10-09-21, 10:22 AM
| #871 | |||||||||
 
|  لازم يكون عندك خطة مسبقة و عارف انت هتعمل إيه في الوقت اللي بتكون فيه مضغوط نفسيا أو محبط . إنت لو ماعملتش كده .. في الغالب وقت الاحباط هتقع في الحاجة اللي أنت بقالك فترة بتحارب عشان ماتقعش فيها .. و بالتالي فترة الإحباط و الفتور بتزيد .. يعني ممكن تلاقي نفسك وقت الضغط و الإحباط رجعت تشرب سجاير .. أو رجعت تكلم حد إنت عارف إن علاقتك بيه علاقة غلط .. أو تلاقي نفسك بطلت تصلي .. او تشتم و تتعصب مع الناس اللي حواليك . او تلاقي نفسك بتتعصبي على أولادك بشكل مؤذي جدا... او تاكلي كميات كبيرة من الاكل بتأثر على صحتك ووزنك .. الخ حاول تكون مخطط انت هتعمل إيه وقتها يعني ممكن تروح تقابل حد أنت عارف إن همتك بتعلى و نفسيتك بتتحسن لما بتقعد معاه .. أو تنزل تجري .. أو تقرأ سورة من القرآن أو كتاب أنت بتحبه .. أو تسمع درس أو حاجة بتحبها .. أو تروح تقعد في نادي أو في مسجد معين .. إلخ و أمنع نفسك من الحاجات اللي بتجرجرك للفخ . زي انك تقعد لوحدك .. أو انك تدخل علي الانترنت بدون هدف .. أو انك تكسل عن الصلاة و تأجلها شوية أو تتأخر عن أدائها . أو انك تتناقش مع مراتك في تفاصيل صغيرة و تتخانق معاها .. وقت الضغط النفسي و الإحباط نفسك بتكون ضعييييفة جدا .. عامل زي الجسم اللي مناعته قلت .. لو ماعندكش خطة طوارئ .. ممكن جدا الشيطان يوقعك في حاجة كان صعب عليه يوقعك فيها في الوقت العادي . إعملوا الكلام ده .... وعلموه لاولادكم من صغرهم.... هاتفرق معاكم | |||||||||
| ŢαŢμαŊα likes this.  |
|
10-09-21, 10:24 AM
| #872 | |||||||||
| لازم يكون اللاعب الأساسي في مباراة مرحلة الخطوبة هو ( العقل) الشباب والبنات اللي بتخرج بره الإطار الشرعي في فترة الخطوبة ويبدأوا يتعاملوا مع بعض بدون أي ضوابط ... الناس دي بتسيطر المشاعر والغريزة عليهم بشكل كامل. وبالتالي كل طرف مابيشوفش عيوب الطرف التاني بشكل موضوعي وبيكون مهتم بس بالمشاعر اللي كان نفسه يحس بيها. ..وبيحاول يتغاضى عن أي تفكير منطقي ممكن يخرجه من الحالة اللي هو عايشها وتلاقي كل واحد فيهم بعد الجواز يشتكي ان الطرف التاني أتغير ...لا يا ريس ...محدش أتغير... بس الناس مكنتش عارفة بعض فعلا..... خلاص.. ذهبت السكرة وجاءت الفكرة عشان كده الشرع حط ضوابط لفترة الخطوبة لتحجيم المشاعر علشان العقل ياخد حقه في الحركة. طبعا ده مش معناه ان الناس تكشر في وش بعض وانها تعامل بعض بجفاء . لكن ده مش معناه ان الناس تقول كلام الحب الصريح براحتها وانها تلمس بعض براحتها.. .. وانها تخلوا ببعض براحتها...وان البنت تلبس اللي هي عاوزاه قدام خطيبها. المطلوب من المخطوبين في فترة الخطوبة ان كل واحد فيهم يدرس التاني بشكل جيد...وانهم يأسسوا لبيتهم الجديد ... والكلام ده مش هيحصل لو الناس مغيبة عقلها في الفترة دي ومطلوب منهم كمان انهم يعززوا مشاعر الألفة والود بينهم... ولكن بشكل عفيف ... بشكل لا يذهب العقل. | |||||||||
