| |||||||
| :: قرار هام :: |
647Likes| إضافة رد |
| | LinkBack | أدوات الموضوع | انواع عرض الموضوع |
| |||||||
| :: قرار هام :: |
| إضافة رد |
| | LinkBack | أدوات الموضوع | انواع عرض الموضوع |
09-08-22, 12:14 AM
| #97 | |||||||||
  
| 
نزع الاعتياد من الارشيف الخاص بي عام 2020 في رواية لجين ويبستر فيها جملة لطيفة بتقول :(ينتاب المرء شعور هائل بالفراغ حين يعتاد أشخاصا أو اماكن او انماط في العيش ثم تنتزع منه ) الاعتياد علي شئ ما قد يمثل ميزان لحياة بعض الافراد فيصبح جزء من روتين محبب وتستطيع ان تغير فيه بارادتك اذا احتجت هذا النوع من التغيير ... ولكن فكرة انه يتم انتزاع منك شئ بدون ارادتك ودون استعدادك لهذا التغيير و كان الشئ ده بيساعد في تكوين الشخص اللي انت عليه حاليا وراضي عنه .. وكان مالي جزء كبير من حياتك فبتلاقيه بيبقي أكثر ما يؤلمك لأنه بيفرغك من افضل ما تملك ... لأن افضل ما تملكه هو افضل ما تعطيه للناس .. وما تعطيه للناس بسعادة يعود عليك بابتسامة وبالتالي ان فقدت جزء مما يكونه ..معناه انك فقدت حلقة من حلقات الوصل مع الناس .. فحلقة من حلقات الوصل مع نفسك ... و الفراغ انواع عامة ما بين فراغ روحي او عاطفي او فراغ في الشخصية او الفكر ده غير الوقت اكيد .... والشئ اللي ممكن يتم انتزاعه منك ممكن يكون فكرة انت كنت قايم بيها واتهدمت او شخص انت واخده قدوة واتصدمت فيه .. او حاجات بسيطة جدا أنت مش متخيل انك ممكن لو فقدتها تخليك فعليا فارغ جزئيا من الداخل وفي حيرة .. ومحتاج تشبع هذا الفراغ ..ومحتاج اللي يزيل الحيرة ي .. فالفكرة انه لما بتفقد شئ كان مالي الفراغ ده وكان ربما بيكملك روحيا او عاطفيا بيترتب عليه نتايج بتؤدي لزعزعة شخصيتك وربما تأخد قرارات سيئة وقتية في فترة ريبة انت بتعيشها قد تؤدي الي انك تفقد جزء من روحك ... او جزء من هويتك اللي تكونت بفضل وجود اشخاص كونوا بداخلك اثر طيب و ليهم بعض التأثير في مبادئك .. لان الانسان في زمننا الي حد ما هش الثوابت بفعل عوامل كتير فيها تراكمات من الزمن والمواقف وبالتالي عماده بيكون اكثر في الناس والاهل و ما يعتقده .. وبالتالي ان تم تشويش هذا الاعتقاد ..تشوشت حياته واصبحت ضبابية .. وهنا نرجع للمجتمعات عامة اللي لما تتفرغ من ثوابتها المتمثلة في القيم والمبادئ يوم بعد يوم بيختل تكوينها ... وده بيحصل بفعل انتهاء حقب تاريخية وتسليم الراية ما بين حاكم لاخر او نظام للتاني .. الثوابت موجودة .. والمتغير في اللي بيعزز وجودها او بيفقدها .. والتغير بيحصل في وقت تحول المجتمعات ما بين انظمة حكم كل واحد فيها يملك ايدلوجية مختلفة او ما بين تحولها ما بين الانظمة الشيوعية والاشتراكية والرأس مالية .. كل نظام او فكرة بتكون دخيله علي اي مجتمع بتفرض عليها مستجدات .. ممكن تكون نافعة او ضارة ... بس تراكم الضرر والنفع مع الوقت ... بيخلي ميزان الضرر يكون اعلي بفعل طبيعة البشر الميالين دايما للسهل ... فبتنتزع معاها