01-30-21, 11:06 AM
| #181 | |||||||||
 
|  واحدة من المشاكل الأصيلة للشغل في الطب النفسي وعلم النفس انها بترفع درجة الوعي عندك لدرجة مرعبة.. بتوصلك ببساطه لأنك تبقى فاهم كل حاجه فيك جايه منين ورايحة فين.. حتى دفاعاتك اللي المفروض انك متبقاش واعي بيها اوي والمفروض انها بتجنبك جزء من الالام النفسية للحياة بتبقى مفقوسة.. وواعي بيها لدرجة مش بتخليها تخدمك. و الغريب انه رغم كل ده بتقف اوقات مش عارف تتصرف في اللي انت عارفه وفاهمه.. يعني تفصيل المشكلة عندك بس مش عارف تلاقي الحل او حتى وصلت انك عارف الحل بس مش قادر تنفذه. هنا الوعي بيبقى نعمة ونقمة في نفس الوقت.. نعمة لانك فاهم.. ونقمة لأنك حاسس بالعجز. افتكر هنا بنبقى محتاجين مساعدة من صوت بره دماغنا.. زينا زي اي حد.. زي ما مش هينفع جراح يعمل لنفسه عملية.. هتحتاج جراح تاني.. وهنا برضه هتقابل مشكلة انك فاهم اللي قدامك بيعمل ايه.. وهلم جرة.. الوعي مؤلم.. ولكنه بيفضل ضرورة.. | |||||||||
| الدكتورة likes this.  |
|
01-30-21, 11:07 AM
| #182 | |||||||||
| الوقت الصعب اللي انت طفحت فيه الدم.. وسندت فيه نفسك بنفسك.. وشقيت بجد على حالك.. وعدت عليك اوقات صعبة كتير.. وحققت من وراه حاجات خلتك احسن.. أقوى.. اقرب لأحلامك.. ماشي طريقك بثبات أكبر.. مهما عدى وقت.. بتفضل فاكره.. ولو لقيت نفسك بتنساه.. فكر نفسك.. الوقت ده هو الدليل اللي عندك انك تقدر تعمل اي حاجة.. انك تقدر تبقى اللي انت عايزه.. وقادر تعمل مجهود حقيقي علشانك.. الوقت ده افتكره لأنه بيثبتلك كمان انك الشخص الأهم في حياتك.. وان قراراتك انت ومجهودك انت هما اللي بيوصلوك.. الوقت ده دليلك الحي على انك لا هتقع ولا هتضيع من غير حد.. وان الحد الوحيد اللي هتضيع لو راح منك.. هو انت.. لو لسه معداش عليك وقت طلعت عينك في الدنيا علشان نفسك.. اعرف انك مقصر مع نفسك اوي.. اوي. وانك لو بتعمل ده علشان ناس تانيه ومش بتعرف تعمله علشان نفسك.. تبقى في كارثة انت مش حاسس بيها.. راجع نفسك قبل ما تندم... اتعب_علشانك | |||||||||
| الدكتورة likes this. |
|
01-30-21, 11:08 AM
| #183 | |||||||||
| الإنتقال من مرحلة انا بحبك لمرحلة انا بكرهك.. يعتبر نوع من انواع التعافي.. هو صحيح مش ده الهدف.. الهدف انك توصل لمرحلة the nothing zone انت لا تمثل بالنسبالي اي شئ سواء سلبا او ايجابا.. وجودك ببساطة مش هيحرك اي نوع من المشاعر.. زيك زي الغرب يعني.. قليلين اوي اللي عندهم رفاهية الانتقال من مرحلة انا بحبك.. لمرحلة انت زيك زي الغريب.. او زي اي حد عرفته في يوم من الأيام.. هما قليلين لدرجة انهم بيبانوا ناس مش طبيعية.. وغالبا بيتم التشكيك في كونهم كانوا بيحبوا أصلا.. واكيد فيهم ناس كده فعلا.. بس فيهم شوية ناس عندهم من النضج والوعي ما يسمحلهم انهم يتجاوزوا مرحلة انا بكرهك دي.. هما أدركوا انها غير واقعية.. غير ضرورية.. وحتى مؤذية.. وبالتالي تجاوزوها.. قلب المشاعر لضدها لا ينفي وجودها.. بيشغل نفس الحيز ويمكن اكتر.. تلاشي المشاعر هو التعافي الحقيقي من حكاية حب مكملتش.. أو حتى من قصة عداوة ملهاش لازمه.. | |||||||||
| الدكتورة likes this. |
|
01-30-21, 11:09 AM
| #184 | |||||||||
