أحب الزواجات والهيصه اللي تصير قبل الزواج
بس ما احب رجعتي وأصعب فقرة شيل الميكب
باقي بكرا بالليل احس مافيني حيل اروح 😂

قليل جدا اظهر تعب القولون قدام أمي وابوي
لدرجة امي لما جاها قولون قبل فترة بسيطه
كانت تتعجب لما اعطيها الأعراض تماما واوصف لها الشعور
بس البارح تهيج القولون وبطريقة شرسه وهذا اللي ما اقدر اتحمله .
ف بينت عقدة حاجبين وكنت ماسكه بطني لا إرادي
وماكنت ادري ابوي يراقب .. حسيته ارتبك وصار ماهو عارف يصعد ينام ولا يبقى معي !!
وامي كذلك تحاول تخفف علي وسوت لي بابوونج ..
وجا سير علي اول ما صحى من النوم يتطمن .. واكيد امي بتجي بعد شوي بعد .
أحزن من نفسي اذا تعبت واظهرت هالتعب لأمي وابوي
يعني شنو تعبي بالنسبه لتعبهم بعد هالعمر ..
الله يحفظهم لي ولا يخليني منهم

كل اللي ردوا علي بالتقييم .. مشكورين ع مشاعركم 🤍
والله يحفظكم من كل شر ويبعد عنكم الحزن والهم 🤍

استلمت وثيقتي يوم الأربعاء الماضي 🥺❤️
اول أمنياتي واحلامي تحققت ولله الحمد
بالتخصص اللي أحبه .. عندي أفكار اكمل دراسه في نفس المجال
الله يسهل أمورنا يارب 🥺❤️❤️

يسجل ذاك اليوم في التاريخ بجميع أحداثه
من اول ما ارسلوا الرساله لين ما وقعت الاستلام .
كانت لحظة مليانه مشاعر ودموع .
بعدها راحه عجيبة حسيت فيها 🥺❤️❤️❤️
تعب ابوي و دعاء امي وتشجيع خواتي والاصدقاء .
صديقاتي لما تنطفي وحده تشعللها الثانيه من جديد عشان ذا اليوم
فعلا لذة استلامها مع صديقاتي كان لها طعم وشعور مختلف 🥺❤️❤️
مليااانه سعادة الحمدالله رب العالمين . ❤️❤️❤️❤️

ختام لليوم الجميل ..

الجو بدء يزين ونفسيتي زانت معاه
الهدوء اللي عايشه فييه جدا مريحني نفسيا
الراحه اللي احس فيها لله الحمد اللهم ادمها نعمه
لها أثر كبير ع نفسيتي اللي كانت تحت الصفر ..

وجلسات الصباح وي امي .. طعم أخر وحياة للحياة
سوالفها ضحكتها الله لا يحرمني منها جد ويطول لي بعمرها.
اعتقد ذكرت بموضوع فضفضه عن موقف الفيديو
لطيف ع قلبي هالمقطع ، حنوون بشكل ما اقدر اوصفه.

صحيح كبرت ومعتمده ع نفسي بس للأن اذا زانت الجلسه
فكيت شعري وخليت امي تسوي لي ضفائر ..
و الطريف بالموضوع دائما أختي لما تشوف شعري مضفر
تقول رجعت للروضة وامي تمشط شعرها هههههه .
مع إن كلنا خواتي وقت نحتاج حنان أمي نجلس تحت رجليها
وتسوي لنا شعرنا وكأن رجعنا لطفولتنا .

مشاعر هالجو مع أمي مختلفه تماما والسنه غير عن كل سنه ..
كل شي تغير وكل شي احاول اتعود عليه من جديد

والشيء الجميل اللي اشكر ربي عليه هو صوت العصافير والحمام
الصباح بدري ، فعلا يكون صبااح خير غصب عن اللي يرضى واللي مايرضي ههههه .

عائلتي .. ماهي العيله المثاليه لكنها احن عيله
الف حمد والف شكر ❤️❤️

قد أرهقني المرض .. .