|
مساء الخير اكثر شي يشدني في مدونتي هو لما اغيب وارجع ادخل المدونه الاقي الزوار جالسين تحت يشاهدون محتواي المتواضع كنهم منتظرين جديدي بلهفه ههههههههههههههههههه :نبض: المهم.. شعوري وجسمي ياا هو متمردغ قبل امس الساعه 3 بالليل نزلنا في المسبح لكم ان تتخيلو الجو بارد كيف والمويه تقول موية براده قسم بالله شفت البنات نزلوا وحماس واكشن قلت ما اخليها بخاطري ههههه ونطيت اعترف تهورت وجالسه ادفع الثمن والله كنه احد مردغني رايح جاي ومسح فيني البلاط ههههههه معليه اهم شي اني تعلمت حركه جديده الي هي النطه في المسبح > جتها ام الركب يوم جت تنط اول مره طبعا نطيت مع الكَفَر ذاك لانه هذي ثالث مره في حياتي انزل المسبح السباحه والمسبح مره مو جوي وللامانه هالمره حبيييت استمتعت بالنطه اكثر شي والسطل ذاك الي يتعبا ويطش اداني احساس اني قطعة ثلج بالفريزر هههههه وبس حاسه اني انجزت شي يوم حاربت شعوري تجاه البرد انا وحده تحب كل شي له صله بالشتا الا البرد سبحان الله ههههههههه مدري كيف |
https://c.top4top.io/p_2176ao3ev1.jpg . . صباح القهوه ~ :نبض: زمان عن رفع الصور وحركات المهم.. هالكوفي مطير لي نومي وخرّب اومّ الروتين كان لازم انام 7 الصباح والحين 11 ؟ وايه جتني بشاره حلوه مع هالصباح :نبض: الواتساب كله الف مبروك والف الف مبرووك يالله لك الحمد ويا عسى دايم هالتباريك :نبض: |
كلّ الذينَ اعرفهم ماتو في حادث ثقة :30: .. |
ما بها الوحدة ؟ أليست أجمل من النفاق والكذب ! |
اللهم لا تجعلنا بحاجة لغيرك وأنتَ أقربُ إلينا من حبل الوريد ...�� |
عندما تركب القطار الخطأ حاول ان تنزل في اول محطة لانه كلما زادت المسافة زادت (تكلفة العودة)..:30: - - صباح الخير |
شعوري الحين ما ينوووصف ما حسيت هالقلب ينبض لاحد بعد مماته شكراً يارب على هذا الشعور الحلو واللطيف الي لا يمكن ينوصف اتمنى ان ربي يرزق كل مسلم هذا الشعور وهذي السعاده الي انا فيها الحين :نبض: طبعا اليوم كان يوم مهم في حياتي كان يوم مختلف واستثنائي كان يوم جميل جدا كل لحظه فيها كانت لحظة سعاده وفرح واهم شي اهم شي اليوم قلبي تعب من كثر دقاته ههههههههههه :نبض: |
البعض لا يقترب منك لمواساتك بل ليتأكد ويطمئن (انك تتألم :30: ..) |
يُقاس الألم بأثره لا بسببه وأتعجّب كيف يجرؤ إنسان أن يقول لآخر أن الأمر لم يكن يستحق ..!! |
الأمرُ معقد ، كـ غيمةٍ لا تعرف ما الذي أصابها فـ بَكَت |
لا تُحاول الإنتصار في كلّ الخلافات فأحياناً كسب القلوب أولى من كسب المواقف |
لا تحسدوا الناس على نصيبهم من الفَرح لمُجرد أن نصيبهم من الحُزن لم يُرى :30: .. |
اولاً: الله يمسيكم بالخير ثانياً: كل عام وانتم بخير :رحيق: ومبارك عليكم الشهر الفضيل ثالثاً: اعذروني ع الغياب الطويل مير والله الظروف والنفسيه ما كانت تسمح رابعاً: هذاني رجعت لكم :نبض: خامساً: محتاجه دعواتكم :رحيق::رحيق: - سادساً واخيراً: عندي كلام لمسك الغلا (المنتدى) شسمه عندك خبر انك قد اهديتني اجمل شي في الحياه ؟!! بس جدن آسفه ماقد جا ببالي اني اشكرك او اطري لك حتى والحين يوم فقدته جيت اشكيلك ايه امس فقدته وودعته للابد ودموعي معيّيه تهجد :30: :30: الله يصبرني يارب |
