| |||||||
| :: قرار هام :: |
2574Likes| إضافة رد |
| | LinkBack | أدوات الموضوع | انواع عرض الموضوع |
| |||||||
| :: قرار هام :: |
| إضافة رد |
| | LinkBack | أدوات الموضوع | انواع عرض الموضوع |
10-22-21, 11:13 AM
| #949 | |||||||||
 
|  قبل الجواز ... وإحنا في بيوت أهالينا... كل واحد فينا بيشوف تصرفات كتير مابتعجيبوش ... ممكن بتبقي مش راضي عن الطريقة اللي بيتعامل بيها والدك ووالدتك مع بعض.. أو الطريقة اللي بيتعامل بيها والدك أو والدتك معاك أو مع أخواتك اللي مليانة ضرب وخناقات . وكل واحد فينا يقول (أنا أول ما اتجوز ويكون عندي بيت مستقل ..أكيد هعامل شريك حياتي بشكل مختلف ... وأكيد هعامل أولادي بأسلوب إيجابي ومش ممكن أبدا هضربهم ) الغريب بقي لما بنتجوز ونخلف عيال ... بنكرر كل الأخطاء اللي كنا بنشوفها في بيت أهالينا رغم رفضنا ليها.. عارفين ليه ؟ عشان لما قابلتنا مشكلة مع شريك حياتنا أو مع أولادنا ... مكناش عارفين الطريقة السليمة للتصرف في الموقف... فعقلنا إستدعي رد الفعل اللي إتربي عليه في بيت أهالينا . فلما لقيت إبنك أو بنتك عمل حاجة غلط .. خسيت أنك قليل الحيلة... وملقتش حل غير إنك تضربه ... رغم إنك كنت رافض الضرب .. بس إنت ماتعرفش غيره.. ولما حصلت مشكلة بينك وبين شريك حياتك .. لجأت للزعيق والإهانة ...رغم إنك رافض ده .. بس ده لأنك ماتعرفش غير كده. الحل إنك تتعلم ازاي تعامل شريك حياتك بشكل سليم ... وإزاي تربي أولادك بشكل سليم ... ومتكابرش وتقول أهلنا إتجوزوا وخلفوا وربّوا من غير دورات ولا كتب ولا هرس. إنت عارف كويس إن إحنا أصلا معظمنا مترباش وبيوتنا مليانة مشاكل وكلاكيع ..وإحصائيات الطلاق وعدد المرضي النفسيين وحالة التدني المجتمعي مش محتاجة نقاش. روح إحضر دورة أو إقرا كتاب ... وإعرف ازاي ندير حياتنا ونحل مشاكلنا .. وحاول تنفذ ... وأغلط وصلّح وحاول تاني ...ولو معملناش كده هتلاقي نفسك بعد 20 سنة نسخة طبق الأصل من النموذج اللي انت كنت كارهه وبتهرب منه. | |||||||||
 |
|
10-22-21, 11:15 AM
| #950 | |||||||||
| عارف يعني إيه يكون عندك طفل ( ولد او بنت) شخصيته قوية. - يعني بيقول ( لا ) كتير. - يعني لازم تناقشه وتقنعه. - يعني واثق في رأيه وبيكوٓن المخزون المعرفي بتاعه بنفسه ..وكلامك مش دايما مرجعية معرفية ليه... ومعندوش حاجة أسمها ( هو كده) - بيتحرك بالتحفيز ...والتأنيب والعقاب الكتير مابيكلش معاه وبيحوله لكائن غبي. - بيتلامض مع الناس... وممكن يحطك في مواقف محرجة معاهم. طبعا الكلام ده مرهق جدا لينا كآباء ....لأننا بنحب الطفل الكيوت اللي بيسمع الكلام اللي مش بيحتاج مناهدة كتير. فلو ربنا رزقك بطفل قوي الشخصية ....لو عاملته صح ( وده مرهق جدا) هتكسب شخصية مميزة. ولو حاولت تطوعه وتحطه في القالب اللي انت عاوزه بالعافية .... هتكسره وهتخسره | |||||||||
| |
|
10-22-21, 11:16 AM
| #951 | |||||||||
