02-01-21, 03:31 PM
| #199 | |||||||||
 
|  ماتخسرش ناس كويسه في حياتك حتى لو مش إصحابك القريبين متخسرهومش طب إزاي؟ 1. متجيش على ناس مستحملاك علشان بتحبك 2. متسحبش من حد اكتر من رصيدك عنده الناس زي الحصاله او زي رصيدك في البنك تاكد ان ليك عندهم حد إئتمان. حد اقصى يعني ممكن تسحبه منهم و لما تحسه بيقل او بيفضى شوف طريقه تملاه بيها 3. لما تبقى مرتاح او مبسوط في علاقتك بحد أيا كان إسأل نفسك يا ترى هو كمان مرتاح؟ هو كمان العلاقه دي إيجابيه بالنسبه ليه؟ و لو كانت الإجابه لأ. . فكر تعدل الكفه إزاي 4. متنهيش علاقه علشان سوء تفاهم لو مش فاهم كويس إسأل لو مش متاكد من المعنى إسأل على الاقل قول للي قدامك ان اللي فهمته كذا... هو ده قصدك؟ 5. متاخدش وجود حد في حياتك مسلم بيه كل الناس ممكن تبقى ماضي في حياتك شوف مين هتندم عليه لو بقى ماضي 6. حافظ أوي على اسرار الناس ... خليك أد ثقتهم فيك 7. شوف إيه اللي رابطك بالناس و حافظ عليه... محدش فينا بيحب يعيش لوحده 8. خليك انت الحد اللي الناس تحب تصاحبه 9. متسبش حد في زنقه 10. متجيش على حد في ضعفه 11. متديش حد اكبر من حجمه 12. متديش حد اقل من حجمه 13. متغيرش مبادءك علشان حد.. لأن دي برضه طريقه تخسر بيها الناس.. لو هتتغير إتغير علشانك مش علشان حد كفايه كده النهاردة | |||||||||
| سمو المجد likes this.  |
|
02-01-21, 03:32 PM
| #200 | |||||||||
| عمر الحياة ما وقفت يوم على حد أو على حاجه يمكن تكون دي حقيقه لا هي أكيد حقيقه الحياة كده كده بتستمر بس فيه حاجات معينه ممكن تقف على حد أو على حاجه زي ما تكون حياتك كده فيها كام شارع رئيسي لو قفلت شارع رئيسي البلد مش بتقف بس بيبقى فيها كام مكان كده زحمه و خنقه و المشي فيهم حاجه مقرفه طول مانت بعيد عن الشارع المقفول الدنيا بتبقى ماشيه عادي المشكله لما حاجه بترميك ناحية الشارع المقفول و تفضل الحكايه ياترى افتحه و لا لأ ساعات اصلا مش بيبقى عندك إختيار تفتحه ولا لأ أصلا لو قادر تسيبه مفتوح مكنتش قفلته بس خليك فاكر إنه يمكن يجيلك يوم تفتحه و ميبقاش وقف على اللي راحوا | |||||||||
| سمو المجد likes this. |
|
02-01-21, 03:33 PM
| #201 | |||||||||
| كل اللي سافر قبل كده عارف النداء الأخير للطياره و اللي مسافرش غالبا سمعها في فيلم حياتنا بقى فيها نداءات كتير من دي الفرق بينها و بين النداء الأخير للطياره إنها غالبا مبتبقاش مباشره أوي كده و بتحتاج اننا نبقى صاحيينلها علشان نسمعها و نفهمها لو سيبنا النداءات دي تفوت بنعدي حاجات كتير في حياتنا ممكن نخسر فرص ممكن نخسر ناس ممكن نخسر طريق ممكن نخسر حلم الفكره اننا كده كده هنخسر ركز مع النداء الأخير قبل ما أي حاجه تسيبك لان ممكن اوي متلحقهاش تاني | |||||||||
| سمو المجد likes this. |
|
02-01-21, 03:34 PM
| #202 | |||||||||
| ساعات أحلامنا بتبقى كبيره أوي مش شرط كبيره يعني صعبه بس ممكن تكون محتاجه وقت طويل علشان تعرف توصلها و ممكن تكون محتاجه طرق غريبه علشان تحققها و ممكن تكون هي في حد ذاتها أحلام مش تقليديه فمتبقاش عارف الطريق ليها شكله إيه أصلا ساعات الخطوات الصغيره اللي بتاخدها ناحية حلمك بتبقى بطيئه و تقيله و بتخليك تقف زهقان من نفسك علشان متأخر و تسأل نفسك ليه محاولتش أكتر شويه ليه متعبتش أكتر شويه بس في الحقيقه جلد نفسك وقتها مش بيخليك تنجز خالص زي ما أختي قالتلي النهاردة و رغم إني عارفه كده كويس بس أوقات بنبقى محتاجين نسمع الكلام من حد تاني أنا مش هتنازل عن أحلامي الصعبه ولا أحلامي البعيدة ولا أحلامي الغريبه يمكن أتأخر على ما أوصل بس وعد يا كل أحلامي مش هتنازل عنك | |||||||||