جزء من هويتها طبقا للتكوين اللي بيفرضه كل حاكم طبقا لكل حقبة زمنية ومدي تأثير عدله او ظلمه والظل بتاعه اللي بيخليه مستمر لقرون لو حتي بعد وفاته .. وبفضل الفراغ اللي بيحصل في تكوين المجتمعات احيانا بتخليها تستظل بأخر قشة قوية في تاريخها ولو كانت ظالمة . لأنها في حاضرها مستهلكة بالضعف حتي لو كان الظل ده كان سبب من اسباب ضعفها وده يعني من سخرية القدر وكأنه نوع من استهزاء الدنيا بيك .. ونوع من تذكير القدر بمدي عقلك القاصر اللي فعليا بقا ضال في فهم ما حوله .. فبتبدأ مع الوقت تأخد الطريق الأسهل دايما في التعامل مع الواقع .. الطريق الأسهل لحل المشاكل .. وبيكون العبث في الثوابت هو اقصر الطرق لعبور الحواجز اللي بتفرضه المتغيرات عند تقدير المصالح .. بس المجتمعات ما بتتفرغش من ثوابتها هي بتتفرغ من العوامل اللي بتساعد علي تقوية الثوابت دي فبتضعفها .... فبتؤدي الي ان الثوابت بتتعري من اللي بيفرضها ,, بتؤدي انك بتخلق مجتمع مشوه ... فاهم ثوابته بس مش قادر يتفهم ازاي يقوم بيها .. متخيل اللي اتجرد منه بس مش قادر يرجعه ... وهنا بيختل التعرف علي النمط بتاع حياتنا ... انك تتعرف علي نمط معناه انك ترجع كل حاجة للكاتوجوري بتاعها او التصنيف .. يعني لو شفت تفاحة تقول دي من الفواكه ماينفعش تقول من الخضروات .. بمعني ان عقلك بيعمل محاكاة تلقائية بشكل بديهي للوقائع .. يعني مثلا دلوقتي انا مش قادر اتعرف علي نمط حياتي .. وبالتالي مش قادر اتخيل ازاي احقق الهدف اللي اتخلقت عشانه وان كنت عارفه ... بمعني ان الاشياء اللي المفروض بتكون ما انت عليه بقت في طريق مش فاهمه ... الارادة اختلت .. الاولويات اختلفت .. فالهدف اتشوش .. فأني اتعرف علي نمط حياتي بينتمي لأيه اصبح شئ مستحيل .. وده اللي حاليا عامل ميزان مختل للمجتمعات حاليا .. فبتفقد نفسها تحت تأثير كل ظرف مختلف بيحصل ... وبيحصل فين وامتي .. ومش شرط دايما مثالية المواقف ومثالية الحياة اللي بتترائي ليك خارجيا في بعض المجتمعات تمثلك نمط للشكل بتاعهم ... لأنه فعليا انت مش شايف ايه اللي في دواخلهم بيدمر فيهم بشكل خفي .. انت فقط بيترائي ليك اللي بتفتقده في مجتمعك كانه كنز لازم تسعي وراه ... بس لما تدخل المنظومة بتاعته هتعرف أنه فعليا بيفتقد لبعض ما تمتلكه انت ايضا .... وده بيدل علي أننا في عالم متعدد الاستجابة لأوجه الفقد والخسارة .. | |||||||||
 |
|
09-08-22, 12:25 AM
| #98 | |||||||||
|
شفقة ولا مشاركة من الارشيف 2020 empathysympathy الكلمتين دول لو حطتهم علي جوجل ترانزليت هيدوك معني واحد في البداية وهو (العطف ).. بس فعليا اللي بتوحي بيه كل كلمة مختلف تماما . الكلمة الاولي : التمقص العاطفي الكلمة الثانية : الشفقة انت مثلا لما بتيجي تتعامل مع شخص بيعاني من التنمر بيكون المفتاح القادر علي تحسين المزاج الخاص بيه هي واحدة من الكلمتين دول .. والكلمة التانية قادرة تدمره وده علي حسب وعيك وفهمك ... لأنك ممكن ما تكونش عندك