| المشاعر بتكدب vs المشاعر مبتكدبش حوار قائم دائما.. والآراء فيه بتختلف.. المشاعر بتكدب كتييييييير شعورك بالخوف بيدي الخطر أكبر من حجمه.. وبيأيدك.. شعورك بالحزن بيدي الحياة لون أغمق من حقيقتها.. بيزود حزنك.. شعورك بالثقة الزايدة بيخلي تقديرك للخطر يقل.. وممكن يلبسك.. حبك الزيادة لحد ممكن يعميك.. ويخليك شايف صورة من محض خيالك.. كرهك الزايد لحد برضه بيعميك.. وهيخلي صورتك عنه اسوء من حقيقته كتير.. التفاؤل الزائف ممكن يخليك تعلي سقف طموحك في حاجة.. لدرجة ان الفشل فيها يقطم وسطك.. التشاؤم الزيادة بيخلي مفيش حاجة فارقة.. بيخليك تبطل تحاول بجد.. ديه مجرد أمثلة من ضمن حاجات كتيييير مشاعرك فيها بتغير الرؤية.. هو احساسك نفسه مش كداب.. انت خايف.. قلقان.. سعيد.. حزين.. بتحب.. بتكره........... انت حاسس كده فعلا.. بس المشاعر لا يعول عليها لوحدها في الحكم على الامور.. ولو خدنا وقتنا وحكنا على الامور بعيد شوية عن فورة المشاعر.. هنشوف أوضح كتير.. ده حتى غطا المشاعر ده هو السبب في امثال نعرفها.. زي اللي ع البر شاطر واللي بره الموضوع شايف احسن وهو برضه السبب في ان ادراكنا للحاجة بيتغير بعد وقت.. مين فينا مجاش في يوم وقال: ياااااه.. انا كنت مغفل اوي.. او ياااااه انا ازاي كنت خايف من كذا!!!! او ياااااه معقول انا سبت الفرصة دي تفوت.. او ياااااه انا اتصرفت بالغباء ده.. سيب لنفسك فرصة تشوف الامور بعد ما مشاعرك تهدى شوية.. او اسأل نفسك.. هو ده صوت المنطق!!! ولا صوت الخوف او القلق او الحب او الكره........... او استعين بصديق... ده اهم وقت تستعين بيه بصديق عارفك كويس.. المشاعر مش دايما كدابه.. بس لما بتكدب.. بتلبسنا في الحيط | |||||||||
| الدكتورة likes this. |
|
01-30-21, 11:09 AM
| #185 | |||||||||
| عادة الناس بتعرف تحافظ على اللي تعبت وحاولت كتير علشان توصله.. بتقدر قيمته فعلا بس نادرا ما بتلاقي حد بيحافظ على حاجه جاتله بالساهل.. اوقات مش قيمة الاشخاص او الأشياء الحقيقية هي اللي بتحدد قيمتها.. ممكن جدا اللي اندفع فيها معنويا قبل ماديا كمان.. هو اللي بيحدد غلاوتها. ويمكن ده اللي بيجاوب ع السؤال اللي ساعات بنقف نسأله: هو ازاي بيضيع كذا من إيده؟؟؟؟ هو مش حاسس بقيمته؟؟؟؟ هو غالبا يا مش حاسس.. يا اما معندوش حاجه يعملها.. وساعتها برضه بيبقى مش حاسس.. لأن اللي حاسس قيمة حاجه بيستموت عليها زي ما بنقول.. اشتغل على نفسك لحد ما تبقى حد يستاهل اللي قدامه يستموت عليه.. وساعتها متقبلش بأقل من كده.. واللي انت شايفه في حياتك يستاهل.. كافح علشانه لآخر نفس | |||||||||
| الدكتورة likes this. |
|
01-30-21, 11:10 AM
| #186 | |||||||||
| الأفلام اللي بتتكلم عن الحب اللي بييجي يخطفك من غير اي مبررات ولا توقعات.. بيبقى ليها جاذبية خاصة سواء للمؤمنين ب happily ever after او حتى اللي فقدوا ايمانهم بالحب. جمال الاحتمالية في حد ذاته بيخطفنا معاه.. رغم ان معظم القصص اللي بنشوفها كده في الحقيقة نادرا ما بتستمر.. او تنتهي ب happily ever after زي ما يكون فيه حاجات في الحياة كده مش عايزين نقطع خيط الأمل فيها.. مهما الواقع كدبها.. هتفضل الافلام دي ليها سحر خاص.. سحر بيلعب على الأحلام والمشاعر المتعلقة.. | |||||||||
| الدكتورة likes this. |
| إضافة رد |
| مواقع النشر (المفضلة) |
| |
 | أصدقاء منتدى مسك الغلا | | |||||
2613Likes
