الله يسلمك ....جزاك الله خير



.......

لاجيتهم نشحت ولا نجدا
غير حن قلبي وماقدرت انردا

لاجيتهم نسول
لاجيت ناوي ف القعاد انطول
لاني على رد السريب انعول
لا فخاطري نحاييه ماضي وعدا
اللي جابني ليهم رفقنا لول
مخاطير خطرن بعد طول المدا

وين جيتهم هملوني
كيف الغريب ف جنبهم خلوني
لا رحبو لا سلموا لا جوني
لا القيت منهم غير جفوه وصدا
ان كان الغوالي في الوسع صدوني
منهو اللي نلقاه وقت الشدا

روحت بالتكديره
روحت نمشي بالندم والحيره
وفي كل خطوه تصيبني تعثيره
نعثر ونلقى عزم فيا انشدا
وانصبر ف قلبي انقول فيها خيره
عمر الجبل مايوم ريح اتهدا

فيه انفكر
دغري بعدها دار رنه وصكر
عمر القديم طويل
فيه انفكر

مطول عمره
انفكر ف صوبه ومنشغل في امره
دغري اتصل بانت عليا النمره
نحساب جوي ايروق زاد اتعكر
ومن صدمتي زريت البطمه الحمره
ماحسبت ايام الغلا متذكر

فيه انفكر
دغري بعدها دار رنه وصكر
عمره القديم طويل

كب عليا
حسيت الوطا مالت وصغرت بيا
عزيز جا يودعني وكب عليا

كب جبيني
وقال بالسلامه ياحبيب عيني
اعلي سد مابينك اليوم وبيني
لا نوصلك لا عاد توصل فيا
وعدى ونا سيطر علي حنيني
وياسي وقهري عقلن رجليا

تمنيت لحظتها ان يوقف حيني
ولا نعيش من دون العزيز رميه
ميت نراجي من اللي يواريني
مايغر ترديد النفس في الريه

قاللي وداع وعدا
سحب الروح في سحبه من ايدي يده
عزيز بالمحبه ودني ونوده
غير باعدت مابينا قسميه
جزر اكثروا سدود حكمت مده
ماعاد ماه يطول في شاطيا
نضايق انقول انسيبه لابدا
نلقاه مابين الهذب وصبيه
لا البعد لا قطع الرجا لا المده
ينسن الخاطر في غلا غاليا

عندي طاقه سلبيه شكلها من المرض....الحمد لله الحراره انخفظت
لكن الدوخه متعبتني ....الله المستعان

علقت تعليق على الفيس جاني شخص قال لي عندك اولاد وعشش.....فوته ...عليك حاله وخلاص....حتى اللي بينصح الناس يعششوا فيه.....الله المستعان





.......

ارحل على كيفك وغرب عيني
طريق السلامه كان ماتبيني

شد ارحالك
لو كان ماجينا اللي في بالك
مانجبرك نبقى رفيق خيالك
دمع المطارح شوقنا تكفيني

امعاك سموحي
مدام لاقي راحتك في موحي
ذكراك عندي هي طبيب جروحي
تروي عطش قلبي زها تسقيني

تباعد غيب
خيرك سبق غطا غلاك العيب
بكرا انصاحب صاحبي التغريب
والليل ليلي والحنين حنيني

دير سوايا
ايعوض عليا الله يامشكايا
غير لو خطر مره عليك غلايا
ابخير حاول في جفاك اطريني

‏"القصايد سلوة النفس والإبداع ذوق
وكل بيتٍ يلفت العين يسلم شاعره"

مرات فيه ناس تستفزك حتى ولو كنت في حالك وماتبي تقرب حد او تجي في طريق حد..تبي تكون بروحك بس..
لا تبي تعرف اخبار احد ولاتبي احد يجي في طريقك ولاتبي احد يكلمك..
لكن مع هذا مافيه حد يخليك في حالك مع انك انسان عادي جدا زي أي انسان عادي في هذه الدنيا لكن وراك وراك و يبوا يعرفوا عليك كل شيء ....والحل هو التجاهل ومافيه شيء غيره ....
في هذه الحياة مافيه احلى من غرفتي احبها...واحب اكون بروحي

المهم
فيه ناس يدخلوا قلبك وتحبهم وتموت فيهم وانت كنت تعتقد بأنهم نفس الشيء ... لكن فجأه يصدوك ويبعدوا عنك ويعاملوك بجفاف وكل ماتحاول تفهم منهم كل مايصدوا....ويكلموك بطريقه غريبه مش من عوايدهم ابدا...
تستغرب وتسأل نفسك هم نفسهم او انا اتوهم وتحاول وتحاول ونفس النتيجه لين تضحك على نفسك وتقول خلي احتفظ بكرامتي أحسن....
هذه الدنيا غريبه بجد


......

اللي يريدك ياعين ايجيك
اللوعه موش امغير عليك

اللي يريدك ياعين ايطل
لا من شوق عزيز ايمل

الصوب ان غاب الشوق رحل
ومرات البعد ايقسيك

اللي يريدك ياعين صحيح
مغالاته ماتجي تمويح

البني الواثق لا مايطيح
ولا الوافي بعيب ايكافيك

اللي يريدك ياعين يسال
وينشد ديما كيف الحال

لاياخذ قول ولا اقوال
ولا يخلي الدنيا تبكيك

اللي يريدك ياعين حبيب
مايطل عنك لا يغيب

واللي ماهو للجرح طبيب
مغالاته امغير اتشقيك

اللي يريدك ياعين اولاف
ايريف في الصوب والاف

الغالي اللي عمره ماراف
تهايلي غير يلعب بيك

اللي يريدك ياعين دليل
ايشيل معاك هموم الليل

اللي يستاهل دمع ايسيل
عليه سيلي ماني ناهيك