https://c.top4top.io/p_2300l0iqy1.jpg https://b.top4top.io/p_2300tzeiz0.jpg حاطين لي مغذي وقناع الاوكسيجين والسبب الله اعلم بوه تقريبا من شهر ونص وانا حالتي النفسيه بالقاع وكل هذا من وراها ما عمري اخذت مغذي ، بس اليوم استسلمت :30: ترا الحياه من دون عافيه ولا شي حرفيا مانب مستمتعه بشي من بعدها يالله اني اسالك ان تكرمني بالعافيه الدائمه |
صايمه اليوم الحمد لله :نبض: ونايمه من بعد الفجر > ما قد ذاقت نوم ف نهار رمضان يمكن اول مره بحياتي تركت صيام 3 ايام ما صمت ، وانا ما فيني شي ، وفيني الف علّه مدري كيف الزبده دوبي اليوم احس برمضان الايام الي مرت كلها كانت زي ايّام العاديّه احس ان بعض الطقوس والعادات لها دور عشان تحس وتستشعر - - قبل انسى شككككرا لكم :رحيق: والشر ما يجيكم :رحيق: ي مرسليلي التقييمم وحركات اجل وحشتكم انا وانا ما عندي خبر ؟ :نبض::0741: |
المهم وانا اقلب المدونات الا وشوفو مين لمحت اسمه شوفو منور القسم ؛(؛( الا والله منور المنتدى كله https://www.al2la.com/vb/t103465-14.html يالله ي حبني لهالبنت :نبض::نبض::نبض: يسوم والله انك نورتي المنتدى مليون ترليون شسمه الف مبرووك الامومه :نبض: من مشاركاتك عرفت انك جبتي بنوته عسى الله يجعلها من مواليد السعاده ويخليها لك :نبض: |
https://i.top4top.io/p_2306sr3np0.png صيام والعالم هدوء وانا جالسه امشي من اليوم لعلّي احرق بعضا من المشاعر السلبيه مع السعرات الحراريه |
"هو عيدٌ دائماً ، طالما ان العائلة بخير." :نبض: - عيدكم مبارك يا اهل مسك الغلا وكل عام وانتم ومن تحبون بالف خير |
مساء الخير كيفكم شخباركم ان شاء الله طيبين ومعدلين نومكم انا نومي للحين مش ولا بد بس يالله خذيت اجازة اسبوع يمديني فيه اعدل نومي المهم .. اخذت اجازه لشغله مهمه اهم من النوم فكرت اسوي لي تحاليل من الى لانو من شهرين وانا فيني تعب مو طبيعي بس عشان رمضان قلت اسويها بعد العيد براحتي ما كنت ادري اني راح اطيح مرتين يعني انا ما اجلت تحاليلي لبعد العيد الا عشان ما اضيع وقتي ووقت الناس معي برمضان وصارت شخخبطه اكثر اطيح عليهم وحوسسه وقلق واروح المستشفى بعز الزحمه بس يالله الحمد لله انها عددت المهم لحقت اسوي لي تحليل واحد قبل رمضان بيوم والنتيجه كانت تمام قالو ما فيك الا العافيه يمكن تتوهمي والله اني قلت الحمد لله من ناحية النتيجه لكن سلامات كيف بيقولو يمكن تتوهمي ؟ انا ما اداني المستشفيات ما اطيق ريحتها جايه عشان متوهمه بس بالتعب :30: !! مادري كيف مستهينين بتعب الناس ما علينا .. حاسه ان البلا عندي بالفيتامينات لانه محد قدر يحدد وش فيني غير ثاني مره يوم رحت عند دكتور العائله قال هذي ليش منهاره ! تصدقون كلمته هذي ساعدتني كثير لانو حتى انا ما كنت اعرف وش فيني الا يوم قال منهاره كنت احسب فيني ضعف من الصيام ومن قل الاكل لكن يوم قال منهاره عرفت تقريبا وش مشكلتي طبعا حالة الانهيار ما تجي عبث انا الفتره ذيك ما غير كنت اعصب على كل صغيره وكبيره < من الزعل وكل اللي سويته عشان اسيطر على حالتي بطلت اني اعصب نهائي لان بنفسي حسيت ان اعصابي رايح فيها يعني حرفيا بلا مبالغه من 19 رمضان للحين ما عصبت ولا مره اعرف اذا عصبت انهرت ما غير اتجنب من اشياء تنرفزني او تعصبني احس ودي اشطح واقول (لا تتكلم عن القوه اذا انت ما جربت تسيطر على تفكيرك) >اصعب شي في الحياة هو السيطره على التفكير لاحظت ان مجرد التفكير ببعض الاشياء يمكن يسبب لك حالة الانهيار ^ وطبعا كذا تسيطرت على حالتي الخلاصه .. عرفت ان (كل احد دواه عنده) يعني لو ما ساعدت نفسي كان يمكن ما صمت ولا يوم برمضان ولو اني للحين ما اعرف وش سبب ضعف الاعصاب عندي الا اني قدرت اداوي نفسي بنفسي لفتره من الزمن وطبعا كتبت ستين الف موضوع مع بعض بس يالله مشّوها هالمره |
طبعا هذي اول مره بنفسي راح اروح المستشفى والمشكله ما عندي خلفيه ابددد يعني شلون اخليهم يسوون لي تحاليل الي ببالي مثلاً تحليل حق فيتامين d هذا انا اعرف له مافيه شرط صيام ولا شي اما التحليلات الثانيه ما اعرف هل يحتاج صيام ؟ والفيتامينات b1 وb2 وb12 باي تحليل يبين ؟ حتى فيتامين a و e والغده الدرقيه اي احد عنده خلفيه يعلمني ما ابيهم يمشّون كيفهم عليّ ويسحبون دمي الف مره :30: وكم مره يحتاج سحب دم لتحاليل مختلفه ؟ او عادي يقدرون يسحبون لتر مره وحده ههههه > اهم شي الابره ما تنضرب اكثر من مره |
اووراانوووس :نبض: ي قدمك ي شيخه يوم تناديني ذووذوو سقى الله ذيك الايام الي الكل كان مدلعني هنا بذوذو ؛( طبعا لو في احد يبي يشوف الطاقه الايجابيه بحد ذاتها تمشي وتتحرك وتاخذ وتعطي يجي يشوف ((أورانوس)) :نبض::نبض::نبض: < انواع الكاريزما ماشاء الله ما تنوصف بكلمتين المهم على طاري القهوه .. اول شي انا احب كل انواع القهاوي ثانيا يختي قد ذقت قهوه عربيه لاهل الطائف وربي ريحتها هنا للحين بمخي العام اختي كان عندها فترة شغل بالطايف وكان في كافي عندهم بالدوام تقول كل ما طفيت رحت اطلب لي قهوه عربيه من غير اي طلب معين المهم من يوم ما رجعت هي ما غير تمدح لي قهوتهم رجعت من غير ما تستكشف سر البن تبعهم وقبل فتره رحنا عند اخوي قامم صلح لنا دلتين قهوه الا يوم ذاقتها اختي انهبلت تقول نفس طعم قهوة الكافي ذاك واخوي يوم سالناه من وين له البن ؟ قال قد خذاه بالكيلو من الطايف ولا يذكر من وين بالضبط ؛( :30::30: انا عني اول رشفه ما حسيت بذاك الطعم الي هي كانت توصف لي بس وربي حرفيا ادمااااان ادمااااااان من اول مره مدري هو طعمها كان حلو ولا ريحتها الزبده شي يمخخمخخخ وحظنا ما لحقنا ع هالبن الا بآخر الدله كان في قرطاس ساده ما كان فيه اي علامه تدلنا عليه دله اخيره وقرطاس ساده هههههه مين قال الحياه مو حلوه مين هههههه |
