قلتله عادي
مسحت الدموع ودرت وجهي غادي
عند الوداع سلمت... قلتله عادي

خفا دكنوني
من خوف دمعتي واطيت هذب عيوني
ودعته وداع اصحاب مايهموني
وداع الرزين ايبان طبعه هادي
خذيت الخلا ع الناس ماحقوني
نزل دمعهن هابه حذر بدادي
سلمت قلتله عادي

ماسك روحي
ومابيت نظهر يارفاقه نوحي
عدى وخلاني عزيز ابروحي
مع حزن عايش في الحياة انفرادي
بين دمع بين احزان بين اجروحي
سجين قهر خلاني قليل رقادي
قلتله عادي

الجو مطر يهبل مش عادي....هذه الايام امطار ...ربي يبارك


مرات نقدر كل شيء انديره
ومرات مابين الشقاء والحيرة

مرات حظي ايواتي
حتى العالي ايظل عندي واطي

ومرات تتغلب عليا اوقاتي
شي نتركه ونقول فيها خيره

راضي بحكم الله طول حياتي
واللي كاتبه مولاي مالي غيره

أشوفك ب عيني و أناديك بسكات
و أقول احبك بين قلبي و بيني

ويللي جفاك خليه يوصل حده
اللي تفقده يجبر الله بغيره

ومن جايك بالود قدر وده
واللي نساك مايلزمك تفكيره

راهي المحبه موش طولة مده
واسباب الكريهه مالها تفسيره

ولا من ضحكلك م الصحاب اتعده
ولا كل كاتب يعجبك تسطيره

ولو كنت غابي شوف لأهل الرده
ارتدوا على الاسلام كم عشيره

ياصاحبي ليام فيها حده
وياصاحبي هالناس فيهم غيره

اللي تصيرلك لاتطيح لاتجدا
اذكر الله وقول فيها خيره

الجو في الخارج يهبل الدنيا مغيمه و عندنا مطر الجو حلوووو ....كنت اسأل في اختي قلت لها متى شهر رمضان قالت لي تقريبا مازال عليه 90 يوم....سبحان الله ...الوقت يجري بسرعه الاسبوع يدخل يطلع بسرعه بدون مانحسوا بيه....
حاليا اسمع في صوت الرعد والمطر....اللهم صيبا نافعا







مازال عقلي يحوس في تياره
عاشق حلف يبي يكمله مشواره


مازال عاشق ريده
ومهما نهوه الناس قال انريده
في الحزن
في الفرح
وفي التنهيده
مرافق غلاه في بوحته واسراره

امشاركه في وقت الحياة السعيدة
امشاركه في لوعته واسراره
امشاركه في صحوته وانظاره
امشاركه في الفرح والتنكيده
ياخوي حتى الفكر نفس افكاره

بالله من ينسى غلاه وعيده
بالله من يطفي لهايب ناره
بالله من يقدر ايقص وريده
بالله من يقتل رفيقه وجاره
بالله من ينهي حياته بيده
ومن هو اللي أشر بدون اشاره

موحال عقلي يهون حبه يحيده
لو عاندوا عقلي اعناده يزيده
ايزيده محبه ويمتلى بأصراره
طريق المحبه هي طريق وحيده
ماشي بها عقلي بدون خساره



هو كلام لكن المكتوب مكتوب....

الجو مازال امطار ...ماشاء الله
درت بجانبي سحلب واقرأ حتى اتسلى وخلاص.....



جاني الليل يبحث عن قصيده
ويش انريد نكتبله بلاك

وكيف تكون كلماتي فريده
ونا والليل مانا مستواك

الشعر احساس وانت هو وريده
ونبض الشعر واقف من حلاك

ظلام رهيب والشمعه وحيده
قريب اتذوب وان ذابت افداك

وما طليت والفكره بعيده
كسفت الليل في غيبت انباك

ان كان كتبت ح انقصر اكيده
ف التوصيف نوحل يا غلاي

وان كان شعرت مانجيبش جديدة
وبداية البيت يطايح معاك

انقول اشوي وانعاود انعيده
فيه انغلب ترتيب امعناك

كيف الطفل كي يحفظ نشيده
ايلكلك فيه كي ايسمع احذاك

وكيف الحر وين ايريح صيده
ايحوس انظره هاناك وهاناك

وكي الغريق غارق في هويده
وما إلقي من ايدله للسلاك
وجاني الليل