| ŢαŢμαŊα likes this. |
|
10-09-21, 10:25 AM
| #873 | |||||||||
| من ردود الفعل الغبية اللي ممكن تتاخد بعد أي خناقة بين أي زوج وزوجة ....إن حد فيهم يكتب كلام ع السوشيال ميديا يلقح بيه علي شريك حياته. الموضوع ده رغم تفاهته في الظاهر.... الا انه بيعقد المشكلة فعلا..... ليه؟ اولا .... حتى لو الكلام المكتوب كلام عام ومن غير تفاصيل ومجرد عبارات بتعبر فيها عن شئ من الألم والحزن نتيجة المشكلة ....لكن طبعا في ناس بتفهم ان في مشكلة بينك وبين شريك حياتك.... وده بينقل المشكلة من السر للعلن.... وده طبعا بيضايق شريك حياتك وممكن يصعّب تجاوز المشكلة. ثانيا.... أحيانا الكلام المكتوب بيكون فيه مبالغات نتيجة إستخدام عبارات بلاغية مش في محلها.... وده طبعا بيجرح شريك حياتك. ثالثا....احيانا في ناس لطيفة بتخش في الكومنتات بتخرب الدنيا ... يا أما عن جهل او شماته. انا متفهم أن في اوقات الواحد مابيعرفش يواجه شريك حياته بالحاجات اللي مضايقاه بسبب الاحراج من المواجهة .. او الخوف من إن المواجهة ممكن تعمل صدام ..... وساعتها أحيانا الرسائل ممكن تكون مفيدة.... بس وقتها الافضل اننا نخلي الرسائل دي في الانبوكس... ومفيش داعي للتلقيح ع السوشيال ميديا | |||||||||
| ŢαŢμαŊα likes this. |
|
10-09-21, 10:25 AM
| #874 | |||||||||
| في حتة نفسية كدا عند أي ست (مهما كان سنها) لازم الراجل يفهمها ... إن الست جواها طفلة صغيرة ... الطفلة ده بتظهر أحيانا وبشكل مش متوقع يعني زوجتك اللي ممكن تديك كل الدهب بتاعها في وقت زنقتك ...هي هي نفس الانسانة اللي ممكن تطلب منك إنك تشتري ليها طلب يبدو أنه تافه في وقت انت مزنوق فيه وتزن عليه زي الطفل الصغير زوجتك اللي انت متعود إنها بتستحمل أحداث صعبة جدا ... ممكن تلاقيها بتعيط وزعلانة وبتتشحتف على كلمة صغيرة انت ماتقصدش بيها حاجة وحشة خطيبتك اللي وافقت على انها تعيش معاك في شقة صغيرة وعفش متواضع وهي راضية ومبسوطة ... ممكن تلح عليك تجيب لها قطعة ديكور كده مالهاش اي تلاتين لازمة الست جواها طفل صغير ... والست اللي انت متعود ومتوقع إنها تكون راسية وعاقلة وصبورة ... ممكن تتفاجأ إنها بتتصرف زي الطفل الصغير أحيانا .. وتلاقيها بتفرح جدا بحاجة بسيطة ... او تلاقيها بتعيط وبتدبدب ع الارض على حاجة بسيطة برضه عشان كده مش صح اننا نعاملها بالمنطق في كل موقف ... وده مش معناه إنك لازم توافق على كل طلباتها .. لكن احيانا هي بتبقى محتاجة إننا نراضيها ونحايلها ونتفهم مشاعرها الطفولية زي ما بنعمل مع أطفالنا . ويمكن الطفلة الصغيرة اللي جواها دي .. هي من احلى الحاجات اللي بتميزهم عننا معشر الرجال ... وخصوصا لو الراجل احسن التعامل معاها | |||||||||