ادراك باللي بتصدره للي قدامك .. لأنك لما تشفق عليه بتدمر حياته ولما تعامله بنوع من التقمص العاطفي بتحييه من جديد .. الاتنين تعاطف .. والاتنين فيهم نوع من الاحسان ولكن الاحساس اللي بتصدره للشخص اللي قدامك بيختلف باللغة اللي بتخاطبه بيها ... يا هل انت بتصدر ليه احساس بالشفقة .. ولا احساس بالمشاركة ... احساس انه مستضعف ولا احساس أنك بتفهمه انه مثلا لو انت مكانه هتصرف كذا وكذا وبتحسسه انه قوي وقادر انه يتخطي الفترة دي من حياته .. علاقة التنمر دي موجودة علي مستوي اكبر في بعض البلدان اللي بتنتمي للعالم التالت بس الفكرة ان بعض الحكومات بتتنمر وفي نفس الوقت بتعطف _ اضرب ولاقي _.. فتلاقي الحكومات بتعامل الفئة المستضعفة من الناس بشفقة اكتر منها مشاركة واحساس بيهم وبمشاكلهم ... عاوزة الناس تطلع ليهم .. مش هي اللي تنزل للناس ... دايما بيفكروا الناس بفضلهم عليهم .. مش ان لو شئ كويس حصل فده حق ليهم .. الشفقة دي بتكسر الناس وبتخليهم طول الوقت راضيين بالأمر الواقع .. احساس انه بيترميلك لقمة واحنا بنتفضل عليك بيها هي النقطة اللي بتكسر الطموح عند الناس .. وبتعمل ليهم احباط بأنها تواصل للامام .. وان الوضع دايما يبقي علي ما هو عليه .. ... لأنك مهما كنت بتبني في حجر .. مش بتبني في ناس .. البشر اساساته واقعة . مفتاح المشاركة او حلقة الوصل والامان بين المواطن وبلده في العصرالحديث اللي المفروض ادارتها بشكل صحيح بيكسر الشفقة هي شبكات الامان الاجتماعي .. شبكات الامان الاجتماعي .. عبارة عن مثلا نظام معاشات قوي او بدل البطالة او زي حتي ما بنسميها عندنا في مصر تكافل وكرامة او البرامج الموجهة لصالح الفقراء وكدا .... واكيد بتكون نسبية بين كل بلد والتانية ... مش هقولك ان مطلوب مثلا تكون تنزانيا زي المانيا ... بس الفكرة انك تكون مبرمج اقتصادك من سنين تراكمية طويلة انه تكون الاولوية لخدمة المواطن ده شئ بيصنع التطور والحافز في الناس .. اقتصاد تراكمي فيه جيل بيكمل التاني .. ورئيس بيكمل رئيس ..مش مجرد انك طول الوقت كل ما حد جديد ييجي عمال يهد ويبني .. واللي بعده يهد ويبني .. وتخصص كل اقتصادك في انك تبني وتهد طول الوقت .. المشكلة انك عمال تبني وتهد في مدارس مثلا.. وناسي الناس اللي عمالة تتهد جيل ورا جيل في افكارها .. كأنك حافظ مش فاهم .. وعمرها ما اتغيرت ببناك لمباني بعكس المفروض توجهك يكون بناء لحياتهم وافكارهم وهما بعد كدا هيقدرو يبنوا مرة واحد من غير هدد ... عامة فيه احصائية في الخارج بتقول ان حوالي 36 % من البشر بتتغير حياتهم للافضل وبيخرجوا من خانة الفقر بسبب شبكات الامان دي ..... لانها بتخلق الحافز للاستمرار .. لأن جزء كبير منهم بيكون جزء من اساس وتطوير البلد .. هنا الامان مش بيكون بداعي الشفقة بتكون بداعي البناء وانك ماتخسرش في انسان قادر بعقله انه يقومك بعد كدا ويساعدك بدماغه ... ومش مجرد بتديله فلوس .. في برامج للتغذية وبرامج تعليمية وحاجات كتير بتأسس لبناء