريكا) بها كره للروس
واشتاق له ما خوف الغرب ( الارهاب)

ولو المحبه شي واقع وملموس
ما شفت عاشق يشتكي هم واتعاب

لكن ما دامه شي فالقلب محسوس
تبقى الحقيقه دونها ستر واحجاب

يا قطع كبدي قطعة الجلد بالموس
لا صارت افعال الرياجيل تنعاب

ما يربح اللي يذخر لوقته فلوس
الرابح اللي يذخر لوقته (اصحاب)

حمد البريدي


باقة جوري لروح الطيبة

لقيت روحي
نادت جروحي
ياشفاءاً لا يغادر من سقم

قصة عٌمر
ثلج وجمر
غنت لها الفرحه على نغمة ألم

الصدر ضاق
يشكي الفراق
بعض الخطايا ما يكفرها الندم

ربع واهل
مضرب مثل
ما نفترق ما نفترق دم ولحم

روح وجسد
وإلى الابد
نبقى سوا طول العمر وأقسم قسم

بمن خلق
ومن رزق
ما نختلف مبدأ وعادات وقيم

طبع الحياه
بسمه وآه
حكم القدر دربٍ مشت فيه القدم

سيف الغدر
ماله عذر
والصبر نعمه والشكر تاج النعم

وأعلى هدف
عز وشرف
لم الشمل هذا المنى نعم نعم



ل بندر بن عوير