https://i.top4top.io/p_2342ad5gm0.png ^ شنو هذا ؟ وانا اقول شبلاني فجاه اثره مفعول الحديد من شوي افطر مع الوالده قلت لها ما لاحظتي اني صرت ابلع الاخضر واليابس قالت لو تسمني اقول قصدها لو اسمن راح تصدق كلامي هذا مهما اكلت مهما شربت بعين امي لقمه وجغمه وهذي اكبر معركه بيني وبينها لدرجة احيان احسني عاقه :30: الله يرزقني برها بس ويطول بعمرها المهم .. داقه بالنعمه بس برضه من الجوع مش قادره انام |
"ما استبّ اثنان إلاّ غلب الأمهما" ^ احيانا الاقي عباره تختصر الكثير من الشرح دايما ودي اني اوّعي بعض الناس ان مش كل الانتصارات حلوه بعض الانتصار تكون فيه انت اللئيم والدنيء ، وبس |
https://i.top4top.io/p_23501syar0.jpg موسوسه !! افا بس افا عاد الدكتور ي صبره على وسواسي كل ما استلمت نتيجة لتحليل اروح اقوله ابسوي تحليل فلان الفلاني يقول ماله دخل ي بنتي بعدين يقول حاضر عشان تتطمني طبعا بعدين اعلمكم ايش من التحاليل والاشعه سويتها لانو باقي كم تحليل براسي لا سويته اعلمكم بالتفصيل يمكن تستفيدون > تقصد الناس الي مثلها الي يهابون من المستشفى والتحاليل والامور هذي < اكتشفت اني كنت مثقله الموضوع بزياده اهم شي الحمد لله صحتي جيده الان :نبض: والتعب احيانا احس فيه لكن بالنسبه لشهر شعبان انا بنععمه لا تعد ولا تحصى |
صباح الخير :رحيق: وبما انو نومي مسوي لي فيها يعنني بسدح لكم معلومه تفيدكم المعلومه هذي انا اعرفها من زمان لكن تاكدت منها الحين يوم جاني تعب من حيث لا احتسب تقولك المعلومه انو تدمير الجسم او الجسد تعتبر اخر مرحله بمعنى انو لا يمكن اي مرض او اذى يصيب جسمك كذا فجاه ، فيه قبلها مرحلتين لا بد تمر منها وهي كلها ثلاث مراحل باختصار < مدري تنقال عنها مراحل ولا لا المرحله الاولى: فكره سلبيه والمرحله الثانيه: الحاله النفسيه السيئه ثم بعدها المرحلة الثالثه: الي هي امراض ومشاكل الجسد بانواعها لو تلاحظو الفكره السلبيه بالمرحله الاولى يعني هي اساس تاسيس الحاله النفسيه السيئه والحاله النفسيه الغلط معروف تسبب مشاكل في الجسم يقلك اي مشكله جسديه مربوطه بالحاله النفسيه حتى لو عطسه او صداع بسيط وممكن الحاله النفسيه السيئه تؤدي الواحد لامراض من الصعب يقدر يتعالج منها ارجع اتكلم عن الفكره السلبيه الي بالمرحله الاولى وايش تاثيرها على النفسيه ودي انو اي احد يقرا هذا الكلام يفكر معي ايش ممكن يكون سبب تدمير حالتك النفسيه ! طبعا تكون فيه اسباب واضحه كوضوح الشمس مثلا احد قريب منك توفى واكيد تعرضت للكثير مثل هالصدمات في حياتك لكن بالحقيقه هذا مو سبب تدمير لحالتك النفسيه السبب الرئيسي هو التفكير والتفريط بالفكر على الاشياء السلبيه الي صارت بحياتك < وحتى الفكر على اشياء سلبيه بمجرد الخيال لذالك .. (راقبو افكاركم) من الآن الله يسعد روحكم انا يوم قررت اطبق هالمعلومه عانييت حسيت انه ما عندي شي اصلا افكر فيه لكن مع الايام عرفت اتعامل مع تفكيري السلبي غير ابدله بالايجابي بالنهايه الوقاية خير من العلاج واتمنى اني وفقت اوصل لكم المعلومه :رحيق: |