مواطن .. اكيد البرامج دي مش هتمنع الفقر او هتمنع مظاهر التشرد في اي بلد .. بس بتخفف بنسبة كبيرة من انخفاض العقول القادرة علي التطوير . بتدي نفس لحياة ممكن تضيفلك بعد كدا وتقدر تنقل تجارب وضعها بانها تحسن فيها لما توصل بعد كدا .. و قوة شبكات الامان في اي بلد يعتبر المقياس للمزاج العام ان كان للافضل او للأسوأ .. المزاج العام للفئة المتضررة الأكبر او الفئة الغالبة في البلاد من اللي عايشين في الفقر و ما قبل الطبقة المتوسطة ... لأنها هي اداة الوصل بين وطن وابنائه ... يا هل البلد عندها احساس بأبنائها او لا .. بتعطيهم الاولوية في قراراتها او لاء ...يا هل فعليا الناس عندها قدر من الامان كافي لما تتعثر في حياتها بأنها هتجد شئ ولو بسيط هتستند عليه ولا لاء .. يا هل المشاركة دي هتكون لمستحقيها او لاء .. ويا هل الشبكات دي قادرة علي احداث طفرة في حياة بعض الناس بأنها تخرجهم مثلا من حلقات الفقر لمستوي افضل او لاء .... يا هل هتقدر تكفي الناس من اسألتها ولا لاء .. الفكرة مش انك تديهم قرشين يعيشوهم يومين فكدا انت قمت بدورك .. كدا انت يا دوب بتتصور انك بتتطهر من ضميرك ... طول ما الناس بتتسائل .. طول ما اعرف ان المزاج العام متوتر ومتردد ... بس هتلاقيه دايما مساند لبلده ... لأن الدول بتبرمج عقول مواطنيها علي حسب ما الامر الواقع بيتفرض كإرث متواصل لسنين طويلة طالما مافيش حلقة كسرت الروتين الفكري المتواجد ... مافيش اختلاف في لغة كلامك مع الناس .. وبالتالي مافيش شحنة جديدة بتدفعها في الناس انها تواصل وتستمر ... بس حافزهم بيكون وطني فقط .. ودي الحاجة الوحيدة اللي بيربيها اي نظام في بلد .. ما تقولش ايه اديتنا بلدنا .. قول هتدي ليها ايه .. بس فكرة انك تغرز العطاء من غير مقابل ..علي قدر ما فيه زهد من الناس .. علي قدر ما فيه نرجسية منك .. لان المواطن هيقوم بدوره في الدفاع عن بلده .. بس انت مش هتقوم بدورك انك تحييه في بلده.. فلما ينتهي الدافع الوطني .. بيظهر الدافع الشخصي .. كلها احاسيس مؤقتة .. مافيش دافع مستمر .. وحتي الدافع الوطني ممكن يقل من جيل لتاني .. نتيجة احساس بالنقمة بيزيد .. لأن احساس انك تكون راضي بقضاء الله شئ .. وانك تكون راضي بالامر الواقع ده شئ تاني ... ده بيأخرك كدولة سنين ضوئية للخلف ... لانه احساس مخفي من الناس طول ما الحياة ماشية وانت طول الوقت بتجري من غير امل .. احساس اختلافه بيقوم دول وبيهدم دول ...لانه احساس من غير طموح .. ولو الطموح اتوجد هيكون في الغالب شخصي .. مش لصالح البلد ... ولو الصعود اتوجد لشخص هيكون غالبا لاتجاه شمال انت بعد كدا بتيجي بتنبذه وبتخلق قصص بتتحكي بعد كدا ان ازاي الظروف الصعبة خلقت وحوش .. ان ازاي الفكرة اللي خلقتها بداخل الناس مع السنين عملت جواهم في الغالب تشوهات نفسية وشروخ طول ما حلقات الايمان بتقل نتيجة الانهيار الاخلاقي للمجتمع اللي هو دايرة مفرغة من الظروف اللي خلقتها بتعاملك مع الفئة المستضعفة من