إنَّ ربّى لطيفٌ لما يشاء..

وإحنا جوّه التجربة بنبقى مصدّقينها قوي، ومقتنعين بيها تماما، ومعتقدين إنها تجربة العمر كله، وبنفترض تلقائيا إن الطرف التاني زيينا بالظبط، ويمكن أكتر، وما بنفوقش من وهمنا غير لما يصدر منه تصرف مش متوقعينه أو مخالف للنسق العام اللي راسمينه للحدوتة، فنقف ثانية، ونبص من برّه ذواتنا، فنكتشف المصيبة!
(زي ما بتبقى جوا أسانسير وتيجي عليك لحظة ما تبقاش عارف هو واقف ولا بيتحرك غير لما تبص على العتبة الثابتة برّه، لكن طول ما إنت جزء منه وجواه، هتفضل الأمور ملتبسة عليك!)
بنكتشف إننا في وادي وهو في وادي تاني، إحنا شايفينه أبد، وهو شايفنا مرحلة، معتقدين إنه دوا، وهو حمل جديد هياخد مكانه على رفوف القلب!
ودايما هتلاقي عنده مبرر عظيم، وحجة ومنطق ودنيا!
وسواء عاتبنا أو ما عاتبناش، انفجرنا ودبدبنا برجلينا وخربشناه بضوافرنا أو لفنا الصمت ونزل علينا سهم الله، فالنتيجة دايما واحدة: إحنا اتخدعنا، مشينا طريق جديد مش بيودي لأي حتة! لبّسنا القلب توب حداد وهو لسه في عز شبابه! خسرنا وقت وعمر مش راجع تاني!
ومفيش حل!
طول ما قلبنا بينبض هنحب، وطول ما إحنا ماشيين لوحدنا في سكة طويلة هنشتاق، وطول ما راسنا محتاج صدر يرتاح عليه، هيفضل يلف حواليه لحد ما يلاقيه!
وطول ما فيه بشر.. هيفضل فيه دناءة وغش وخداع وانتهازية ودموع!
وهيفضل فيه ألم.
أنت على الأرض.. ليس هناك علاج لذلك!

#تعافي

الناس بتكتب عن وجعها وأحلامها ومخاوفها وأمنياتها وكفاحها وانتصاراتها، عشان تلاقي حد يشيل معاها الحمل التقيل، أو يطمّنها، أو يفرح لها، أو يدّيها نصيحة، أو يقول لها "وأنا كمان كنت كده وعدّيت.. ما تقلقش".

فما تكسّروش مجاديف الناس، وما تسفّهوش أحزانهم، وما تحسّسوهمش بالدونية، وما تعايروهومش.. اسمعوهم، وطبطبوا عليهم، واحتووهم..

كلّنا -والله العظيم كلّنا- هنحتاج الطبطبة دي والمواساة في لحظة ما، لما الواقع الفعلي يعجز عن إنه يكون سند لينا، ولما تضيق علينا الدنيا، وأحلامنا تتكسر، ومخاوفنا تبقى أكبر منّا، وتبقى كلمة حلوة، مجرّد كلمة حلوة، أغلى عندنا من الحياة وما فيها!

إنت مش متخيّل إن "كلمة"، ممكن تقنع حد كان قافل من الدنيا ومقرّر يسيبها ويمشي، إنه يقف لحظة، ويفكّر، ويعيد حساباته، ويقرّر يدي كل حاجة فرصة تانية!

"كان -على غيرِ عادةِ الناس- يزدادُ غرابةً وغموضًا مع الأيام!
كلما اقتربتَ من عالَمه؛ وجدتَ أن الذي خَفِيَ عليك منه أكثرُ مما يبدو، وأن القُربَ لم يُجدِكَ إلا معرفةً أوسعَ بجهلك به!
كان كالعِلْمِ، كلما ازددتَ علمًا به، ازددتَ علمًا بجهلك به.
لم تكن تلك ميزةً فيه، ولا عيبًا!
لم يكن ذلك إلا هو، كما هو".

طول الوقت بنبعت رسايل استغاثة خفية للي حوالينا، وعلى حسب قربهم مننا وإيمانهم بإننا نستحق، بيتلقوها أو بتضيع وتتبدد في الفضاء السرمدي.

الرسايل مش بس كلام؛ نظرات، ابتسامات، دموع، صريخ، دبدبة بالرجلين، هذيان وصوت عالي مش مفهوم، شتيمة، اتصال في أنصاص الليالي من غير ما نقول كلمة واحدة، صورة عملنا لها لايك!

غالبا بنبقى عايزين حد بعينه يقرانا، ويفهم، ويمد لنا إيده، حد بيبقى بالنسبة لنا هو العالَم والتاريخ والحقيقة المطلقة للوجود وتجلي الله الحق، بس مش قادرين نقول له، أو خايفين، أو محرجين، ومتعشمين إن تاريخنا المشترك يتحرك تحت جلده وينبهه إن فيه هنا روح -كانت تخصه في يوم- بتتحرق فعليا ومحتاجة نظرة.

بنبقى وصلنا لنهايات كل شيء؛ العشم والخذلان والصبر والانتظار والأمل والمناجاة والحلم والفتوح والتوقع، ومستنيين -للمرة الأخيرة- انفراجة، مساحة حرة لالتقاط أنفاسنا بجد، بُشرى، إثبات إننا فارقين مع حد ونستحق، تواطؤ كوني في صالحنا ولو مرة، عشان نقدر نبدأ من جديد ونكمل مكابدة الحياة ونسدد فواتير الوجع!

لكن في الغالب بيكون هو الوحيد اللي ما بيفهمش الرسالة، أو بيفهمها ويطنش، أو بيفهمها وتاخده العزة بالإثم وينتهزها فرصة لتصفية الحسابات، أو بيفهمها ويدرك توحش احتياجنا بس خلاص ما بنبقاش فارقين معاه، فبيسد ودانه ويكمل حياته عادي، فبنزداد انكفاء على ذواتنا، وناخد أحزاننا بالحضن، ونكره كل الناس، وما تبقاش أي حاجة فارقة معانا!

ومن الجحود، للنكران، للتجبر في قطم رقبة العلاقات، للخذلان، لاستسهال كسر القلوب، للعب بمشاعر الصادقين، للوحدة المهلكة، لاعتقادنا المروع إننا دايما صح ونملك الحقيقة المطلقة ،لدقات الساعة اللي ما بتقفش..
#تعافي