| |||||||
| :: قرار هام :: |
2611Likes| إضافة رد |
| | LinkBack | أدوات الموضوع | انواع عرض الموضوع |
| |||||||
| :: قرار هام :: |
| إضافة رد |
| | LinkBack | أدوات الموضوع | انواع عرض الموضوع |
02-27-23, 08:59 AM
| #1441 | |||||||||
 
|  ليس من نبل الاخلاق إنك تحط شريك حياتك في حرج إجتماعي كإجراء عقابي على خلاف بينكم مالوش علاقة بالناس اللي حواليكم اساسا يعني مثلا زوج إتخانق مع زوجته عشان حاجة تخص الاولاد وشدوا مع بعض شوية..... يقوم حالف عليها انها ماتروحش فرح قريبتها او صاحبتها زوجة إتخانقت مع زوجها ... فتقول لزوجها إنها مش مستعدة تستقبل أهله في العزومة اللي كانوا متفقين عليها .. واللي عزم أهله عليها بالفعل ..وتطالبه انه يلغيها زوج إتخانق مع زوجته .... فيحسسها انه متضايق من وجود حماته اللي قاعدة عندهم كام يوم ويطالبها إنها تبلغها إنها تمشي (رغم انه كان موافق من الاول وماعندوش مشكلة) زوجة متخانقة مع زوجها ... فماترضاش تتصل او تزور والدة زوجها اللي كانت مريضة ولسة خارجة من العمليات حاجة سيئة جدا اننا نستخدم ورقة الحرج الاجتماعي كورقة ضغط وقت المشاكل ... والموضوع ده بيزود المشاكل وبيوغر الصدور .. وبيبقى بوابة لخروج المشاكل بره البيت ... وبيكون نقطة خلاف في حد ذاتها بعد كده وبتتحفر في الذاكرة | |||||||||
 |
|
02-27-23, 09:00 AM
| #1442 | |||||||||
| إبليس (لعنه الله) هو أكتر واحد عارف خطورة خراب البيوت علي حياة الإنسان وعلي المجتمع ... عشان كده هو بيكافئ الشيطان (من جنوده) اللي يقدر يفرق بين الراجل وزوجته وبيخليه يقعد جنبه في المجلس بتاعه. قال رسول الله صلى الله عليه وسلم: ((إن إبليس يضع عرشه على الماء ثم يبعث سراياه فأدناهم منه منزلة أعظمهم فتنة ....يجيء أحدهم فيقول فعلت كذا وكذا فيقول ما صنعت شيئا .....قال ثم يجيء أحدهم فيقول ما تركته حتى فرقت بينه وبين امرأته قال فيدنيه منه ويقول نعم أنت)) [مسلم ح2813]. عشان كده مش دايما المشاكل بيكون كل أسبابها أسباب مادية بس... حطوا في حساباتكم ان في شياطين بتوسوس في الصدور وبتكبر المواضيع وبتسود الدنيا في وشنا. لما بتحلوا مشاكلكم ... ده معناه إنكم إنتصرتوا في معركة كان الشيطان بيحاول فيها انه يرفع رآية النصر علي أنقاض البيت بتاعكم. | |||||||||
| |
|
02-27-23, 09:01 AM
| #1443 | |||||||||
| من آفات العصر اللي احنا فيه ... إننا بقينا بنشخّص اللي حوالينا بالاضطرابات النفسية عادي كده. خلاص ... بقينا كلنا شايفين بعض نرجسيين وسيكوباتيين وثنائي القطب ... وعلاقتنا باللي حوالينا علاقات توكسيك لما بتسأل سؤال [ اتعامل إزاي مع الزوج النرجسي ؟ ] أول سؤال بيجي في ذهني [حضرتك عرفتي ازاي انه نرجسي؟ ] في الغالب بتكون الإجابة[ انا قرأت بوستس او سمعت محاضرات عن الشخصية النرجسية ... واكتشفت إن زوجي نرجسي] الجزم إن شخص ما مصاب بأحد الاضطرابات النفسية ده لازم يحصل من خلال حد متخصص [طبيب نفسي او معالج نفسي] ... ومن خلال اختبارات وبروتوكول محدد. ومش معنى ان حد عنده بعض سمات احد الاضطرابات النفسية... إننا نجزم انه مضطرب نفسيا انا شخصيا لا أجرؤ على تشخيص حد بإضطراب نفسي لان ده مش شغلي ..... اه طبعا اتعلمت ودرست سمات الاضطرابات النفسية ... لكن مش عشان اشخص الناس او اعالجهم ... لكن عشان لما يجيلي عميل اشك انه مصاب بأحد الاضطرابات النفسية... فاعرف اني مش الشخص المناسب لمساعدته ..وانه لازم يستعين بمعالج او طبيب نفسي. خطورة الموضوع ده ... إن لما حد فينا بيقتنع إن شريك حياته مضطرب نفسيا ...اتوماتيك بيفسر كل مشاكل البيت من الزاوية دي ... وبيحس انه ضحية اضطراب شريك حياته ...وبينفي عن نفسه مسئوليته النسبية في الوصول للأزمة ...كل ده لانه شخّص شريك انه مضطرب نفسيا جدعنة منه كده ... وكمان بدأ ينفذ النصايح العامة اللي بتتقال عن التعامل مع الشخص المصاب . مع إن ممكن يكون الموضوع مش كده اصلا.... وساعتها الأزمة بتكبر مش بتصغر فرجاءا بلاش ننجر للمصطلحات البراقة وخصوصا لو كانت بتتقال بالانجليزي 😄... وبلاش ننجر لتشخيص خلق الله اللي حوالينا بالأمراض والاضطرابات النفسية . | |||||||||
| |
|
02-27-23, 09:03 AM
| #1444 | |||||||||
| الوقت الحالي وقت صعب جدا على المستوى الاقتصادي ... وربنا يستر الايام اللي جاية كمان ... والأزمات الاقتصادية أحد اهم أسباب المشاكل في البيوت ...الناس كلها روحها بقت في مناخيرها وصدروهم بقت مليانة قلق وحيرة . والخناقات بتزيد.. وحدتها كمان بتزيد . زوجتك بتطلب حاجات كتير لأن طلبات البيت والأولاد بقت كتير ... غصبا عنها فعلا . وجوزك بقى حساس جدا ناحية الطلبات دي ... وبقى بيتذمر من طلباتك ....مش بخل وإستخسار ... ولكن فعلا الوضع بقى صعب... والحاجة بقت غالية وقيمة الفلوس بتقل .... فهو مش قادر يكفي طلبات الحاضر ومطلوب منه كمان يفكر هايعمل إيه في اللي جاي. كلنا ضحايا الوضع المتأزم ... فمفيش داعي نحمل بعض مسئولية اللي بيحصل ....الوضع صعب ع الناس كلها ده الوقت اللي المفروض نقف فيه جنب بعض وتكونوا جبهة واحدة وكيان واحد قصاد الأزمة.. .فمش صح انكم تتخانقوا مع بعض ....اعذروا بعض ...وهوّنوا على بعض ... وفكروا مع بعض إزاي ترتبوا أولويات الإنفاق بتاعتكم في ظل الإمكانيات الموجودة .. و خدوا بالاسباب كويس ... وقبل كده اطلبوا سعة الرزق والبركة من الله الرازق. وماتخلوش قلقكم من الحاضر والمستقبل يخليكم تجرحوا بعض و تخسروا بعض وتنكدوا على بعض وتفقدوا تركيزكم في تربية ولادكم انبسطوا بالمتاح ... وربنا ييسر الأحوال ....ويرزقنا الطمأنينة وسعة الرزق | |||||||||
| |
|
02-27-23, 09:04 AM
| #1445 | |||||||||