| وانت بتتفرج مع ولادك علي كارتون او فيلم او مسلسل في التليفزيون .... ماينفعش يعدي مشهد فيه حاجة سلبية وتعديها كده. يعني لو بتتفرج مع طفلك اللي عنده ٤ أو ٥ أو ٦ سنين علي مشهد فيه حد بيسرق حاجة او بيكدب او بيأذي حد أو بيتطاول علي أبوه وأمه أو بيشتم ....إسأله ( ينفع حد يسرق ؟).... أو (ينفع كده نكدب؟)....( ينفع كده نزعق لماما ؟) ...في الغالب هيتفاعل معاك و هيرد عليك ويقولك ( لا طبعا) . ولو قاعد مع بنتك اللي علي مشارف سن البلوغ وبتتفرجوا علي فيلم او كارتون البطلة فيه بتخرج من غير حجاب او عايشة حياتها من غير ضوابط .. لازم تقول كومنت كده ان البنت لازم تلبس الحجاب وهي بره البيت او مينفعش يكون عندها صحاب ولاد وهكذا.. الموضوع ده مهم .... لأنك بالشكل ده بتنقذ إبنك او بنتك من ترسيخ أي قيم سلبية في العقل اللاواعي وبتحافظ علي القيم اللي انت بتحاول تزرعها من فترة. إنت مش متخيل كم المصايب اللي ممكن يتعلمها طفلك لما بتتخلص منه وتزرعه قصاد التليفزيون عشان ينزل من علي دماغك للأسف .... لا يخلو فيلم او مسلسل ( مهما كان محترم) او حتي كارتون من مشاهد سلبية ....وتأثير المواد المرئية (سلبي او إيجابي) أكبر بكتير من ١٠٠ نصيحة و١٠٠ محاضرة. عشان كده لازم نحاول نقلل المشاهدة العشوائية علي التليفزيون وإستبدالها بحاجات مختارة من الانترنت.... ولكن لو حصل وولادنا شافوا حاجة سلبية في التليفزيون في البيت او عند بيت حد تاني.... وقتها مهم إنك ترمي تعليق في النص عشان تحميهم من محاولات الهدم اللي ممكن تأثر عليهم | |||||||||
| |
|
10-22-21, 11:17 AM
| #952 | |||||||||
| المجد لكل زوجة بتسمع لفضفضة زوجها بودان الصديقة. في ستات كده لما جوزها يحكيلها مشكلة عنده في الشغل مثلا. ..هي بقي تسيب القصة اللي الحزين عمال يحكيها من الصبح وتمسك في تفصيلة في النص إستنتجت منها إنه معجب بواحدة زميلته في الشغل.... وهوووب تدب معاه خناقة. وطبعا البرنس يحرّم يتكلم معاها في أي حاجة تاني.. لو إنتي عاوزة جوزك يحكيلك مشاكله ويرجع آخر الليل يحط راسه علي كتفك ويفضفض باللي جواه... لو سمحتي إركني الروح الشريرة بتاعة الست المصرية الأصيلة وإسمعيه كويس وتفاعلي معاه...وإحتفظي بكل التفاصيل اللي مش عجباكي. ولما يفوق شوية كده... إستدعي الروح الشريرة وطلعي عينه | |||||||||
| |
|
10-22-21, 11:18 AM
| #953 | |||||||||
| من اكبر المصايب اللي ممكن نعملها في حق ولادنا ... اننا نتعامل معاهم علي أساس انهم واجهة وممثلين ( representatives) لينا .... وان أي سلوك سلبي يصدر منهم قصاد الناس بنفترض ان صادر مننا احنا شخصيا و انه فضيحة وبيخلي شكلنا وحش . وده بيخلينا واحنا بنعدل سلوكهم ....بيبقي عينينا علي منظرنا قصاد الناس . وبالتالي رد الفعل ممكن يكون اكبر من الغلط ومبالغ فيه .... لانه في الحقيقة رد فعل ناتج عن محاولة الدفاع عن نفسنا وعن منظرنا اللي باظ .... فبيكون رد الفعل فيه في شكل من أشكال الانتقام من الطفل اللي كان السبب في الاحراج ده.... وبدل ما نعدل سلوكهم بنصب غضبنا عليهم.... وبنبقي عاوزين نتيجة فورية لأوامرنا عشان نخرج من الإحراج اللي إحنا فيه. ايوة... احنا مسئولين عن تربية ولادنا وسلوكهم... ولكن هما في النهاية أطفال ... ممكن يقولوا كلام مش صح... ممكن يعندوا... ممكن يكسروا حاجة.... ممكن يحكوا حاجة المفروض ماتتحكيش.... ممكن يتحانقوا مع أقرانهم... ممكن يوسخوا هدومهم. يعني لما ابنك يعمل حاجة غلط...