الناس ... يعني بتلاقي الناس عايشة في دواير .. فصمود الفرد تجاه المحن والاختبارات بيبقي اصعب .. لأنك مش مخلي حياته اسهل او اولوية ليك .. اخيرا مافيش مبرر لدولة انها تربي احساس الضغف وقلة الحيلة في ابنائها.. الا ارث طويل من سوء الفكر وقلة الحيلة مش اكتر اللي اتبنت بسنين اطول .. وصنعت برواز لطيف لدكتاتورية القرار واالآنا وازدواجية المعايير والاهم من ده كله تكبر في عدم الاعتراف بالخطأ والمواصلة فيه للنهاية في بلاد العالم التالت .. لأنه كله بيتهيأ ليه انه مافيش حساب قريب .. | |||||||||
| رايــق likes this. |
|
09-08-22, 12:28 AM
| #99 | |||||||||
|
اي كلام من الارشيف 2021 كل يوم بنكبر وكل يوم الاحداث حوالينا بتكترالهواجس في دماغنا بتزيد .. افكارنا متشعلقة بتناقضات المجتمع حوالينا اللي بيفرض علينا كل يوم اننا لازم نكون جزء من التناقض ده ونتقبله لا وكمان نمارسه بكل ما فيه .. الحياة بتجلدنا وده انعكس علينا و بقينا علي ذاتنا في زي جلادين .. ومع ذلك بقا مطلوب منك في الباطن انك لازم تعادي كل افكار اتربينا عليها من صغرنا وكل قضية كنا مؤمنين بيها عشان فعليا انت مطلوب منك تفهم ان احنا مالناش يد اننا نغير من واقعها تم استهلاكنا واستنزافنا في اكتر من بصورة وبأكتر من طريقة ومن اكتر من طرف .. بس في العلن وبالشعارات تظهر ولائك ليها وحبك فيها ... مطلوب منك تكون اتنين طول الوقت .. هتتفزلك وتقولي مين ده اللي بيطلب منك ... هرد عليك واقولك ومين اصلا قالك انك مهم تشوف اللي بيطلب دي مجرد برمجة ذاتية جوانا لاخطاء كتير عشناها من غير مانعرف ازاي نتداركها ونصلحها ومواقف كتيرة ماخدنهاش في وقت كان محتاج مننا اننا ناخد موقف .... فبقت في ال dna بتاعنا مع الوقت .. لانها اخطاء مجتمع بالكامل مش شخص واحد مجتمع كان محتاج ياخد خطوة لقدام ويتغير .. بس اكتفي انه يتغير عليه اللي منه بس .. المهم ان كل يوم الحياة بتمص من طاقتنا وافكارنا واحلامنا كتير كل يوم بنسيب ورانا حاجات مهمة مش بيعوضها غالبا فرص في المستقبل كل يوم غالبا بينضاف لعمرنا رصيد سلبي من الحياة تحس ان النضج او بداية استيعابك للدنيا لعنة لناس كتير مش نضج اوي يعني هو نضج بصورة قاصرة يا هل النضج انك تكون مستوعب ولا النضج انك تكون قادر انك تغير باستيعابك حياتك مش عارف .. بس انا شايف ان مابقاش في حد ناضج في الحياة دي كل الناس مراهقة في زي مسنين .. هو مش تشاؤم علي قدر ما انه واقع بيقابل ناس المهم اننا كل يوم بنتغير .. مفهوم التغيير بين الايجاب والسلب نسبي من شخص للتاني ومتغير في كل فترة بنعيشها في حياتنا كتير من الناس ماعشتش لحد اللحظة افضل لحظات حياتها ماوصلتش للبرايم بتاعها وممكن تنتظر وقت طويل جدا لحد ما تبدأ تعيش لحد ما تستوعب هي عاوزة ايه من حياتها اساسا كتير من الشباب بيقعد يسأل نفسه ايه السبب في أنه مش راضي دايما ليه حظه مش حلو و ليه دايما الاكتئاب اسهل طريق لقلبه ولافكاره .. وعلي فكرة الأسوأ من كدا انك تكون