أنا مع هالكلام /

" لا تطلب الشيء مرتين إلى من الله "
+
" اطلبوا الحوائج بعزة الأنفس
‏فإن الأمور تجري بمقادير الله "

وضد الإلحاح في طلب الشي من الناس

لأن يمكن اللي أطلب منهم ما يقدرون يسوون شي
وأكون رحت للناس الخطأ
كذا بحطهم بوقف محرج ويمكن أضغط عليهم
وبحط نفسي بعد بموقف مو حلو وبرجع مخذولة

وبعد ما أحب أحكم على الناس
على حسب مين وقف معاي ف الشدة ومين لا ..

لأن أصلاً لو الله سخرهم لي بيوقفون معاي
حتى لو ما طلبت منهم شي
وبالطريقة الصحيحة والمناسبة اللي ترضى الله
يعني بدون ما يسوون شي غلط

حتى الموضوع ماله علاقة إذا هم طيبين ولا لا
يمكن يكونون طيبين كثير مع غيري والله مسخرهم لغيري
بس مو مسخرهم لي ..

وأنا يمكن في ناس ثانيين مسخرهم لي وهكذا ..


المهم

الأحكام اللي مثل كذا
أشوف فيها سوء ظن و ظلم للناس

اللي يخالفون القوانين الكونية مستحيل يربحون
أقصد اللي يحاولون يحصلون على الأشياء بأساليب ملتوية
بالغش والكذب والخداع والتلاعب والتخريب على الغير
بالطرق الغير قانونية والغير شرعية
مستحيل يربحون
حتى لو حصلوا اللي يبونه ب هالطرق بيكون سبب تعاستهم

المفروض الإنسان ما يفكر كيف يوصل وبس
لازم يفكر بالطريقة هل هي صح ولا غلط
اللي ماشي سيدا هو اللي يفوز في النهاية
والباقي كلهم يخسرون

و اللي نيته طيبة ما يجتمع مع اللي نيته خبيثة

اللي ماشي على النية لازم ما يخاف
لأن بتكون عنده حماية إلهية
الخبيث هو اللي لازم يخاف

ممكن مرات الإنسان يسيء الظن بدون ما يعرف

بس كيف يعرف أنه أساء الظن ؟

من ردة فعله وشعوره لما يسمع أو يشوف الكلام أو التصرف
إذا غضب و حس بضيق يعني أساء الظن وما فهم صح
اللي يفهم صح يكون هادئ ونفسيته زينة

طبعاً نحتاج نتعمق
ونشوف الموضوع من كل الجوانب ونحط كل الاحتمالات
عشان نفهم وما نسيء الظن
وهالشي مو سهل بس نحاول وبنتعود

وبس

كنت أسولف مع الشغالة
تقولي فينيش سكوول ؟
ما تدري أني فينيش سكول من زمان جداً
من أيام لما أمي وأبوي وجدتي كانوا عايشين

طبعاً تحسبني أصغر منها
مع أني أكبر منها ب 5 سنوات
> مابي أقولها وأصدمها

مرات أحس الشي حلوو لأن يدلعونك
ومرات ينرفز
لأن اللي يحسبوني أصغر منهم
يعاملوني كأني ما أفهم وخاصة لأني أغلب الوقت ساكتة
بس ترى أكون فاهمتهم لكن أطنش بمزاجي
مابي أسوي نفسي فاهمة عشان ما ينتحرون مني

ما يدرون أني ساكتة ومستحملة كثيير
لو أتكلم بيكرهوني بيحقدون علي على طول
لأن محد يحب يسمع الصراحة

أصلاً التسليك شي حلوو وجميل
وغالباً مايكون لي خلق أتكلم ولا أوضح شي

بس أكثر شي أتكلم و أوضح بعض الأشياء
من باب أنصر أخاك ظالماً أو مظلوماً ..

ولأن مرات الكلام يحل بعض المشاكل ويفيد

ومرات أحب أطير جبهة اللي يتفلسفون علي
وفاهمين غلط و ما يشوفون نفسهم

ما أحب البكايين
لأني مو بكاية
اللي أعرفه أن الإنسان يبكي مع نفسه
عشان يتخلص من المشاعر السلبية
بعدين يغسل وجهه ويظهر للناس
هالشي طبع فيني منذ الصغر وصعب أغيره

حتى بتلاحظون نادراً أحط الفيس اللي يبكي
لأن ما أكون أبكي وحتى لو حطيته أحطه بس كذا عبط

أكثر شي أحب هذا الفيس
لأني أكثر شي أبتسم

ما يقهرني إلا اللي يقول
من يبتسم كثيراً فهو حزين
مو على كيفكم

يمكن أنه قوي نفسياً مب هش
و تراه نفسية اللي يقول كذا مب حزين


المهم
ترى ما أعرف أواسي اللي يبكون
ولا أعرف أطبطب عليهم بس أتوتر وأحس بكآبة

أنا لما أتضايق أو أعصب أو شي
أحب أشوف ناس فرحانين كذا أفرح وأنسى الزعل
وأحب اللي يضحكوني
بس اللي يقولون كلام حزين ينرفزوني

أقول يالله متى يخلصون ويفكوني من الكآبة

لحد يزعل بس هذي الحقيقة =)

ترى أدري أن في ناس مثلي ومتأكدة

ودي أسوي هذيك الشغلة
اللي لما يجيبون لي الأوراق لين مكتبي الفخم
اللي في بيتي الجميل

وأنا بس أوقع على الأوراق
وكل شي ما يمشي إلا بتوقيعي

تعبت وأنا أتدرب عشان أضبط لي توقيع حلو
خلاص لازم أطبق وأوقع على أوراق وشيكات

ما يصير تعبي يضيع