10-07-21, 10:34 AM
| #865 | |||||||||
 
|  جبر الخواطر... الكلمة الحلوة.... المدح ..... التبسم.... التواضع... السعي في تعليم الناس ... وإصلاح ذات البين كل الحاجات دي أخلاقيات الناس اللي معندهاش مشاكل نفسية اما اللي بيستغل أي موقف علشان يغلس علي اللي قصاده ويحسسه بالنقص... والتنطيط علي خلق الله..... والتحفيل والتريقة المتجاوزة حد الهزار ...وكتم العلم .. وتسخين الناس علي بعض ... كل دي أخلاق الناس اللي مليانة أمراض نفسية. ماتخليش حد يقنعك ان الأمراض النفسية حاجة كويسة ومهمة للتعايش في وسط الناس. إحمي نفسك من الأذى ... لكن إعمل ده من غير ما تسمح لأصحاب الأمراض النفسية إنهم يجرجروك لدايرة المرض بتاعتهم في ناس بيحوّلوا بيوتهم ل (حقل ألغام) بيت فيه الولاد بيتحركوا فيه بمنتهى الحذر ... خايفين من أي غلطة ...من أي كلمة ... خايفين إنهم يعبروا عن رأيهم او من إنهم يظهروا مشاعرهم...لاحسن البيت يشتعل. وده حصل بسبب إن الأب أو الأم دقيق المحاسبة ... عصبي ....صارم بزيادة ... مش بيفوت غلطة لحد وبيستخدم لغة الشتايم والاهانة والزعيق والتبكيت والتقطيم. وده ممكن يحصل بدافع التربية او الخوف عليهم... او بسبب داء العصبية. طبعا إحنا بنحب أولادنا جدا .... اصلا احنا بنتعب عشانهم... بس لازم نعرف إن أكتر حاجة مهمة لولادنا ولشريك حياتنا هي مشاعر الأمان والطمأنينة والراحة النفسية... ده أهم من الفلوس ومن تلبية إحتياجاتهم المادية. طبعا الحزم ركن مهم في التربية .... لكن الغلط كل الغلط إن الموضوع يتعدى الحزم ويبقى تخويف وإهانة وكسر للنفوس. إيا كانت الضغوط اللي بنتعرض لها... وأيا كانت الدوافع ...لو الناس اللي عايشين معانا دايما خايفين يتكلموا او يتحركوا او يغلطوا ... يبقى إحنا حرمناهم من البيت والسكن ... وعيّشناهم في حقل ألغام... ودي مشكلة كبيرة ولازم تتحل | |||||||||
| عطر النَّدَى likes this.  |
|
10-07-21, 10:36 AM
| #866 | |||||||||
| في بيوتنا وفي حياتنا الزوجية ... أحيانا بيكون عندنا إحتياج مهم جدا ...والطرف التاني مش عاوز يلبيه ...او مش قادر يلبيه وممكن نحس أحيانا إن التخلص من العلاقة دي أحسن حل .. لأننا بنحس وقتها إن الوحدة أريح بكتير من حرقة الدم الناتجة عن الحرمان و الانتظار مشاعر الرغبة في التخلص من العلاقة دي مشاعر مفهومة ومعتبرة لكن يظل هناك سؤال مفصلي و في منتهى الأهمية يحتاج الي إجابة الا وهو (هل الفراق هو الحل الافضل الوحيد فعلا؟ .. وهل حاولنا (سويا) إصلاح الوضع بشكل سليم فعلا ؟ ) عدم القدرة على الإجابة عن السؤال ده .... ده اللي بيخلي ناس كتير تدور في دايرة كبيرة من الاحتراق والتأزم | |||||||||
| عطر النَّدَى likes this. |
|
10-07-21, 10:36 AM
| #867 | |||||||||
