آخر سولافة وبعدها باروح أنام إن شاء الله

أختي الصغيرة دوختني رايحة جاية مو راضية تنام ووراها مدرسة

انتِ ليه ما تنامين؟
قالت مستنيتك !!
وليه مستنيتني؟؟
قالت أخاف أنام لوحدي

أنا توقعت تخاف من الجن وذا السوالف،، لأني كنت كذا وأنا صغيرة،، وبصراحة ولأني حابة أهرب من جو الكتب شوي فتحت معاها حوار ليه تخاف مع اني كنت متوقعة اني اعرف الاجابة مسبقًا

لكن الي صار ان توقعي غلط!!

قالت انها تخاف لأنه لما تكون لحالها يوسوس لها الشيطان!!

استغربت فعلا وذي المرة الفضول كان صدقي مش لمجرد الهروب من الكتب ..

قلت لها ايش يقولك طيب يوم يوسوس لك؟
قالت لي عادي أقولك؟؟
قلت لها طبعا عادي
قالت يقولي يعني انتِ ليه تصلين،، انتِ صغيرة مو لازم تصلين عادي العبي ولما تكبري صلي

قلت لها وانتِ وش تسوي لما يوسوس لك؟
قالت اتعوذ من الشيطان واغمض بقوة عشان أنام بسرعة وأنسى ..

قلت لها عارفة ليه دايمًا يوسوس لك؟ لأنك ما رديتي عليه،، لو كنتي رديتي عليه كان ماراح يوسوس لك مرة ثانية
مفروض تقولي له انك تصلي عشان انتِ تحبي الله وتحبي انه يكون راضي عنك،، عشان احنا عادي نتعب شوي في الدنيا بس بعدها نرتاح في الجنة ،، وطااال الشرح وسؤال يجر سؤال وإجابة تجر إجابة

بصراحة حبيت موقفها وانها كلمتني،، لأني تذكرت انه كان عندي أسئلة شبيهة لما كنت صغيرة بس ما كنت أسألها كنت أخاف،، أحس إني بمجرد السؤال باروح للنار على طول هههههه

لما كبرت وصار عندي جوال وعرفت عن الدكتور ذاكر نايك ومناظرته أدمنتها حرفيًا ،، شيئ مذهل ما شاء الله سبحان من أعطاه هبة إقناع الناس وسرعة البديهة

بعدها صرت ما أخاف أسأل،، لأن إبراهيم عليه السلام سأل،، وعزير سأل ولكن سؤال الميقن بأن هناك إجابة،، إجابة انت تجهلها ولكنها موجودة ومعرفتها راح تزيدك يقين ورسوخ

سؤال اليقين يزيدك نور ،، عكس سؤال التشكيك الي يتبعه حاليا الملحدين

وتصبحون على كل خير

اكتشفت ان الراحة والسعادة غير مرتبطة بالظروف
ممكن تكون تشعر براحة داخلية وكل الظروف الي حولك ما تأهل
يعني ممكن تكون مكروف ع الآخر ،، وعندك اختبارين في نفس اليوم ،، ومو نايم غير اربع ساعات ،، وجوالك الجديد الي ماله الا كم شهر طاح وانكسر وانتهى واضطريت تمشي حالك بأي جوال والسلام،، ومع كذا فاك الخشة

اي والله هذا الي صاير��

واحد من الاختبارات كان عبارة عن ثلاثة أسئلة فقط،، أحدها كيف تتوقع راح يكون العالم بعد ٢٠ سنة!!

أكره ذا النوع من الأسئلة ،، مش يمكن أكون مت قبل هالعشرين سنة!
هو يعني بقضي حياتي افكر وش بيصير بعد ٥ سنين و١٠ سنين و٢٠ سنة!

المهم أبشركم اني خبصت وعليها قلت لهم اني ما أحب ذا السؤال

تدرون اني اشتقت لكم

اشتقت اقرأ المدونات وأمر الأقسام بس الجوال الي استخدمه ما يساعد

لوحة المفاتيح لا ترى بالعين المجردة والشاشة تجيب الحول

واللاب يبي له جلسة ما ينفع تقرا وانت ماشي وانت تسولف وانت تطبخ

المهم دخلت اقولكم انكم وحشتوني،، واشوفكم مرة ثانية في جلسة محترمة على اللاب

دخول استثنائي اليوم بمناسبة المباراة الاستثنائية،، رغم اني مالي في الكورة وبرغم الكيبورد الي يفقع العين وبرعم الزحمة بس فوز السعودية على الارجنتين لازم أحتفظ له بذكرى هنا في المدونة

بيتنا اليوم عبارة عن احتفالية والكل فرحاان من قلب

اقولكم وش الغريب انه امي الي ما تحب الكورة تفرجت على المباراة وفرحت كمان ،، والاعجب انه قلبها على ياسر الشهراني وعلى أمه! تقول مسكينة أمه الحين أكيد قلقانة عليه

الأم بقلبها الكبير تحس بالأمهات الي زيها ..

مبارك للمنخب السعودي ولكل العرب

السلام عليكم

شلونكم يا قوم

مدونتي ينفع اخليها مزرعة على كثر الغبار المكدس فيها

اصلا جيت بس علشان اقولكم اني زعلانة وقلبي الصغير مكسور

جوالي ما تصلح وما راح يتصلح

أبوي يقول عادي نجيب لك غيره،، بس هو مش عادي عندي هذاك كان هدية وقيمته عندي كبييرة وحتى لو اجيب احسن منه بابقى زعلانة عليه