فاهم انت فين وقادر تشخص بس ماعندكش أي رد فعل تحس انك متكتف في مكانك ومش قادر تنهي حلقة لسنين طويلة من تراكمات في حياتك وصلتك لنقطة انت مش فاهمها او مش قادر تخرج براها وانت عارف انها الحضيض بتاعك ... تيجي تبص مثلا حواليك هتلاقي كتير من الشباب حاليا بتعيش احلامها في احلام غيرها يعني لما تلاقيك بتتبع مسيرة نادي ولا لاعب كورة وعاوز تحس بانتصارك في انتصارهم .. وبتشعر بالرضا لده .. دي بقت لذتك من الحياة ده بقا اكتفائك لحد ما توصل لسن تحسن فيه انك عشت في احلام غيرك اكتر ما عشت لنفسك احنا بنكلم في مجتمعات تعدادها بالملايين .. اكيد انا مش بوصف حالة في ناس انا بوصف ناس في حالة ... وبالتالي هما الاغلبية وفيه اكيد اللي اختلفت حظوظهم في الدنيا عشان يكونوا هما المرجعية .. زي طبيعة الدنيا عامة .. لازم يكون فيه فيد باك ليك عشان تبني عليه فكرة عن المجتمع وهما فين وانت فين منهم ...؟ حتي هما علي فكرة بيعانوا من انهم مصدر اهتمامك بيهم بس بيتصدقوا بوقتهم عليك .. وبكلامهم اللي بيبسط جزء فيك وكأنه بيكافئك انك كنت متابع ليه او مشجعه .. وانت بتاخد المكافأة دي عشان تحس براحة جواك .. وممكن من وقت للتاني تلاقي نفسك بتتفرج علي شباب في اليوتيوب بتلف حوالين العالم وشايف المثالية في حياتهم مثلا ... غالبا ده واقع مضلل بيخليك عندك دايما قلة رضا عن حياتك بسبب تجربة انت ماستكشفتهاش وانت اصلا مش عارف هي هتلائمك ولا لاء .. بيتصدرلك التجربة بالمونتاج ..و ان الحياة سهلة والفلوس بتحسها سهلة برضه في حياة ناس كتير ... وبتسأل نفسك دايما ايه الحال لو انت هناك مكانهم او اخدت فرصتهم .. دايما بيتصدرلك المثالية في الاحداث حواليك .. وغالبا كتير من الناس مابقتش قادر تفلتر .. العيوب والمزايا لكل حاجة .. مافيش شئ نازل من الجنة .. شايفة الحياة دايما بالمونتاج .. بيقص كل العيوب ومكفي عنيه فقط بجمال المزايا .. وبقي اعمي عن الواقع بشكل تام السوشيال ميديا ولا التليفزيون ولا اليوتيوب ولا الافلام بتصدر ليك دايما صورة حلوة .. جرافيك جميل لحياة انت بتشوف نفسك فيها بس في الغالب هتلاقيها بعيد عنك .. فبتكون زي انسان واخد بنج طبيعي .. مش عارف مكانك فين في الدنيا اعتقد ان فيه امراض جديدة في العصر اللي احنا فيه بقت اخطر من الطاعون والكوليرا والحاجات اللي كانت من قرن فات وكان بيموت فيها ملايين من البشر .. لأن الامراض الموجودة حاليا بتحكمها الشهوة بشكل اساسي اللي هو يعتبر من الخطايا السبعة المميتة غريزة في البشر فيها نهم و محتاجة دايما اشباع شهوة الشهرة .. شهوة الفلوس .. شهواتك الشخصية وازاي بقت سهل جدا انك تلاقيها او تحيد عن طريقك عشان تكون مغروس فيها وانت سعيد .. سعادتك الوقتية بقت غالبا اهم ليك من سعادتك الكاملة طالما النهاردة بيعدي ومستني يخلص وفي نفسه الوقت عاوزه يطول.. عشان في لحظات في يوم جديد انت مستنيها ولحظات تانية عاوز تعملها تجاوز وتمحيها من يومك .. احيانا انك تقنع نفسك ببداية جديدة بعد موت ملايين من البشر اسهل كتيرمن أنك تحاول تقنع ناس انها مش عايشة اساسا ولازم تدخل حرب مع نفسها عشان تموت امراض كتيرة اتكونت فيها وبقت جزء اساسي منها عشان تبدأ تعيش من جديد ... | |||||||||