الله يعين معزومه الليله والنوم معيي اقوم متاخره ووجهي يكون مفقع نوم شلون احط ميكب ههههههه وايش البس اصلا عاد من زمان عن العزايم والمناسبات وناس جدد معزومه من قبل اسبوعين بس كنت مكنسله الفكره وامس جاني اتصال وليه وذا قلت تمم ولين الحين ما قررت وش البس اصحى واقرر المشكله مكان الحفله بمدينه ثانيه يعني لزوم نتجهز من بدري عاد اعترف لكم بشي > اعتراف الاعجاب ما قبل النوم ههههه يا اني معجبه ومقتنعه بذوقي واختياراتي وتنسيقي لنفسي الكثير ما يعجبهم لكن عندي اقتناع كبير بذوقي مستحيل يتغير لاحد اما لغيري الوضع عكس اي شي يلبسون احبه فيهم الا الشي الاوفر ما احبه في نفسي ولا في احد غيري واحب الاختصار ف كل شي سواءا ف اللبس ف الاكسسوارات ف الميكب ما عدا الايلاينر والكعب هههههه بس برضه مش الكعب الي يجي زي القلم والايلاينر احب العب فيه وابدّع الا المناسبات الكبيره دايما اجيب العيد هههه :30: وبس .. اصحى وادور لي لبس بلون غامق وفخم ويارب القى شي ساده بدون فصوص الي يرضي ضميري |
في مثل هذا الوقت من العام الماضي رحلت اختي من دار الفناء الى دار البقاء خلال الثلاث سنين فقدت ناس غالين جدا على قلبي في شهر 7 عام 1440 توفت عمتي فجاه وبعده بشهرين توفي والدي رحمة الله عليه والعام خالي توفى وعقبه بشهرين اختي توفت رحمة الله عليهم وجمعني بهم في اعالي الجنان |
ارررررق طبعا كملت اكثر من 24 ساعة والنوم ما له اي طاري لانب نايمه ولانب واعيه شي مدري وش اسوي لو مصحصحه اقوم انجز اعمالي حرفيا جالسه اطالع السقف والسقف يطالعني |
https://j.top4top.io/p_2365rwrad0.png قلبتي المواجع ي همس الله يرحم آبائنا ويرحم جميع اموات المسلمين .. من وانا صغيره اعرف ايش هو الوجع لكن ما عرفت الفرق بين الوجع الحقيقي والغير حقيقي الا يوم فقدته :30: |
https://e.top4top.io/p_2368q58tb1.jpg احترام اكثر من كذا مافيش :نبض: عادتي اول ما اصحى ادور جوالي واليوم اصحى والاقي هذي الورقه جوه الكفر احس بابكي اول مره يحترمون نومتي ويتركون لي رساله كذا بكل حب واحترام ههههه مكملات الفيتامين دال اخذها اسبوعيا يوم السبت بس امس طلع عن بالي من قوة التعب كنت مواصله من عصر الجمعه لين البارح الساعه 3 يعني 31 ساعه بدون ولا اي غطه بس اهم شي خلصت الكثير من الاشغال والمشاوير الي كنت مؤجلتها من شهر تقريبا |
قال رسول الله صلى الله عليه وسلم خيرُ الدّعاءِ دُعَاءُ يومِ عَرَفَة وخيرُ ما قُلْتُ أنا والنّبيّون مِنْ قَبْلي "لا إله إلا الله وحده لا شريك له له الملك وله الحمد وهو على كل شيء قدير" |
