انا حقيقي عندي تقدير وإعجاب شديد بالناس اللي بتبقى قادر تؤمن بشئ رغم كل الظروف وكل التحديات وكل الوقعات.. وكل الوجع اللي بييجي مع كل وقعه.
رغم الوجع.. بيقوموا ويكملوا ويدوروا تاني..
وبيفضلوا ماسكين في الفكره.. حتى لو التجارب مره ورا التانيه كدبت فكرتهم..
على الرغم من ان ده ممكن يبان لغيرهم غباء...
يعني انته رغم كل تجاربك ووجعك ده.. لسه مؤمن بإنك تلاقي الحب والأمان في علاقه تكمل فيها باقي عمرك؟
يعني انت رغم كل مره معرفتش تحقق فيها حلمك في شغل.. لسه مؤمن انك هتحققه؟
فهما مش بس بيواجهوا احباطاتهم الشخصية.. لا كمان بيواجهوا كل واحد تطوع وسألهم الأسئلة دي..
وبيفضل عمق الإيمان بالفكره.. هو اللي بيقومهم يحاولوا تاني رغم الوجع.
تخاريف فيلسوف

واحده من اكتر الأمثال اللي اقتنعت بيها لما كبرت..
الغريق بيتعلق بقشايه..
المثل ده و شوية حاجات كمان علمني أعذر الغريق اللي اتعلق بقشايه ده...
مع أنه في اي لحظه تانيه في حياته كان هيبقى عارف ان القشايه ديه مش هتزيده غير غرق على غرق..
بس ساعتها.. مشافش غير القشايه.. و أصلا مشافهاش قشايه..
لحظات او ساعات او ايام او حتى سنين الغرق ملهاش حل تاني غير اننا نتعلم العوم.. نبطل نغرق.. نقاوم و نطلع من الغرقه دي..
الكلام شكله سهل.. لكن تنفيذه بيبقى صعب اوي..
مجرد انك تدرك انك غريق بياخد وقت...
و انك تفكر هتعمل ايه.. آدي كمان وقت..
و انك تبتدي تعمله.. كمان وقت..
لما تبتدي تطلع.. انسى القشايات اللي اتعلقت بيها..
بطل تسلخ نفسك على انك اتعلقت بيها..
و افتكر.. انه يكفيك فخرا انك طلعت..
تاملات فيلسوفيه

العلاقات العلاجيه بين المريض والطبيب النفسي او الاخصائي النفسي ليها قواعد واضحه تنظمها
وممكن تقروا عنها من مصادر كتير
وبناء على اللي بنشوفه وبيضر المرضى وسمعة العلاج النفسي على حد سواء وجب التنويه
مفيش طبيب نفسي من حقه يمد ايده على مريضة بأكثر من السلام باليد.. وفيه ناس مش بتفضله كمان..
اي حاجه تتعدى الحدود المنطقية لعلاقة معالج او طبيب نفسي بمريضة.. يبقى انتي بتتعرضي للاستغلال.. واللي بيتنافى مع ابسط أخلاقيات المهنة..
مفيش دكتور نفسي ولا معالج نفسي من حقه يحضنك ولا يطبطب عليكي ولا حتى يقولك بحبك..
ومفيش علاج اسمه ابعتيلي صور علشان اعزز ثقتك بنفسك..
ولا وريني شعرك كده ولا وريني ضهرك كده
ديه علاقة علاجية مهنية.. انتي بتدفعي فلوس في مقابل خدمة.. اي حاجه تتجاوز الخدمة دي.. هقولك تاني يبقى انتي بيتم استغلالك..
على فكرة كمان مره..
مش من حقه يقولك بحبك طول ما انتي المريضة بتاعته..
وعلى فكرة كمان.. من حقك قانونا تبلغي عنه في النيابة طالما معاكي رسايل من رقمه ليها اي محتوى خارج..
النيابة العامة.. مش حتى نقابة الأطباء..
ومره كمان.. طالما انتي عميلة في عيادة بتتلقي خدمة.. محدش ينفع يقولك بحبك..
انتي مش جايه تتحبي.. انتي جايه تتعالجي..
اي معالج مريض لا يمت للأخلاق بصلة.. سواء كان دكتور او أخصائي نفسي او بتاع تنمية بشرية.. عارف اللي بقوله ده كويس..
وهو بيقولك بحبك بيبقى عارف ان ده تجاوز لحدود واخلاقيات مهنته.. وهو بيمد ايده يلمسك.. يبقى عارف انه بيتجاوز حدود واخلاقيات مهنته.. وهو بيقولك اتصوري ووريني عارف انه بينتهك أخلاقيات مهنته.
لو هو معندوش اخلاق تمنعه من تجاوز أخلاقيات مهنته اللي بتدفعيله عليها فلوس.. صدقيني مفيش اي حاجه تمنعه يستغلك..
للتحذير بواقع وظيفتى المهنيه التى تحتم عليه ذلك
وبكده الدسك اذن كوكو وسكت شهريار والفيلسوف عن الكلام وتصبحوا ع خير عايز انام