| |
|
09-08-22, 12:35 AM
| #100 | |||||||||
|
تراكمات من الارشيف 2020 دايما فقه التراكمات بستد إليه لما الأمر بيخص دراسة واقع مجتمعنابالأدق .. تحليل عدم قدرتنا للتعامل مع واقع معظم مشاكلنا .. او تشوشنا تجاهها بشكل عام .. وعندي ايمان بطبيعة الحال ان دراسة التراكمات هو مفتاح علاج امتنا .. الفكرة ببساطة أنك لازم ترصد الحاضر و تستقرأ الماضي وتقوم بتحليلهم فتحدد بيه نوع الرسالة او العلاج المراد بيه اصلاح الواقع الحالي وعلي اي اولوية يجب ان يرتكز هذا الاصلاح لصناعة مستقبل افضل ... في مقال قريته جزء منه بيتحدث عن فقه التراكمات والاسلام كان بيتحدث عن اهمية دراسة التراكمات في التحكم بالواقع والمستقبل والمصير وربطها بدعوة الرسل في عصور مختلفة وعلي اي اساس استندت رسالتهم بدراسة التراكمات اللي اوصلت امتهم لما هم عليه وكيف تم تحديد العلاج علي هذا الاساس لاحلال المفاهيم السليمة بديلا لرجعية افكارهم هقتبس جزء منه تراكمات الجريمة الاقتصادية في قوم شعيب عليه السلام جعلت العلاج النبوي لها في ترسيخ قيم التعاملات الشرعية السليمة من الخبث و الغش، و تراكمات الجريمة الأخلاقية في قوم لوط جعلت دعوة لوط عليه السلام أخلاقية بالدرجة الأولى، و تراكمات عقدة العلو و الاستعلاء في ثمود جعلت دعوة صالح عليه السلام تركز على ضعف المخلوق أمام جبروت الجبار، و تنبه على خطر الاغترار بالقوة، و تدعو لنبذ الكبر الذي جعلهم يتباهون بتحدي الخالق، و إرجاع الإنسان إلى حقيقته، و هي أنه عبد ضعيف أمام قوة الخالق العظيم. كما يتحدث القرآن عن سبب الجمود الفكري، و موت المنطق، و يربطه بالتقليد الأعمى الذي تراكم في العقل الجمعي السلبي للكفار {إنَّا وَجَدْنَا آبَاءَنَا عَلَى أُمَّةٍ وَ إنَّا عَلَى آثَارِهِم مُّقْتَدُونَ 23} [الزخرف: 23]، و لا يتوقف القرآن هنا في توصيف التراكمات تلك، بل يحدد العلاج انطلاقًا منها، فيستعمل الحجاج العقلي و الحوار المنطقي لتفكيكها و هدمها، تمهيدًا لإحلال مفاهيم الحق مكانها، {قُلْ إن كَانَ لِلرَّحْمَنِ وَلَدٌ فَأَنَا أَوَّلُ الْعَابِدِينَ}[الزخرف: 81] دعوة للتحرر من التقليد و من ربقة عقيدة الآباء، نحو رحابة الفكر و التأمل و السؤال. مش حابب ادخل في تفاصيل تزيد من طول الموضوع .. ونرجع نقول انه عامة فقه التراكمات مالوش وزن في عالمنا مع انه هو مبدأ التعامل مع الحياة .. وبالتالي بنفتقد جزء كبير من العقلانية في التعامل مع ازماتنا لأننا بنتخلي دايما عنه لما الأمر يتعلق بالتخطيط للمستقبل مع أنه ركن رئيسي في عمل اي خطة.. اولا علينا ادراك اننا في حالة من الجمود الفكري الذي لا يستطيع استيعاب القيم الحقيقية التي تقوم بيها الامم ولا قيمة ادراك ان لكل امة علاج يخصها وحدها ... ولا