| رتب أولويات مصاريفك طبقا لظروفك و إمكانياتك المادية. لكن وانت بتعمل ده .... خليك عارف إن في حاجات لو جت بعد ما عدى وقتها بتفقد جزء كبير من قيمتها. لو وفرت وماصرفتش دلوقتي علي إبنك عشان تحفظه القرآن او تديله كورس عشان يتعلم حاجة معينة وهو صغير ..... ممكن يبقي صعب عليه او مايتقبلش ده لما يكبر... حتي لو معاك فلوس كتير. دلوقتي وانت وزوجتك لسه شباب وبصحتكم...خلي زوجتك تشتري هدوم حلوة كل فترة تقعد بيها قصادك في البيت.... سيبها تروح تجدد في شكلها كل فترة.... إديها فلوس وشجعها إنها تجيب ميك اب و تحطه وانت موجود في البيت.... لو انتوا حرمتوا نفسكم من الكلام ده وانتوا شباب عشان توفروا في المصاريف مش هتعرفوا تعملوه لما تعجزوا حتي لو بقي معاكم ملايين . الفسحة اللي فيها تنطيط ولعب مع ولادك .... مش هتعرف تعملها لو كبروا وكبرت إنت معاهم. المناسبة اللي محتاجة هدية ولو بسيطة وماجبنهاش عشان نوفر... طعم الفرحة بيها مش هيرجع حتي لو صرفنا بعدها ملايين. الكلام ده مش دعوة للتبذير.....والتوازن مطلوب.. وكلنا محتاجين ندبر مصاريفنا وخصوصا في ظل الظروف اللي بنمر بيها ...... لكن في حاجات لو ما اتعملتش في وقتها بيبقي صعب نعوضها حتى لو اتوفرت الامكانيات بعدها | |||||||||
| عطر النَّدَى likes this. |
|
10-07-21, 10:38 AM
| #868 | |||||||||
| ليه أحيانا حد فينا ممكن يكون عنده إحتياج بسيط . .. ومع ذلك شريك حياته مايرضاش يلبي الاحتياج ده ؟ يعني زوجة كل اللي طالباه من زوجها ... كلمة حلوة ... او انه يسمعها ... او يطبطب عليها ...او يفتكر كل فترة يجيب لها هدية ... وهكذا او زوج... كل اللي طالبه من مراته إنها تقدر تعبه ... او يرجع م الشغل يلاقي لقمة جاهزة ...او البيت نضيف ... إهمال سد الاحتياج ده سببه حاجة من الاتي : ١ - إن الطرف التاني يجهل تماما أهمية سد الاحتياج ده بالنسبالك ...وشايف إن الاحتياج ده تافه أساسا... وبالتالي مش هايبذل جهد في إشباع إحتياجك ده ٢ - الطرف التاني عارف أهمية سد الاحتياج ده بالنسبالك ... لكن مش عارف يعمل إيه عشان يقدر يلبي الاحتياج ده ...وبيفتقد المهارات اللازمة عشان يقدر يرضيك ٣ - شريك حياتك عارف أهمية سد الاحتياج ده بالنسبالك ... و بيعرف إزاي يعمل ده ... لكن مجروح منك في نقطة معينة ... والجرح ده مخليه زاهد في إنه يرضيك او يسعدك ... وأحيانا الامر بيتطور إنه بيحرمك من الحاجة اللي انت محتاجها كإجراء عقابي عشان انت بتأذيه أساسا مهم قوي إننا نحدد السبب ... عشان نقدر نحل المشكلة ...لأن كل سبب ليه طريقة معالجة ... ولو ما أدركناش السبب الحقيقي... هانفضل نحل في السكة الغلط | |||||||||
| عطر النَّدَى likes this. |
|
10-07-21, 10:39 AM
| #869 | |||||||||
| إختلفوا على حاجة صغيرة بتحصل في أي بيت ... إختلفوا على حاجة تخص الاكل او الشرب او كلمة رخمة إتقالت.. او شدوا مع بعض بسبب موقف حصل قصاد الناس.… او على حاجة تخص الاولاد فإيه اللي يحصل بقى ؟ هو : يمنعها تروح فرح واحدة قريبتها ويحرجها قصاد أهلها... او يحلف انها ماتنزلش الشغل تاني.... او يحرمها من كورس هي بتاخده.... يمنعها تروح لأهلها... الخ او هي : ماتعملوش أكل وتهمل في رعايته .... تخترع مشوار للولاد عشان مايروحش يزور أهله او يخرج مع صحابه ... او تحرمه من حقه في الفراش ...