01-21-21, 10:32 AM
| #121 | |||||||||
 
|  انا عندي تقريبا بتاع ١٠٠ علامة استفهام و ١٠٠ علامة تعجب على الدعوات الغريبة اللي انتشرت في اوساط عديدة بتاعة انك لازم تسامح اللي اذوك وبتاع.. لازم ليه يا جماعه يا مؤاخذة؟؟ ماشي انا متفهم أهمية تجاوز الازمات ايا كان اللي سببها لكن اسامح اللي سببها ليه يعني؟ هو اللي جي شايل أذى طويل عريض من حد ناقص كمان اشيله هم انك لازم تسامحه؟ وتاني لازم ليه يعني؟ مش كل الناس تستحق السماح على فكره.. وفيه ناس مؤذية بالفعل وتحميل الضحية مسؤولية السماح ده بالنسبالي شئ غير موضوعي وانا ممكن أتفهم الفرق بين الأذى المقصود والأذى غير المقصود.. وافهم اني ممكن اساعد الناس اللي تعرضوا لأذى غير مقصود انهم يتفهموا ويتجاوزوا.. ومش في كل الحالات كمان.. لأنه في اوقات كتير الجهل لا يعفي من المسؤولية. لكن في حالات الأذى المقصود مفتكرش ان السماح شئ مطروح اصلا.. تجاوز الأذى مسؤوليتك بعد ما تتعرضله.. علشان تعرف تكمل حياتك.. لكن السماح مش إلزام.. أقصى حاجه ممكن توصلها في اوقات كتير امك تنساه.. او حتى تتجاهله وتكمل حياتك.. لكن مفتكرش على الاطلاق ان السماح شئ ملزم لأي حد تعرض لأذى حقيقي في حياته. | |||||||||
 |
|
01-21-21, 10:35 AM
| #122 | |||||||||
| الإنتقال من مرحلة انا بحبك لمرحلة انا بكرهك.. يعتبر نوع من انواع التعافي.. هو صحيح مش ده الهدف.. الهدف انك توصل لمرحلة the nothing zone انت لا تمثل بالنسبالي اي شئ سواء سلبا او ايجابا.. وجودك ببساطة مش هيحرك اي نوع من المشاعر.. زيك زي الغرب يعني.. قليلين اوي اللي عندهم رفاهية الانتقال من مرحلة انا بحبك.. لمرحلة انت زيك زي الغريب.. او زي اي حد عرفته في يوم من الأيام.. هما قليلين لدرجة انهم بيبانوا ناس مش طبيعية.. وغالبا بيتم التشكيك في كونهم كانوا بيحبوا أصلا.. واكيد فيهم ناس كده فعلا.. بس فيهم شوية ناس عندهم من النضج والوعي ما يسمحلهم انهم يتجاوزوا مرحلة انا بكرهك دي.. هما أدركوا انها غير واقعية.. غير ضرورية.. وحتى مؤذية.. وبالتالي تجاوزوها.. قلب المشاعر لضدها لا ينفي وجودها.. بيشغل نفس الحيز ويمكن اكتر.. تلاشي المشاعر هو التعافي الحقيقي من حكاية حب مكملتش.. أو حتى من قصة عداوة ملهاش لازمه.. | |||||||||
| |
|
01-21-21, 10:36 AM
| #123 | |||||||||
| هو البعيد عن العين قريب من القلب؟؟ ولا البعد يعلم الجفا؟؟ لما نبص حوالينا ونفكر فيها شوية تحس انهم مرحلتين ورا بعض.. الاول بيبقى البعيد عن العين قريب من القلب.. ومشاعر الاشتياق والفقد بتسود الموقف.. فبتحس زي ما يكون الحب بيزيد والمشاعر بتقوى وتترسخ.. بس المرحلة ديه ليها حد اقصى من البعد.. مختلف من حد للتاني.. بعدها بيبتدي البعد يعلم الجفا... لأنه ببساطة فيه جزء كده دايما في مشاعر الحب بتقولك انك متقدرش تعيش من غير اللي بتحبه.. وجوده الايجابي حواليك بيأكد الفكرة دي ويخليها أكثر رسوخا.. وبدايات البعد برضه بتثبت الفكرة.. لأن غيابه بيخليك تفتقد وجوده الايجابي.. مع الوقت.. وشوية وقت... وكمان شوية وقت... بتدرك انك عايش من غيره عادي اهه... ده انت يمكن تبتدي تقتنع انك احسن من غيره.. سواء كانت دي حقيقة.. او مجرد فكرة بتسكن بيها ألم الفراق.. والمشكلة هنا ان المشاعر عمرها اقصر من الافكار.. المشاعر علشان تعيش بتحتاج افكار وسلوكيات تدعمها.. وغياب الدعم ده هو اللي بيخلي مشاعرنا تتغير.. لان المشاعر ميالة للتغيير.. علشان كده الحفاظ عليها مش سهل.. البعد بيعلم الجفا علشان عقلك محتاج يعمل مجهود (حيل دفاعية) يقتعك بيها ان كده احسن.. علشان يتخلص من ألم الفراق.. وجودك الايجابي في حياة ناس بتحبها.. هو الضمان الوحيد لاستمرار المشاعر.. ملهاش حل تاني | |||||||||