يالله وش ذا الظهر دخلت هنا وعيّدت عليكم والحين اكتشف اني ما اعتمدت المشاركه زين انها ما طارت معليه بعتمد الحين :نبض: ***** تقبل الله منا ومنكم صالح الاعمال :رحيق: كل عام وانتم بخير وعيدكم مبارك :رحيق: يمكن انا الوحيده الي مسيطره على نومة العيد احلى شي عندي بالعيد لما الكل يدخل بالغيبوبة واكون انا صاحيه مصحصحه تعودت على كذا من عشرات السنين العام بعيد الفطر وقت الظهر كذا دخلت معاهم بغيبوبه ويوم صحيت تحسفت على عمري احب الجو الهادئ حق اول ايام العيد :نبض: ما اقدر افوته عاد من كثر المواصله امس قريب المغرب وصلت لمرحلة الهلوسه لانو لي كم يوم ما انام الا 4 ساعات في اليوم والعاده انام 9 ساعات الزبده احد جرب الهلوسه الي بمعنى الكلمه ؟ انا من كثر ما اواصل مريت بمراحل غريبه وعجيبه مش بس الهلوسه مثلاً مرحلة انك جالس تصلي تقوم وتسجد مثل العالم وانت نايم حرفياً وتحلم بعد هههههه امس وانا اصلي فجاه اكتشفت اني جالسه احلم وقطعت صلاتي مرتين لكن من غير فايده رجعت احلم من جديد واضطريت اكمل بنفس الوضع لانو ما كان باليد حيله المهم اكتشفت فيني ميزه جديده الي هي اني لما انام بالصلاه لساني ما يوقف هههههههههه الزبده ناويه على نومه محترمه الليله لا قمت رديت على بعضهم من كثر السهر والمواصله هالعيد مخي ما هو بمصحصح |
انا الوحيده الي ما اكلت ذرة لحم لين الحين مادري ويش مشكلتي احيانا اكل واحيانا الله يديم النعمه مادري نباتيه او مش نباتيه اذا اكل اكل اللحمه اللي تكون مره ذايبه والي تجي بدون عظم اما كبده وتقاطيع وهالسوالف ابدددددا ما قد ذقتها حتّى |
"اذا ماكلتي كبده وتقاطيع فاتتك نص متعة الحياة" ^ الكبده شيء معقول اما التقاطيع حرفيا الله يديم النعمه انا البيض يالله يالله اكله هههههه فما بال الشحوم والكبده والتقاطيع متعة الحياة كلها عندي والعشق هو الرز رز ابيض احمر بني اصفر :نبض: بالغدا او العشى او بالفطور اي وقت ما عندي مشكله ما امل منه عاد الاعتراف بالحق فضيله المشكله فيني موب فيكم نعمة ربي تحللونها انا يوم اقعد اكل البيض واللحوم تجيني تخيلات مدري كيف وهذا الي مانعني وبقوه الله يشفيني بس هههههههههه |
الفقد شين لكنه حق.. بس اذا تبين تنسين الفقد نصيحه تصدقي لو بريال يوميا ترى الصدقه تهدي الروح وتخليك مرتاحه لانك تنفعينها بقبرها.. عسى الله يريح بالك ويهدي سرك ^ الله يسعد صاحب هالفكره :رحيق: ونرجع لموضوعنا السابق يبيلك دوره عن ثلاث عجايز صنتين يمشن بعصا وواحده مهذري ويغصبونك على اكل لسان وكرش الذبيحه ^ طبعا هو كذا الواحد يمكن يتعود والشغله هذي تقوم فيها الجدات وجداتي متوفين منذ زمن بعيد وامي الله يطول لي في عمرها انسانه لطيفه جدا مستحيل راح تجبرني على هذا يعني محد بقى فوق راسي عشان انجبر ع هذي الاكلات حتى الازواج جايين مرره كيوتيين هالايام ما لهم هيبه هههههههههههههه وفوق هذا نلاقيه راعي الاستيك او الباربكيو باي وجه يقول لي على لسان وكرش عاد يوم اني صغيره كنت اكل نخاع العظم طبعا الفضل يرجع للاهل كل ما كان يطلع باكلهم العظم ذاك الي فيه النخاع نادوني واجيهم جري بكل لهفه لا وانا ووحده من خواتي كنا نتسابق عليه ههههه يعني الي يوصل اول يكون من نصيبه وكذا وللامانه للحين اتذكر طعمه كان مره لذيذ بس ما عاد اقدر اكل بسبب تخيلاتي الزايده :30: |