او ماترضاش تستقبل أهله بعد ما بلغهم انه عازمهم... الخ مش من الحكمة انك تعاقب شريك حياتك عقاب ضخم او تحرجه إجتماعيا او تقلب عليه الترابيزة بسبب زعل حصل بسبب موقف عادي . وارد اننا نتخانق أو نزعل... بس ياريت رد فعلنا يكون مناسب للموقف ... المبالغة في رد الفعل بيأزم الوضع وبيهدم مشاعر الود ماينفعش إن الحياة الزوجية تكون مجرد رد فعل للمشاكل اللي بتظهر كل فترة .... مهم قوي إننا نكون قادرين نصنع لحظات سعيدة ونبني رصيد إيجابي ونخزن ذكريات حلوة اللحظات السعيدة والرصيد الايجابي بيسعفونا وقت المشاكل... وبيخلوا مناعة العلاقة الزوجية مناعة قوية ...وبيكونوا هما الحاجة اللي بنخاف على ضياعها وقت المشاكل واللي بيخلونا مانقعش بسهولة في حفرة سوء الظن حل المشاكل ... زي تناول الدوا أما اللحظات الحلوة والرصيد الايجابي ... عاملين زي الاكل الصحي اللي بيقوي المناعة والانسان اللي بياخد الدوا بس لما يتعب .. بدون ما يكون بياكل اكل صحي ومفيد ... ممكن صحته تنهار قصاد المرض رغم إنه بياخد الدوا بجانب الجري ورا المسؤوليات...و محاولة حل المشاكل اللي بتظهر ... حاولوا تعيشوا لحظات سعيدة ... وده بيحتاج للتخطيط ماتستسخروش في بعض الكلمة الحلوة ... إنزلوا إتمشوا شوية.... إمدحوا بعض بينكم وبين بعض وقصاد الناس ... خططوا لخروجة حلوة او حتى قعدة هادية في البيت ... سيبوا الموبايلات وإتكلموا مع بعض ... هاتوا لبعض هدية بسيطة ... كلوا مع بعض أكلة بتحبوها .... إلعبوا سوا ومع الولاد إبنوا رصيد حلو يسندكم وقت المشاكل | |||||||||
| عطر النَّدَى likes this. |
|
10-07-21, 10:40 AM
| #870 | |||||||||
| الناس المتجوزة من فترة واللي بينهم رصيد من المواقف الايجابية والذكريات الحلوة... هاتفهمني أكيد عدى عليك وقت مع شريك حياتك كنت حاسس فيه بقمة السعادة وكنت حاسس قد إيه الجواز حاجة جميلة جدا وكده. فلما يكون في مشكلة جامدة بينك وبين شريك حياتك... وتلاقي نفسك مليان مشاعر سلبية ناحيته ومتضايق منه ... وكاره نفسك والعيشة واللي عايشنها واليوم اللي اتنيلت اتجوزت فيه . وانت غطسان في برميل المشاعر السلبية دي إفتكر (ولو بشكل ذهني) الايام الجميلة اللي انت عشتها مع شريك وإفتكر الذكريات الحلوة اللي بينكم....وإفتكر كل المواقف اللي وقف فيها جنبك... وإفتكر لحظات الاندماج الروحي والجسدي اللي بينكم. هاتحس وقتها ان المشكلة اللي بينكم دي مش نهاية العالم والمشاعر القاسية اللي انت حاسس بيها دلوقتي مجرد عارض في مسيرتكم ... والمشاعر دي هيحصلها إخماد لما تهدي وتتحركوا في الاتجاه الصحيح لحل المشكلة. وبعد ما هتعدي الازمة وترجع المياه لمجاريها ...هتستغرب من كمية الحنق والغضب اللي كنت حاسس بيها وقت المشكلة. هي دي طبيعة الحياة.... والجواز جزء من الحياة.... لا يخلو من الكدر والمنغصات .... إدراك المفهوم ده هايخلينا نتعامل مع المشاكل بمرونة اكتر ...وهيقلل من حجم الخساير وقت المشاكل. | |||||||||
| عطر النَّدَى likes this. |
| إضافة رد |
| مواقع النشر (المفضلة) |
| |
 | أصدقاء منتدى مسك الغلا | | |||||
2613Likes