| |
|
10-09-21, 10:27 AM
| #875 | |||||||||
| في أحد الجلسات ... قعدت مع كل واحد لوحده عشان اسمع رؤيته للمشكلة اللي بيمر بيها البيت من ضمن الكلام اللي قاله الزوج ( طموح مراتي مخليها طول الوقت بتجري ... دايما مشغولة ... بتحاول دايما تستغل وقتها عشان تعمل إنجاز ... ولما بقولها تعالي نقعد سوا شوية او نتكلم شوية .. بتحسسني إن وقتها بيضيع ) ... ولما راجعتها في النقطة دي قالت ان ده فعلا بيحصل دايما باسمع الشكوى دي من الزوجات ... لكن في الجلسة دي الوضع كان معكوس 🙃 النقطة دي بتدل على سوء فهم للعلاقات ...أحيانا بنحتاج نهدى الجري شوية ونهتم بالتفاصيل ... مش صح اننا نفضل نجري طول الوقت في الشغل وفي المشاكل ومع الولاد.. ونهمل التفاصيل النفسية الصغيرة في ناس كتير بيبقى الإنجاز عندهم معناه نتيجة مادية ملموسة .... يعني نجاح في الشغل ... او فلوس اكتر ... او شهادة بياخدوها الاولاد ... او نجاح في إختبار معين .. وبس.. وده مش صح الحقيقة ان القرب في حد ذاته إنجاز ... الونس إنجاز.... الطمأنينة إنجاز ... الاحتواء إنجاز ... إننا نسمع ونتسمع انجاز الاهتمام بالتفاصيل الصغيرة مع الناس اللي حوالينا بيخلي الانجازات الكبيرة ليها معنى ... وفقدانها ممكن يضيع طعمها. طبعا هايعدي علينا وقت هانكون مشغولين جدا ... لكن ماينفعش يكون ده رتم حياتنا الطبيعي | |||||||||
| ŢαŢμαŊα likes this. |
|
10-09-21, 10:28 AM
| #876 | |||||||||
| مش شرط عشان علاقتك بحد تكون علاقة جميلة يبقي لازم تكونوا جنب بعض في كل وقت....وشبه بعض.. وبتعملوا كل حاجة سوا. أحيانا محاولة تطوير العلاقة عشان نوصلها لمرحلة الإحتكاك المستمر بيكون سبب في فقدان جمالها يعني في حد ممكن تكون علاقتك بيه جميلة رغم إنها في إطار الرسايل المكتوبة ( ع الواتس او الفيس مثلا) وفقط .. ويمكن لو قابلته ماتحسش بالدفا الموجود خلف الكلمات المكتوبة . وواحد تاني علاقتك بيه جميلة طول ماهي في إطار زمالة دراسة او شغل.... لكن ما تقدرش تدخله حياتك الشخصية وواحد تاني بتحب تقابله لما يكون عندك مشكلة وعاوز حد يفكر معاك ويدعمك نفسيا... بس مابتحبش تخرج تتفسح معاه .....عادي علي فكرة وواحد تاني بتاع الهجص والسرمحة... بتحب تقابله لما تكون عاوز تفسّي دماغك.... بس ملوش تلاتين لازمة في أي حاجة جد . وواحد تاني مخلصاتي.... ده بترجعله لما تكون مزنوق في مصلحة وعاوز حد ينجزهالك... بس يمكن ماتقدرش تستني منه دعم نفسي في مشكلة معينة. ماتحمّلش علاقتك بالناس فوق طاقتها عشان ماتضيعش حلاوتها. إستمتع بعلاقتك بالناس علي حسب المساحة المتاحة للتفاعل...لو عملت كده هتكتشف وقتها إن حواليك ناس كتير. | |||||||||
| ŢαŢμαŊα likes this. |
| إضافة رد |
| مواقع النشر (المفضلة) |
| |
 | أصدقاء منتدى مسك الغلا | | |||||
2613Likes