| لما نتخانق ... في حاجة لو عملناها .... ممكن تقلل حدة المشاكل شوية إن الواحد مننا يفكر في شكاوى الطرف التاني اللي كانت بتتقال أثناء الخناقة ... ويحاول يفهم ليه بيقول عني كده مع إني مش شايف نفسي كده؟ على سبيل المثال - ليه جوزي بقى شايفني نكدية رغم إني شايفة نفسى مش كده او مش عاوزة اكون كده ؟ ... ليه هو شايفني عنيدة ؟ هل انا باطلب منه إحتياجاتي بشكل سلبي؟ ... هل انا فعلا بقيت لاوية بوزي معظم الوقت عشان أجبره يهتم بيا؟ ... هل انا فعلا مش ليّنة معاه ودايما ناشفة؟ - ليه مراتي شايفاني زوج غير مسئول رغم إني بتعب جدا عشان خاطرهم؟ ... هل فعلا انا فاهم المسئولية غلط وفعلا مقصر ؟ ... هل هي طالبة مني حاجة وانا مش باعملها؟ ... طب اعمل ايه عشان ارضيها وأساعدها؟ - ليه جوزي مش بيحب يتكلم معايا خالص؟ ... هل انا بلومه وبانتقده كتير لما بيتكلم ؟ ... هل انا باتكلم معاه بلغة الأمر والنهي كتير ؟ ... هل بأنبه وأقطمه كتير؟ - ليه مراتي شايفة إني بطلت احبها او مش مقدر تعبها مع إني بحبها ؟ ...يمكن عشان بطلت أمدحها وأعاكسها؟ ... يمكن عشان بطلت اقولها كلام رومانسي زي اول الجواز؟ هل عشان لما باتكلم معاها وانا مرهق ببقى مش متفاعل وبكون باصص في الموبايل ؟ ... يمكن عشان بطلت أفسحها او أجيب لها هدية ؟ ... يمكن عشان بطلت احسسها اني ممتن لتعبها؟ لو كل واحد فينا حاول يبص لشكاوى الطرف التاني بشكل واعي ومن غير ما يعتبر الشكوى دي مجرد إتهام باطل ... يمكن وقتها نقدر نتفهم بعض أسباب مشاكلنا ونقدر نحلها ... إحتمال ... ليه لا؟ | |||||||||
| |
|
02-27-23, 09:04 AM
| #1446 | |||||||||
| وانت بتربي أولادك ... حاول تستفيد من أخطاء أبوك وأمك معاك علشان متكررهاش تاني مع أولادك. بس صدقني... ملهاش لازمة دلوقتي إنك تحاسب أبوك وأمك علي أخطاءهم في تربيتك بعد ما كبرت خلاص . وماتحاولش تثبتلهم إنهم غلطوا معاك... هما لو كانوا يعرفوا يعملوا معاك أحسن من اللي عملوه مكانوش إتأخروا. هما ربوك من وجهة نظرهم ومن خلال ظروفهم ومن خلال اللي إتربوا عليه ومن خلال أفكارهم اللي ممكن كانت غلط وقتها... بس هو ده اللي حصل. ووارد إن حد فيهم كان إنسان غير سوي ... وكان بيفتقد حتى للمشاعر الفطرية مع ولاده... وربى جواك عقد وتشوهات ... وقتها فكر ازاي تحافظ على حياتك من أذاه وازاي تعالج نفسك من اللي حصل من غير ما تدخل في دايرة العقوق ... ...واقصى حاجة ممكن تعملها انك تجرب تقول لهم اللي جواك من باب التفريغ أيا كان ...كل اللي ممكن تعمله دلوقتي إنك تطبطب عليهم وتريحهم وخليك عارف إنهم مفتاح جنتك. البوست ده موجه للناس اللي عانوا في علاقتهم بأهاليهم. .... اما اللي ربنا عافاهم فربنا يديم عليهم نعمته | |||||||||
| |
| إضافة رد |
| مواقع النشر (المفضلة) |
| |
 | أصدقاء منتدى مسك الغلا | | |||||
