|
:: قرار هام :: |
إضافة رد |
| LinkBack | أدوات الموضوع | انواع عرض الموضوع |
11-27-22, 02:24 PM | #1261 | |||||||||
| من الملاحظ ... إن نمط الفسح والخروجات اتغير في في مجتمعنا. في بيوت كتير ...بالنسبة لهم ... بقت الخروجات معظمها يغلب عليها النمط الاستهلاكي . هانتفسح .... يعني ناكل اكل مكلف . ... يعني نقعد في كافيه وكل واحد ماسك موبايله ...يعني نشتري طلبات البيت ونعمل شوبنج ..... الخ كل ده ممتع فعلا ومفيش مشكلة طبعا يكون جزء من خروجاتنا كده لكن مع الظروف الاقتصادية الصعبة... الخروجات اللي بالشكل ده بقت مكلفة ومرهقة ... وده خلى ناس كتير مش عاوزة تخرج من البيت ... وده بيقلص فقرة الترويح عن النفس ... وده بيخلينا نحس ان حياتنا كلها تعب واجهاد مش لازم نربط الترويح عن النفس بالتكلفة العالية - حلو إننا نتمشى شوية ... حتى لو لآخر الشارع . - لو في مكان قريب منكم فيه مساحات خضرة ... ممكن نروحه وناخد شوية شاي وشوية تسالي ونقعد هناك او نلف شوية ... وعلى فكرة في حدائق معقولة في مناطق كتير حوالينا... دور وانت هتلاقي - ممكن نجهز لقعدة لطيفة في البلكونة او ع الرووف لو ده متاح - إحنا في البيت.. عندنا فقرة اكتشاف المساجد ... وبنحب كل فترة نروح مسجد جديد نصلي فيه الجمعة ونجيب ساندوتشات فول وطعمية بعد الصلاة وناكلها سوا ...او نروح نصلي العشا سوا في المسجد لو القارئ صوته حلو ... ده بيكسر الروتين وبيبقى لطيف وبيربط الولاد بالمسجد - لو بتعرفوا تخلوا الولاد يناموا في ميعاد ثابت .. بعد ما يناموا ممكن إنتوا كزوجين تنزلوا تتمشوا مشي رياضي ... او ممكن تشربوا حاجة بسيطة من العربيات اللي بقت منتشرة في كل حتة دي شوية أفكار بسيطة كده . و لو حد عنده فكرة لحاجة ممكن نعملها تخلينا نفصل من مسئوليات الحياة وتساعدنا نقرب من بعض ... ياريت يقولنا عليها | |||||||||
|
11-27-22, 02:25 PM | #1262 | |||||||||
| إزاي نربط ولادنا بربنا ❤؟ - لما تجبلهم حاجة بيحبوها .... فكرهم إن اللي رزقك ورزقهم بالفلوس اللي جبنا بيها الحاجة دي ..... هو ربنا - خليهم يتأملوا في الشمس والقمر والشجر والنجوم وإتناقش معاهم.. ....و خليهم يتفرجوا علي فيديوهات بتتكلم عن عظمة خلق الكون وخلق الإنسان.... وفهمهم إن اللي خلق كل الكلام ده .... هو ربنا. - لما تتكلم عن ربنا.... إتكلم بوقار و إحترام....وخلي ده يبان في نبرة صوتك وحركة جسمك. - جمّعهم .... وإدعي بصوت عالي .... وخلي كل واحد فيهم يدعي و يطلب اللي هو عاوزه من ربنا 🤲. - لما حد فيهم يعمل حاجة كويسة.... عرفه ثوابها... وعرفه إن ربنا شافه وهو بيعملها وإنه هايكون راضي عنه(إن شاء الله ) 🙂 - لما حد فيهم يغلط زي الكذب او عدم الأمانة .... بعد ما يعتذرلك خليه يستغفر لربنا - كلمهم عن رحمته وعن جنته ... وعن حبه ليهم . - عرفهم انهم هايشوفوه في الجنة (إن شاء الله).... وخليهم يجهزوا الكلام اللي عاوزبن يقولوه ليه لما يشوفوه. الموضوع ده مهم جدا.... ومؤثر جدا في عقيدتهم وسلوكهم. | |||||||||
|
11-27-22, 02:25 PM | #1263 | |||||||||
| في أشخاص إتعودوا انهم يعاملوا أهاليهم وأقرب الناس ليهم معاملة مليانة عدم إهتمام . يعني ممكن تلاقي واحد بيعامل كل الستات اللي بيقابلهم بمنتهى الچنتلة .. وفي نفس الوقت بيعامل زوجته أو إخواته البنات أو حتى أمه بالزعيق والشخط وقلة الذوق. او تلاقي زوجة تهتم بمظهرها وكلامها قصاد الناس…وبتهمل نفسها جدا قصاد جوزها وكلامها معاه كله دبش أو تلاقي واحد بيعامل صحابه بمنتهى الكرم والإهتمام ويقف جنبهم... وبيعامل أخوه بمنتهى الجفاء والبخل. أو تلاقي واحد بيضغط علي نفسه عشان يقضي مصالح كل خلق الله .. وفي نفس الوقت مايرضاش يشتري لأمه حاجه من تحت البيت. في أباء وأمهات علاقتهم بأولادهم مختزلة في شوية أوامر ونواهي وخناقات.. وتلاقيهم بيعاملوا بقية أولاد الناس بإهتمام وحنية. بعض الأسباب اللي ممكن تخلى ده يحصل: 👇👇 # الشعور بإمتلاك الشخص بيخلينا نزهد في إرضائه. # خلل في ترتيب الأولويات. # لو الناس مش متعودة تشكر بعض ..ده بيخلي بعض الأشخاص يدوروا على الشكر والامتنان من الناس الغريبة. الخلاصة.. ماتخليش الناس اللي من لحمك ودمك يتمنوا إنهم يبقوا أغراب عنك عشان ينالوا إهتمامك وحبك وحنيتك. خيركم خيركم لأهله… هو ده الميزان | |||||||||
