يوم سألتني !. قالت : فلان وشفيك ؟ .. قلّي ! عسى ماشر ؟ ترى ضاق صدري

سلامتك يافلان !!. قل ! وش معنّيك .. لجلك رجعت أركض من السوق وأجري

ودّي أصارحها : البلا منّك وفيك ! .. واشق أضلاع الصدر كود تدري

وأقول :أنا يابنت من جد أغليك .. وغلاك فيني قطّع أوصال صبري

ياليت بعيوني عن الناس أخْفيك .. وأصير بك أعمى ولا افقدك بصري

يابنت طيّرتي عقل راس مغليك ..وأصبحت من زود الغلا فيك أهذري

وش هالجمال اللي عن الكل زاهيك ؟ .. وسحر الدلال اللي غدى فيك فطري

كن النعومة ساكنة كلها فيك .. وغصن الطفولة فيك غضٍّ وعذري

ماخلْق من يشبه لطلّة معاليك .. ياللي سكنتي بين روحي وفكري

أنتي ( الخطيرة ) والمخاطير تعنيك .. وأنا ( الشجاع ) اللي بلياليك يسري

عقبك سهرت وصوت شعري يناديك .. ونمتي وأنا سامرت ليلي وفجري

ياقلب أنا ودي لها آجيب طاريك .. مير البلا إن زعلت ولا فاد عذري

خايف تفسّرها بريبٍ وتشكيك .. ويغيب عن وجهْ السما وجهْ بدري

سألتها ! يابنت أبطت خطاويك .. ورانا ماصرنا على البال نطري

قالت : بزورك في محلّك واباجيك .. بس إنتظر أيام والعذر مقري

ثم قالت : أستاذنْك هالحين أخليك .. وبغيت أصرخ !! توّنا !. الوقت بدري

ياأجمل إنسانٍ لفظ قول ( وشفيك ؟) .. ياأروع إنسانٍ سكن وسط صدري

اكتب و قلي عن اغيابك وأنا اقلّك
في بصمة الحرف طمني عن أحوالك
أرسلت طيف الغرام وعاد ما دلّك
ضيع طريقك وتاه الشوق ما جالك
ودّه يلاقي غلاك ويتعب ارضا لّك
في قمة الشوق تهنا له ويهنالك
وأللي يحاول يتوهني معادٍ لّك
جعله فدا لّك تحت رجليك و انعالك
ما يدري إني على بعدك محبالّك
وأحب حيّك وعمانك وأخوالك
طول الليالي يزيد الشوق ما ملّك
يمشي مع خطوتك ويلازم اظلالك

الربيع

شفتك مع سجة خفوقي مع الريح
يا أجمل خيالٍ في سما الطيف شفته
أخشى عليك من العيون المشافيح
وإلاسحب ما شفت زينك وصفته
تهوم نفسي لك على فوق وأطيح
وأمسك على حبلٍ يمينك ربطته
ما شفت في عيني دموع المجريح
لوشفت في عيني غلاكم رحمته
دمع الوفاء ماهي دموع التماسيح
لو تنظر اعيوني بعينك لمحته

الربيع

يا طير يا ألي في فضاء الجو يا طير
هات الخبر من ساكن الدار هاته
هات الخبر منه ومسيه بالخير
وأنشد عن أحواله وجب لي وصاته
وقله ترى لو غاب في زحمة السير
طيفه معي موجود لو غاب ذاته
أشري غلاه ولا حسبت المخاسير
ولو يطلب الدنيا ملايين جاته
بشر وأنا بعطيك غالي التباشير
بأخبار غالي تحتويني غلاته

الربيع

لاصرت بايعني اشوفك على خير

لاصرت بايعني اشوفك على خير ...مع السلامه دام مابه سلامه

قلت انتهينه قلتلك خير يا طير .... ماني اول شخص يخسر غرامه

امحذرك من قبلها الف تحذير ....لعفتني بيعف قلبي هيامه

ماني بميت لا ولا احتاج تبرير....صح الله لسانك ووفر كلامه

بسمعك حبكه وفكره وتصوري...وافهم عدل يامدعي بالفهامه

وجه الشعر ابيض ويحتاج تبرير ...ودي تزينها القصيده علامه

ماضيك الاسود بذكره دون تقصير...كذا يكون بخده الشعر شامه

يصدق معي تعبير ويخون تعبير...ياضيعت الشاعر بوقت انسجامه

يمكن خطى دونك بالشعر مير....لو ماحترمتك للغرام احترامه

ماكان حبك غير بس طعنتك غير...علمتني معنى الندم والندامه

ماجاك مني اي زله وتقصير ....كل ما خطيت اعاتبك ببتسامه

حسبي على الذكره اذا هبت عصير ....ماعاد تنفع شرهتي والملامه

البال ظامي وقتها والحزن بير...خسرتك وهمي كسبت اهتمامه

هزت شموخ الجبال الراسيه هوج الرياح
والهيب ينبح والجبل سفحه يغازل قمته
مشغول عن صوت الاوادم كيف يسمع للنباح
ما همه الحــاقد ولا ســـود النوايا همــته
كبير يا هو هالجبل رغم الشتايم والصياح
شامخ على ظهر البسيطه والسحايب عمته