المطلوب منك تتجاهل نظرة الناس ....وإسأل نفسك هل المفروض أسكت دلوقتي واتناقش معاه بعدين .... ولا لازم آخد رد فعل دلوقتي وإيه هو رد الفعل؟ .... ولا أتجاهل الموضوع خالص ؟ يعني لما إبنك ياخد لعبة بتاعت صاحبه من غير مايقوله... فهّمه ان ده غلط وخليه يرجعها له ويعتذرله حتي لو الموقف ده هيخلي شكله مش كويس قصاد صاحبه وأهله. لما بنتك تعيط وتصرخ قصاد الناس عشان عاوزة تشتري حاجة كان في إتفاق بينكم إنها ممنوعة.... أوعي ترضخ لعياطها حتي لو ده هيخلي شكلكم وحش قصاد الناس... وحاول تحل الموضوع وأخلق بدايل من غير ما ترجع في إتفاقك معاها . طب إفرض ان إبنك بيعمل حاجة بتأذي الناس فعلا.... يعني بيتشاقي جدا وبيتنطط وبيكسر في بيت قرايبكم وانتوا بتزروهم... او عامل دوشة في المسجد وبيشوش جامد علي المصلين .... او مستقوي علي الولاد اللي اصغر منه وممكن يعٓوّر حد فيهم . أوعي تهينه وتكسره عشان هو حطك في موقف محرج.... المطلوب منك انك تبقي حازم معاه جدا ( بدون غضب) عشان تحد من تصرفه .... وخده علي جنب وأتكلم معاه وإستخدم معاه الترغيب والترهيب ... ولو مفيش إستجابة انصرف فورا من المكان ... وفكر ازاي تعدل من سلوكه ( وده موضوع نتكلم فيه بعدين). الخلاصة ... تربية ولادنا أهم من نظرة الناس لينا. | |||||||||
| |
|
10-22-21, 11:19 AM
| #954 | |||||||||
| من ردود الفعل السيئة اللي ممكن تتاخد بعد أي خناقة بين أي زوج وزوجة ....إن حد فيهم يكتب كلام ع الفيس بوك يلقح بيه علي شريك حياته. الموضوع ده رغم تفاهته في الظاهر.... الا انه بيعقد المشكلة فعلا..... ليه؟ اولا .... حتي لو الكلام المكتوب كلام عام ومن غير تفاصيل ومجرد عبارات بتعبر فيها عن شئ من الألم والحزن نتيجة المشكلة ....لكن طبعا في ناس بتفهم ان في مشكلة بينك وبين شريك حياتك.... وده بينقل المشكلة من السر للعلن.... وده طبعا بيضايق شريك حياتك وممكن يصعب تجاوز المشكلة. ثانيا.... أحيانا الكلام المكتوب بيكون فيه مبالغات نتيجة إستخدام عبارات بلاغية مش في محلها.... وده طبعا بيجرح شريك حياتك. ثالثا....احيانا في ناس لطيفة بتخش في الكومنتات بتخرب الدنيا ... يا أما عن جهل او شماته. انا متفهم أن في اوقات الواحد مابيعرفش يواجه شريك حياته بالحاجات اللي مضايقاه بسبب الاحراج من المواجهة أو أن الكلام المباشر مش جايب نتيجة.... وساعتها الرسائل الغير مباشرة ممكن تكون مفيدة.... بس الافضل اننا نخلي الرسائل دي في الانبوكس أحسن.... وانا بانصح بعدم إستخدام التلقيح علي مواقع التواصل الاجتماعي. | |||||||||
| الدكتورة likes this. |
| إضافة رد |
| مواقع النشر (المفضلة) |
| |
 | أصدقاء منتدى مسك الغلا | | |||||