قيمة ادراك أن تقليدها لامم اخري يؤخر من عملية اصلاحها لأن هوية واحدة هي فقط التي تخصها وهي القادرة علي ان تلم شتاتها .. فعليا احنا كأمة بمن يمثلها نعيش في حلقات مفرغة.. فلا نتيجة ولا وصول نتحرش بالحاضر دون النظر في تراكمات تكوينه ( الزمن والمكان والعنصر الأهم .. وهم البشر ) .. وتراكمات تكوينهم داخل هذا الحاضر وسماتهم وواقعهم... وبالتالي نخطأ في تكوين الحقائق التي لا تجعلنا نتعامل مع مشاكلنا بشكل يوازي الحدث.. وبالتالي بتكون خططنا بقرارتنا بخطاباتنا عالعالم منظمة عندما تراها العين وتسمعها الاذان لأنها تناقش من هم في نفس الحاضر ... من يناسبهم حكمك ويتناسب مع استيعابهم العاطفي لكلمة ( حقيقة تفصيل ) علي ايد ترزي يعي كيف يتم تسكين عقليات من هم في عالمه .. ولكن في الحقيقة بعد فترة من الوقت تصبح مشوشة عندما يحاصرها التاريخ وعندما نتيقن اننا مازلنا في نفس المكان .. ربما تستطيع من وقت لاخر ان تلقيها عالعالم بثقة لأنها مزخرفة بشعارات عالمية ولكن فعاليتها صفر في واقع مجتمعك ... لانها مجرد شعارات سطحية لا تناسبه وتتمني كل يوم أن تكون علي حق في حين أنك متيقن أنك في طريق معاكس .. وعندما تتشدق بالعلم .. .. تتخلي عن الهدف الرئيسي الذي تم وجود العلم بسببه وهو الحفاظ علي الإنسان وبالتالي لا تستطيع ان تتعامل مع طبيعة الحقائق التي يقدمها لك ... وهي انه كلما تكشف شئ جديد .. تكشفت معه مجاهل جديدة .. كانت تستدعي حقائق أصيلة ..لتشييد مبادئ حكيمة .. تسمو بالبشر لا أن تهلكهم بما هو بخس ورخيص . لانك جعلت من الإنسان في عالمك ارخص السلع .. وتلك اول حقيقة يجب ان تدرس تراكمات الوصول لها ... | |||||||||
| |
|
09-08-22, 12:49 AM
| #101 | |||||||||
| انا الصراحة بنتهز الفرصة من وقت للتاني عشان انقل كتاباتي القديمة في المدونة هنا وساعات بنقل الجزء المهم منها علي حسابي في الفيس بوك برايفت ... وحاجات عندي علي الجهاز .. بحاول اوزعهم قدر الامكان لأني عندي ذكري سيئة مع المنتديات انا لم اسجل واشارك الا في ثلاث منتديات اخرهم هنا ... المنتدي الاول صراحة كنت املك فيه الكثير من الذكريات الجميلة ..وكان فيه اول حاجات كتبتها وكانت كتير الصراحة .. وكانت مهمة بالنسبة ليا وكانت برضه تملك ذكري مع الاعضاء هناك لأن كان فيه بينا ود كبير .. بس الرجل صاحب المنتدي قام باعه فجأة بدون اي انذار ... وفجأة بدخل علي الموقع .. بعد فترة غياب طويلة .. لاقيت الموقع غير الموقع .. وكل حاجة بح ... الصراحة كان احساس رخم فاتمني ماحدش ينزعج من النقل ده لأني عارف ان الصفحات هتكون طويلة حبتين والكتير مش بيحب الرغي بس لو حد بيحب يتابع ويقرأ وهاوي انا اعتقد هيستمتع باللي هيقرأه وبقولها بثقة ههههه لأن اي حاجة كتبتها قبل سنة 2022 انا واثق فيها | |||||||||
| |
|
09-08-22, 10:01 PM
| #102 | |||||||||
| الروتين  | |||||||||
| |
| إضافة رد |
| مواقع النشر (المفضلة) |
| |
 | أصدقاء منتدى مسك الغلا | | |||||
