" ربنا مُطلع علينا فى أبسط الأشياء وفى الفكرة دى منتهى الرحمة لقلوبنا وفى نفس الوقت الخوف الرادع من أفعالنا "

قَدْ سَمِعَ اللَّهُ قَوْلَ الَّتِي تُجَادِلُكَ فِي زَوْجِهَا وَتَشْتَكِي إِلَى اللَّهِ وَاللَّهُ يَسْمَعُ تَحَاوُرَكُمَا ۚ إِنَّ اللَّهَ سَمِيعٌ بَصِيرٌ

أظن إن نقطة فارقة جداً فى العلاقات إنك تحس من اللى قدامك إنه شايفك إنسان كويس ومؤمن بيك
دايماً الإيمان علامة عميقة فى قوة العلاقة وبيفرق مابين التعلق والحب
التعلق أنا عايزك تفضل موجود
الإيمان أنا مقتنع بيك بعقلى وبقلبى ومؤمن أن وجودك شىء آمن ليا وجميل.
والإيمان لا يشمل إنكار العيوب الإيمان إدراك أن مميزات وجودك شايفها و(عيوبك يلا بينا) نحاول سوا نوصل لمنطقة وسط بينا

الإنسان بيضيع أوقات كتيرة من عمره فى إنتظار الخلود
البقاء الأبدى فى ذاكرة شخص/مكان/العالم
ودى أغبى حاجة بيضيع فيها وقته لأنه بيعاكس طبيعة الكون الكُل يُنسى كأنه لم يكن فلا تجتهمد فيما لايمكن إتمامه.

الإنسان بيحارب كتير جداً عشان يرتاح يطمن
بس أغلب الوقت بيحارب بس بكل الأسباب المادية وبيتناسى إنه أصلاً عايز يوصل للراحة/السعادة اللى هى أشياء معنوية
محتاجين نفتكر إن الأسباب المادية آه مهمة لكن دون إغفال صيانة الجانب المعنوى لأنه هو المذاق للحياة بدونه الحياة ميتة.

العلاقات الإجتماعية السليمة هى اللي بيقدر فيها كل طرف يعبر عن مشاعر دون خوف ودون حسابات كتير.
أحيان كثيرة بيجى طرف على نفسه وبيخفى مشاعره السلبيه ناحية الطرف الآخر بحجه " عشان مزعلوش "
بس فى الحقيقة المشاعر اللى مش بتعبر عنها ومش بتقبلها وتفهمها بتتراكم جواك واحدة واحدة هتكوم عائق فى العلاقة مابينكم وأنت مش فاهم السبب
بيتراكم جواك بدون قصد منك رفض للآخر وبتبتدى دون وعى تتصرف بشكل حاد أو تبقى مش قادر تتفاعل معاه وتحبه زى الأول لأن جواك ألم متراكم واللى قدامك مش هيبقى فاهم حاجة لأنك معبرتش بالعكس هيكرر اللى بيضايقك لأنه مش فاهم إيه بيحصل.
مشاعرك ليها حق عليك اقبلها.

(بلاش فتى)

فى بداية سورة الكهف ربنا حذرنا من الفتى وخطورة الكلام من غير علم ولا فهم ولا دراسة..

ودى ظهرت معانا فى بداية الآية ٥
{مَا لَهُم بِهِ مِنْ عِلْمٍ وَلا لِآبَائِهِمْ}

ويمكن الوقت ده هو أنسب وقت لتقديم النصيحة دى مع انتشار وسائل التواصل الاجتماعي وكل واحد معاه الوسيلة اللى تساعده على إشباع رغبته وشهوته فى الكلام والفتى..

مش عيب إن الواحد يقول ماعرفش، لكن العيب يتكلم من غير علم..

إن شاء الله تدبر الأسبوع الجاي نكمل باقي النصيحة اللى فى الآية رقم ٥