قول ان لحالك بالبيت
بدون ما تقول ان لحالك بالبيت :Silbando:.









يم يم غداي جدًا لذيذ،
سمك السلمون مع نص افكادو،
وصويا صوص للتغميس.

ودي اقول شي يا جماعة :)
جدًا يضحكوني الناس اللي يحسبون اني
اسوي شي عشانهم :105: ما يعرفون!
ما يعرفوني اذا ما ابغى شي ما اسويه
واذا سويت شي يعني انا ابغاه!
اقول تراني مو مسوية هالشي عشانك،
غير كذا مدري كيف هم يحسبوا انهم
مهمين عندي لهذه الدرجة؟؟؟.
حقيقي الناس يحطوا نفسهم في مواقف بايخة!
أنا انسانة عندي حدود حتى مع اقرب شخص لي
وما اسمح بتعديها أنا كذا مرتاحة،
لازم تكون فيه مساحة لنفسي،
عشان اقدر ارفض في حال انضغطت في العلاقة!

من خبرتي البسيطة في تكوين علاقات صحية
من البداية كذا اكون واعية لها،
و‏اكتشفت أن الاغلب يدرعم وما يدرس العلاقة
مضبوط ويتعب نفسه والطرف الثاني معاه،
على شو كل هذا حبيبي؟.

اليوم صار شيء اسعدني،
راسلني اخوي الكبير وجلس يسولف معاي :eiwp:
وبعد ارسل تسجيلات صوتية،
هو نادرًا ما يرسل تسجيل صوتي!
فقلت له حمدان صوتك مُريح!
قال تبغين اغني لج؟
قلت له ايوه، وغنى لي أُغنية عبدالحليم حافظ :67:.

صار لي تقريبًا 6 أو 5 سنوات مو شايفته..
هو أغلى إنسان على قلبي وجدًا احبه والله!
الحلو ان أنا وياه مشتركين بنفس يوم وشهر الميلاد
انا وياه انولدنا بشهر نوفمبر ومثل الشي :eiwp:
فتقريبًا اطباعنا متشابهة وحتى آرائنا :in_love:.
أبوي يقول حتى اطباعج نفس اطباعه لما كان طفل.

أتذكر مرة سألته إذا يعرف شكثر فرق العمر بيني وبينه؟
وهو قال: "شلون ما تعرفين؟ انا اكبر عنج ب 9 سنوات."
وانا كنت بوقتها مصدومة لأن يعرف وحسيته مهتم فيني :نبض:.
رغم الفرق بيننا كبير!
بس احسه الأقرب وأكثر واحد يفهمني
والحنون بعائلتي من بعد أبوي..

لما كنا صغار هو كان يشتغل،
فيعني نادرًا ما يكون بالبيت،
ولما يكون بالبيت كنت أحاول ألفت إنتباهة
عشان أقدر اسولف وياه،
فكان اول ما يرجع اركض له واقعد ادور حوله :)
واسولف سوالف ما صارت،
واحداث مستحيل تصير بالعالم اصلاً :).
بس عشان اجذب انتباهة واتكلم معاه،
الحين لما اتذكر احس بفشلة وبنفس الوقت سعيدة،
لأنه استمر يسمع كلامي رغم هو يعرف إنه
ما حصل ويتفاعل معاي بعد :فطسه:.

غير لما نطلع نتمشى مع بعض،
كان ينزل ويعدل ربطة الجوتي لما بنفك،
وحتى مرات يلبّسني الهودي حقه لما ابرد :Dl3:.

المهم نهاية تسجيلاته الصوتية عطاني نصيحة حلوة،
قال لي: "أعيشك مثل ما تحبين الآخرين حبي نفسج بعد،
ويقول المثل اللي يطبخ يظل جوعان،
ما يصير تحبين الكل وتكرهين نفسج صح؟."
تأثرت بكلامه!
وحسيته كأنه يقرأ اللي ببالي ويعرفه،
وكان يواسيني بطريقة غير مباشرة :نبض:.

أواسي نفسي بأنكِ رحلت للمكان
الذي يلائم وداعتك،
لكن فقدك عزيز مثلما كنتِ
عزيزة ومازلتِ عزيزة،
اللَّهم ارحم أمي وفقيدتي
بقدر ما تمنيت لها البقاء وأكثر،
وأروي قبرها بنهرٍ من جنتك،
وأذقها من النعيم ما وعدت به المؤمنين.

صباح الخير للجميع،
يوم جديد أعلنُ فيه امتناني
لذاتي عن كُل ماسبق.
‏لصبري، وجميع محاولاتي.
‏أعلن امتناني لذاتي التي لا
تعرفُ عنها شيء غير ذاتي.
‏ولخالقي الذي لم يتركني يوم،
أعلن امتناني للمواقف والأشخاص
‏لإنهياراتي التي جعلت مني هذه الصلابة،
أعلن امتناني للدروس ولكل كلمة
لم تمرّ على مسامعي بِسلام.

فطور اليوم تحت شعار:
" كُل اي شي وانت ماشي."

مرّت أول ست ايام من 2024
راحت بالخالي بلاش..
عندي خطة لأول عشرة ايام بالسنة
بس للأسف يبدو اني ضيعتها،
حاليًا كل وقتي على Genshin Impact
وإذا ما كنت ألعبها فأكيد منسدحة
على اليوتيوب ومقاطع البودكاست،
متخيلين كمية الهوس يا أخوان؟

حتى سحبت على حياتي الواقعية هالأسبوع،
لأن صرت أشوف ألعب أهم من واقعي،
واليوم ما رحت للجمعة العائلية بعد،
لأني كنت سهرانة ألعب ونمت طول النهار :).
هو بصراحة أنا مو مقهورة لأن أدمنت اللعب،
أنا مقهورة لأن جدولي مش منظم..
ف ايوه لازم اسويلي جدول ليومي
لأن انا ما أبغى ألخبط حياتي،
وأكمل يومي مع نفسي وأهلي وكثير اشياء..
فخطة هذا الأسبوع مستمرة للأحد القادم:
1- أكمل مهام الأسبوع بـGenshin Impact :)
2- بدون أي سبب أقطع شرب القهوة
3- أقرأ 50 صفحة من كتابي وإذا قريت اكثر احسن
4- أحاول ارسم رسمة بسيطة
5- أكتب شعر غزلي عن نفسي
6- أروح لموعد الاسنان
7- أنظف فُرش المكياج
8- أهم شيء أعدل أكلي وأرجع للنادي
9- أحضن أبوي يوميًا
10- أتغزل بنفسي اكثر
11- أكتب تدوينة فيها أجر.

وبس والله :).

كان من دعاء النبي :

اللهم إني أعوذ بك من جهد البلاء،
ودركِ الشّقاء، وسُوء القضاء، وشماتة الأعداء،
اللهم إِني أَعوذ بِك مِن زوال نِعمتك،
وتحوّل عافيتك، وفجاءة نِقمتك، وجميع سخطك،
اللهم أحسن عاقبتنا في الأمور كُلها،
وأَجرنا مِن خِزي الدُّنيا وعذاب الآخرة.