|
11-27-22, 02:26 PM | #1264 | |||||||||
| هو مش بيرد علي التليفون بسرعة. - هي بتاخد ساعتين عشان تجهز للخروج. - هو مش بيصلح حاجة بايظة غير لما اقوله عليها ٥٠ مرة. - هي بتفتكر طلبات البيت بعد ما اوصل عند باب الشقة. لما يكون شريك حياتك عنده سلوك من السلوكيات اللي تضايق زي اللي فوق ....وإنت حاولت معاه عشان يبطله وهو مش قادر . حاول ماتاخدش الموضوع على أعصابك و ماتخليش السلوك ده نقطة توتر ملتهبة بينكم...وبلاش تفسر الموضوع بشكل أكبر من حجمه وبلاش تقول (هي بتعند معايا .... هو عاوز يستفزني) .... لان الموضوع ممكن يكون سلوك سلبي عند الطرف التاني مش قادر يعدله. حاول تتعامل مع السلوك ده بمرونة مش عشان تحل المشكلة بشكل جذري ولكن علي الاقل لتقليل حدته وتحسين الوضع ..... او حاول تتقبل الوضع وتتعايش معاه . | |||||||||
|
11-27-22, 02:28 PM | #1265 | |||||||||
| علموا أولادكم توقير الكبير ماتتساهلوش مع أولادكم في فكرة انهم يتكلموا عن الأكبر منهم بشكل فيه جرأة وتجاوز لحدود الأدب . زي الجد والجدة والعم والخال والعمة والخالة ... وزي أصحاب الفضل عليهم زي المدرس...ومعلم القرآن ... او المدرب ...او المحاضر طب لو الطفل حصل معاه موقف وعاوز يشتكي ليكم منه ... حقه يشتكي ... وحقه يعبر عن رأيه ... لكن يعمل ده بدون جرأة وقلة أدب طبعا مش هانعرف نعلمهم ده لو احنا كآباء وامهات بنجيب سيرة الناس دي بشكل في تجاوز لحدود الأدب... لأن ده اكتر حاجة بتجرأهم علموهم قول النبي صلى الله عليه وسلم [ليس منا من لم يرحم صغيرنا ويعرف حق كبيرنا] طب لو في حد كبير( غير سوي ) بيأذي الطفل..وقتها مهم برضه ان الطفل يتعلم إزاي يدفع عن نفسه الأذى كلامي مش معناه نسيب ولادنا فريسة لغير الاسوياء ... كلامي هنا عن العلاقات السوية | |||||||||
|
11-27-22, 02:29 PM | #1266 | |||||||||
| لما تزور حد والحد ده ساكن في مكان بعيد والطريق لبيته زحمة او مكسر ... مفيش داعي تحسسه انك اتبهدلت عشان تزوره ،.. هو بيبقي حاسس بالإحراج لوحده ... هو عارف ان المنطقة اللي هو عايش فيها زحمة ومكسرة ... وهو لو كان بإيده انه يسكن في مكان أحسن كان عمل كده. - لما تزور حد شقته ضيقة او الجو فيها حر ... مفيش داعي كل شوية تتكلم عن شقتك الواسعة وتتكلم عن أهمية البراح والوسع والتكييف ... مش لازم تنغص عليه حياته .... هو لو كان قادر يشتري قصر ماكنش إتأخر.... هون عليه وحسسه ان شقته جميلة وفيها بركة رغم انها مش كبيرة. - مفيش داعي تهزر مع حد بكلام انت عارف انه بيضايقه لمجرد انك بتستمتع بده.... للأسف في ناس بتتبسط لما تشوف اللي قصادها محروق دمه ومضايق. - مفيش داعي كل ما تشوف صاحبك تفكره انه تخين وشكله وحش.... هو حافظ شكله كويس ومضايق منه.... لو عندك نصيحة تنفعه في مشكلته وهو هيقبلها قولهاله ... غير كده بلاش تحرجه. - مفيش داعي تتكلم عن مدرسة ولادك الغالية النضيفة اللي بتعمل أنشطة كتير قصاد واحد ظروفه المادية إضطرته يودي ولاده مدرسة متواضعة جدا. - مفيش داعي تتكلم عن عربيتك وإزاي هي بتسهل عليك حياتك قصاد واحد طلعان عين اللي جبوه في المواصلات كل يوم. الانسان بطبيعته بيحب يحس بالتميز ... وبيحب اللي حواليه يحسوا بتميزه بده... وأحيانا شعوره بالتميز بيبقي مرهون انه يشوفه في عيون الآخرين .... بس الأسلوب ده ممكن يكسر قلوب ناس حوالينا وينغص عليهم حياتهم. | |||||||||
|
إضافة رد |
مواقع النشر (المفضلة) |
| |
| أصدقاء منتدى مسك الغلا | | |||||