https://e.top4top.io/p_2389dt8uv0.jpg ما كنا ماشين صح ؟ ياخي احب التقييمات الي تجيني هنا :نبض: حرفياً مادري متى راح اكبر عن هذي التفاصيل الصغيره |
https://k.top4top.io/p_2390wqma00.jpg حبيباتي دققو فوق الخط الاحمر الي بالصوره انا يوم اقول تفاصيل صغيره ما اقصد التقييمات التفاصيل الصغيره هو اني احب اسم مدونتي يكون بملفي من فوق لتحت وما يقاطعه اي موضوع آخر اما التقييمات تفاصيل جدا جميله والبعض منها تصنع يومي على قولتهم :نبض::نبض::نبض: ويسعد مساءكم :رحيق: |
يالله هدتني السخونه اعذروني ياللي ما قدرت ارد على تقييماتكم انا التصويت ما مداني اصوت توني استفيق مع اني دخلت اكثر من مره بس دخت وطلعت العام داهمني كرونا قبل الحج من بعده هذه ثالث مره تجيني سخونه والا كنت من النوع الي كل بين سخونه وسخونه كنت اخذ فترة سنتين اقل شي بس يالله الحمد لله :رحيق: قبل انسى شكرا لكم على التصويت صعفق طاش كندي & احمد العالمي & متأمل والصدق اني فرحت على المصوتين اكثر من التصويت نفسه يا جعل ربي يسعدكم :رحيق: |
على طاري ام حسن ههههه والعين والحسد امس شفت اسد بحلمي > اول مره تشوف ويوم استفسرت قالو لازم التزم بآيات العين والحسد عاد يبيلي ادور احد يقرا علي كل يوم ويحصنني :30: احس البلاوي كلها تجيني بسبب اني مهمله في موضوع التحصين |
ي عيني ع التوقيع الجديد :نبض: تفاجئت يوم دخلت هنا اقول في نفسي مين ذي الي خاشه مدونتي اثر الاداره حاطين لي توقيع :نبض: المهم جايه من قسم همومنا ومشاكلنا قريت موضوع (اخذها كزوجه صعبه) صراحه ما استغربت من كلام صاحب الموضوع كثر ردود الاعضاء بالموضوع نفسه مدري مستغربه من استغرابهم هو مجتمعهم غير عن مجتمعنا والا وش السالفه انا من وعيت شاب راسي من هالقصص وهنا كل الي ردو بالموضوع حسيتهم متفاجئين !! لدرجة ان البعض يحسب الموضوع وهمي ههههههههههههه معليش جلست اضحك وانا اقرا ردودهم المهم.. في مثل هالموقف بنظري الغلط كله يرجع للبنت مو معقوله كيف اربع سنوات وهي ما حست انه قاعد يلعب عليها !! > وين راحت الحاسه السادسه الي عندنا :30: وطبعا هو والي شرواه الغلط راكبه من ساسه لراسه لكن دايما في مثل هالعلاقات انا اشوف المبادر بالغلط هي البنت نفسها يعني موش ممكن انو اي علاقه تبدا من غير (الضوء الاخضر) من قبل الستات وهذا الضوء الي والله يوديهم بستين داهيه من حيث لا يعلمون وادناهم هالموقف (اخذها كزوجه صعبه) الي انحطت فيه هذيك المسكينه |
| الساعة الآن 09:51 PM. |
Powered by vBulletin® Copyright ©2000 - 2024, Jelsoft Enterprises Ltd.
SEO by vBSEO 3.6.1 al2la.com
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع الحقوق محفوظه لـ منتديات مسك الغلا