| سمو المجد likes this. |
|
02-01-21, 03:35 PM
| #203 | |||||||||
| من وجهة نظري الفشل إنك تبطل تحاول ﻷنك طول ما بتحاول يبقى ممكن توصل حتى لو حسيت إن حلمك بعيد و إن الأمل صغير أوي لو فضلت تحاول يبقى فيه إحتمال حتى لو صغير إنك توصل بس لو بطلت تحاول يبقى مفيش إحتمال خالص مش مشكله لو وصلت متأخر مش مشكله لو حسيت كذا مره في الطريق إنك مش شايف آخره المشكله الحقيقيه إنك تضطر تعيش بقية حياتك و إنت عارف إنك إنت اللي إتخليت عن أحلامك يوم ما بطلت تحاول توصلها | |||||||||
| سمو المجد and عبدالله همام like this. |
|
02-01-21, 03:36 PM
| #204 | |||||||||
| إحنا ليه جيل يمتاز بقلة المزاج و المود الهباب النيله  خلينا نجمع شوية الكلام جايز الجو العام السئ و يمكن إحنا أصلا شعب مش بيعرف يستمتع بالحياة و طبعاً خالتي الله يكرمها زيها زي كل جيل سبق بيبقى شايف إن اللي بعده جيل طري و مشفش تعب أنا بقى شايفه كذا حاجه 1. الفوضى العامه اللي احنا عايشين فيها بتخلي كل حاجه المفروض تبقى روتينيه و سهله تبقى روتينيه و مقرفه من اول الشوارع المنيله للمواصلات المقرفه للشغل اللي مفيهوش حاجه شبه طموحنا و أحلامنا 2. مش طبيعي أبداً إنه علشان البني آدم يعيش في مستوى معقول يبقى بيشتغل طول الوقت و معندوش أجازات ثابته بيتفسح فيها فسحه محترمه غير مره في السنه ده إن عملها 3. القيود الإجتماعيه اللي تحت مسمى العيب و اللي ميصحش و اللي للأسف بتسبق عندنا الحلال و الحرام بتخلينا محتارين بين اللي ممكن نعمله و اللي عايزين نعمله و اللي بنعمله فعلا 4. علاقاتنا الإنسانيه بقت زي الزفت و بنحاول نعوض قلة التواصل بالفيس و غيره و الفرق بينه و بين التواصل الإنساني الحقيقي محدش يقدر ينكره 5. مستعجلين أيوه إحنا عادة مستعجلين عايزين نخلص دراسة بسرعه و نتجوز بسرعه و نسافر نعمل فلوس بسرعة و في وسط السرعه دي بننسى ندور على نفسنا بننسى نعرف إحنا مين عايزين إيه محتاجين إيه إيه اللي ممكن يريحنا بننسى ندور على حقيقتنا و بنتوه وسط تعريفات بيحطها اللي حوالينا 6. متطلبين سقف طلباتنا عالي أوي و الحقيقه دي و رقم 4 غلطة الجيل اللي قبلنا اللي قفل معظم علاقاته على الأسرة الأصغر و حاول يحقق لولاده أقصى درجات الرفاهية اللي ممكن يحققهاله و نسي في أوقات كتير إن ده هيقلل قدرته على التأقلم مع مشاكل الحياة 7. مش حاسين بغيرنا أوي الفروق الإجتماعيه و الطبقيه زادت في مجتمعنا بصوره مخيفه فعلاً معدش حد حاسس بحد و بالتالي بقى عادة باصص على اللي أعلى منه و واضح قدامه و ناسي اللي أقل منه و بيبصله 8. يومنا طويل أوي بين أشغالنا و دراستنا و مدارس الولاد و دروسهم و قرف كل دوووووووول اللي بقى بجد مش طبيعي بقينا نوصل ﻵخر اليوم و إحنا أساساً مش طايقين نفسنا علشان نقدر نستحمل حد تاني 9. الأنا و دي مش بعتبرها عيب بالعكس دي اللي بتخلينا ندور على ال Good quality of life و بتخلينا عايزين نغير للأحسن مبقاش مقبول إننا نعيش و خلاص نستحمل و خلاص نعدي يومنا و خلاص و خلاص دي إتلغت من حساباتنا خالص و ده اللي كل اللي اكبر مننا لازم يفهموه إحنا مش هنعيش و خلاص آه هنفضل متعكننين و هنكسر حواجز كتير ورثناها منكم و هنغير قواعد كتير و مش هنعيش و خلاص و مسيرنا في يوم هنوصل طول ما احنا بنحاول يبقى مسيرنا هنوصل مش لمرحلة و خلاص لا لل good quality of lifeً | |||||||||
| سمو المجد likes this. |
| إضافة رد |
| مواقع النشر (المفضلة) |
| |
 | أصدقاء منتدى مسك الغلا | | |||||
2613Likes