| |
|
01-21-21, 10:38 AM
| #124 | |||||||||
| لما بتطلع من علاقة خدت منك كتير.. مش بتبقى ندمان ومقهور على الشخص نفسه في اوقات كتير.. بتبقى ندمان على الوقت اللي عدى.. ومجهودك اللي راح في محاولات كنت فاكر انها هتوصلك لحاجه.. وعلى الأوقات اللي قلبك كان مصدق فيها اوي.. وعلى الأحلام اللي رسمتها في الهوا.. بتبقى غضبان من نفسك على اللي انت بقيت شايفه غباوة.. حرق وقت ومجهود وقلبك اللي اتوجع وروحك اللي بتتحرق ع الفاضي.. وانت بتتعافى.. حاول تسامح نفسك على كل ده.. اصل انت كنت شايف ان فيه امل فعلا.. والا مكنتش حاولت.. كل اللي حصل ان رؤيتك كانت غلط في وقت ما.. او حتى لوقت طويل.. ومحدش فينا بيطلع صح طول الوقت.. محدش فينا تقييمه لكل الناس هيطلع صح كل مره.. محدش فينا مبيغلطش غلطات توجعه اوي ساعات.. وانبسط انك عرفت تخرج.. ياما ناس محبوسة ومش عارفه تخرج. ومتخسرش املك ولا ثقتك في كل الناس.. علشان متبقاش خسايرك اكبر من انها تخليك تعرف تعيش.. خسارة شخص.. تعني خسارة شخص.. مش لازم خالص تخليها تعني خسارة كل حاجه.. | |||||||||
| |
|
01-21-21, 10:40 AM
| #125 | |||||||||
| اي حد بيكفر بالعلاقات بيبقى شايل جواه وجع كبيييير.. اتحوش في سنين طويلة.. في علاقات هلكت روحه.. خدت منه اكتر كتير مما أدته.. الوحدة اختيار مؤلم.. مش هييجي غير لو كان هروب من وجع اكبر. وحتى لما بتختاره بسبب الوجع.. اوقات مش بتقدر تستحمله.. وممكن تحاول تطلع منه.. بس لو لبست وقتها في وجع جديد.. أكيد إيمانك بالوحدة هيزيد. مش هتبقى غلطتك لما تقابل ناس من اللي شايله وجع من النوع ده.. مش هتبقى غلطتك لو حبيت حد فيهم.. بس المشكلة ان اللي جواهم زي ما اتحوش في سنين.. محتاج وقت طويل اوي علشان يتحكي.. ووقت اطول علشان يتداوى.. ده لو أصلا أتداوى. يمكن مش ذنبك انك قابلتهم بعد كل اللي جرالهم من كل اللي عدى عليهم.. على راي الست أصالة: كل اللي جي جايب وجع.. ياخد مكانه فرحها ويروح.. فلو حبيت حد من دول.. خليك عارف انك ممكن تكون آخر قشاية بيتعلقوا بيها قصاد خيار الوحدة المرعب.. وخليك فاكر ان اللي بيزقك بعيد عنه.. هو خوف متكوم من كتر الوجع. وانه مش بينفخ في الزبادي.. هو اصلا مبقاش مصدق أنه فيه زبادي. | |||||||||
| |
|
01-21-21, 10:41 AM
| #126 | |||||||||
| ادراك ماهو حقيقي في العلاقات شئ صعب.. وخاصة في العلاقات طويلة المدى.. فيه معاني كتير حلوه بتبقى موجودة بالفعل.. بنبطل ناخد بالنا منها بحكم التعود.. زي كده ما محدش فينا بيفتكر عنيه اللي بيشوف بيها ولا رجليه اللي شيلاه.. مش بيفتكر غير لو جراله حاجه او شاف حد قدامه جراله حاجه.. ويمكن في العلاقات الوضع بيبقى اسوء.. لأن اغلبنا بيميل ناحية انه يسوق العند عند الخلافات.. و اغلبنا برضه بيقى أسهل عنده بكتير انه يعد النواقص والأخطاء من انه يقف يشوف الحلو اللي بطل ياخد باله منه.. سؤال مش سهل الاجابه عليه.. بس محتاجين نسأله لنفسنا من وقت للتاني لما نبقى جوه علاقه.. ومحتاجين نجاوبه بكثير من المصداقية.. وفي وقت رايق.. هو انا من غير الطرف التاني هينقصني ايه؟ | |||||||||
| |
| إضافة رد |
| مواقع النشر (المفضلة) |
| |
 | أصدقاء منتدى مسك الغلا | | |||||
2613Likes
