لطالما مقتُّ قضاء الوقت مع الملائكة من البشر،
مدعين الثقل والكمال،
أو بالأحرى اولئك من يجيدون النفاق بجدارة.
في ملازمتهم سقم لنفسي واحساس يبعث بالغثيان،
نبذهم لي بحجة التسيب فقط لجرئتي على قول الحقيقة
- المُرّة في اغلب الأحيان-.
انظر لهم بقلة حيلة وكلي رغبة في لعن تملقهم المبالغ فيه،
وإن فعلت لتم نعتي بالمتهجمة البربرية.
وحقيقة لا امانع ان يتم نعتي بذلك،
فليفعلوا ذلك يوم نجتمع سوية في الجحيم،
وكلي ثقة بأن لنا في جهنم ملتقى.



^



فضفضة ليلية.

لو كان فيه يوم ثامن بالاسبوع بيكون اسمه الثّمناء، ولا الأثمون ؟
اوباا شكل الدواء بلش يعطي مفعوله
ويلعب على عقلي شوي شوي.
بس جد ي جماعه !!
شو بيكون اسم اليوم الثامن بالاسبوع ؟
لا تسوون نفسكم عباقرة وتتكبروا على هالسؤال !!
تنجرح مشاعري ترا.


صباحكم سعيد .

انا في مرحلة ان مو حزينه
على اي شي غير المشاكل العائلية اللي تصير
لانها طبعا شي يخليني انفعل رغما عني
مو حزينه ليش؟ ومو مهتمه ليش؟
لأني مؤخرا انهيت علاقتي مع ناس،
وخربت علاقاتي مع كثير ناس ،
ماعرف شو المرحلة اللي انا فيها،
بس هالتبلد لوين ماخذني؟
شي ثاني، اني صرت اسوي اشياء ادري انها غلط
بس ما احس بتأنيب الضمير!
واسوي الغلط بدون اي اهتمام!
نقمة فيني؟ ماعرف، لاني مو حاسه بشي
نقمة في منو؟ ماعرف.
ما احب الاغلاط اللي اسويها،
وفي نفس الوقت ماكرهها ولا ندمانة عليها!.

ليلة مُختلفة، مُميزة!.
ليلة غريبة، مُثيرة.

....



كلام انكتب وانمسح.

اليوم جدا جدا متعب،
او للأمانه خلوني اقول من امس في الليل
اشتد على ألم القولون مره مع غثيان فضيع
وكله بسبب توتر يوم كامل بالدوام وضغوطات الحياة،
غير مشاكل العائله اللي كل مالها تزيد
الامر مُحزن.
صحيت نص الليل على ألمها ولا قدرت انام.
واحس شوي وقلبي يطلع من مكانه من قوة الدقات،
وثقل بصدري، لدرجه قلت خلاص يا بنت هذي نهايتك.

وفي الصبح جتني حمى من النوع ذاك
اللي يخليك ترتعش في اسفل جسدك
وراسك يكون ساخن جدا،
للاسف ما قدرت اداوم ولا حتى رحت للطبيب،
الحمى تمّت ملازمتني حتى بعد ما
خذيت دُش عبارة عن ثلج وشويه مويه
ولا راحت !
خذيت فيتامين سي بعدها وشربت زنجبيل،
احاول اعالج نفسي من الحمى والقولون بمثل الوقت
انهلكت، يا الله اكتب اجري.

لكن الحمدلله نمت الظهر وصحيت العصر
القولون بدأ لحظتها يخف شوي
خذيت بندول والحمى انعدمت.
واخيرا رجعت للحياة واقدر اكمل باقي يومي.

الحمدلله على نعمة الصحة،
الحمدلله على كل النعم،
كثير مقصرين مع ربنا.

عمومًا، حاليا خلصت العناية الليلية،
ولازم ارتاح كفايتي واعوض نفسي
لكن قبلها ضروري اكمل باقي المانجا
اللي ساحبه عليها من قرن .

اوباا لحظه لحظه،
الحين توني استوعب ان يومي كامل
بس كليت فيه وجبه وحده اللي هي الفطور،
وامس اخر وجبه كانت الغداء !!!
يبدو اني اعيش على الطاقة الشمسية،
لكن حقيقي التعب اللي مرّيت فيه،
لو حد غيري ما تحمله،
عندي قُدرة رهيبة على تحمل الألم،
لاحظت هالشي فيني.

يلا اخليكم الحين.
تصبحون على خير.